Aktgjykimi i Gjykatës Speciale ndaj ish-drejtuesve të Ushtrisë Çlirimtare të Kosovës ka hapur një kapitull të ri politik për Kosovën. Vendimi i 16 shtatorit 2026 për Hashim Thaçin, Kadri Veselin, Rexhep Selimin dhe Jakup Krasniqin pritet të ndikojë jo vetëm në fatin e tyre, por edhe në pozicionimin e partive politike dhe në funksionimin e institucioneve të vendit.

Profesori Enver Bytyçi, në një prononcim për “Bota sot”, tha se aktgjykimi i Hagës e ka vendosur politikën kosovare përballë një realiteti të ri, ku partitë duhet të rishikojnë qëndrimet dhe strategjitë e tyre.

Sipas tij, Partia Demokratike e Kosovës dhe Aleanca për Ardhmërinë e Kosovës, si subjekte politike të dala nga lufta, nuk mund të vazhdojnë të mbështeten te pritja për kthimin e Hashim Thaçit si kusht për rikthimin e tyre në pushtet.

Bytyçi vlerësoi se shpresa për lirimin e ish-presidentit ka krijuar pasiguri dhe i ka nxitur PDK-në e AAK-në të vijojnë bllokimin e institucioneve. Ai kërkoi që këto dy parti të bashkëpunojnë me Vetëvendosjen dhe LDK-në për krijimin sa më të shpejtë të institucioneve të Kosovës.

Profesori paralajmëroi se mungesa e institucioneve e vë një shtet në rrezik edhe më të madh se një vend nën diktaturë, ndërsa e cilësoi anarkinë si armikun më të madh të njerëzimit. Për këtë arsye, ai pret kompromis, mirëkuptim, bashkëpunim dhe unitet mes forcave politike në çështjet që lidhen me interesat themelore të shtetit dhe vendit.

Bytyçi u ndal edhe te përmbajtja e vendimit të Gjykatës Speciale, të cilin e përshkroi si një goditje për mënyrën se si Kosova është qeverisur nga çlirimi i saj deri në ngritjen e aktakuzës ndaj katër ish-komandantëve të UÇK-së. Ai i konsideroi disproporcionale dhe jo logjike masat e dënimit, duke theksuar se Hashim Thaçi dhe Jakup Krasniqi nuk duhej të merrnin të njëjtin dënim.

Sipas tij, para ish-krerëve të UÇK-së në bankën e të akuzuarve do të duhej të ishin disa ish-drejtues të Partisë Socialiste dhe të institucioneve të Tiranës, mes tyre edhe Fatos Klosi. Bytyçi pretendon se vrasja e Behadin Hallaqit kishte ndodhur nën këshillat e Klosit, me synimin për forcimin e autoritetit, kontrollin e gjithçkaje në UÇK dhe marrjen e pushtetit.

Megjithatë, ai tha se nuk dëshiron të ndalet gjatë në këtë pjesë dhe përsëriti se dënimet e dhëna ishin të rënda dhe, sipas tij, të pamerituara në atë masë. Profesori pret që Gjykata e Apelit të ulë dënimet dhe të sjellë një panoramë tjetër të çështjes.

Bytyçi solli si shembull rastet e trajtuara nga Gjykata Ndërkombëtare e Krimeve të Luftës në ish-Jugosllavi, duke përmendur Kotovinën e Kroacisë, i cili u dënua në shkallën e parë, por më pas u shpall i pafajshëm në Apel. Megjithatë, ai theksoi se nuk duhet pritur pafajësi e plotë, pasi gjykata ka provuar se një ose disa prej të akuzuarve kanë marrë pjesë në ekzekutime fizike.

Një tjetër element që, sipas profesorit, duhet të merret parasysh është rrëzimi i akuzës për krime kundër njerëzimit. Ai e sheh këtë si dëshmi se UÇK-ja ishte një lëvizje kryengritëse legjitime dhe se vendimet e dhëna nuk e zhbëjnë luftën e shqiptarëve për liri.

Bytyçi nënvizoi gjithashtu se përgjegjësia është përcaktuar si individuale dhe se në proces është pranuar që krijimi i UÇK-së ishte një nevojë e domosdoshme e shkaktuar nga regjimi i Millosheviçit.

Vendimi i Hagës, sipas tij, duhet të sjellë ndryshim edhe në mënyrën se si klasa politike e Kosovës i qaset Serbisë. Ai kërkoi që të gjitha partitë të mbajnë një qëndrim të përbashkët dhe deklaroi se opozita duhet të kuptojë se më nuk funksionojnë ndërmjetësues si Grenelli apo persona të tjerë të ngjashëm, të cilët, sipas tij, mund të bëhen të rrezikshëm për interesat e Kosovës kur tejkalojnë kufijtë në mbështetje të politikave serbe.

Profesori argumentoi se marrëdhënia me Serbinë ka hyrë në një fazë të re dhe se ka ardhur koha që politika kosovare të bashkohet rreth vendosjes së një kufiri përfundimtar ndaj saj. Ai e cilësoi dialogun e imponuar nga administrata Obama si shkak që solli Gjykatën Speciale dhe zhvillime të tjera që, sipas tij, e kanë dëmtuar Kosovën.

Bytyçi tha se nuk mund të ketë dialog me Serbinë për sa kohë ajo synon të përfitojë pa e njohur shtetin e Kosovës. Sipas tij, bisedimet mund të zhvillohen vetëm pas njohjes dhe vendimi për këtë qasje duhet të merret bashkërisht nga të gjithë politikanët e Kosovës.

Duke analizuar zhvillimet politike pas vitit 2013, profesori tha se Kosova është përçarë dhe fragmentarizuar më shumë se në çdo periudhë tjetër. Ai e lidhi këtë proces me marrëveshjen e parë mes Hashim Thaçit dhe Ivica Daçiqit, të nënshkruar më 19 prill 2013.

Sipas Bytyçit, në vend që dallimet të anashkaloheshin, ato u thelluan dhe u kthyen në ndarje të mëdha mes forcave politike dhe brenda vetë partive. Ai e lidhi këtë periudhë edhe me ardhjen në pushtet të Edi Ramës në Shqipëri, duke e akuzuar kryeministrin shqiptar se nuk e bashkoi klasën politike të Kosovës, por ndikoi në përçarjen e saj.

Ai përmendi faktin se, gjatë vizitave të para në Prishtinë, Rama nuk takonte homologun e tij Isa Mustafa, si dhe konfliktin publik me ish-kryeministrin Ramush Haradinaj. Më tej, Bytyçi iu referua edhe përplasjes gjashtëvjeçare me Albin Kurtin.

Profesori tha se shumë persona ia atribuojnë Kurtit përgjegjësinë për ndarjet politike, por sipas tij, Rama nuk është përplasur vetëm me të. Bytyçi e shpjegoi këtë me qëndrimin që, sipas tij, Edi Rama ka mbajtur në favor të Serbisë sa herë është diskutuar çështja e Kosovës.

Për këtë arsye, ai kërkoi ndalimin e dialogut me Serbinë, duke e cilësuar të papranueshme që Serbia të ketë dy karrige në tryezën e bisedimeve, ndërsa Kosova vetëm një. Sipas tij, karrigia e dytë, e padukshme, e Serbisë në dialog është ajo e Edi Ramës.

Si hap të parë pas këtij zhvillimi, Bytyçi sugjeroi arritjen e një konsensusi për zgjedhjen e presidentit të Kosovës. Ai tha se një marrëveshje e tillë do të ishte një mesazh i rëndësishëm për stabilitetin e vendit, në një kohë kur, sipas tij, Serbia ka pritur krijimin e një gjendjeje lufte në Kosovë.

Hapi i dytë, sipas profesorit, duhet të jetë përcaktimi i dy ose tre parimeve si kushte për marrëdhëniet e ngushta me Shqipërinë. Në këtë kuadër, ai përmendi dënimin e gjenocidit serb në Kosovë, kushtëzimin e marrëdhënieve të Shqipërisë me Serbinë nga interesat e Kosovës dhe bashkërendimin e qëndrimeve në marrëdhëniet ndërkombëtare.

Bytyçi kritikoi situatën aktuale, ku, sipas tij, Kosova angazhohet për sigurimin e njohjeve, ndërsa kryeministri i Shqipërisë u kërkon ambasadorëve të tij të punojnë kundër tyre, për shkak të ideve që ai i cilëson si zgjidhje në favor të Serbisë, përfshirë Jugosllavinë e Re apo ndarjen e Kosovës. Këto qëndrime ai i bëri për “Bota sot”.

The post Bytyçi: PDK-ja dhe AAK-ja nuk duhet të presin më rikthimin e Thaçit, kërkohet bashkëpunim politik pas vendimit të Hagës appeared first on Albeu.com.

Vendimi i KFOR-it për ta zhvendosur gradualisht praninë e përhershme nga Ura e Ibrit në Mitrovicë, së bashku me përfshirjen hap pas hapi të Policisë së Kosovës në strukturën e sigurisë së KFOR-it në Manastirin e Deçanit, ka nxitur debat për rolin në rritje të institucioneve vendore në garantimin e sigurisë në të gjithë territorin e vendit.

KFOR-i dhe NATO i kanë ndërlidhur këta dy hapa me përmirësimin e gjendjes së sigurisë në Kosovë. Zhvillimet po interpretohen gjithashtu si tregues i besimit më të madh në aftësitë e institucioneve vendore, në veçanti të Policisë së Kosovës. Ndërkohë që Beogradi ka reaguar ndaj vendimit, në Kosovë është hapur diskutimi nëse ai përfaqëson sukses politik të qeverisë së tanishme apo përparim institucional në dobi të shtetit.

Për këto çështje, profesori Enver Bytyçi dha një prononcim për “Bota sot”, duke i cilësuar vendimet për Urën e Ibrit dhe Manastirin e Deçanit si dëshmi të rritjes së sigurisë dhe të besimit të NATO-s ndaj Policisë së Kosovës.

Në vlerësimin e tij, rëndësia e këtyre zhvillimeve nuk kufizohet vetëm te siguria. Ato kanë edhe peshë politike, sepse tregojnë se institucionet kosovare i kanë shtuar kapacitetet për ruajtjen e rendit dhe të stabilitetit.

Bytyçi tha se gjatë ditëve të fundit kanë ndodhur dy ngjarje: KFOR-i ka bërë të ditur se përgjegjësitë për Urën e Ibrit po i kalojnë Policisë së Kosovës, ndërsa kësaj të fundit po i jepet edhe e drejta për të garantuar normalitetin në Manastirin e Deçanit. Sipas tij, të dy vendimet mbështeten te përmirësimi i situatës së sigurisë. Ai pretendoi se mediet dhe opozita në Kosovë i kanë shpërfillur dhe heshtur këto zhvillime, të cilat, sipas tij, u lanë në hije nga veprimet destruktive dhe anarkiste në Kuvendin e Kosovës.

Profesori argumentoi se vendimet nuk erdhën rastësisht, por janë fryt i një procesi të vazhdueshëm të fuqizimit të institucioneve të Kosovës dhe i shtimit të besimit ndërkombëtar tek ato. Për Bytyçin, bartja graduale e disa detyrave nga KFOR-i te Policia e Kosovës dëshmon se institucionet vendore mund të marrin përsipër përgjegjësi gjithnjë e më të mëdha për sigurinë.

Ai u shpreh se Ura e Ibrit dhe Manastiri i Deçanit, si dy objekte me rëndësi të veçantë dhe me potencial për të shkaktuar pasiguri në Kosovë, do të kalonin një ditë në kompetencën e Policisë së Kosovës. Megjithatë, sipas tij, për këtë nevojiteshin siguri dhe garanci, të cilat KFOR-i dhe NATO tashmë vlerësojnë se ekzistojnë në Kosovë.

Bytyçi ia atribuoi arritjen deri në këtë pikë atyre që i quajti sjellje kokëforta të Albin Kurtit, të paraqitura vazhdimisht nga opozita si “katastrofë” për Kosovën. Sipas tij, zhvillimet e tanishme tregojnë se kjo “katastrofë” nuk ishte për Kosovën, por për Serbinë.

Duke iu referuar kritikave të presidentit serb Aleksandër Vuçiq ndaj vendimeve dhe komandantit të KFOR-it, profesori tha se reagimi i Beogradit tregon se këto masa prekin drejtpërdrejt interesat politike të Serbisë kundrejt Kosovës.

Sipas Bytyçit, Beogradi është zemëruar nga këto zhvillime shumë pozitive, pasi e kupton se nuk do të rikthehet më në Kosovë dhe nuk do të mund të marrë asnjë pjesë të territorit të saj. Ai shtoi se mesazhi për Beogradin është se NATO qëndron me Kosovën dhe nuk pranon partnerë “me njëqind fytyra” si Aleksandër Vuçiq.

Në interpretimin e tij, vendimet e KFOR-it sinjalizojnë qartë se institucionet e Kosovës po marrin një rol gjithnjë e më të madh në garantimin e sigurisë së vendit. Bytyçi vlerëson gjithashtu se fuqizimi i shtetit nuk mund të zhbëhet nga trysnitë politike që vijnë nga jashtë.

Profesori i konsideron këto zhvillime edhe si arritje politike të Qeverisë së Kosovës. Sipas tij, rritja e besimit ndaj Policisë së Kosovës dhe përmirësimi i gjendjes së sigurisë i legjitimojnë politikat e ndjekura nga kryeministri Albin Kurti.

Ai deklaroi se stabiliteti dhe siguria në Kosovë janë rezultat i hapave të guximshëm të kryeministrit Kurti, të ndërmarrë madje edhe në kundërshtim me këshillat e aleatëve. Në vlerësimin e Bytyçit, kjo jo vetëm që u jep legjitimitet veprimeve dhe politikave të sigurisë të kësaj qeverie, por ia shton asaj edhe autoritetin përballë qytetarëve të vendit.

Duke folur për qëndrimin e opozitës, Bytyçi pretendoi se një pjesë e saj kërkon të zvogëlojë rëndësinë e çdo rezultati pozitiv të qeverisë aktuale. Sipas tij, zhvillimet e fundit në siguri dobësojnë argumentet politike të opozitës kundër ekzekutivit.

Ai ngriti pyetjen se përse opozitarët shfaqen të pakënaqur nga ky zhvillim dhe dha si përgjigje pretendimin se ata kanë përgatitur një skenar destabilizimi dhe mobilizimi të qytetarëve në protesta kundër Qeverisë Kurti dhe politikave të saj. Bytyçi tha se vendosja e Urës së Ibrit dhe Manastirit të Deçanit nën mbikëqyrjen e Policisë së Kosovës ua rrëzon alibinë, planet dhe skenarin.

Megjithatë, profesori theksoi se bëhet fjalë për më shumë sesa suksesin e një partie ose qeverie. Sipas tij, këto hapa lidhen drejtpërdrejt me konsolidimin e shtetit të Kosovës dhe forcimin e institucioneve të tij.

Bytyçi tha se dy vendimet e NATO-s nuk janë të rastësishme, por pasqyrojnë aftësinë e institucioneve të Kosovës për ta ndërtuar shtetin dhe për të garantuar paqen e sigurinë si në Kosovë, ashtu edhe në rajon. Sipas tij, paqja dhe stabiliteti nuk sigurohen nga deklaratat oportuniste të Edi Ramës drejtuar Aleksandër Vuçiqit dhe as nga akuzat e tij për “nacionalizmin” e Prishtinës.

Ai argumentoi se garancia vjen nga politika aktive në mbrojtje të lirisë, pavarësisë, shtetësisë dhe sovranitetit të Kosovës, duke e cilësuar këtë si mësimin më të madh të këtyre zhvillimeve.

Në përfundim, Bytyçi kërkoi që shtimi i përgjegjësive të Policisë së Kosovës të vlerësohet nga politika si një përparim institucional në shërbim të shtetit, pavarësisht se cila forcë është në pushtet. Sipas tij, një opozitë e përgjegjshme duhet të përshëndesë çdo hap që forcon sigurinë dhe sovranitetin e Kosovës, edhe kur meritat i atribuohen qeverisë kundërshtare.

Enver Bytyçi e mbylli prononcimin për “Bota sot” duke e quajtur të turpshme sjelljen e sotme të opozitës në Kosovë dhe mungesën, sipas tij, të çfarëdo respekti nga ana e saj për sukseset e Qeverisë së Albin Kurtit.

The post Bytyçi: Kalimi gradual i përgjegjësive te Policia për Urën e Ibrit dhe Manastirin e Deçanit rrëzon skenarin e opozitës ndaj Kurtit appeared first on Albeu.com.

Në një reagim publik, Bytyçi ka drejtuar kritika edhe ndaj SPAK-ut, duke pretenduar se ky institucion nuk po funksionon më si mekanizëm i drejtësisë dhe se nuk po heton këto çështje.

Shkrimi i Bytyçit:

Në shkrimet e tij, diktatori shqiptar Enver Hoxha përmendte vazhdimisht dëshirat dhe urdhrat që kishte dhënë gjatë Luftës së Dytë Botërore, si edhe në periudhën e komunizmit, për eleminimin fizik të kundërshtarëve të tij politikë. Këto pasazhe në librat e tij paraqiteshin si mburrje për aktet kriminale që kishte kryer. Ai e pranonte hapur se likuidimi i kundërshtarëve politikë përbënte politikë thelbësore të qeverisjes dhe partisë së tij. Për këto deklarime, nëse do të ishte ende gjallë, ai mund të dënohej me burgim të përjetshëm. As dëshmitarë nuk do të duheshin. Ramiz Alia nuk e bëri këtë gafë!

Sot, sipas tij, është një diktator tjetër që ka nxjerrë me mburrje librin e krimeve të tij makabre kundër Shqipërisë. Edi Rama. Në librin “Albania Files”, i promovuar para disa muajsh, sipas tij paraqiten qartë të gjitha projektet anti-shqiptare të kryeministrit të Shqipërisë, të cilin arkitektët e shquar e pa moral të botës së sotme në Perendim e në Lindje e quanin “Mbret”! Madje, sipas tij, i kërkonin të shpallej president i përjetshëm, e pse jo edhe mbret.

Ndërsa diktatori Hoxha nuk jeton më për t’u përballur me burgun, ky diktatoruci i ditëve të sotme, sipas tij, vazhdon ende të mburret me krimet dhe tradhtitë e tij kundër Shqipërisë, Kosovës dhe kombit shqiptar. Kjo ndodh, sepse SPAK ka pushuar së qeni një instrument drejtësie.

The post Profesori Enver Bytyçi: Edi Rama po vepron si një diktator appeared first on Albeu.com.