Bashkimi Demokratik për Integrim ka dalë me reagim për zhvillimet rreth Ligjit për Përfaqësim të Drejtë dhe Adekuat, duke pretenduar se propozimi i koalicionit VLEN nuk siguron përfaqësim të drejtë të shqiptarëve në institucionet shtetërore.

Sipas BDI-së, VLEN është bërë pjesë e Qeverisë “pa legjitimitet etnik” dhe për më shumë se dy vjet e ka promovuar këtë ligj si arritje historike. Partia opozitare vlerëson se teksti i propozuar nuk përfshin instrumente që do të garantonin zbatimin e përfaqësimit të drejtë dhe adekuat.

BDI pretendon se ligji është dërguar për procedurë pa kuota etnike, pa mekanizma institucionalë për zbatim dhe pa masa ndëshkuese ndaj atyre që e shkelin. Sipas saj, një zgjidhje e tillë nuk krijon garanci të vërteta për ruajtjen e të drejtave të shqiptarëve.

Partia thekson gjithashtu se projektligji nuk e ka marrë shumicën e kërkuar në Kuvend sipas parimit të Badenterit, gjë që, sipas BDI-së, tregon se ai nuk ka mbështetjen e deputetëve shqiptarë.

“BDI e bllokoi këtë përpjekje për të legalizuar cenimin e të drejtave të shqiptarëve dhe do ta bllokojë çdo herë kur të tentohet që diskriminimi të paketohet si ligj”, thuhet në reagimin e partisë.

Në përmbyllje, BDI shprehet se do të vijojë angazhimin për mbrojtjen e të drejtave kolektive të shqiptarëve dhe respektimin e standardeve kushtetuese, duke iu referuar edhe parimeve të Marrëveshjes së Ohrit.

The post BDI: Projektligji për përfaqësim të drejtë nuk u jep garanci shqiptarëve appeared first on Albeu.com.