Bora që ka zbardhur malin është kthyer në magnet për familje, të rinj dhe turistë, duke e shndërruar zonën në destinacionin më të frekuentuar të fundjavës.

Megjithatë, fluksi i jashtëzakonshëm i vizitorëve ka sjellë edhe trafik të rënduar rrugor.

Aksesi drejt Dajtit është paralizuar pothuajse plotësisht, me radhë të gjata automjetesh që kanë krijuar trafik kilometrik.

Sipas pamjeve me dron, autokolonat shtriheshin deri në rreth 25 kilometra, duke e bërë udhëtimin drejt malit një sfidë të vërtetë për drejtuesit e mjeteve.

Jo vetëm ngjitja, por edhe kthimi nga Dajti është shoqëruar me vonesa të gjata dhe lodhje për vizitorët, të cilët janë përballur me orë të tëra pritjeje në trafik.

Pavarësisht kësaj, shumë prej tyre nuk kanë hequr dorë nga dëshira për të shijuar borën, ajrin e pastër dhe panoramën dimërore që ofron mali më i afërt me Tiranën.

The post VIDEO/ 25 kilometra trafik, qytetarët “vërshojnë” në Dajtin e zbardhur nga bora, bllokohen për orë të tëra në rrugë appeared first on Albeu.com.

Qarku i Elbasanit, ka përjetuar kushte të vështira atmosferike gjatë kësaj jave, por Librazhdi rezulton zona më e prekur nga moti i përkeqësuar, i shoqëruar me reshje të dendura shiu dhe stuhi dëbore.

Disa ditë më parë, dëbora mbuloi për disa orë edhe qytetin e Librazhdit, ndërsa aktualisht shumica e fshatrave të bashkisë vijojnë të jenë të mbuluara nga dëbora dhe ngricat.

Temperaturat kanë shënuar rënie të ndjeshme, ndërsa termometri në orët e para të mëngjesit ka zbritur deri në -7 gradë Celsius.

Fshatrat malorë, përfshirë Fushë Studën, Qarrishtën, Neshtën, Kostenjën, Orenjën, malin e Dardhës, Xhyrën, Spatharin, Babjen, Polisin dhe zona të tjera, janë të mbuluara nga dëbora.

Ndërkohë, aksi rrugor Librazhd–Peshkopi ka pësuar ndërprerje të qarkullimit disa herë gjatë kësaj jave, duke e bërë të domosdoshme përdorimin e zinxhirëve për mjetet që qarkullojnë në këtë segment.

Agjencia e Shërbimeve Publike, strukturat e Emergjencave Civile dhe grupet e OSHEE-së janë çdo ditë në terren për të monitoruar situatën dhe për të ndërhyrë aty ku është e nevojshme.

Kryetari i Bashkisë Librazhd, z. Mariglen Disha, ka qenë i pranishëm edhe gjatë fundjavës në terren, duke inspektuar fshatrat e Njësisë Administrative Polis dhe duke vlerësuar gjendjen e rrugëve si dhe nevojat e banorëve.

Në Njësinë Administrative Steblevë, trashësia e dëborës ka arritur mbi 40 centimetra, ndërsa punonjësit e mirëmbajtjes po punojnë intensivisht për të mbajtur rrugët të hapura dhe të aksesueshme.

Kryebashkiaku Disha, thekson se situata monitorohet në mënyrë të vazhdueshme në çdo njësi administrative dhe se grupet e punës janë në gadishmëri të plotë për të përballuar çdo problematikë.

Gjatë ditës së shtunë, pjesa më e madhe e grupeve të ndërhyrjes u përqendruan në fshatrat e Njësisë Administrative Polis, ku u shënuan bllokime të disa segmenteve rrugore për shkak të rrëshqitjes së masiveve të dherave dhe gurëve nga skarpatet e kodrave.

Autoritetet vendore u bëjnë thirrje qytetarëve të tregojnë kujdes maksimal, të shmangin lëvizjet e panevojshme dhe të respektojnë udhëzimet e strukturave përkatëse, për të garantuar sigurinë gjatë këtyre kushteve të vështira atmosferike.

The post I ftohti mbërthen Librazhdin/ Dëbora, ngrica dhe vështirësi të shumta në zonat malore appeared first on Albeu.com.

Sipas mediave, dyshimet për krizë në çift janë nxitur nga fakti se dyshja, sipas tyre, nuk e ndjekin më njëri-tjetrin në “Instagram” dhe se kanë fshirë fotot e përbashkëta, veprime këto që u interpretuan si fundi i lidhjes së tyre.

Megjithatë, një verifikim i shpejtë tregon se ky informacion nuk qëndron.

Si Bora, ashtu edhe Donaldi, vazhdojnë të jenë në listën e ndjekësve të njëri-tjetrit në platformën e “Instagram”-it.

Për të hedhur poshtë plotësisht zërat, Bora Zemani, së fundmi ka shpërndarë në llogarinë e saj personale në “Instagram” një nga projektet e fundit të Donald Veshajt.

Ky veprim i fundit i moderatores konfirmon qartë se romanca mes dyshes vazhdon të jetë e fortë, duke hedhur poshtë zërat se marrëdhënia e tyre ka përfunduar.

Dyshja prej kohësh ka preferuar që të mos shfaqet së bashku në publik, duke preferuar që të fokusohen në karrierat e tyre.

Nga njëra anë Bora vijon në ekran, sakaq Donaldi ka preferuar që të jetë larg ekranit, duke vazhduar me krijimet e tij në skulpturë, pikturë, por edhe arkitekturë.

Megjithatë, shpeshherë në rrjetet sociale, çifti na ka dhënë copëza nga e përditshmja e tyre që është plot romancë.

Moderatorja Bora Zemani dhe aktori i humorit Donald Veshaj, kanë marrë vëmendjen e fansave vetëm pak kohë më parë me disa foto të shkrepura në krahë të njëri-tjetrit.

Çifti i cili bëri bujë me romancën e tyre, jo më larg se dy vite më parë, janë parë më të dashuruar se kurrë teksa pozojnë ëmbëlsisht para kamerës.

Herë duke u përqafuar e herë duke vallëzuar, dyshja kanë postuar momente të lumtura të cilat nuk kanë kaluar pa u vënë re nga ndjekësit.

Bora ka folur publikisht për këtë raport, duke prekur edhe një temë, që ndjekësit e shumtë që kjo dyshe ka mezi po e presin.

Ajo mes tjerash ka folur edhe për dasmën, pasi u tha se do të jetë në vitin e ardhshëm.

“Unë nuk e shoh si një gjë kaq të rëndësishme se nuk më bën ndonjë ndryshim shumë të madh, e martuar apo e pamartuar me Dondaldin. Ne jetojmë bashkë, e shijojmë marrëdhënien tonë në të gjitha drejtimet kështu që nuk është se do më ndryshonte diçka në raportin tonë një martesë”, – u shpreh ajo.

The post I dhanë fund romancës për shkak të xhelozisë? E vërteta e ndarjes mes Bora Zemanit dhe Donald Veshaj appeared first on Albeu.com.

Ata ndodheshin në stan dhe nuk kanë mundur të lëvizin, për shkak të borës së madhe.

Në përpjekje për t’u ardhur në ndihmë, djali i tyre ka shkuar me automjet, por edhe ai ka mbetur i bllokuar.

Autoritetet vendore po ndjekin situatën dhe bashkia ka deklaruar se janë duke marrë masat e nevojshme, për të nxjerrë të sigurt tre personat e mbetur të izoluar.

The post Reshje të dendura bore në Tropojë, bllokohen 3 persona appeared first on Albeu.com.

Ajo ka shtuar se xhelozia nuk ka vend në lidhjen e saj, pasi besimi dhe respekti janë baza kryesore e marrëdhënies.

Në këtë intervistë, Bora gjithashtu ka përmendur se Donaldi është një person shumë kokëfortë, duke aluduar për karakterin e tij të fortë, por që ndikon në mënyrën e veprimit në marrëdhënien e tyre.

“Nuk jam xheloze, jam shumë e rregullt në marredhënie, japim dhe marrim sa duhet. Nuk është xhelozi. Donaldi eshtë shumë kokëforte”- tha ajo.

The post Bora Zemani flet pa ‘dorashka’, tregon për marrëdhënien e saj me Donald Veshaj appeared first on Albeu.com.

Por, ndryshe nga sezoni i kaluar ku ky program i cili arriti të linte gjurmë të thella te të gjithë shqiptarët, nuk do të vijë nën moderimin e Marina Vjollcës, por të Bora Zemanit.

Bora e cila sapo përfundoi emisionin “Piramida” është shprehur e lumtur për këtë ftesë të marrë nga Fondacioni Firdeus të cilën nuk mund ta refuzonte.

“Isha shumë e lumtur kur mu bë ftesa nga fondacioni Firdeus. Si mund ti thuash Jo misioneve kaq të mëdha. Shihemi të premten në orën 21:00 vetëm në TCH dhe këtë të diel, mos harroni!”, tha Bora.

Elvis Naçi: Po flasim për një emision i cili ka të bëj drejtpërdrejtë me jetën e njeriut. Ata të cilët na bashkohen nga bamirësit është një emision me heronj brenda dhe me njerëz që kanë nevojë. Unë besoj që këtë të premte në orën 21:00 emisioni ‘Për shqiptarët’ fillon furishëm, me amanet, me përgjegjësi, po me shpresën e madhe që të bëhen sa më shumë vepra të mira. Në këtë sezon do të jetë Bora Zemani një risi e emisionit dhe do të ketë nuanca të ndryshme por thelbi mbetet i njëjtë. Kur flitet për të shpëtuar jetë njerëzore, lodhja kthehet në shplodhje dhe në të njëjtën kohë, angazhimi kthehet në kënaqësi. Dhe unë shpresoj që bashkë me ekranin e madh të Top Channel ne të bëjmë mrekulli për familjet shqiptare.

Bora Zemani: Është lidhja shumë e bukur mes të dyja programeve. Te Piramida ishim me familjet shqiptare e këtu për një mision akoma më të madh. Është ai programi që bëhen bashkë të gjithë shqiptarët për të dhënë mesazhe të bukura e për t’iu gjendur pranë njëri tjetrit. Isha shumë e lumtur kur mu bë ftesa nga fondacioni Firdeus. Si mund ti thuash Jo misioneve kaq të mëdha. Shihemi të premten në orën 21:00 vetëm në TCH dhe këtë të diel, mos harroni!.

Elvis Naçi: Sezoni që kaloi ne përpara shqiptarëve thamë nëse janë shëruar 300 fëmijë ne do i shumëfishojmë ato dhe mund ta them me sinqeritet, ato kanë qenë të dukshme e transparente moria e fëmijëve dhe angazhimi ishte i jashtëzakonshëm.

Bora Zemani: Nuk di a mund të mos përfshihesh në këto histori që dëgjohen këtu. Aq më tepër në ato mesazhet dhe zgjidhjet e mëdha që jepen. Do përfshihesh si nga ana emocionale por akoma më bukur edhe për të dhuruar!

The post Marina Vjollca largohet sërish nga Top Channel, një tjetër moderatore i zë vendin appeared first on Albeu.com.

ARRSH thekson se në Doganën Kapshticë, në Korçë-Dardhë, Korçë-Voskopojë, Korçë-Ersekë, Ersekë- Leskovik, borëpastrueset ndodhen në terren po punojnë me pastrimin e rrugëve nga dëbora dhe shpërndarjen e kripës. në mënyrë që qarkullimi kryhet pa probleme.

“Drejtuesit e mjeteve të kenë kujdes të shtuar gjatë drejtimit të mjetit, për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore”, njofton ARRSH.

The post Rikthehet bora në Korçë, ARRSH apel shoferëve: Tregoni kujdes gjatë drejtimit të mjetit appeared first on Albeu.com.

Sa u takon akseve rrugore, sipas raportimit të Autoritetit Rrugor Shqiptar (ARRSH) të gjitha akset kombëtare janë të kalueshme, me përjashtim të disa rrugëve në zonat malore.

Konkretisht, sipas ARRSH-së, në qarkun Kukës të gjitha rrugët janë bërë të kalueshme, përveç rrugës që lidh njësinë administrative Arrën me rrugën nacionale dhe rrugët e fshatrave Cahan, Xhebexhi dhe Vlahen të bashkisë Has.

Në qarkun e Dibrës, Rruga e Arbrit është e pakalueshme në Qafë-Murriz, pasi ka reshje bore të dendura. Firmat kontraktore po punojnë për hapjen e këtij aksi.

Bashkia Dibër ka të bllokuar rrugën nga qendra administrative Lurë me aksin kryesor, por po punohet për hapjen e kalimit nga Rrësheni, gjithashtu edhe rrugët që lidhin fshatrat me njësitë administrative Selishtë.

Në bashkinë Bulqizë janë të bllokuara rrugë të brendshme të njësive administrative Ostren, Trebisht dhe pjesërisht në njësinë administrative Zerqan, Martanesh dhe Fushë-Bulqizë.

Në bashkinë Klos janë bllokuar rrugët e fshatrave me qendrat administrative Gurë dhe Xibër. Në bashkinë Mat janë bllokuar vetëm dy fshatra në njësinë administrative Komsi dhe aksi rrugor Vig Macukull.

Në qarkun Durrës aksi rrugor Cudhi-Qafështamë, tashmë është i kalueshëm pas punës me mjetet e bashkisë Krujë. Aktualisht po punohet në rrugën që lidh fshatin Bruz-Mal me aksin Cudhi-Qafështamë.

Në qarkun Shkodër, në bashkinë Fushë-Arrëz po punohet për zhbllokimin e rrugëve që lidhin njësinë administrative Iballë me fshatrat e saj. Ndërsa segmenti Kir-Shosh vazhdon të jetë i bllokuar.

Në qarkun Lezhë të gjithë akset rrugorë kombëtare janë të kalueshme, me goma dimërore, duke përfshirë edhe rrugën e Kishës, e cila u hap për qarkullim rreth orës 13:30.

Ekipet e OSSHE po punojnë për kthimin e energjisë elektrike në disa zona të bashkive: Durrës, Elbasan, Berat, Korçë, Fier, Gjirokastër, Kukës, Shkodër e Burrel.

Lumenjtë dhe rezervuarët

Në fshatin Vadardhë, njësia administrative Sukth, bashkia Durrës pati dalje nga shtrati të lumit Erzen duke përmbytur 1 serrë dhe 4 dynymë tokë bujqësore, por pas ndërhyrjes me ekskavator nga Drejtoria e Ujitjes dhe Kullimit, u eliminua rreziku. Dalje nga shtrati të lumit Erzen pati edhe në fshatin Katund, duke përmbytur vetëm oborret e disa banesave.

Në fshatin Murqinë, njësia administrative Bubq, bashkia Krujë, ku ditën e sotme lumi Ishëm doli nga shtrati, aktualisht është tërhequr uji nga tokat bujqësore.

Efektivët e Forcave të Armatosura ndodhen në qytetin e Vlorës, ku po ndihmojnë bashkinë për përballimin e situatës së shkaktuar nga përmbytjet.

Gjithashtu, pas kërkesës së bërë nga Prefekti i Qarkut Tiranë ditën e sotme për mbështetje me mjete të rënda, u dërgua në Njësinë Administrative Dajt, Bashkia Tiranë një fadromë dhe një kamion nga FA në ndihmë të komunitetit. Ndihma do të vijojë edhe gjatë ditës së nesërme në Linzë, në ndihmë të komunitetit.

Parashikimi motit në vijim

Nesër (e martë, 14 janar) reshjet dobëta të dëborës pritet të përfshijnë zonat verilindore, qendrore dhe juglindore të territorit, në lartësitë mbi 500 m.

Temperaturat minimale dhe maksimale të ajrit pritet të arrijnë: në bregdet 4 / 11 °C, në vendet e ulëta 1 / 11 °C dhe në vendet malore -5 /1 °C. Era pritet të fryjë e lehtë deri mesatare, ndërsa në veri dhe në bregdet deri e fortë.

Vijon monitorimi dhe koordinimi me të gjitha institucionet qendrore dhe vendore për të menaxhuar në kohë çdo situatë emergjente që mund të krijohet.

The post Reshjet e dëborës, ja si paraqitet situata në akset kryesore të vendit appeared first on Albeu.com.

Burime konfirmojnë se rruga tashmë është hapur dhe mund të kalojnë lirisht të gjitha mjetet.

Pas shumë orësh pritje në temperatura të ulëta, më në fund udhëtarët do të mund të shkojnë drejt Greqisë.

Më herët, dogana greke njoftoi se situata më e renduar ishte në zonën Grevena-Doganë. Për këtë arsye nuk u lejua kalimi i mjeteve.

Pas ndërprerjes se reshjeve është ndërhyrë për të pastruar boren dhe u lejua qarkullimi.

The post Ngricat dhe bora/ Pas orëve të gjata pritjeje në Kapshticë, lejohet kalimi i kamionave drejt Greqisë appeared first on Albeu.com.

Sipas raportimeve nga Emergjencat Civile, disa akse rrugorre janë bllokuar si pasojë e reshjeve të dëborës në të gjitha qarqet e vendit.

Disa njësi administrative janë të bllokuara në qarkun e Dibrës, ndërkohë që situata më problematike paraqitet në rrugën e “Arbrit”, që është bërë e pakalueshme për shkak të reshjeve të dëborës.

Nga Ministria e Mbrojtjes, bëhet me dije se një automjet me tre persona është bllokuar nga dëbora në Qafën e Murrizit.

Sot në orët e para të mëngjesit, është nisur një automjet tip “Buldozer” dhe një autoambulancë dhe ekipet e emergjencës aktualisht po përpiqen të ndihmojnë qytetarët e bllokuar.

Ndërkohë, ekipet e OSSHE janë duke punuar për rikthimin sa më parë të energjisë elektrike në disa zona të thella.

Situata deri në këto momente paraqitet si më poshtë:

Akset rrugore

Në qarkun e Dibrës rruga e “Arbrit” është e pakalueshme në Qafë Murriz, pasi ka reshje bore të dendura. Firmat kontraktore po punojnë për hapjen e këtij aksi.

Në bashkinë Dibër janë bllokuar disa qendra administrative me akset kryesore si; Lurë, Selishtë, Luzni, Kala e Dodës dhe Zall Dardhë.

Në bashkinë Bulqizë janë të bllokuara njësitë administrative Ostren, Trebisht.

Në bashkinë Klos janë bllokuar rrugët dytësore të fshatrave që lidhen me qendrat administrative Suç, Gurë dhe Xibër.

Në bashkinë Mat janë bllokuar disa rrugë të fshatrave që lidhen me qendrat administrative Macukull, Lis, Derjan dhe Komsi.

Aksi rrugor Peshkopi-Ulëz, në vendi e quajtur Qafë Ulëz ka qenë e bllokuar për shkak të pranisë së dëborës, akullit dhe mjeteve që lëvizin pa goma dimërore. Ditën e sotme qarkullimi kryhet normalisht.

Rrugët rurale që lidhin bashkinë Fushë-Arrëz me njësinë administrative Iballë dhe fshatrat e saj janë të bllokuara.

Në aksin rrugor Elbasan-Qafë Thanë, në vendin e quajtur kthesat e “Murrashit: ka patur prezencë inertesh në rrugë. Në Qafë Thanë pati reshje dëbore të cilat kanë vështirësuar qarkullimin e mjeteve të rënda. Gjatë natës dhe në orët e mëngjesit të ditës së sotme po vijon puna për pastrimin dhe kriposjen e rrugës ne aksin Qafë Thane – Pogradec. Qarkullimi kryhet me goma dimri.

Në aksin rrugor Tiranë-Elbasan në dalje të tunelit, pati probleme me qarkullimin pasi terreni ishte shumë i lagësht dhe me ngrica. Qarkullimi u krye vetëm në një sens lëvizje. Gjatë natës dhe ditën e sotme është bërë shpërndarja e kripës dhe qarkullimi behet me goma dimri.

Në bashkinë Krujë, aksi rrugor Cudhi Kamp-Qafështamë është i bllokuar nga reshjet e dëborës.

Në aksin rrugor Vuno – Himarë, në vendin e quajtur ura e Vishës ka rënë një masiv shkëmbor. Rruga është e kalueshme në një sens lëvizje dhe po punohet për hapjen e krahut tjetër.

Rruga për në Shëngjergj, bashkia Tiranë është e vështirë për tu kaluar nga sasia e reshjeve të dëborës.

Në Lanabregas si pasojë e bllokimit të kolektorit ka patur prezencë të ujit duke rrezikuar përmbytjen e një banese.

Në segmentin Fresku – Trau Dajt, në km 5 pati rrëshqitje të skarpatës duke bllokuar njërën prej korsive. Po punohet për pastrimin e rrugës.

Në bashkinë Vlorë, situata është e qetë. Nuk ka prezencë uji në qytet.

Gjatë ditës së sotme po punohet me borëpastrueset për të mbajtur të hapura rrugët e qarkullueshme dhe për të hapur rrugët e bllokuara nga dëbora.

Nga raportimet e strukturave të sistemit të mbrojtjes civile në nivel vendor, të gjithë lumenjtë dhe rezervuarët janë brenda kuotave të tyre normale dhe nuk paraqesin asnjë rrezik, përveç se në fshatin Murqinë, njësia administrative Bubq, bashkia Krujë, ku lumi Ishëm ka dalë nga shtrati duke përmbytur një sipërfaqe prej 20 Ha tokë bujqësore.

Parashikimi motit në vijim

Moti parashikohet me alternime vranësirash mesatare dhe të dendura, megjithatë nuk do të mungojnë intervale të herëpashershme afatshkurtra me kthjellime kryesisht përgjatë Ultësirës Perëndimore. Reshje shiu me intensitet të ulët në pjesën më të madhe të territorit, dhe lokalisht shtrëngata afatshkurtra të izoluara deri në mesditë. Pas orëve të mesditës gradualisht ulje të intensitetit të reshjeve të shiut.

Në relievet malore verilindje-lindje-jug në lartësitë mbi 400-600 metër reshje dëbore me intensitet të ulët deri mesatar. Në mënyrë të izoluar, në periudha afatshkurtra në Alpe dhe relievet e larta malore reshjet e dëborës parashikohen në formën e stuhive të dëborës. Mjegull e dendur/mjegullinë për shkak të reshjeve të dëborës dhe shiut. Ngrica të forta përgjatë akseve rrugore, kryesisht në relievet malore.

Era do të fryjë me drejtim Verilindje-Lindje me shpejtësi mesatare 4-14 m/s. Përgjatë vijës bregdetare dhe zonat luginore era me shpejtësi 16-26 m/s.

Temperaturat ekstreme, pritet të luhaten:

Në vendet malore: temperaturat minimale do të zbresin deri në -6°C, ndërsa ato maksimale do të ngjiten deri në -2°C.

Në vendet e ulëta: temperaturat minimale do të zbresin deri në -2°C, ndërsa ato maksimale do të ngjiten deri në 7°C.

Në bregdet: temperaturat minimale do të zbresin deri në 4°C, ndërsa ato maksimale do të ngjiten deri në 7°C.

The post Dëbora mbërthen Shqipërinë, ja akset e bllokuara nga reshjet appeared first on Albeu.com.