Takimi i parë u mbajt në Njësinë Administrative Qukës, ku banorët u shprehën njëzëri kundër mundësisë së bashkimit të Bashkisë Prrenjas me Bashkinë Librazhd.

Gjatë debatit, qytetarët renditën arsye ekonomike, gjeografike dhe administrative për të kundërshtuar zgjerimin e mëtejshëm territorial të njësisë së tyre vendore.

Sipas tyre, largimi i qendrës administrative do të krijonte pengesa në marrjen e shërbimeve publike. Banorët vlerësuan se distancat më të mëdha do ta bënin më të vështirë aksesin në institucionet lokale, si edhe do të shtonin kostot dhe vështirësitë logjistike për pajisjen me dokumente dhe shërbime bazë.

Në dëgjesë u theksua gjithashtu nevoja për të mbrojtur identitetin dhe përfaqësimin lokal. Qytetarët argumentuan se çdo riorganizim territorial duhet të respektojë veçoritë e komuniteteve dhe të sigurojë një administratë sa më të afërt me banorët.

Përveç kundërshtimit të bashkimit të mundshëm me Librazhdin, pjesëmarrësit shprehën kritika të ashpra edhe për mënyrën e zhvillimit të konsultimeve.

Disa banorë e konsideruan dëgjesën një “fasadë” dhe “farsë të radhës”, duke vlerësuar se Komisioni i Posaçëm Parlamentar duhej të kishte konsultuar komunitetet në terren përpara përgatitjes së drafteve ose propozimeve për ndryshimin e hartës administrative.

Vëmendje iu kushtua edhe deputetëve që përfaqësojnë zonën në Kuvendin e Shqipërisë. Banorët kërkuan që ata të mbajnë një qëndrim të qartë dhe të përcjellin në procesin parlamentar vullnetin e shprehur nga komuniteti.

Sipas qytetarëve, deputetët e zonës duhet të marrin parasysh kundërshtimin e tyre dhe, nëse propozimi për bashkimin e bashkive kalon për votim në Kuvend, të votojnë kundër.

Në përfundim të dëgjesës, banorët e Qukësit kërkuan që çdo argument dhe qëndrim i paraqitur në takim të reflektohet i plotë në procesverbalin zyrtar dhe t’u dërgohet institucioneve përgjegjëse.

Ata kërkuan që konsultimi publik të mos trajtohet si një formalitet, por që mendimi i komunitetit të merret realisht parasysh në vendimin përfundimtar për Reformën Administrative Territoriale.

Konsultimet do të vazhdojnë edhe në njësitë e tjera administrative të Bashkisë Prrenjas. Qëndrimi i banorëve të Qukësit përbën reagimin e parë publik në këtë seri dëgjesash ndaj propozimit për një riorganizim të mundshëm territorial.

The post Banorët e Prrenjasit refuzojnë bashkimin me Librazhdin: Kërkojnë respektimin e zërit të komunitetit appeared first on Albeu.com.