Gjatë takimit tête-à-tête dhe më pas në takimin mes delegacioneve, dy presidentët diskutuan mbi procesin e integrimit të Shqipërisë në Bashkimin Europian, sfidat e sigurisë si vende aleate në NATO, si edhe bashkëpunimin ekonomik mes dy vendeve.

Në konferencën e përbashkët për mediat, Presidenti Begaj vlerësoi mbështetjen e vazhdueshme të Sllovakisë për anëtarësimin e Shqipërisë në European Union, duke e cilësuar shtetin sllovak një partner dhe aleat të rëndësishëm në rrugëtimin europian të vendit.

Kreu i Shtetit deklaroi se Shqipëria ka hapur të gjithë grupkapitujt brenda një viti, duke e cilësuar këtë një ritëm rekord në procesin e negociatave, ndërsa objektivi mbetet mbyllja e tyre në vitin 2027 dhe anëtarësimi i plotë në Bashkimin Europian në vitin 2030.

“Shqipëria ka hapur për një vit të gjithë grupkapitujt, një kohë rekord, dhe synon mbylljen e tyre në vitin 2027 dhe për t’u bërë pjesë e Bashkimit Evropian si anëtare në vitin 2030”, u shpreh Presidenti Begaj, duke falënderuar Presidentin, qeverinë dhe shtetin sllovak për mbështetjen ndaj Shqipërisë në procesin e integrimit europian.

Presidenti vlerësoi gjithashtu rolin e Sllovakisë si një nga mbështetëset më aktive të Shqipërisë në procesin e anëtarësimit, duke theksuar se vendi ka ndihmuar me ekspertizë dhe mbështetje konkrete në reformat institucionale.

Dy presidentët konfirmuan vullnetin për forcimin e bashkëpunimit në fusha me interes të përbashkët si energjia, turizmi, bujqësia, shëndetësia, energjia e rinovueshme dhe tranzicioni i gjelbër. Ata theksuan nevojën për institucionalizimin e mëtejshëm të bashkëpunimit përmes marrëveshjeve ekzistuese dhe krijimit të instrumenteve të reja të partneritetit.

Në këtë kuadër, hapja e linjave direkte të fluturimit Tiranë – Bratislavë u konsiderua si një zhvillim që pritet të afrojë më tej dy popujt dhe të forcojë lidhjet mes tyre.

Sa i takon rajonit, Presidenti Begaj nënvizoi se stabiliteti i Ballkanit Perëndimor mbetet thelbësor për sigurinë e Europës dhe se integrimi europian i rajonit duhet të mbetet prioritet strategjik për Bashkimin Europian.

Duke falënderuar Sllovakinë për pjesëmarrjen me trupa në KFOR, Kreu i Shtetit shprehu besimin për një rivlerësim të qëndrimit të saj ndaj Kosovo, të paktën në mosbllokimin e rrugëtimit të Kosovës drejt organizatave ndërkombëtare.

Gjatë qëndrimit në Bratislava, Presidenti Begaj zhvilloi takime edhe me Kryeministrin Robert Fico dhe me Kryetarin e Këshillit Kombëtar të Republikës Sllovake, Richard Raši, prej të cilëve mori mbështetje për anëtarësimin e Shqipërisë në Bashkimin Europian.

Presidenti Begaj nderoi gjithashtu viktimat e komunizmit në memorialin “Porta e Lirisë”, kushtuar personave që humbën jetën duke tentuar të kalonin “Perden e Hekurt” të ish-Çekosllovakisë.

The post Presidenti Begaj pritet nga homologu sllovak Pellegrini në Bratislavë: Shqipëria synon mbylljen e negociatave në 2027 dhe anëtarësimin në BE në 2030 appeared first on Albeu.com.

Begaj thekson se ky projekt ka në themel vlera si paqja, siguria, demokracia, begatia, solidariteti dhe liria.

Ai shtoi gjithashtu se Shqipëria ndodhet më afër se kurrë integrimit në familjen evropiane, e gatshme të kontribuojë me energjinë dhe vlerat e veta në projektin evropian.

Postimi i presidentit Begaj:

Sot ne festojmë Ditën e Evropës dhe nderojmë të gjithë ata që ndërtuan dhe bënë realitet projektin e Bashkimit Evropian, i cili ka në zemër paqen, sigurinë, demokracinë, begatinë, solidaritetin dhe lirinë.

Shqipëria është sot më afër se kurrë për të qenë pjesë e familjes evropiane, e gatshme për t’i shtuar projektit evropian energjinë dhe vlerat e saj!

The post Dita e Europës, presidenti Begaj: Nderojmë ata që e bënë realitet projektin BE, Shqipëria më afër se kurrë integrimit appeared first on Albeu.com.

Begaj vlerësoi këtë partneritet si një nga historitë më të suksesshme të bashkëpunimit ndërmjet dy vendeve.

Sipas tij, ky bashkëpunim ka ndikuar drejtpërdrejt në transformimin dhe modernizimin e ushtrisë shqiptare.

Gjithashtu, Begaj theksoi se marrëdhënia me SHBA mbetet një nga shtyllat kryesore të politikës së jashtme dhe të sigurisë së Shqipërisë, duke nënvizuar se ajo ka qenë vendimtare në momente kyçe si anëtarësimi në NATO dhe forcimi i kapaciteteve mbrojtëse.

“Për Shqipërinë, partneriteti strategjik me Shtetet e Bashkuara të Amerikës është një nga gurët themelorë të politikës sonë të jashtme, të sigurisë dhe të mbrojtjes”, u shpreh ai.

Presidenti vuri në dukje se përmes trajnimeve, stërvitjeve të përbashkëta dhe mbështetjes teknike, bashkëpunimi me Gardën e New Jersey-it ka afruar Forcat e Armatosura shqiptare me standardet e NATO-s, duke i bërë ato më profesionale dhe më të ndërveprueshme.

Në fjalën e tij, Begaj u ndal edhe te sfidat aktuale të sigurisë, duke theksuar se kërcënimet që nga agresioni rus në Ukrainë, te siguria kibernetike dhe stabiliteti në Ballkanin Perëndimor kërkojnë përgjigje të përbashkëta nga aleatët.

Ai ritheksoi pozicionimin e qartë të Shqipërisë në krah të SHBA-së dhe aleancës euroatlantike, duke deklaruar se vendi mbetet i përkushtuar ndaj NATO-s dhe vlerave demokratike.

Një pjesë e rëndësishme e fjalës iu kushtua Kosovës, për të cilën Begaj theksoi se mbështetja e Shqipërisë është e përhershme dhe strategjike për stabilitetin e rajonit.

“Kosova përbën një interes madhor për Shqipërinë… mbështetja për Kosovën është e përjetshme”, u shpreh Presidenti, duke shtuar se anëtarësimi i saj në NATO dhe institucionet ndërkombëtare është i merituar.

Begaj vlerësoi gjithashtu rolin e NATO-s dhe të pranisë amerikane në rajon, duke e cilësuar atë thelbësore për paqen dhe stabilitetin në Ballkanin Perëndimor.

Në përmbyllje, Presidenti theksoi se partneriteti me SHBA nuk është vetëm institucional, por edhe njerëzor, i ndërtuar mbi besim, bashkëpunim dhe vlera të përbashkëta si liria dhe demokracia.

Ai e cilësoi këtë përvjetor si një moment jo vetëm për të reflektuar mbi arritjet, por edhe për të forcuar më tej bashkëpunimin në të ardhmen, me fokus në siguri, mbrojtje dhe zhvillim strategjik.

FJALA E PLOTË

Në marrëdhëniet shqiptaro-amerikane ka shumë momente që mund të përshkruhen me protokoll, me data dhe me dokumente zyrtare, por ka edhe momente që shpjegohen më thjesht: me një shtrëngim dore, me besim të ndërsjellë, me shërbim krah për krah dhe me miqësi që i ka rezistuar kohës. Ky është një prej atyre momenteve.

Sot nuk jemi mbledhur vetëm për të kujtuar 25 vjet bashkëpunim me Gardën Kombëtare të New Jersey-it. Jemi mbledhur për të nderuar një partneritet, një partneritet që ka prodhuar besim, profesionalizëm, siguri, dhe, mbi të gjitha, lidhje njerëzore, lidhje njerëzore midis ushtarakëve, midis institucioneve dhe midis dy popujve tanë.

Në një ceremoni si kjo, ku janë bashkë ushtarakë, diplomatë, përfaqësues institucionesh dhe media, si dhe të rinj, fjala “partneritet” nuk tingëllon si term formal. Ajo merr kuptim konkret. Sepse ky partneritet është ndërtuar në terren, është ndërtuar në stërvitje, në misione, në sfida të përbashkëta dhe në momente kur aleatët e vërtetë njihen jo nga fjalët, por nga prania, nga veprimi.

Partneriteti me Gardën Kombëtare të New Jersey-it, i nisur në vitin 2001 në kuadër të Programit të Partneritetit Shtetëror, përbën një nga historitë më të suksesshme të bashkëpunimit ushtarak dhe strategjik ndërmjet Shqipërisë dhe Shteteve të Bashkuara të Amerikës. Për 25 vite, ky bashkëpunim ka ndihmuar drejtpërdrejt në transformimin, modernizimin dhe forcimin e Forcave tona të Armatosura.

Për Shqipërinë, partneriteti strategjik me Shtetet e Bashkuara të Amerikës është një nga gurët themelorë të politikës sonë të jashtme, të sigurisë dhe të mbrojtjes.
Ai ka qenë vendimtar në momentet më të rëndësishme të historisë sonë kombëtare moderne: në konsolidimin e institucioneve demokratike, në anëtarësimin e Shqipërisë në NATO, në forcimin e kapaciteteve tona mbrojtëse dhe në orientimin e pakthyeshëm Euroatlantik të vendit.

Në këtë kuadër, partneriteti me Gardën Kombëtare të New Jersey-it zë një vend të veçantë. Ky partneritet nuk ka qenë thjesht një bashkëpunim teknik midis dy strukturave ushtarake. Ka qenë një marrëdhënie besimi, profesionalizmi dhe solidariteti.
Përmes trajnimeve, edukimit ushtarak, mbështetjes teknike, stërvitjeve të përbashkëta dhe angazhimeve operacionale, ky partneritet ka ndihmuar që Forcat tona të Armatosura të afrohen gjithnjë e më shumë me standardet më të mira të NATO-s.

Sot, Forcat e Armatosura të Shqipërisë janë më profesionale, më të ndërveprueshme dhe më të përgatitura për të përmbushur detyrimet e tyre kombëtare dhe aleate.
Ky është rezultat i përkushtimit të ushtarakëve tanë, i vizionit të institucioneve tona dhe i mbështetjes së vazhdueshme të partnerëve tanë amerikanë.

Dua të shpreh mirënjohjen për të gjithë ushtarakët shqiptarë dhe amerikanë, për ata burra dhe gra në uniformë, shqiptarë dhe amerikanë, që kanë shërbyer së bashku në misione ndërkombëtare, në Afganistan, Irak, Kosovë dhe në angazhime të tjera në shërbim të paqes dhe sigurisë. Përvoja të tilla nuk krijojnë vetëm aftësi ushtarake. Ato krijojnë besim, krijojnë respekt, krijojnë miqësi dhe krijojnë kujtesë të përbashkët.

Stërvitjet e përbashkëta, përfshirë serinë “Defender Europe”, kanë dëshmuar nivelin e lartë të bashkëpunimit tonë dhe aftësinë për të vepruar si aleatë të vërtetë. Ato kanë treguar se Shqipëria nuk është vetëm përfituese e sigurisë kolektive, është aleat i besueshëm, por edhe kontribuuese aktive në të. Vendi ynë e ka marrë seriozisht rolin e tij në NATO dhe është i vendosur të vijojë të investojë në mbrojtje, në infrastrukturë strategjike, në kapacitete mbrojtëse moderne dhe në gatishmëri operacionale.
Në këtë kohë krizash dhe pasigurish, siguria është më parësore se kurrë. Për Shqipërinë, NATO duhet të mbetet e fortë, aktive dhe e bashkuar, ndërsa Shtetet e Bashkuara të Amerikës mbeten partneri ynë strategjik. Sfidat që kemi përballë: nga agresioni rus në Ukrainë, te kërcënimet hibride, nga siguria kibernetike, te stabiliteti i Ballkanit Perëndimor, nuk janë sfida të një vendi të vetëm. Ato janë sfida të përbashkëta dhe kërkojnë përgjigje të unifikuara.

Shqipëria e ka bërë zgjedhjen e saj strategjike. Ajo qëndron me Shtetet e Bashkuara, me NATO-n dhe me botën demokratike. Dhe nëse dikush kërkon të gjejë një vend pro-amerikan në rajonin tonë, do ta gjejë gjithmonë në Shqipëri, në Kosovë dhe kudo ku ka shqiptarë. Ne ishim me Shtetet e Bashkuara të Amerikës në koalicionin antiterror, jemi edhe sot me Shtetet e Bashkuara të Amerikës në nismën e Samitit për Paqen.

Kosova përbën një interes madhor për Shqipërinë dhe për stabilitetin e të gjithë rajonit. Mbështetja për Kosovën është e përjetshme. Kosova e ka vendin në NATO dhe anëtarësimi i saj në institucionet ndërkombëtare është i merituar. Ne vlerësojmë rolin e NATO-s, të KFOR-it dhe veçanërisht udhëheqjen amerikane në garantimin e një mjedisi të sigurt, të lirisë së lëvizjes dhe të paqes në Kosovë. Për Shqipërinë, prania amerikane në rajon nuk është vetëm e rëndësishme. Ajo është strategjike. Ajo është e domosdoshme për të ardhmen Euroatlantike të Ballkanit Perëndimor.

Por partneriteti me Gardën Kombëtare të New Jersey-it ka ende shumë potencial për t’u zgjeruar. Arsimi ushtarak, stërvitjet e përbashkëta, mbrojtja kibernetike, modernizimi i kapaciteteve tokësore, ajrore dhe detare, si dhe zhvillimi i infrastrukturës strategjike janë hapësira ku bashkëpunimi ynë mund dhe duhet të marrë dimensione të reja.

Shqipëria ka shumë për të ofruar dhe shumë për të ndërtuar së bashku me partnerët e saj amerikanë. Infrastruktura strategjike, kapacitetet mbrojtëse, Baza Ajrore Taktike e Kuçovës, porti i Porto Romanos, projektet në fushën e transportit dhe korridoret rajonale të lidhjes janë pjesë e një vizioni më të gjerë: një vizioni të një Shqipërie më të fortë, më të sigurt dhe më të dobishme për Aleancën.
Por, mbi të gjitha, ky partneritet mbetet i fortë sepse ka në themel njerëzit. Ka në themel ushtarakët që mësojnë nga njëri-tjetri, drejtuesit ushtarakë që planifikojnë së bashku, familjet e tyre që mbështesin ata që shërbejnë, shtetet dhe shoqëritë tona që besojnë në të njëjtat parime: në liri, demokraci, dinjitet njerëzor dhe përgjegjësi ndaj paqes.

Tek e fundit, partneriteti me Gardën Kombëtare të New Jersey-it është një nga mënyrat më konkrete se si miqësia shqiptaro-amerikane është kthyer në kapacitet, në siguri, profesionalizëm dhe besim të ndërsjellë.

Në emër të Republikës së Shqipërisë, dëshiroj të shpreh mirënjohjen më të thellë për Shtetet e Bashkuara të Amerikës, për shtetin e New Jersey-it, për Gardën Kombëtare të New Jersey-it dhe për të gjithë ata që kanë kontribuar në këtë histori suksesi!

Le të jetë ky 25-vjetor jo vetëm një kremtim i së shkuarës, por edhe një zotim për të ardhmen.

Një zotim për më shumë bashkëpunim.
Një zotim për më shumë siguri.
Një zotim për një Aleancë edhe më të fortë mes Shqipërisë dhe Shteteve të Bashkuara të
Amerikës.
Gjenerale Mays,
Faleminderit shumë që jeni sot këtu!
Ne shqiptarët kemi një thënie: “Shtëpia e shqiptarit është e mikut dhe e Zotit”. Ju jeni në shtëpinë tuaj këtu.
Ambasadore, faleminderit për gjithçka që keni bërë!
Një përshëndetje të veçantë për të rinjtë që na janë bashkuar sot.
Ata janë e ardhmja që do të forcojë miqësinë shqiptaro-amerikane.
Zoti e bekoftë miqësinë shqiptaro-amerikane!
Faleminderit!

The post Presidenti Begaj: Partneriteti me SHBA në themel të sigurisë, Kosova prioritet strategjik appeared first on Albeu.com.

Dita e Dëshmorëve e ka origjinën në 5 maj 1942, dita kur u vra heroi i popullit, Qemal Stafa, një nga figurat më të shquara të qëndresës antifashiste shqiptare.

Kjo datë simbolizon jo vetëm humbjen e një figure të re e të guximshme, por edhe sakrificën e një brezi të tërë që luftoi për lirinë e atdheut.

Pas shpalljes së Pavarësisë më 1912 e deri me 1945, shteti shqiptar nuk krijoi një status ligjor për dëshmorët e Atdheut. Gjatë luftës Nacionalçlirimtare, nisen përpjekjet e para, për të nderuar dëshmoret e rënë në fushat e betejave. Pas çlirimit, më 28 gusht 1945, kryesia e Këshillit Antifashist Nacionalçlirimtar, miratoi ligjin Nr. 109 “Mbi shpërblimin e familjeve të dëshmorëve dhe invalidëve të Luftës Antifashiste Nacionalçlirimtare”. K

y ligj sanksiononte trajtimin e familjeve të patriotëve që kishin luftuar e rënë për atdheun edhe para Luftës Antifashiste Nacionalçlirimtare, në kohën e Rilindjes Kombëtare, në luftërat për pavarësi, duke shënuar kështu përpjekjen e parë për një ligj integral për dëshmorët e Atdheut.

Në vitet ´60-të statusi i dëshmorit përpunohet më tej dhe zgjerohet, duke specifikuar termin ”Dëshmor i Atdheut”. Në këtë ligj futen edhe Varrezat e Dëshmorëve të Atdheut, të cilat u ndërtuan në të gjitha qendrat e rretheve të vendit.

Me 1992-1993, me ndërrimin e sistemit politik, pësoi ndryshime edhe statusi i Dëshmorit të Atdheut. Në vitin 2000, pas shumë përpjekjeve u miratua ligji Nr. 8607 datë 27.04, “Statusi i Dëshmorit të Atdheut”, në të cilin përfshihen dëshmorët e të gjitha periudhave historike, madje edhe të rënët në vitet 1997-1999, në Shqipëri dhe në Luftën Çlirimtare të Kosovës.

The post Sot Dita e Dëshmorëve/ Politika ceremoni nderimi pranë monumentit “Nëna Shqipëri”, të pranishëm Begaj dhe Rama appeared first on Albeu.com.

Urimi i Begajt:

“Faleminderit çdo njeriu punëtor që, me përkushtim, sakrificë dhe ndershmëri, e bën çdo ditë më të begatë Shqipërinë”, shkruan Presidenti Begaj.

The post Dita Ndërkombëtare e Punëtorëve/ Urimi i Presidentit Begaj: Faleminderit çdo njeriu punëtor, e bëni çdo ditë Shqipërinë më të begatë appeared first on Albeu.com.

Në këtë aktivitet, Kreu i Shtetit nderoi brezat që kanë shërbyer ndër vite në Forcën Ajrore, duke kujtuar komandantin e parë Edip Ohri si edhe 43 Dëshmorët e Kombit që humbën jetën në krye të detyrës. Ai vlerësoi rrugëtimin e aviacionit ushtarak, duke e cilësuar atë si një histori transformimi që ka ndjekur zhvillimin e vetë Shqipërisë.

Begaj theksoi se Forca Ajrore ka kaluar nga një periudhë izolimi dhe teknologjie të kufizuar drejt standardeve të Aleancës së Atlantikut të Veriut, duke u kthyer në një element kyç të sigurisë kombëtare dhe asaj kolektive.

Sipas tij, modernizimi i Forcës Ajrore përmes pajisjes me helikopterë Black Hawk, zhvillimit të kapaciteteve të mbrojtjes ajrore nga toka, ngritjes së detashmentit të avionëve pa pilotë dhe ndërtimit të një sistemi të integruar të vëzhgimit ajror përfaqëson një kapitull të ri për mbrojtjen e vendit. Ai nënvizoi gjithashtu transformimin e bazës së Kuçovës në një bazë taktike ajrore të NATO-s.

Duke iu referuar situatës ndërkombëtare dhe konflikteve në Ukrainë dhe Lindjen e Mesme, Presidenti theksoi se mbrojtja kolektive është një domosdoshmëri dhe kërkon përkushtim dhe gatishmëri të vazhdueshme. Në këtë kuadër, ai rikonfirmoi angazhimin e Shqipërisë për të arritur objektivin e rritjes së buxhetit të mbrojtjes deri në 5 për qind të Prodhimit të Brendshëm Bruto deri në vitin 2035, në përputhje me vendimet e NATO-s.

Si Komandant i Përgjithshëm i Forcave të Armatosura, Begaj shprehu mbështetjen e tij të plotë për Forcën Ajrore dhe vlerësoi rolin e efektivëve, pilotëve, teknikëve dhe specialistëve të tjerë, duke i cilësuar ata si trashëgimtarë të denjë të një historie 75-vjeçare.

Në përfundim të ceremonisë, Presidenti ndoqi edhe një demonstrim ajror të Forcës Ajrore, ku u përfshinë fluturime të avionëve F-16 të NATO-s si dhe të flotës së helikopterëve të bazës ajrore të Farkës.

The post 75 vite Forca Ajrore, Presidenti Begaj nga Kuçova: Aviacioni ushtarak hyn në një kapitull të ri modernizimi appeared first on Albeu.com.

Shqipëria, prej vitit të kaluar, është anëtare e asociuar e kësaj nisme që synon forcimin e ndërlidhshmërisë, inovacionit, infrastrukturës dhe konkurrencës industriale.

Në fjalën e tij, Presidenti bëri apel për rezultate konkrete që përshpejtojnë zhvillimin ekonomik rajonal dhe integrimin në Bashkimin Evropian, duke theksuar se Ballkani Perëndimor nuk është më periferi, por një front strategjik i Evropës.

Begaj e cilësoi këtë iniciativë si një histori suksesi që është shndërruar në një platformë konkrete për zhvillim, duke prodhuar lidhje reale, investime reale dhe ndikim real.

Ai nënvizoi se Evropa ndodhet në një moment vendimtar, ku sfidat gjeopolitike, pasiguria ekonomike dhe transformimet në energji dhe teknologji kërkojnë jo vetëm koordinim, por edhe lidership dhe vizion.

Në lidhje me procesin e integrimit, Presidenti theksoi se zgjerimi i Bashkimit Evropian është një investim për një Evropë më të sigurt dhe më konkurruese.

Duke folur për Shqipërinë, Begaj vuri në dukje rëndësinë e ndërlidhshmërisë dhe projekteve infrastrukturore, duke i cilësuar ato si instrumente transformimi që krijojnë stabilitet dhe tërheqin investime.

Ai rikonfirmoi objektivin strategjik të vendit për anëtarësimin në Bashkimin Evropian deri në vitin 2030, duke e cilësuar atë si busullën kryesore të zhvillimit.

Në fund, Presidenti theksoi se rëndësi ka realizimi konkret i angazhimeve dhe jo vetëm deklaratat.

Presidenti i Republikës përfaqësoi për herë të dytë Shqipërinë me statusin e shtetit partner të asociuar në këtë samit.

Në deklaratën e miratuar në Dubrovnik u theksua se zgjerimi i Bashkimit Evropian është një investim strategjik për paqen, sigurinë dhe begatinë në Evropë, duke kërkuar një proces pranimi të bazuar në meritë, të besueshëm dhe të parashikueshëm për vendet kandidate, me referencë të veçantë për Shqipërinë.

The post Presidenti Begaj, në Samitin e Nismës së Tre Deteve: Integrimi i rajonit është kyç për të ardhmen e Evropës appeared first on Albeu.com.

Begaj shprehu solidaritet të plotë me presidentin amerikan Donald Trump, Zonjën e Parë Melania Trump dhe popullin amerikan.

“Dënoj fuqishëm sulmin e armatosur ndaj Presidentit të SHBA dhe Zonjës së Parë gjatë darkës së korrespondentëve të Shtëpisë së Bardhë. Në një demokraci, dallimet zgjidhen përmes ideve dhe dialogut, jo përmes forcës”, u shpreh Begaj.

Ai theksoi se akte të tilla të dhunshme cenojnë vlerat themelore demokratike dhe janë të papranueshme.

The post Sulmi me armë në darkën ku ishte Donald Trump, Presidenti Begaj: Solidaritet të plotë me popullin amerikan appeared first on Albeu.com.

Në reagimin e tij, Kreu i Shtetit, merr si referencë edhe veprën “Panteoni i rralluar”, duke e lidhur largimin e Qoses me zgjerimin e boshllëkut dhe mungesën e figurave të këtij niveli në jetën kulturore dhe intelektuale shqiptare.

“Një akademik i rrallë iku nga Panteoni… Rexhep Qosja ishte një nga mendjet më të bukura të kulturës dhe mendimit shqiptar.

Ngushëllimet më të sinqerta familjes së tij, të afërmve dhe miqve. Pusho në paqe, Profesor!”, shprehet Begaj.

The post Ndarja nga jeta e akademikut Rexhep Qosja/ Presidenti Begaj mesazh ngushëllimi: Ishte një nga mendjet më të bukura të kulturës dhe mendimit shqiptar appeared first on Albeu.com.

Në fjalën e tij përpara studentëve dhe pjesëmarrësve, Begaj ndau reflektime mbi historinë dhe demokracinë amerikane, duke theksuar se “ëndrra amerikane” vijon të mbetet një model i arritshëm dhe frymëzues.

Ai e prezantoi rrugëtimin e tij personal si një dëshmi të ndryshimeve që ka përjetuar Shqipëria, duke u shprehur: “Jam një mjek që u bë ushtarak, e më pas presidenti i një vendi që kaloi pesë dekada duke ndërtuar mure për të mbajtur larg qytetarëve të vet idetë si liria dhe qeverisja demokratike”.

Gjithashtu, kreu i Shtetit u ndal te origjina e konceptit të “ëndrrës amerikane”, duke kujtuar se ajo lindi 250 vite më parë në Filadelfia si një ide mbi dinjitetin njerëzor, e cila vijon të sfidojë dhe frymëzojë shoqëritë edhe sot.

Ai solli në vëmendje edhe izolimin ekstrem të Shqipërisë gjatë komunizmit, duke theksuar se regjimi ndërtoi rreth 750 mijë bunkerë për të mbajtur qytetarët larg ndikimeve të jashtme, por pavarësisht kësaj “ëndrra amerikane depërtoi jo me leje, por me dëshirë të madhe”.

Begaj rikujtoi edhe momentet e vitit 1991, kur shqiptarët dolën në rrugë për liri dhe jo për ideologji, ndërsa theksoi se Shqipëria zgjodhi Shtetet e Bashkuara si partner strategjik real që në fillimet e demokracisë.

Në fjalën e tij, Presidenti vuri theks te rëndësia e institucioneve demokratike dhe kulturës së debatit, duke u shprehur se një institucion bëhet më i fortë kur sfidohet nga brenda.

Ai u shpreh optimist për të ardhmen, duke theksuar se; “përgjigjja është ende po, ëndrra amerikane është ende e arritshme”, ndërsa për vende si Shqipëria ajo ka shërbyer si një busull orientimi.

Në përfundim të fjalës së tij, ai u bëri thirrje të rinjve që ta mbajnë gjallë këtë ideal, duke e cilësuar si dëshmi se liria funksionon.

Gjatë qëndrimit në Teksas, Presidenti Begaj, zhvilloi takime me përfaqësues të autoriteteve vendore dhe u nderua me “Çelësin e Qytetit” nga Bashkia e Conroe-s.

Ai kreu gjithashtu homazhe në Memorialin e Veteranëve në Montgomery County, ku përfshihen edhe emrat e shqiptaro-amerikanëve që kanë shërbyer në ushtrinë amerikane, si dhe vizitoi varrin e ish-Presidentit Xhorxh Bush.

The post Presidenti Begaj nga Teksasi: Ëndrra amerikane vijon të jetë një busull për Shqipërinë appeared first on Albeu.com.