Flakët që shpërthyen pasditen e sotme rreth orës 17:00 në një depo bojërash dhe llaçesh në bulevardin “Aleksandar Makedonski”, në zonën e ish-kompleksit industrial “Zhelezara” në Shkup, janë shuar plotësisht, bëjnë të ditur shërbimet zyrtare.

Si pasojë e materialeve të ruajtura në këtë magazinë, mbi vendin e ngjarjes u formua një re e dendur tymi i zi, e cila ishte e dukshme nga disa pika të qytetit.

Në aksionin e fikjes morën pjesë 20 zjarrfikës dhe gjashtë automjete të Brigadës Zjarrfikëse, njoftoi Qendra e Menaxhimit të Krizave (QMK).

Fillimisht zjarri u lokalizua dhe më pas u fik tërësisht. Deri tani nuk ka asnjë raportim për persona të lënduar.

Shkaqet e këtij zjarri mbeten ende të pazbardhura. Ekipet kompetente do të inspektojnë vendin e ngjarjes dhe më pas pritet të ofrojnë detaje të reja rreth rrethanave që çuan në shpërthimin e flakëve.

The post Fiket zjarri që përfshiu depon e bojërave dhe llaçeve në Shkup appeared first on Albeu.com.