Ky ishte thelbi i qëndrimit që ai ndau publikisht në një video të publikuar menjëherë pas takimit me Presidentin amerikan.

“Ne pajtohemi me Presidentin Trump se Irani nuk duhet të ketë armë bërthamore. Kjo mund të ndodhë me një marrëveshje, por vetëm nëse ajo është një marrëveshje si ajo libiane – pra, të hyjnë, të shkatërrojnë objektet, të çmontojnë çdo gjë, nën mbikëqyrjen dhe zbatimin e Shteteve të Bashkuara. Përndryshe, mbetet vetëm opsioni ushtarak”, deklaroi Netanyahu.

Deklarata vjen në një moment tensioni në rritje mes Izraelit dhe Iranit, me raportime të vazhdueshme për përparime në programin bërthamor të Teheranit. Izraeli, aleati kryesor i SHBA-së në Lindjen e Mesme, ka insistuar prej vitesh se një Iran i armatosur bërthamorisht është një vijë e kuqe, dhe Netanyahu duket i vendosur ta forcojë këtë qëndrim me mbështetjen e Trump.

Referenca ndaj modelit libian, ku nën presion ndërkombëtar dhe amerikan, regjimi i Gaddafit çmontoi tërësisht programin e tij të armëve të shkatërrimit në masë, është e ngarkuar politikisht dhe e diskutueshme – por për Netanyahun, është formula e vetme e pranueshme.

Pas Iranit, tema e dytë kryesore në tryezën e bisedimeve ishte situata në Rripin e Gazës dhe lufta kundër Hamasit. Netanyahu ritheksoi vendosmërinë e qeverisë së tij për të vazhduar ofensivën ushtarake deri në eliminimin e plotë të organizatës militante palestineze.

“Ne jemi të vendosur të shkatërrojmë Hamasin, por edhe të sjellim pengjet tona në shtëpi. Diskutuam edhe vizionin e Presidentit Trump për rajonin, përfshirë kontaktet që po bëhen me disa vende që janë të gatshme të pranojnë një pjesë të popullsisë së Gazës,” tha Netanyahu.

Kjo deklaratë sugjeron një qasje të re për trajtimin e çështjes së Gazës, ku Izraeli dhe partnerët ndërkombëtarë po eksplorojnë mundësinë e zhvendosjes së banorëve, një çështje e ndjeshme që ka ngjallur debat të gjerë ndërkombëtar.

Takimi i mbrëmshëm në Shtëpinë e Bardhë është një tjetër tregues i marrëdhënies së ngushtë dhe ideologjikisht të afërt mes Donald Trump dhe Benjamin Netanyahu. Të dy liderët ndajnë qëndrime të ngjashme për politikën e jashtme, qasjen ndaj Iranit, Hamasit dhe vizionin për Lindjen e Mesme.

Ky takim dhe deklaratat që pasuan vijnë në një kontekst të tensionuar rajonal dhe ndërkombëtar, ku çdo fjalë dhe çdo paralajmërim ka potencialin të ndikojë drejtpërdrejt në zhvillimet gjeopolitike.

The post Netanyahu paralajmëron Teheranin nga Shtëpia e Bardhë: O ç’montim bërthamor, o ndërhyrje ushtarake appeared first on Albeu.com.

Zoti Biden tha të premten se kishte folur në një telefonatë me zotin Netanyahu për zgjidhjet e mundshme për krijimin e një shteti të pavarur palestinez, duke sugjeruar se një alternativë mund të ishte një qeveri e çmilitarizuar.

“Në bisedën e tij me Presidentin Biden, kryeministri Netanyahu përsëriti qëndrimin e tij se pasi Hamasi të shkatërrohet, Izraeli duhet të ruajë kontrollin e sigurisë mbi Gazën për t’u siguruar që Gaza të mos përbëjë më kërcënim për Izraelin, gjë që bie ndesh me kërkesën për sovranitetin palestinez”, thuhet në një deklaratë nga zyra e kryeministrit izraelit.

E pyetur të sqarojë nëse zoti Netanyahu është kundër çdo lloj alternative për një shtet palestinez, zyra e tij nuk u përgjigj menjëherë.

Telefonata mes dy udhëheqësve ishte e para prej gati një muaji, tha Shtëpia e Bardhë.

I pyetur nëse një zgjidhje me dy shtete ishte “e pamundur” ndërsa kryeministri Netanyahu është në pushtet, presidenti Biden tha: “Jo, nuk është”.

Presidenti u tha gazetarëve të mbledhur në Shtëpinë e Bardhë se ai beson se “ka disa lloje zgjidhjesh me dy shtete” dhe se zoti Netanyahu mund të jetë i hapur për një prej tyre.

Zoti Netanyahu nuk ka refuzuar drejtpërdrejt dhe qartë krijimin e një shteti palestinez. Por të enjten ai tha se në çdo zgjidhje në të ardhmen e parashikueshme “Izraeli duhet të ketë kontrollin e sigurisë mbi të gjithë territorin në perëndim të lumit Jordan. Ky është një kusht i domosdoshëm.

Kjo bie ndesh me parimin e sovranitetit, por nuk kemi ç’të bëjmë.”

Bisedimet e paqes të mbështetura nga SHBA drejt së ashtuquajturës “zgjidhje me dy shtete”, dështuan një dekadë më parë.

Të enjten, zëdhënësi i Departamentit të Shtetit të SHBA, Matthew Miller tha se nuk kishte asnjë mënyrë për të zgjidhur sfidat afatgjata të sigurisë të Izraelit dhe sfidat afatshkurtra të rindërtimit të Gazës pa krijimin e një shteti palestinez.

Zoti Miller tha se Izraeli kishte një mundësi tani pasi vendet në rajon janë të gatshme për të ofruar garanci sigurie për Izraelin.

The post Netanyahu, kundër qëndrimit të presidentit Biden për një shtet të ardhshëm palestinez appeared first on Albeu.com.

“Dje thashë se forcat tona mund të arrijnë kudo në Rripin e Gazës. Sot ata po rrethojnë shtëpinë e Sinwar,” tha ai . “Shtëpia e tij mund të mos jetë baza e tij kryesore dhe ai mund të shpëtojë, por është vetëm çështje kohe para se ta kapim”, theksoi Netanyahu.

Kush është Sinwar?

Yahya Sinwar ka udhëhequr Hamasin që nga viti 2017, pasi u bashkua me radhët e militantëve në fillim të viteve 1980.

Besohet se ai është arkitekti i sulmeve të 7 tetorit, ndërsa për momentin personi është më i kërkuari i Izraelit, sipas Netanyahut.

The post Lufta në Lindjen e Mesme, Netanyahu: Forcat izraelite kanë rrethuar banesën e liderit të Hamasit appeared first on Albeu.com.

Kryeministri i Izraelit, Benjamin Netanyahu tha se një marrëveshje bërthamore me Iranin nuk do të frenonte programin bërthamor të republikës islamike dhe do t’i jepte Teheranit të ardhura të mëdha që mund t’i përdorë për të mbështetur grupet militante që kundërshtojnë Izraelin.

Duke folur në një takim të kabinetit të tij, zoti Netanjahu tha se këtë qëndrim ia ka bërë të qartë edhe Sekretarit të Shtetit, Antony Blinken gjatë një bisede telefonike të enjten.

“Gjatë bisedës e theksova qëndrimin tonë të vazhdueshëm, riaktivizimi i marrëveshjes bërthamore me Iranin, nuk do të ndalonte programin bërthamor të Iranit dhe thjesht do t’i mundësonte Teheranit që t’u dërgonte shuma të mëdha parash organizatave terroriste që veprojnë me sponsorizimin e tij në Lindjen e Mesme dhe përreth kufijve të Izraelit”, tha kryeministri izraelit, Netanjahu.

Paralajmërimi i kryeministrit Netanjahu u bë ndërsa udhëheqësi suprem i Iranit, Ali Khaemeni tha të dielën se një marrëveshje me Perëndimin mbi programin bërthamor të Teheranit ishte i mundur nëse infrastruktura bërthamore e vendit do të mbetej e paprekur.

Irani dhe perëndimi patën arritur një marrëveshje në vitin 2015, por tre vjet më vonë presidenti i atëhershëm amerikan, Donald Trump doli nga pakti dhe rivendosi sanksionet që kanë dëmtuar rëndë ekonominë e Iranit.

Uashingtoni dhe Teherani iu rikthyen bisedimeve përmes palëve të tjera për të shpëtuar marrëveshjen bërthamore, por ato kanë ngecur që nga shtatori, pasi të dyja palët që akuzojnë njëra-tjetrën për kërkesa të paarsyeshme.

“Nuk ka asgjë të keqe të arrihet marrëveshje me Perëndimin, por infrastruktura e industrisë sonë bërthamore nuk duhet të preket”, tha zoti Khamenei të dielen, sipas mediave shtetërore iraniane.

Izraeli e konsideron Iranin si armikun e tij më të madh, duke përmendur thirrjet e Teheranit për shkatërrimin e Izraelit dhe mbështetjen e tij për grupet militante anti-izraelite në të gjithë rajonin.

“Gjatë bisedës me Sekretarin Blinken theksova se Izraeli nuk do t’i bindet asnjë marrëveshjeje me Iranin. Me ose pa marrëveshje, ne do të vazhdojmë të bëjmë gjithçka që është e nevojshme për të mbrojtur shtetin e Izraelit”, tha kryeministri izraelit Benjamin Netanjahu.

Tel Avivi gjithashtu e akuzon Iranin për përpjekje për të zhvilluar një bombë bërthamore, por kjo është një akuzë që Irani e mohon.

“Akuzat se Teherani kërkon armë bërthamore janë gënjeshtra dhe ata e dinë këtë. Ne nuk duam armë bërthamore për shkak të besimit tonë fetar. Përndryshe Perëndimi nuk do të ishte në gjendje ta ndalonte një gjë të tillë”, tha udhëheqësi suprem iranian, Khamenei.

Zoti Khamenei ka fjalën e fundit për të gjitha çështjet shtetërore përfshirë edhe programin bërthamor. Ai tha se autoritetet bërthamore të Iranit duhet të vazhdojnë të punojnë me mbikëqyrësin bërthamor të OKB-së, por pa iu “nënshtruar kërkesave të tepruara të Agjencisë Ndërkombëtare të Energjisë Bërthamore”.

The post Netanjahu: Izraeli nuk pranon marrëveshje bërthamore me Iranin appeared first on Albeu.com.