Një ngarkesë e re me speca, me peshë 9.502 kilogramë dhe me origjinë nga Maqedonia e Veriut, do të shkatërrohet pasi analizat laboratorike në Bullgari evidentuan praninë e mbetjeve të pesticideve që tejkalojnë kufirin maksimal të lejuar. Për pasojë, specat nuk u lejuan të hyjnë as në tregun bullgar, as në rrjetin e shpërndarjes brenda Bashkimit Evropian.

Ky parregullsi u zbulua gjatë kontrolleve të përforcuara që u kryhen frutave dhe perimeve të freskëta të destinuara për tregun vendor.

Agjencia Bullgare për Sigurinë Ushqimore ka njoftuar se e gjithë sasia do të dërgohet për asgjësim.

Ky është incidenti i dytë i kësaj natyre i regjistruar në më pak se një muaj. Në gusht, inspektorët bllokuan një ngarkesë prej 11.6 tonësh, ku analizat treguan praninë e pesticidit formetanat në përqendrim që kapërcente kufirin e lejuar.

Me shtimin e 9.5 tonëve të rinj, totali i specave nga Maqedonia e Veriut që nuk kanë kaluar kontrollin për të dalë në treg ka kaluar tashmë 21 tonë. Agjencia bullgare thekson se bëhet fjalë për dy dërgesa krejtësisht të veçanta, të zbuluara në kuadër të inspektimeve të shtuara.

Për ngarkesën e re, për momentin nuk është bërë i ditur lloji i substancës aktive të zbuluar, as vlera e përqendrimit të matur në laborator dhe as se sa është tejkaluar norma e lejuar. Gjithashtu, mbeten të panjohura vendi konkret i prodhimit në Maqedoninë e Veriut, pika kufitare përmes së cilës ka hyrë malli, seria e prodhimit dhe data e marrjes së mostrave.

Mungesa e këtyre të dhënave e bën të pamundur përcaktimin nëse të dyja ngarkesat lidhen me të njëjtin prodhues, qendër grumbullimi apo rajon bujqësor. Po kështu, nuk mund të vlerësohet serioziteti i rrezikut për shëndetin, pasi nuk dihen lloji dhe niveli i saktë i pesticidit të matur në ngarkesën e fundit.

Nga ana tjetër, autoritetet kompetente në Maqedoninë e Veriut, si Agjencia e Ushqimit dhe Veterinarisë dhe Inspektorati Shtetëror i Bujqësisë, ende nuk kanë dhënë shpjegime mbi origjinën e ngarkesës së re apo pesticidin e identifikuar.

The post Speca nga Maqedonia e Veriut me pesticide: Bullgaria asgjëson 9.5 tonë, rasti i dytë në një muaj appeared first on Albeu.com.

Fermerët e Strumicës do të rikthehen në protestë pasi çmimi i specit “ajvarka” ka zbritur përsëri në 25 denarë për kilogram, ndonëse marrëveshja e arritur pas protestave parashikonte 30 denarë. “Shoqata vendore të rinjtë e Murtinos”, organizatore e protestave, ka njoftuar se tubimi i radhës do të mbahet nesër në orën 11, para objektit të Ministrisë së Bujqësisë në Strumicë.

Prodhuesit kërkojnë që në protestë të marrin pjesë edhe kryetarët e komunave të Strumicës dhe zonave përreth. Ata i bëjnë thirrje gjithashtu kryeministrit Hristijan Mickoski që të zhvillojë, siç shprehen ata, një “ekskursion deri në Strumicë”.

Fermerët i drejtohen ministrit të Bujqësisë, Borçe Serafimovski, duke i kërkuar një “këshillë magjik” se si mund ta përballojnë dimrin pa subvencione të paguara dhe njëkohësisht të sigurojnë përgatitjet për mbjelljet e sezonit të ardhshëm.

Dy javë më parë, kultivuesit e specit “ajvarka” në Strumicë organizuan disa protesta, gjatë të cilave bllokuan kryqëzime të rëndësishme në rajon, si dhe zhvilluan një bllokadë para njësisë së Ministrisë së Bujqësisë në Strumicë. Pas ndërmjetësimit të ministrit Borçe Serafimovski me blerësit dhe tregtarët, fermerët u njoftuan se çmimet do të rriteshin me pesë denarë.

Sipas marrëveshjes, speci i klasës së parë, “kurtovska kapija”, do të blihej me 40 denarë, klasa e parë-dytë me 30 denarë, klasa industriale me 30 denarë, ndërsa “shkart” do të paguhej 15 denarë. Meqë rreth 80 për qind e prodhimit blihej si klasë industriale me 25 denarë, rritja për këtë kategori ishte pesë denarë për kilogram.

Fermerët thonë se për pesë ditë nuk kanë bërë deklarata publike, ndërsa kanë vijuar komunikimin me ministrin e Bujqësisë, Borçe Serafimovski. Sipas tyre, autoritetet janë informuar për situatën, por marrëveshja nuk është zbatuar në terren dhe nuk kanë vërejtur angazhim serioz nga institucionet.

“Bujku është shtyrë në një sulm të organizuar nga disa fabrika ‘xhelatë’ që ia përcaktojnë fatin, ndërsa shteti dhe institucionet qëndrojnë si vëzhgues të heshtur duke luajtur të pafuqishëm, pa aktivizuar apo krijuar ndonjë mekanizëm të duhur për ta mbrojtur bujkun, njerëzit që ushqejnë këtë shtet. Fund!”, shkruajnë organizatorët, të cilët shprehen se ndihen të manipuluar, të nënvlerësuar dhe të revoltuar.

Pas marrëveshjes së arritur me blerësit dhe tregtarët, ministri Serafimovski kishte paralajmëruar kontrolle gjatë procesit të blerjes së specit “ajvarka”. Në terren shkoi drejtori i Inspektoratit Shtetëror për Bujqësi, Ivica Angelovski, së bashku me disa inspektorë shtetërorë, duke deklaruar se blerja po bëhej sipas marrëveshjes: 30 denarë për klasën e parë-dytë dhe për klasën industriale.

Sasia kryesore e grumbulluar dërgohet për përpunim te përpunuesit vendorë, ndërsa një pjesë eksportohet në Kroaci, Serbi, Bullgari dhe vende të tjera.

The post Çmimi i specave “ajvarka” zbret sërish në 25 denarë, fermerët e Strumicës paralajmërojnë protestë të re appeared first on Albeu.com.

Ekspertët ndërkombëtarë kanë paralajmëruar se vitin e ardhshëm mund të shfaqen vështirësi të mëdha në furnizimin me ushqime, si pasojë e mungesës së plehut artificial. Ndërsa për naftën ekzistojnë rezerva strategjike, për plehun një mundësi e tillë nuk është krijuar. Pa pleh nuk ka prodhimtari, ndërsa pa prodhimtari nuk mund të ketë ushqim. LSDM vlerëson se ky rrezik nuk është një skenar i largët, por një realitet që Maqedonia po e përjeton tashmë.

Sipas opozitës, bujqit vazhdojnë të negociojnë për çmime që mezi kompensojnë punën dhe shpenzimet e tyre. Problemi i grumbullimit të specit, thuhet në reagim, u trajtua vetëm pasi çështja u bë publike.

Mucunski më pas deklaroi se gjithçka po zhvillohej sipas pritjeve.

LSDM akuzon se situata përsërit të njëjtin model: fillimisht krijohet kaos, më pas arrihet një marrëveshje në minutën e fundit dhe në fund mbahet një konferencë për shtyp për të deklaruar se çështja është zgjidhur.

“Bujku që e ka siguruar prodhimin nuk jeton nga deklaratat. Të ardhurat e tij varen nga çmimi, afati i grumbullimit dhe pagesa”, shprehen nga LSDM.

Partia thekson se subvencionet ose vonohen, ose janë zvogëluar, ndërkohë që janë shtuar kostot për karburantin, farërat, plehun dhe ujitjen. Ajo pohon gjithashtu se qumështi blihet me çmime që nuk mbulojnë as shpenzimet themelore, se disa toka nuk po mbillen dhe se importi i ushqimeve po rritet.

LSDM e cilëson si paradoks faktin që shteti pretendon se bujqësia po shënon rritje, ndërsa në të njëjtën kohë varet gjithnjë e më shumë nga ushqimet e importuara. Sipas saj, kjo nuk përbën zhvillim, por dobësim të sigurisë ushqimore.

“Në një kohë kur bota diskuton për rezervat e plehut, në vendin tonë nuk ofrohet as mbrojtja minimale për sezonin e ardhshëm. Kush do ta blejë plehun nëse shteti i vonon pagesat? Kush do të mbjellë kur nuk dihet nëse prodhimi do të grumbullohet? Kush do të investojë në ujitje kur në një qytet uji është problem, ndërsa në rajone të tjera problematikë janë kanalet?”, pyet LSDM.

Sipas SDSM, qeveria e paraqet rritjen e çmimeve në treg si një sukses për bujqit. Megjithatë, qytetarët po paguajnë më shumë për specat, domatet dhe mollët, ndërsa prodhuesit vazhdojnë të luftojnë për 30 ose 40 denarë dhe për të mësuar nëse grumbulluesi do të paraqitet apo jo në ara.

“Kjo nuk është politikë, por transferim i barrës te prodhuesi dhe konsumatori. Në vend që të jemi liderë rajonalë në prodhimin e ushqimit, bujqit mezi po mbijetojnë. Maqedonia ka mundësi ta ushqejë rajonin, por me politikat e OBRM-PDUKM-së nuk do të kemi ushqim as për tryezat tona”, deklarojnë nga LSDM.

The post LSDM: Bujqësia në Maqedoni po zhytet në krizë, ndërsa fermerët luftojnë për mbijetesë appeared first on Albeu.com.

Protesta e blegtorëve para Qeverisë u zhvillua në një kohë kur përhapja e lisë te delet po shkakton shqetësim të madh. Sipas të dhënave të tyre, deri tani kanë ngordhur nga 7 deri në 10 mijë dele, ndërsa janë eliminuar 40 deri në 50 tufa.

Rritësit e deleve kërkojnë që vaksinat të sigurohen në kohë dhe që pronarët e prekur nga sëmundja të kompensohen për dëmet. Ata shprehen të alarmuar nga shfaqja e vazhdueshme e vatrave të reja, të cilat shtojnë rrezikun e përhapjes së infeksionit në tufa të tjera.

“Deri tani kemi mbi 50 vatra, kemi rreth 40-50 tufa të asgjësuara dhe rreth 40 familje kanë mbetur pa bukë, kanë mbetur në rrugë dhe nuk kanë me çfarë të merren. Këtu pas meje janë edhe një pjesë e atyre që u janë asgjësuar tufat dhe kërkojmë që sa më shpejt t’u paguhet, përkatësisht të dëmshpërblehen këta njerëz”, tha Naser Xhemaili, kryetar i Lidhjes së Rritësve të Deleve.

Blegtorët kundërshtojnë edhe skemën aktuale të dëmshpërblimit. Sipas tyre, pagesa prej 100 denarësh për kilogram nuk i afrohet vlerës së vërtetë të deleve.

Milena Veliçkoviq nga Lidhja e Rritësve të Deleve nga Kumanova deklaroi se deri tani mbrojtja e tufave po mbetet kryesisht në përgjegjësinë e vetë blegtorëve. Ajo kërkoi që shteti të ndërhyjë për të mbrojtur blegtorinë vendase.

Gjithashtu, blegtorët i kërkuan Qeverisë të marrë masa më të forta për ruajtjen e fondit blegtoral në vend, pasi kjo do të krijonte mundësi edhe për rritjen e eksportit të mishit të qengjit.

“Mendoj se prej më shumë se një muaji po negociohet lidhur me vaksinimin. Realisht, nuk kemi dëgjuar asnjë argument kundër vaksinimit, përse të mos i vaksinojmë. I vetmi argument për të mos e zbatuar vaksinimin është se po përpiqen të përballen me sëmundjen dhe për shkak se ndoshta Bashkimi Evropian mund të na vendosë ndalesë për eksportin”, deklaroi Milena Veliçkoviq, lidhja e rritësve të deleve “Modern Ovcar”.

Ministria e Bujqësisë, Pylltarisë dhe Ekonomisë së Ujërave njoftoi se, së bashku me Agjencinë për Ushqim dhe Veterinari, po e ndjek në vazhdimësi gjendjen epidemiologjike. Autoritetet u kanë bërë thirrje blegtorëve të mos kryejnë vaksinime vetë, pasi një veprim i tillë mund të pengojë monitorimin epidemiologjik dhe të shtojë rrezikun për tufat.

“Ministria dhe AUV-ja i paralajmërojnë blegtorët se sigurimi dhe përdorimi i pavarur i vaksinës, me shpenzime të tyre dhe pa miratim paraprak nga Agjencia, do të sanksionohet në përputhje me dispozitat në fuqi. Në një rast të tillë, pronari nuk do të ketë të drejtë për kompensim për kafshët e sëmura, as për dëmshpërblim për kafshët e asgjësuara për shkak të luftimit dhe çrrënjosjes së sëmundjes. Vaksinimin mund ta kryejnë vetëm shërbimet veterinare të autorizuara, nën mbikëqyrjen e drejtpërdrejtë të AUV-së”, thanë nga Ministria e Bujqësisë.

Sipas Ministrisë, Republika e Turqisë ka siguruar 500 mijë doza vaksinash në formën e donacionit dhe ato pritet të mbërrijnë gjatë këtyre ditëve. Ndërkohë, Komisionit Evropian i është dërguar kërkesë për vaksina shtesë. Përpara se të përdoren, dozat do t’u nënshtrohen analizave të detyrueshme laboratorike për të verifikuar sigurinë dhe pastërtinë e tyre. Fushata e vaksinimit do të nisë pasi të konfirmohen rezultatet dhe do të zbatohet sipas një plani zyrtar, nën mbikëqyrjen e AUV-së. /tv21

The post Blegtorët protestojnë para Qeverisë: Kërkojnë vaksinimin e deleve kundër lisë appeared first on Albeu.com.

Një sasi prej 11.6 tonësh speca të freskët është kthyer nga autoritetet bullgare në Maqedoninë e Veriut, pasi testet laboratorike konstatuan se prania e pesticidit formetanat tejkalonte kufirin e lejuar.

Ngarkesa kishte kaluar në territorin bullgar përmes pikës kufitare të Zlatarevos dhe do t’i dorëzohej një operatori tregtar në Petriç. Deri në daljen e rezultateve të analizave, specat u bllokuan dhe u ruajtën në një magazinë frigoriferike.

Pas përfundimit të testimeve, Agjencia Bullgare e Sigurisë Ushqimore vendosi që e gjithë sasia t’i kthehej furnizuesit. Sipas autoriteteve, produktet nuk kanë mbërritur në dyqanet apo tregjet e Bullgarisë.

Ende nuk janë publikuar të dhëna për zonën e Maqedonisë së Veriut nga ku vinin specat, ndërsa nuk dihen as identitetet e prodhuesit dhe eksportuesit. Ky verifikim zhvillohet në kuadër të kontrolleve të përforcuara që Bullgaria po ushtron ndaj frutave dhe perimeve të importuara nga Maqedonia, Kosova dhe Shqipëria.

The post Bullgaria rikthen në Maqedoninë e Veriut 11.6 tonë speca për nivel të lartë pesticidi appeared first on Albeu.com.

Kryeministri Hristijan Mickoski njoftoi se është gjetur një zgjidhje për situatën e krijuar me kultivuesit e specave dhe se grumbullimi i prodhimeve ka vijuar prej disa ditësh në përputhje me parashikimet.

Ai bëri të ditur se informacionet e përcjella nga ministri i Bujqësisë, Pylltarisë dhe Ekonomisë së Ujërave flasin për bisedime mes palëve, të zhvilluara me synim tejkalimin e problemit.

Mickoski deklaroi se Qeveria është në mbështetje të fermerëve dhe kërkesës së tyre për rritjen e çmimeve të blerjes së produkteve bujqësore. Sipas tij, puna e prodhuesve është zhvlerësuar nga grumbulluesit.

“Ne i mbështesim fermerët për çmime më të larta. Kur u thamë: ‘Hajde të protestojmë së bashku te grumbulluesit’, ata thanë jo. Na thanë se kjo nuk u përshtatet. Atëherë u thamë: nëse kjo nuk ju përshtatet juve, Qeveria nuk është grumbulluese”, deklaroi Mickoski.

Kryeministri sqaroi se fermerëve u ishte sugjeruar të organizonin protesta përpara grumbulluesve më të mëdhenj, së bashku me përfaqësues të Qeverisë dhe të pushtetit lokal, por prodhuesit nuk e kishin pranuar këtë propozim.

Sipas tij, blerja e specave po vijon aktualisht, ndërsa Qeveria do të vazhdojë të angazhohet për mbështetjen e fermerëve dhe për përmirësimin e kushteve në të cilat ata punojnë.

The post Mickoski: Çështja me prodhuesit e specave është zgjidhur appeared first on Albeu.com.

Bujqit nga Strumica vijuan edhe sot protestën e tyre, duke bllokuar qendrën e qytetit. Ata kërkojnë që speci i kuq të blihet me çmime më të larta dhe shprehen të revoltuar me atë që e konsiderojnë neglizhencë nga Ministria e Bujqësisë dhe kompanitë blerëse.

Speci i klasës ekstra, i cili eksportohet, aktualisht blihet për 40 denarë kilogrami, ndërsa çmimi për specin që dërgohet në përpunim është 25 denarë. Sipas bujqve, këto tarifa nuk mjaftojnë për të përballuar kostot e prodhimit.

Protestat nisën të enjten dhe fermerët kanë bërë të ditur se do t’i vijojnë bllokadat. Ata u kërkojnë institucioneve ndërhyrje të menjëhershme dhe vendosjen e çmimeve më të larta të blerjes. Me sezonin e grumbullimit ende në fazat e para, bujqit paralajmërojnë se mund të përballen me humbje edhe më të mëdha.

“Është për të ardhur keq dhe është e turpshme që në këto kushte të motit të luftosh. Toka digjet në atë diell, ndërsa ti mundohesh të prodhosh shumë mall, kurse ata duan të ta marrin pa para. Nuk mund të mbijetosh, e jo më të prodhosh ndonjë prodhim tjetër për vitin e ardhshëm”, tha një bujk./TV21/

The post Bllokadë në Strumicë, bujqit kërkojnë rritjen e çmimit të specit të kuq appeared first on Albeu.com.

Me traktorë dhe mjete të tjera bujqësore, fermerët e rajonit të Strumicës kanë paralizuar qendrën e qytetit. Protesta vjen si kundërshtim ndaj çmimit aktual të blerjes së specave të Kërtovskës, të cilët përdoren nga industria e konservimit dhe përpunimit.

Prodhuesit presin që ministri i Bujqësisë, Borçe Serafimovski, të ndërmarrë hapa konkretë pas takimit të zhvilluar një ditë më parë në Strumicë. Sipas tyre, ministri është shprehur i gatshëm t’i shqyrtojë kërkesat, por para se të marrë një vendim duhet të bisedojë me përfaqësuesit e kapaciteteve përpunuese. Aktualisht, këto kompani ofrojnë 25 denarë për një kilogram.

“Ministri na premtoi dje se do të angazhohet për gjetjen e një çmimi më të lartë blerjeje. Nëse nuk arrihet një vlerë e pranueshme, që të paktën të mbulojmë shpenzimet e prodhimit, nga e marta do të rikthehemi në protesta dhe bllokada”, deklaroi Aleksandar Grozdanov, përfaqësues i Shoqatës “Mladi Murtino”.

Protestat dhe bllokadat e fermerëve kanë hyrë tashmë në ditën e tretë. Kërkesa e tyre kryesore është që çmimi i blerjes të llogaritet mbi bazën e kostove reale të prodhimit.

Fermerët e konsiderojnë të pajustifikueshëm ndryshimin e çmimit krahasuar me vitin e kaluar. Speci i përzier i klasës së parë dhe të dytë, që dërgohej për përpunim në fabrikat e industrisë së konservimit, atëherë blihej për 35 deri në 40 denarë kilogrami, ndërsa këtë vit çmimi ka zbritur në 25 denarë.

Sipas prodhuesve, me shumën që u ofrohet aktualisht nuk mund të përballohen shpenzimet e prodhimit. Ata paralajmërojnë vijimin e protestave në rast se nuk ofrohet një zgjidhje konkrete.

Kërkesa e tyre është që institucionet dhe kompanitë përpunuese të zhvillojnë negociata dhe të caktojnë një çmim që u lejon fermerëve të mbulojnë kostot dhe të vijojnë aktivitetin e prodhimit.

The post Fermerët bllokojnë Strumicën, kërkojnë rritjen e çmimit të specave appeared first on Albeu.com.

Fermerët e rajonit të Strumicës kanë vazhduar edhe sot bllokadën, pasi ende nuk është gjetur një zgjidhje për çmimin me të cilin grumbullohen specat ajvarka.

Ata kërkojnë që prodhimi i klasës së parë të blihet me 50 denarë për kilogram.

Sipas kultivuesve, kushtet e tanishme të grumbullimit nuk u mundësojnë të mbulojnë lehtësisht kostot e prodhimit. Në këto shpenzime përfshihen materiali farëror, përpunimi i tokës, mbrojtja e kulturave, ujitja dhe pagesa e fuqisë punëtore.

Protesta e sotme është vijim i pakënaqësive të shfaqura gjatë periudhës së fundit nga bujqit e zonës së Strumicës. Prodhuesit këmbëngulin që çmimi i grumbullimit të caktohet në një nivel që garanton leverdi ekonomike për ta.

Speci ajvarka përbën një nga kulturat bujqësore më të rëndësishme në Strumicë, ndërsa periudha e grumbullimit është veçanërisht e rëndësishme për shumë familje fermere të këtij rajoni.

Bujqit paralajmërojnë se nuk do ta ndërpresin presionin pa marrë një përgjigje konkrete ndaj kërkesës së tyre, që klasa e parë të paguhet 50 denarë për kilogram.

The post Fermerët e Strumicës vijojnë bllokadat, kërkojnë 50 denarë për kilogram speca ajvarka appeared first on Albeu.com.

Ekzekutivi ka bërë të ditur miratimin e një vendimi që rregullon kushtet e përdorimit të fondeve të kompensimit. Linja ekzistuese e huasë, e menaxhuar nga Banka Zhvillimore, do të shërbejë për të siguruar kapitalin për blerjen e orizit të pa përpunuar dhe varietetit të rrushit për verë, Vranec.

“Këtë masë e marrim përpara se të nisë faza kryesore e grumbullimit, periudhë gjatë së cilës ndërmarrjet përballen me nevoja të larta financiare për sigurimin e lëndës së parë, të ardhurat nga shitja apo transformimi i së cilës vijnë në një fazë të mëvonshme”, thuhet në njoftim.

Objektivi i këtij instrumenti është vendosja e një baze të shëndoshë financiare, në mënyrë që procesi i blerjes të ecë pa vonesa dhe prodhimi i dorëzuar të shlyhet brenda afateve të përcaktuara. Për këtë qëllim, vihen në dispozicion burimet nga linja kreditore ekzistuese, si dhe likuiditetet e lira që administron Banka Zhvillimore. Vlera e përgjithshme e fondeve arrin në 793.481.723 denarë, shifër kjo që i korrespondon rreth 10,1 milionë eurove. Nga kjo shumë totale, 240 milionë denarë janë alokuar për sigurimin e orizit të pa përpunuar, ndërkohë që 553.481.723 denarë do të përdoren për blerjen e rrushit të verës të llojit Vranec.

Aplikimet për secilën nga këto dy ndarje do të shqyrtohen duke zbatuar parimin e radhës kronologjike të paraqitjes. Sipas rregullave, vlera maksimale e huasë për një subjekt që blen rrush Vranec shkon deri në 130 milionë denarë, ndërsa për orizin e pa përpunuar ky kufi është 30 milionë denarë.

Sa i përket afateve, kredia për orizin duhet të likuidohet brenda gjashtë muajve, ndërsa për rrushin ky afat shtrihet deri në nëntë muaj. Për të dyja linjat parashikohet një periudhë grejs prej tre muajsh, me pagesa të bëra me këste tremujore. Kushtet e financimit parashikojnë një normë interesi fikse prej 1% në vit, pa asnjë tarifë të menjëhershme për administrimin e kredisë, sqarojnë burimet zyrtare.

The post Mbi 10 milionë euro për grumbullimin e orizit dhe rrushit Vranec appeared first on Albeu.com.