Në kuadër të takimit, dy ministrat firmosën dy marrëveshje bashkëpunimi, të orientuara drejt përparimit të politikave të përbashkëta në sektorin agro-ushqimor, ngritjes së standardeve për sigurinë ushqimore, veterinarinë dhe fitosanitetin, si edhe forcimit të koordinimit mes institucioneve.

Ministria e Bujqësisë bëri të ditur se marrëveshjet përfshijnë edhe zgjerimin e bashkëpunimit në zhvillimin rural, përkrahjen e fermerëve përmes politikave bujqësore dhe skemave financiare, si dhe përafrimin e mëtejshëm me standardet dhe praktikat e Bashkimit Evropian.

Modernizimi i sektorit mbetet një nga drejtimet kryesore të këtij bashkëpunimi, përmes digjitalizimit të shërbimeve bujqësore, fuqizimit të kapaciteteve në kërkim shkencor, inovacion dhe transferim të teknologjive bashkëkohore, me qëllim rritjen e efikasitetit dhe konkurrueshmërisë.

Sipas Ministrisë së Bujqësisë, këto marrëveshje shënojnë një hap me rëndësi në forcimin e partneritetit strategjik ndërmjet Kosovës dhe Shqipërisë, duke ndikuar në zhvillimin e qëndrueshëm të bujqësisë, rritjen e sigurisë ushqimore dhe përmirësimin e mirëqenies së komuniteteve rurale në të dy vendet.

The post Kosova dhe Shqipëria thellojnë partneritetin në bujqësi, firmosen dy marrëveshje bashkëpunimi appeared first on Albeu.com.

Gjatë këtij takimi, vëmendje e veçantë iu kushtua shkëmbimit të përvojave institucionale, trajtimit të rasteve me karakter ndërkufitar dhe fuqizimit të mekanizmave të bashkëpunimit për çështje që prekin drejtpërdrejt qytetarët e të tria shteteve.

Avokati i Popullit në Kosovë, Naim Qelaj, vuri në pah rëndësinë që ka koordinimi ndërinstitucional dhe ndarja e përvojave mes institucioneve homologe.

Sipas tij, bashkëpunimi në nivel rajonal krijon mundësi për trajtim më efikas të rasteve dhe për adresim më të shpejtë të sfidave që lidhen me të drejtat e njeriut, veçanërisht kur ato kanë natyrë ndërkufitare.

“Shkëmbimi i përvojave tregon ku është rajoni, jo vetëm ku është vendi respektiv dhe mundëson marrjen e veprimeve konkrete në adresimin e çështjeve prioritare për të drejtat e njeriut. Bashkëpunimi nënkupton edhe ofrimin e shërbimeve të ndërsjella në situata kur qytetarët përballen me vështirësi në shtetet respektive”, tha Qelaj.

Ai bëri të ditur se mes temave kryesore të trajtuara në këtë takim trepalësh ishin problemet me dokumentacionin, të drejtat civile dhe mundësia për ngritjen e mekanizmave të përbashkët për monitorimin e zbatimit të marrëveshjeve shtetërore. Gjithashtu, ai theksoi se vëmendje e posaçme duhet t’u kushtohet edhe shërbimeve shëndetësore për qytetarët që lëvizin mes këtyre shteteve.

Nga ana tjetër, Avokati i Popullit në Shqipëri, Endrit Shabani, nënvizoi kufizimet territoriale që kanë institucionet dhe domosdoshmërinë e një bashkëpunimi të ngushtë për trajtimin e rasteve ndërkufitare.

Ai përmendi raste konkrete kur qytetarë të Kosovës marrin shërbime në Shqipëri dhe hasin vështirësi institucionale, duke theksuar se koordinimi mes zyrave të Avokatit të Popullit mbetet thelbësor për mbrojtjen efektive të të drejtave të tyre.

“Ne kemi krijuar dhe po krijojmë pika kontakti dhe mekanizma bashkëpunimi për të trajtuar me prioritet ankesat që vijnë nga qytetarët e tri vendeve”, tha Shabani.

Ai shtoi se problematikat ndërkufitare lidhen edhe me pronat, proceset gjyqësore, marrëdhëniet familjare mes personave me shtetësi të ndryshme, si dhe me çështje mjedisore, përfshirë ndotjen e lumenjve të përbashkët mes shteteve.

Ndërkohë, Avokati i Popullit në Maqedoninë e Veriut, Faton Selami, mbështeti forcimin e koordinimit rajonal, duke e cilësuar atë si një hap të rëndësishëm drejt arritjes së standardeve më të larta për mbrojtjen e të drejtave të qytetarëve në rajon.

Në fund, në takim u theksua se ky bashkëpunim rajonal nuk ka për synim vetëm trajtimin e rasteve individuale, por edhe ngritjen e mekanizmave të qëndrueshëm të bashkëpunimit institucional, të cilët do të mundësojnë reagim më të shpejtë dhe më efektiv ndaj shkeljeve të të drejtave të njeriut.

The post Avokatët e Popullit të Kosovës, Shqipërisë dhe Maqedonisë së Veriut kërkojnë forcim të bashkëpunimit rajonal appeared first on Albeu.com.