Drejtori i përgjithshëm i Partizanit, Olsi Rama, po shfaqet gjithnjë e më shumë si një figurë aktive dhe e suksesshme në tregun e transferimeve.

Përmes një postimi të fundit në rrjetet sociale, Rama bëri të ditur se kishte qenë pjesë e grupit që punoi për transferimin e mbrojtësit të Kombëtares, Berat Gjimshit, nga Atalanta te Al-Diriyah.

“Jam i lumtur që kontribuova në kalimin e kapitenit të Kombëtares sonë nga Atalanta BC te Diriyah Club në Saudi Pro League. Falënderoj menaxherët e tjerë që u përfshinë në këtë marrëveshje dhe i uroj sukses Beratit në aventurën e re”, shkroi Olsi Rama.

Kalimi i Gjimshiti në Arabi pritet t’i sigurojë kapitenit të Shqipërisë një pagë të majme, e cila raportohet të jetë më e larta mes futbollistëve të Kombëtares.

The post Olsi Rama, nga drejtimi i Partizanit te roli i rëndësishëm në transferimet drejt Arabisë appeared first on Albeu.com.

Pas dhjetë vitesh të mbushura me sfida dhe emocione të shumta, mbrojtësi shqiptar Berat Gjimshiti ka mbyllur kapitullin e tij te Atalanta dhe është ndarë nga skuadra e Bergamos.

Kapiteni i Kombëtares shqiptare zgjodhi Instagramin për të publikuar një mesazh të gjatë lamtumire, ku falënderoi të gjithë ata që kanë qenë pjesë e kësaj periudhe të rëndësishme të karrierës së tij.

“Dhjetë vjet më parë mbërrita në Bergamo si një futbollist i ri, i udhëhequr nga një ëndërr dhe nga dëshira për të treguar vlerat e mia. Sot po largohem me bindjen se ky vend më ka dhënë shumë më tepër sesa thjesht futbollin.

Këtu u rrita si lojtar, si burrë dhe si baba. Edhe familja ime u rrit në këtë qytet. Bergamo u shndërrua në shtëpinë time, ndërsa Atalanta u bë diçka shumë më e madhe se një ekip futbolli.

Gjatë këtyre dhjetë viteve kaluam së bashku fitore, humbje, mbrëmje të paharrueshme dhe gola që dikur mund t’i kishim vetëm ëndërruar. Megjithatë, ajo që do të ruaj më shumë në kujtesë janë njerëzit.

Shokët e skuadrës, trajnerët, të gjithë anëtarët e stafit, çdo person që punon për klubin, familja Percassi, tifozët tanë dhe banorët e Bergamos: ju falënderoj për besimin dhe mbështetjen tuaj, për luftën që bëtë krah nesh dhe për mënyrën se si më bëtë mua dhe familjen time të ndiheshim pjesë e diçkaje të veçantë.

Asnjë prej arritjeve tona nuk na u dhurua. Çdo gjë e ndërtuam së bashku përmes punës së palodhur, sakrificës, disiplinës, zemrës dhe atij mentaliteti që e lidh kaq fort Atalantën me qytetin e saj.

Tani nis një kapitull i ri. Por ekzistojnë vende prej të cilave njeriu nuk largohet kurrë plotësisht. Mund të ndahesh nga një skuadër apo nga një qytet, por një shtëpi të tillë e mban gjithmonë brenda vetes. Faleminderit për gjithçka, Bergamo. Faleminderit për gjithçka, Atalanta. Përgjithmonë në zemrat tona”, shkroi Gjimshiti.

The post Në Bergamo u formova si futbollist, burrë dhe baba!” Berat Gjimshiti i jep lamtumirën Atalantës me një mesazh emocionues appeared first on Albeu.com.