Nga Ermal Spahiu

Spanja u shpall kampione e botës pas finales dramatike ndaj Argjentinës, e cila nuk u vendos brenda kohës së rregullt. U deshën 120 minuta lojë që turneu të jepte verdiktin përfundimtar, me Ferran Torres që hyri nga stoli dhe realizoi golin vendimtar. Rrjeta e tij i dhuroi përfaqësueses iberike yllin e dytë dhe ndezi festën e tifozëve spanjollë në stadiumin “MetLife” të New York-ut.

Festa i takoi Spanjës së mbushur me yje, ndërsa Argjentina e Messit me shokë e mbylli me zhgënjim. Kështu u përcaktua “mbretëresha” e re e botës dhe mori fund një turne që prodhoi emocione që nga takimi hapës mes Meksikës dhe Afrikës së Jugut. Kampionati, i organizuar në tri shtete të ndryshme, solli ritëm dhe vështirësi si rrallëherë, ndërsa oraret i shtynë tifozët të sakrifikonin edhe gjumin.

Në harkun e 104 ndeshjeve, ky Botëror ofroi gjithçka: rekorde të reja, episode të pazakonta, risi, rezultate befasuese dhe lamtumirën me lot të disa prej ikonave të futbollit. Në të njëjtën kohë, një brez i ri dha shenjat e një kapitulli tjetër. Pas përfundimit të turneut, mbetet për t’u analizuar se çfarë mësimesh dha ai dhe deri në ç’masë realiteti përputhej me pritshmëritë.

SURPRIZAT

Italia nuk ishte pjesë e Botërorit për të katërtin turne radhazi. Bosnja eliminoi “Azzurrët” në fazën “playoff”, duke e zgjatur në 12 vite mungesën e tyre në kompeticionin më të rëndësishëm të futbollit. Zhgënjimet prekën edhe kombëtare të tjera prej të cilave pritej një ecuri më e gjatë. Turqia u ndal që në grupe, kurse Holanda, Gjermania dhe Brazili u eliminuan shumë më shpejt nga sa parashikohej.

KEPI I GJELBËR, DEBUTIM PËR T’U PASUR ZILI

Vetë pjesëmarrja e parë historike në një Botëror përbënte sukses për Kepin e Gjelbër, por paraqitja në fushë e tejkaloi këtë arritje. Kombëtarja debutuese tregoi guxim, dëshmoi se mund t’u marrë pikë skuadrave të mëdha dhe i vuri ato në vështirësi serioze. Udhëtimi nisi përballë Spanjës, që tashmë mban titullin e kampiones, dhe përfundoi kundër Argjentinës, finalistes tjetër të turneut. Një rastësi e bukur.

MEMET DHE FIGURAT KRYESORE

Një Kupë Bote nuk do të ishte e plotë pa episode pikante që marrin përmasa virale. Protagonistët në fushë prodhuan shumë të tilla dhe rrjetet sociale u kujdesën që asnjë moment të mos kalonte pa u vënë re. Gjithçka nisi me Wilton Sampaio, gjyqtarin brazilian të ndeshjes hapëse Meksikë – Afrikë e Jugut, i cili krijoi konfuzion përmes anglishtes së tij.

Nga ironitë e internetit nuk shpëtuan as Erling Haaland, “përplasja” mes Messit dhe Jude Bellingham, apo shishja e ujit që portieri i Anglisë, Jordan Pickford, përdori për gjuajtësit e penalltive. Lista vijoi edhe me shumë personazhe e episode të tjera, duke bërë që turneu të vendoste rekord edhe në këtë drejtim.

RREGULLI I RI, I NJOHUR SI “LIGJI PRESTIANNI”

Mbulimi i gojës gjatë qëndrimit në fushë solli 2 kartonë të kuq në këtë turne. Të ndëshkuarit ishin Miguel Amorim i Paraguait dhe Piero Hincapie i Ekuadorit. Masa u frymëzua në njëfarë mënyre nga incidenti i njohur mes Gianluca Prestianni dhe Vinicius Junior në ndeshjen e Champions League ndërmjet Benficës dhe Real Madrid. FIFA vendosi ta aplikonte këtë rregull edhe gjatë Kupës së Botës.

FUNDI I NJË EPOKE DHE FILLIMI I NJË TJETRE

Critiano Ronaldo, Leo Messi, Neymar, Luka Modric dhe Guillermo Ochoa janë ndër legjendat që kanë lënë kujtime të paharrueshme në futboll dhe veçanërisht në historinë e Kupës së Botës. I fundit që provoi shijen e hidhur të eliminimit ishte sulmuesi argjentinas, i cili humbi finalen dhe nuk arriti të fitonte trofeun e tij të dytë.

Më herët, të njëjtin zhgënjim e përjetuan CR7, “Ney” pas rikthimit në kombëtaren e Brazilit, portieri simbol i Meksikës dhe “veterani” kroat. Mbyllja e ciklit të tyre i hap rrugën një epoke tjetër të artë, të përfaqësuar nga emra si Lamine Yamal, Kylian Mbappe, Erling Haaland, Jamal Musiala dhe shumë të tjerë.

VALË LARGIMESH NGA STOLAT

Pas turneut, 17 trajnerë dhanë dorëheqjen ose u shkarkuan nga drejtimi i kombëtareve të tyre. Edhe kjo shifër përbën rekord, pasi nga Botërori i vitit 2022 u larguan 11 teknikë, ndërsa në 2014-tën ishin 8 dhe në 2006-tën 9.

TË ARDHURAT

FIFA gjeneroi 15 miliardë euro fitime, një rezultat i jashtëzakonshëm që përfshiu të gjithë sektorët e mundshëm. Organizimi i një ngjarjeje globale me përmasat e Botërorit pritet të prodhojë shifra të mëdha, por edicioni i zhvilluar në tri shtete të ndryshme tejkaloi çdo parashikim. Në përfundim, ky turne la një trashëgimi shumë më të gjerë sesa vetëm kurorëzimi i një kampioneje të re.

The post Nga triumfi i Spanjës te rekordet dhe surprizat: Bilanci i Botërorit me 104 ndeshje appeared first on Albeu.com.

Lionel Scaloni duket se po kalon muajt e fundit te kombëtarja argjentinase. Në deklaratën e dhënë menjëherë pas humbjes në finale përballë Spanjës, trajneri i “Albicelesteve” përmendi edhe afatin kur do t’i japë fund qëndrimit të tij.

Ai tha se do të mbetet në drejtim deri në dhjetor dhe më pas me shumë gjasa do të largohet. “Dua të pushoj dhe të ndalem,” shtoi Scaloni, duke theksuar se në këto momente është thelbësore të ruhet shpirti dhe lidhja mes popullit argjentinas dhe ekipit. “Jam i lumtur për këtë,” përfundoi ai.

Në krye të Argjentinës, tekniku 48-vjeçar ka udhëhequr kombëtaren amerikano-latine drejt 4 trofeve të rëndësishëm, duke përfshirë Kupën e Botës 2022. Në 109 ndeshje në stol, ai ka 85 fitore, 14 barazime dhe 10 humbje.

The post Pas finales së humbur ndaj Spanjës, Scaloni: Largohem nga Argjentina në dhjetor appeared first on Albeu.com.

Kombëtarja e Argjentinës synon të fitojë Kupën e Botës për herë të dytë radhazi dhe në përballjen vendimtare ndaj Spanjës në Nju Jork, futbollistët “Albiceleste” kanë një arsye më tepër për të kapërcyer pengesën e fundit drejt triumfit.

Bëhet fjalë për një tendencë shqetësuese që Lionel Messi dhe bashkëlojtarët e tij aspirojnë ta “fshijnë” përfundimisht nga fusha e lojës, e cila ndërlidhet me fatin e fituesve të Botërorit që dështojnë në finalen e turneut pasardhës.

PARADOKSI I KAMPIONËVE:

Argjentina – Në vitin 1986, nën udhëheqjen e legjendarit Diego Maradona, skuadra ngriti trofeun, por katër vjet më vonë u mposht në finalen e vitit 1990 nga Gjermania Perëndimore me rezultatin minimal 1-0.

Brazili – “Seleção” dominoi Shtetet e Bashkuara në finalen e vitit 1994, por në Botërorin e ardhshëm të vitit 1998, të organizuar nga Franca, pësuan një humbje të thellë 3-0 ndaj vendasve.

Franca – Të kaltrit siguruan titullin botëror në finalen e vitit 2018, por e dorëzuan atë në vitin 2022, kur Argjentina e udhëhequr nga “Pleshti” triumfoi pas ekzekutimit të penalltive.

The post Argjentina me një shtysë shtesë në finalen e Botërorit ndaj Spanjës, Messi kërkon të thyejë mallkimin e kampionëve në fuqi appeared first on Albeu.com.

Trofeu i Kupës së Botës 2026 do të vendoset sonte, kur Spanja dhe Argjentina të zbresin në fushën e stadiumit “MetLife” në New Jersey. Sfida finale nis në orën 21:00.

Përballë do të jenë dy kombëtaret që mbajnë pozicionet e para në renditjen e FIFA-s: Argjentina ndodhet në vendin e parë, ndërsa Spanja në të dytin. Takimi pritet të ofrojë futboll të nivelit të lartë dhe të tërheqë vëmendjen e miliona tifozëve në mbarë botën.

Spanja vjen në këtë përballje me statusin e kampiones në fuqi të Europës, pasi në gjysmëfinale kaloi Francën me shifrat 2-0. Argjentina, ndërkohë, është kampionia aktuale e botës dhe arriti në finalen e madhe pas fitores ndaj Anglisë, me synimin për të ruajtur titullin e fituar katër vite më parë.

Në fund të kësaj ndeshjeje do të shpallet kampionia e re e botës.

The post Spanja dhe Argjentina luajnë sonte finalen e Botërorit 2026 appeared first on Albeu.com.

Presidenti i Federatës Shqiptare të Futbollit, Armand Duka, ishte pjesë e aktivitetit që FIFA organizoi në Trump Tower, në New York. Eventi i zhvilluar përpara finales së Kupës së Botës FIFA 2026 iu kushtua kremtimit të suksesit të edicionit më të madh që ka njohur ndonjëherë ky kompeticion.

Në mbrëmje morën pjesë presidenti i FIFA-s, Gianni Infantino, presidenti i Shteteve të Bashkuara të Amerikës, Donald Trump, anëtarë të Këshillit të FIFA-s, krerë të federatave kombëtare nga vende të ndryshme të botës dhe emra të njohur të futbollit ndërkombëtar.

Gjatë aktivitetit, Duka zhvilloi një takim dhe bisedë me presidentin amerikan Donald Trump, si edhe me drejtues të lartë të FIFA-s dhe përfaqësues të federatave të ndryshme. Mbrëmja solli në vëmendje rezultatet e organizimit të Kupës së Botës FIFA 2026 dhe peshën që futbolli ka në nivel global.

Gianni Infantino e përshkroi edicionin si një arritje të jashtëzakonshme, duke deklaruar se Kupa e Botës FIFA 2026 ka shkuar përtej çdo parashikimi. Sipas tij, ajo nuk është vetëm Botërori më i madh i të gjitha kohërave, por edhe ngjarja më e madhe njerëzore, sociale dhe kulturore që ka parë ndonjëherë njerëzimi.

Edhe Donald Trump e konsideroi turneun një ngjarje të pakrahasueshme në historinë e sportit. Presidenti i Shteteve të Bashkuara të Amerikës vlerësoi konkurrencën e jashtëzakonshme dhe momentet e paharrueshme që, sipas tij, kanë bashkuar botën, duke e cilësuar këtë si eventin sportiv më të suksesshëm në histori.

Botërori FIFA 2026 ka vendosur standarde të reja si për pjesëmarrjen në stadiume, ashtu edhe për ndjekjen në shkallë botërore. Mbi 6.6 milionë tifozë kanë qenë të pranishëm në ndeshje, shifër që e bën këtë edicion më të ndjekurin në historinë e Kupës së Botës, ndërsa mbushja mesatare e stadiumeve ka arritur në 99.7%.

Turneu u zhvillua për herë të parë me tre vende organizatore, Shtetet e Bashkuara të Amerikës, Kanadaja dhe Meksika, si edhe me formatin e ri prej 48 skuadrash pjesëmarrëse, duke shënuar një tjetër faqe historike për futbollin botëror.

Pjesëmarrja e Armand Dukës në këtë aktivitet nënvizon angazhimin e Federatës Shqiptare të Futbollit në strukturat ndërkombëtare të futbollit, si edhe raportet e saj të afërta me FIFA-n dhe federatat partnere. Kjo ndodh në një periudhë kur Shqipëria po konsolidon më tej profilin e saj si vend organizator i veprimtarive të rëndësishme sportive ndërkombëtare.

The post Armand Duka në eventin e FIFA-s në New York, Botërori 2026 prezantohet me shifra rekord appeared first on Albeu.com.

Armand Duka, presidenti i Federatës Shqiptare të Futbollit, ndodhet në “Trump Tower” në New York, ku do të luhet edhe finalja e madhe mes Spanjës dhe Argjentinës. Njëra prej dy përfaqësueseve do të sigurojë gjithashtu statusin më unik në botë.

Në një reagim të publikuar në profilin e tij, kreu i FSHF-së vlerësoi lart organizimin e turneut, i cili për herë të parë u zhvillua në tri vende të ndryshme: SHBA, Meksikë dhe Kanada.

“Një rrugëtim i jashtëzakonshëm, nga vizioni e deri te realizimi i këtij turneu që dëshmoi edhe njëherë një të vërtetë të madhe: Futbolli bashkon botën”, shkruan Duka.

Ai ka publikuar gjithashtu pamje nga takimi me kreun e Shtëpisë së Bardhë, si edhe nga konferenca ku foli presidenti i FIFA-s, Gianni Infantino.

The post Duka në New York pranë Trump dhe Infantino: Turneu ishte i jashtëzakonshëm dhe tregoi se futbolli bashkon botën appeared first on Albeu.com.

Finalja e madhe e Botërorit 2026 do të luhet të dielën, kur Spanja dhe Argjentina do të përballen për trofeun më të rëndësishëm të futbollit botëror. Sfida është planifikuar të nisë në orën 21:00 në “MetLife Stadium” të New Yorkut.

Argjentina, nga ana e saj, mbështetet te një tjetër shkëndijë e Leo Messit. “Albicelestet” synojnë të fitojnë titullin e dytë radhazi, një arritje që do të përmbyllte në mënyrën më të mirë të mundshme karrierën e futbollistit dhe do të forconte dominimin e tyre në arenën globale.

Spanja kërkon rikthimin në majën e botës pas 16 vitesh. “Furia e Kuqe” nuk e ka ngritur trofeun që prej vitit 2010, kur triumfoi 1-0 ndaj Holandës në finale, dhe tashmë synon të rikthehet sërish në podiumin më të lartë.

Spektakli nuk do të kufizohet vetëm te fusha e lojës. Pas mbylljes së pjesës së parë, parashikohet një performancë speciale 17-minutëshe nga emra të njohur të muzikës, mes tyre Shakira, Madonna, BTS dhe Justin Bieber, përpara se të rifillojë pjesa e dytë.

Një duel mes dy gjigantëve pritet të sjellë ritëm, emocione të forta, drithërima, si edhe lot gëzimi e zhgënjimi, në një mbrëmje që premton sukses të madh si në fushë, ashtu edhe jashtë saj.

The post Botërori 2026 vendos kampionin të dielën, Spanja përballë Argjentinës së Messit në finalen e New Yorkut appeared first on Albeu.com.

Armando Cungu, ish-trajneri i Vllaznisë, ka kritikuar ashpër paraqitjet e Argjentinës në këtë Kupë Bote. Sipas tij, kombëtarja argjentinase dhe Lionel Messi kanë përfituar trajtim favorizues gjatë kompeticionit.

I ftuar në emisionin “Kampionët e Botës” në TV Klan, Cungu theksoi se shqetësimet për Argjentinën kishin nisur që në përballjen me Algjerinë, ku sipas tij Messi nuk u ndëshkua me karton të kuq.

“Nëse e shohim Argjentinën, ajo pati probleme që në ndeshjen kundër Algjerisë. Messit nuk iu dha një karton i kuq. Për gjithçka që ka dhënë në futbollin botëror, Messi është një futbollist para të cilit duhet të heqësh kapelen.

Por ligji duhet të funksionojë edhe në sport. Të gjithë duhet të trajtohen njësoj, jo që njëri të përjashtohet me të kuq dhe tjetri të favorizohet. Dhe kjo nuk ka ndodhur vetëm në një takim, por pafundësisht.

Ka pasur problematika ndaj Algjerisë, Kepit të Gjelbër, Egjiptit dhe Zvicrës. Këtë mund ta quaj edhe masakër. Mediat botërore flasin për 31 ndërhyrje të ‘pista’ dhe i kanë të shoqëruara me minutazh. Më vjen keq, sepse kam pasur shumë respekt për Argjentinën.

Ata kanë prodhuar emra të mëdhenj, mjafton të kujtojmë Maradonën dhe Messin. Asnjëherë nuk i kam parë të luajnë në një mënyrë kaq të pisët”, u shpreh Armando Cungu.

The post Armando Cungu: Messi duhej ndëshkuar me të kuq, Argjentina po merr favore të pafundme appeared first on Albeu.com.

Franca hyri në gjysmëfinalen e Kupës së Botës 2026 me peshën e favoritës absolute, e bindur se do të mposhtte Spanjën dhe do të vazhdonte rrugën drejt trofeut. Megjithatë, realiteti në fushë rezultoi krejtësisht i ndryshëm për “Gjelat”, që u dorëzuan pa shumë rezistencë.

Skuadra e drejtuar nga Didier Deschamps pësoi një disfatë të pastër 0-2 nga iberikët, duke u shfaqur totalisht e zbehtë dhe pa ide gjatë gjithë 90 minutave. Pas ndeshjes, ylli i ekipit, Kylian Mbappe, foli hapur për dështimin që la të tronditur gjithë kombin francez.

“Performanca jonë ishte larg asaj që kishim parashikuar. Synimi ishte të ushtronim një presion të lartë për t’ua mohuar kontrollin e lojës, por taktika dështoi plotësisht. Në mesfushë përballemi vazhdimisht me epërsi numerike të kundërshtarit, në situata 3 kundër 2, dhe përballë Spanjës kjo u shndërrua në një hendikep të madh,” shpjegoi sulmuesi francez.

Ai shtoi më tej se synimi për të arritur në finale ishte një ëndërr e përbashkët. “Zhgënjimi është kolosal, por tani na duhet të rimarrim veten. Do të shkëputemi për pushime dhe më pas do të nisim një cikël të ri,” deklaroi Mbappe, duke sinjalizuar fundin e një epoke për këtë gjeneratë futbollistësh.

The post Mbappe pranon dështimin pas goditjes së Francës nga Spanja: Asgjë nuk shkoi sipas planit appeared first on Albeu.com.

Ismail Elfath është emri i përzgjedhur nga FIFA për të drejtuar gjysmëfinalen mes Anglisë dhe Argjentinës. Arbitri 44-vjeçar, me origjinë nga Casablanca e Marokut, e nisi karrierën e tij ndërkombëtare në vitin 2012.

Që nga viti 2016 ai mban distinktivin e FIFA-s, ndërsa sfida më prestigjioze që i është besuar deri më tani mbetet Kupa Interkontinentale, aty ku Paris Saint-Germain triumfoi ndaj Flamengos pas ekzekutimit të penalltive.

Sa i përket qasjes së tij në fushë, Elfath njihet për një tolerancë të theksuar gjatë ndërhyrjeve, edhe në ato momente kur lojtarët tejkalojnë kufijtë e lejuar. Ky element shihet si një lehtësim për Argjentinën, skuadër e cila u shfaq mjaft agresive në përplasjet fizike gjatë ndeshjes çerekfinale kundër Zvicrës.

Duhet theksuar se Lionel Messi dhe bashkëlojtarët e tij janë vënë në qendër të kritikave të ashpra, si në median tradicionale ashtu edhe në rrjetet sociale. Ata akuzohen se kanë përfituar nga favorizime të dyshimta nga ana e FIFA-s, përmes vendimeve të diskutueshme të gjyqtarëve në ndeshjet e tyre.

The post Vendimi i FIFA-s për arbitrin e Angli-Argjentinë ngre dilema, “Albicelestet” gjejnë mbështetje të re appeared first on Albeu.com.