Temperaturat në rritje dhe punimet e korrjeve në fusha kanë bërë që zjarrfikësit në Tetovë të angazhohen më shpesh. Njësia Territoriale kundër Zjarrit kryen të paktën dhjetë ndërhyrje në ditë, ndërsa në 90 për qind të rasteve flakët shkaktohen nga bujqit që djegin mbetjet e arave pas korrjeve.

Shefi i NJTKZ-së në Tetovë, Avni Ameti, deklaroi se gjatë kësaj periudhe shënohet një numër i madh zjarresh, pasi bujqit, pas korrjes së grurit, u vënë flakën mbetjeve për të pastruar tokat. Sipas tij, vetëm zjarrfikësit e Tetovës realizojnë rreth dhjetë intervenime brenda një dite.

Ameti bëri të ditur se zjarrfikësit nuk mund të shfrytëzojnë pushimet gjatë kësaj kohe. Muaji i shtatë dhe ai i tetë konsiderohen “sezoni” i zjarreve, ndaj e gjithë ekipa duhet të qëndrojë mobile. Ai theksoi gjithashtu se mbështetje e madhe sigurohet nga nënstacionet në Tearcë dhe Bogovinë.

Përveç shuarjes së zjarreve, ekipet janë thirrur të ndërhyjnë edhe në raste që lidhen me zvarranikët. Avni Ameti tha se gjarpërinjtë janë hasur si brenda shtëpive, ashtu edhe në oborre, duke u bërë thirrje qytetarëve që të tregojnë kujdes. Megjithatë, ai sqaroi se gjarpërinjtë që gjenden në Pollog nuk paraqesin rrezik për jetën e njerëzve.

Gjatë ditëve të fundit, në repartin e kirurgjisë në Tetovë janë regjistruar dy raste të kafshimit nga gjarpërinjtë./Alsat/

The post Vapa dhe sezoni i korrjeve rrisin numrin e ndërhyrjeve të zjarrfikësve në Tetovë appeared first on Albeu.com.