Një shtetas i Kosovës, R.E. (24), u arrestua të martën në mbrëmje pasi ishte larguar me automjetin e tij BMW me targa të Kosovës nga kontrolli doganor në pikën kufitare të Bllacës.

Ministria e Punëve të Brendshme njoftoi se, teksa po kryhej kontrolli doganor i veturës, R.E. e kishte ndezur automjetin dhe kishte shtyrë e tërhequr për disa metra një zyrtar doganor. Më pas ai ishte larguar në drejtim të Shkupit.

Pas ndërhyrjes së Njësisë së Policisë Intervenuese, BMW-ja u ndalua në rrugën “Magjistralja e Adriatikut”, ku edhe u arrestua i dyshuari.

“Gjatë kontrollit në terren është gjetur një qese me marihuanë, ndërsa në automjet është gjetur një thikë xhepi. R.E. ka deklaruar gjithashtu se gjatë arratisjes kishte hedhur një qese në të cilën ndodheshin dy pistoleta”, thuhet në kumtesën e MPB-së.

24-vjeçari është dërguar në stacion policor, ndërsa pas sqarimit dhe dokumentimit të plotë të ngjarjes, ndaj tij do të dorëzohet kallëzimi përkatës.

The post Pas ndjekjes policore në Shkup arrestohet 24-vjeçari nga Kosova që u largua nga Bllaca appeared first on Albeu.com.