Rreth 15 vjet më parë, Bugatti u bashkua me Königliche Porzellan-Manufaktur Berlin për të ndërtuar një Veyron Grand Sport të posaçëm.

Tipari që e veçonte atë veturë ishte pikërisht porcelani, ndërsa në bashkëpunimin më të ri mes prodhuesit të automobilave dhe KPM, i njëjti material del sërish në pah, kësaj here te Bugatti W16 Mistral Blanc Éternel, raporton Telegrafi.

Ky model është realizuar përmes programit të personalizimit Bugatti Sur Mesure dhe nuk përfaqëson vetëm një homazh për Mistral. Ai vjen edhe si një model unik që nderon motorin W16 të kësaj veture, të cilin Bugatti po e nxjerr gradualisht nga përdorimi.

Te W16 Mistral Blanc Éternel, porcelani është përdorur si në pjesën e jashtme, ashtu edhe në kabinë. Nga jashtë, ai shfaqet te emblemat EB, kapaku i karburantit dhe zbukurimet e motorit, ndërsa në brendësi është vendosur te ndërruesi i marsheve, mbulesat e altoparlantëve dhe mbështetëset e krahëve.

Dizajnerët e Bugatti-t e kanë pasqyruar të njëjtën qasje edhe në interier, duke i dhënë veturës një pamje sikur të ishte gati për një film të animuar. Mistral është modeli i fundit i Bugatti-t që përdor motorin e saj legjendar W16 me katër turbo dhe 8.0 litra. Pasuesi i tij është një V16 me aspirim natyral, 8.3 litra, që fuqizon Tourbillon-in, model i cili njëkohësisht është hibrid dhe ka tre motorë elektrikë. /Telegrafi/

The post Bugatti sjell krijimin e saj të fundit unik, të stolisur me porcelan të vërtetë appeared first on Albeu.com.