“3 mijë euro për rrahjen, ‘bonuse’ nëse do kishte thyerje…”

26 vjeçari rrëfeu me detaje si e rekrutuan grupet kriminale për të bërë gjymtime dhe djegie makine me para’. Ai thotë se një i njohuri i tij, duke parë vështirësitë që po kalonte, i sapo kthyer me ekspuls nga emigrimi, pa punë, me një fëmijë të vogël, e ka joshur për të kryer vepra penale. Personi ndërmjetës, ose sekseri, jetonte në Durrës dhe quhej Klodian.

“Klodiani i dinte vështirësitë e mia të jetesës. Isha pa punë, me expuls nga jashtë. Me fëmijë të vogël, pa shtëpi. Ai më ofroi një ‘punë’ që duhet ta kryeja në Lushnje. Më tha se disa të njohur të tij e kanë kontaktuar për të rrahur dhe gjymtuar një person. Duke parë vështirësitë e mia, pranova. Klodiani do më siguronte një makinë, ndërsa për rrahjen do më jepte 3 mijë euro. Nëse personit do t’i thyeja ndonjë gjë, shuma do të rritej. Gjithashtu këtij personi do t’i digjja dhe makinës dhe çmimi ishte 1000 euro. Bashkë me Klodianin u nisa në Lushnje në fillim të muajit shtator 2022. Takuam një person tjetër, s’m’u prezantua me emër, por kishte një servis te rrethrrotullimi i Grabianit. Ky person donte që unë të rrihja një shtetas tjetër, që kishte dhënë me qira një karburant. Karburanti dhe servisi i porositësve ishin afër” pohon 26 – vjeçari.

Më tej pohon se bashkë me Klodianin (ndërmjetësin) dhe porositësin shkojnë për të parë makinën që do digjte. Ishte e tipit “Hyundai” dhe ishte parkuar te karburanti. “Më pas, më tregoi lëvizjet e personit që o të rrihja dhe do të gjymtoja. Ishte rreth 60-65 vjeç dhe aktualisht ai ishte në arrest shtëpie. Por, ai lëvizte me biçikletë dhe shkonte nga tokat. Unë do e prisja afër një nënkalimi të Unazës së Lushnjes ku s’kishte lëvizje. Për këtë do më paguanin 3 mijë euro. Ndërkohë, të njëjtët persona më treguan edhe banesën e objektivit, e cila ishte në afërsi të Stacionit të Trenit në Lushnje, një shtëpi përdhese” pohon 26 vjeçari.

“Porositësi më dha foto dhe video të objektivit, më tregoi adresat”

Në rrëfim, i riu që banon në Durrës, pohon se është nisur në Lushnjë pasditen e datës 7 shtator 2022. “Kam ikur me dyshime, pasi kam mësuar se, nëse i bëja të gjitha këto, do më paguanin vetëm 1 mijë euro dhe do më bënin presion që të bëja punë të tjera. Kam pritur afër autostradës dhe në orët e vona ka kaluar një makinë policie dhe më ka pikasur. Më kanë shoqëruar në polici dhe atje unë kam treguar të gjithë planin. Madje, ndërmjetësin, porositësit dhe objektivin. Këta më kishin dhënë foto dhe video të objektivit. Por, Policia e Lushnjes më shumë më bënte mua presion se personave të tjerë që shoqëroi, porositësit. Në prani të policëve më ka marrë Klodiani dhe më tha se ‘puna do mbaruar’. Kam të gjitha komunikimet në telefon që ma sekuestroi policia. Unë nuk i njoh me emra porositësit, por kanë një servis te rrethrrotullimi i Grabianit. Edhe emrin e objektivit nuk e di” vijoi ai.

Më tej shton se ka qendruar vetëm një natë në polici, ku ka treguar gjithçka. “Madje, kam shoqëruar policinë te servisi, karburanti, vendin ku do bëja rrahjen. Pastaj, policia më ka lënë të lirë afër servisit të porositësve, më dhanë 4 mijë lekë të vjetra për rrugë. Më pas, s’më kanë lajmëruar për asnjë gjë. Policia më mori makinën që e kisha me qira, portofolin dhe telefonin” thotë ai.

Të nesërmen, bashkë me të riun, gazetarët e Fiks Fare shkojnë te vendet në Lushnje, ku do kryhej rrahja, te karburanti, servisi dhe shtëpia e objektivit. Fillimisht, ai çon grupin e Fiks Fare në afërsi të një nën kalimi në Unazën e Lushnjes, rrugë e cila të çon nga arat. “Këtu do të kryeja rrahjen. Te ky nënkalim” thotë ai. Vendi është një rrugë e pashtruar, ndërsa përdoret nga banorët e zonës që e dinë atë si vend për të kaluar nga tokat. “Personi do të vinte me biçikletë” vijon 26 – vjeçari. Më pas, u tregon edhe banesën e objektivit, e cila është një shtëpi përdhese në afërsi të Stacionit të Trenit në Lushnje. I riu e çon grupin e Fiksit edhe te servisi dhe karburanti, të cilat janë anës rrugës Rrogozhinë-Lushnje. Madje, u tregon edhe automjetin “Hyundai”, të cili do e digjte, automjet i cili është në pronësi të familjes së objektivit.

Gazetarët e Fiks Fare interesohen te karburanti, për të pyetur nëse kanë apo jo ndonjë konflikt të hapur. Punonjësit u tregojnë se pronari i karburantit dhe i një servisi aty pranë janë grindur. “Nuk flasin fare, janë zënë me sherr. Kjo i ka sjellë me hekur me levë, i ka nxjerrë sytë. Jo ç’je ti, ç’jam unë. U kap duke i sjellë me hu e nuk e di mirë historinë. Një të vajtur e ankuar ky (pronari i servisit) i hëngri m… e mori gruaja përsipër. Gjuajti burri, e mori gruaja e para. Ndëjti nja gjashtë muaj arreste shtëpie, doli” thonë ata.

Shefi i krimeve, “të penduarit”: Mos rri si i dh…, dilu para!

Në rrëfimin e tij, 26 vjeçari, shprehu rezerva për sjelljen e punonjësve të Policisë së Lushnjes për hetimin e këtij rasti. Madje, ai nuk është rimarrë në pyetje apo të paktën Policia e Lushnjes të njoftonte policinë e qytetit ku ai banon.

Pas këtij rrëfimi, denoncuesi shkon në Komisariatin e Policisë së Lushnjes për të pyetur se çfarë veprimesh janë bërë. Në hyrje të komisariatit, ai takon pronarin e makinës, të cilën ia ka sekuestruar policia. Më pas, shkon te Shefi i Krimeve dhe bisedon fillimisht për makinën. Oficeri i thotë se makinën do ia japë pronarit. Ndërkohë, i riu i shpreh shqetësimin për rrezikun që i kanoset, pasi ka bashkëpunuar me policinë. Por, shefi i Krimeve i thotë “mos u bëj budalla, dilu para”. Më tej ai i thotë se si quhej porositësi, ndërsa i riu ia tregon edhe njëherë. Shefi e mëson që mos të ketë frikë dhe të vijojë të jetojë i qetë pasi “kjo gjë është bërë”. “Mos rri si i dh… Mos u bëj budalla, s’ka ndodhur ndonjë gjë. Kjo që ndodhi, ndodhi” i thotë, ndërsa nga bashkëbisedimi duket sikur shefi është “shoku” dhe jo një inspektor policie. Madje, nuk i merr asnjë të dhënë se ku jeton apo të lajmërojë policinë lokale të vendbanimit të bashkëpunëtorit.

Pas indiferentizmit të Policisë së Lushnjes, bashkëpunëtori i policisë niset drejt Prokurorisë së Lushnjes, ku kërkon prokurorin. Ai pyet fillimisht në sekretari dhe i thonë një emër prokurori. Shkon në zyrën e prokurorit dhe prokurori i thotë “s’kam kohë, do të thërras vetë”.

Bisedat e denoncuesit në Komisariatin e Policisë së Lushnjes

Denoncuesi – Desha me taku…

Oficeri i rojes – Kë do takosh?

Denoncuesi – Atë shefin e madh.

Oficeri i rojes – Si ti them?

Denoncuesi –Thuaj ka ardhur ai çuni nga Durrësi.

Oficeri i rojes – A ke shqetësime?

Denoncuesi – Po kam shqetësime sa të duash, prandaj desha ta takoj.

Oficeri i rojes – Si e ke emrin?

Denoncuesi – F …

Oficeri i rojes – (Flet në telefon) Shefi, është paraqitur F…  do të llafoset me ty.

Polici – O F… hajde me mua te Shefi i Krimeve. Shefi i Krimeve.

Shefi i krimeve – Hë çfarë ke?

Denoncuesi – Kanë ardhur njerëz plot aty, ça të bëj?

Shefi i krimeve – Ku kanë ardhur njerëz?

Denoncuesi – Edhe tek porta, edhe tek shtëpia.

Shefi i krimeve – Po nuk të vjen njeri mo burrë, je në terezi. Nuk ja mban bytha njeriu mos ja fut kot. Po çfarë njerëzish, ty s’të kanë gjetur, ky ka ardhur e të ka kërkuar i makinës.

Denoncuesi – Edhe të tjerë. Kam ikur nga shtëpia.

Shefi i krimeve – Kush të tjerë?

Denoncuesi – Nuk e di nuk i njoh. Prandaj kam vendosur të flas me ju, thashë të paktën të ma gjeni një mbrojtje ju. Është kapur ai ?

Shefi i krimeve – Kush?

Denoncuesi – Klodiani?

Shefi i krimeve – Klodiani jo, s’na punojnë as kompjuterët mirë. Pa shihe një herë, ky është Klodiani?

Denoncuesi -Jo, jo, jo është tjetër.

Shefi i krimeve – Ik ore mos ki frikë, mos ki frikë se nuk do të bëj asgjë njeri.

Denoncuesi – Po me këtë të makinës, çfarë do bëhet?

Shefi i krimeve – Po do ia japim mo burrë. Ka ardhur ai çuni, më takoj mua. Do marrë makinën më tha, po i thashë do ta marrësh.

Denoncuesi -A është me gjobë makina?

Shefi i krimeve – Po çfarë gjobe është pa gjobë. Nëqoftëse është me letra të rregullta, nuk ka punë gjobe. Ti Klodianin takoje o burrë, pse nuk e takon Klodianin?

Denoncuesi – S’kam me ça me e taku.

Shefi i krimeve – Po ai të ka marrë në telefon?

Denoncuesi – Po telefonin e keni ju .

Shefi i krimeve – Ne sekuestruam telefonin?

Denoncuesi – Po e keni telefonin, portofolin, patentën, të gjitha i keni.

Shefi i krimeve – Po ti s’ke qenë në shtëpi, ty të ka kërkuar, ku do të takonte Klodiani? Ore ik e takoje Klodin, thuaj kusht, kusht.

Denoncuesi – Po kam frikë.

Shefi i krimeve – Pse se sqaron more burrë.

Denoncuesi – Po kam frikë.

Shefi i krimeve – Po çfarë frike, ça do të bëj, ça do të bëj?

Denoncuesi – Ku i dihet ça do të bëjë?

Shefi i krimeve – Sa budalla je, ku i dihet. Ore ti do ti thuash nuk e bën dot. Kështu, kështu ndodhi tani ça do bëj?

Denoncuesi – Përderisa vijnë me njerëz edhe tek shtëpia.

Shefi i krimeve – O hu, po vinë për të kërkuar për tu sqaruar për çfarë po vjen edhe ky (pronari i makinës që ka marrë me qira) po vinte për të sqaruar makina ku është? Për ça do vijnë për të sqaruar? Sqaroj gjërat more burrë, se kur i le kështu ti bredh kotë. Ti thua kam frikë, po nga se ke frikë? Të ka kërcënuar Klodi?

Denoncuesi – Me Klodin nuk jam takuar asnjëherë.

Shefi i krimeve – Këtë po them , ti pa u takuar, ti po thua po më vijnë tek shtëpia.

Denoncuesi – Po më vijnë përditë tek shtëpia.

Shefi i krimeve – Po takohu pra me njerëzit, thuaj ça kini, ku e kini hallin? Mos u bëj budalla, thuaj më kapen atje. Thuaj me dhunë me ashtu, pastaj qenka e vërtetë se këta kishin konflikt kështu thuaj mos e … Dëgjon ore.

Denoncuesi – Po.

Shefi i krimeve – Tani mos bëj se kam frikë të rri në shtëpi, ça do të bëjnë tek shtëpia?

Denoncuesi – Po tek shtëpia kanë ardhur njerëz, aty duke më kërkuar.

Shefi i krimeve – Po pra të thashë, ka ardhur ky sepse të kërkonte makinën. Tani po vjen e merr makinën. Ai boti ka ardhur për të sqaruar ore si do t’ia bëjmë? Ti do ta sqarosh atë kështu, kështu është puna. Unë s’e bëj atë punë, mbaroj filmi. Ça do të bëjë? Pse nuk e ashtu …

Denoncuesi -T’ju dalë para unë?

Shefi i krimeve – Po pra dilu, ça ka?

Denoncuesi – Kam ikur edhe nga shtëpia.

Shefi i krimeve – Nuk ke ça të ikësh nga shtëpia, se kot po e bën këtë tragjike. Ik atje përballu me ta dhe thuaju kështu, kështu ishte puna duke vajtur për atje, më kapen. Më bën ashtu, ça ka? Ti e ke faktin, ja je brenda në polici. Çfarë, se po bëj çudi, jo po më erdhi tek shtëpia, jo po bën kot. Ti sqaroj o vëlla, kështu është puna. Mos rri si i dh…. Thuaj kështu është puna, vajta për ta bërë. Ça do bëja, nuk e bëra dot, më kapen. Ça, ça do? Këta ta thashë edhe atë ditë që ishim këtu. Kështu, kështu! Takoje Klodin, thuaj kështu, kështu muhabeti. Siç më more mua në telefon merre edhe atë. E do numrin?

Denoncuesi – Po ma jep numrin.

Shefi i krimeve – Na numrin e Klodit. Ke telefon aty tani?

Denoncuesi – Kam telefon.

Shefi i krimeve – Ja merre kështu, kështu thuaj ti.

Denoncuesi -Po s’kam ofertë.

Shefi i krimeve – Mbaje këtë atje dhe o Klodi thuaj unë u tremba dhe ika qëndrova pak ditë andej se nuk e dija si do vejë.

Denoncuesi – Po e hapi telefonin, ta marrë në telefon ça të bëj?

Shefi i krimeve – Fol një herë, sqaroje mo burrë. Ç’punë ke në qoftë se pastaj të kërcënon a të bën ndonjë gjë merr një herë Durrësin, pastaj thuaj çfarë halli ke. Kështu bëje, boll ndëjte si i trembur, si i dh…

Denoncuesi – Po si i trembur se di…

Shefi i krimeve – Mbaroj ajo punë, u bë ça u bë kështu thuaj siç të thashë unë. Bëje bindëse, mos rri …

Denoncuesi – Po bindëse.

Shefi i krimeve – Thuaj kështu më thanë, do kishe vajtur me kohë, ke qëndruar kot.

Denoncuesi – Kam ndenjur i fshehur.

Shefi i krimeve – Ik atje o vëlla, se duke u fshehur do të thotë që siç the këtu o Klod kështu, kështu muhabeti. Dakord?

Denoncuesi – Në rregull.

Shefi i krimeve – Ik.

Denoncuesi – Mirupafshim.

Denoncuesi shkon te Prokuroria e Lushnjes

Denoncuesi – Si jeni?

Roja i prokurorisë – Mirë si je?

Denoncuesi – Kam bërë një denoncim në polici, që kam qenë shtyrë për ti rënë dikujt. Më kanë mbajtur patentën, telefonin, të gjitha.

Roja i prokurorisë – Kush prokuror e ka?

Denoncuesi – Vetëm se më thanë, ka ardhur patenta …

Roja i prokurorisë – Kush të tha?

Denoncuesi – Policia.

Roja i prokurorisë – Kush polic? Emri i policit?

Denoncuesi – Po s’ia di emrin.

Roja i prokurorisë – Po qysh, kotë në të … ? Sa ke që ta kanë bllokuar?

Denoncuesi – Ka një javë.

Roja i prokurorisë –Ti do të dish se kush e ka çështjen?

Denoncuesi – Kush e ka?

Roja i prokurorisë – Jepi emrin kësaj vajzës.

Sanitarja – Ja ta marrë pak atë gocën.

Roja i prokurorisë – Do të dish kush e ka marrë, kush prokuror? Çfarë emri ke?

Denoncuesi – F …

Roja i prokurorisë – Klaudja, një F… shiko kush e ka marrë nga prokurorët. Shikoje një herë me emër? Prokuror, Skënder Mistani. Do takosh atë.

Takimi me prokurorin

Denoncuesi – Si jeni? Ju jeni Skënderi?

Prokurori – Po.

Denoncuesi – Mua më kanë bllokuar patentën edhe ato …

Prokurori – Qa të quajnë ty?

Denoncuesi – F…

Prokurori – Po mbiemrin?

Denoncuesi – S…

Prokurori – Ëhë, kam gjyqe sot dhe s’kam kohë të merrem … (i mbyll derën).

The post “Zbërthehet” bashkëpunëtori të drejtësisë: 3 mijë euro rrahja, 1 mijë djegia e makinës, si më rekrutuan appeared first on Albeu.com.

Sipas gazetarit Elton Qyno, i cili shkruan për “OraNews”, Alla është dorëzuar në polici, duke marrë në telefon inspektorin e zonës dhe pasi ka shkuar në policinë e Durrësit, ka kërkuar takim vetëm me Tonin Vocaj, Drejtorin e Policisë Kriminale në Policinë e Shtetit. Alla thotë se tek policia e Durrësit s’kishte besim tek askush me frikën se mund të informonin Nuredin Dumanin, ndaj ka kërkuar takim personal me Tonin Vocajn. Këtij të fundit i ka rëfyer të gjithë ngjarje e vrasjes së Besmir Hashia, Viktor Haxhia, Dorian Shkozës dhe Anxhelo Avdisë.

Por edhe pse ka qëndruar për gati 1 orë me Tonin Vocajn, duke i shtuar dhe frikën e ankthin se mos ndiqej nga Dumani, Alla sërish ka gënjyer. Ai ka gënjyer në dëshminë e dhënë dhe kjo vihet në dukje qartësisht në deklarimin e dhënë në datën 30 prill 2020.

Në dëshminë e parë që ka dhënë me procesverbal-deklarimi, vetëm pak çaste nga takimi me Tonin Vocaj, Alla nuk ka përmendur në asnjë moment Nuredin Dumanin. Një gjë të tillë e ka kryer edhe në dëshminë e dytë, duke mos e përfshirë vrasësin me pagesë, por përmend një emër Ilir që thirret me nofkën “Bubi”. Për këtë të fundit, edhe sot nuk ia ka përmendur emrin se për cilin e ka fjalën.

Më pas, tregon se vetëm një ditë pas krimit të dyfishtë së 27 Prillit 2020, policia kishte shkuar në banesën e tij, duke shoqëruar dhe marrë në pyetje babain e tij, Xhemal Allën, i cili punonte si mbledhës skrapi në Durrës. Dëshmia ndryshon sërish në datën 26 shkurt 2021, duke përmendur më në fund edhe Dumanin.

Në dëshminë e katër, Klevis Alla, u thotë prokurorëve Altin Dumani dhe Doloreza Musabelliu, se: …ju kam njoftuar sot për të dëshmuar dhe një herë rreth ngjarjes, pasi u sigurova plotësisht që unë do jem në programin e mbrojtjes si bashkëpunëtor i drejtësisë, dhe se në lidhje me ngjarjen kam për të saktësuar dhe shtuar disa momente…

Sipas dëshmisë të Allës, Nuredin Dumani kishte “të infiltruar” në Policinë e Durrësit, e merrte informacione me detaje për çdo gjë. Për të vërtetuar atë që thoshte Alla përmend vjedhjen e një makinë në emër të një personi, të identifikuar si Arben.

“…sapo dola nga Komisariati i Policisë, mora makinën që kisha parkuar para policisë dhe nxora telefonin “IPhone 7”-të, të kriptuar i cili kishte të instaluar programin “SKY Chat”. Sapo e kam ndezur më ka ardhë një sms në “Sky Chat” nga Nuredini dhe më thotë: “…Meqë mbarove punë tek policia, eja se po të pres tek shtëpia. Unë akoma nuk e di se nga e kishte marrë vesh Nuredini, se unë kisha qenë në polici atë moment. Kur shkova aty më tha se: “…makinën ML e kam vjedhur unë…”, më tha mos e vrit trurin se nuk të gjen asgjë…kujtoj se mbas dy ditësh, Nuredini duke parë se pronari i automjetit ML dyshonte te unë dhe më tha: “…kam folë me çunat dhe nuk është e përshtatshme ML-ja, me ba atentatin, e kemi gjet një tjetër tek shokët e mi dhe të Talos. Më tha se makina që kishin gjetur, ishte në Elbasan. Sqaroj se makinën ML e lamë në Arapaj, në një rrugicë të cilën me sa kam marë vesh brenda në burg, e ka gjetur më pas policia….”

Madje bashkëpunëtori Klevis Alla tregon se lëvizjet e tij në polici, kontrolloheshin edhe pas vrasjes së Besmir dhe Viktor Haxhisë

“…një ditë pas ngjarjes, kam shkuar sërish tek shtëpia dhe sapo hyra në oborr të shtëpisë takova mamin tim, e cila ishte e shqetësuar sepse kishte ardhë policia dhe kishte marrë babin tim në komisariatin e Policisë Durrës. Jam veshur, kam marrë rreth 200 Euro me vete dhe kam ikur nga shtëpia. Sapo kam dalë nga banesa më ka telefonuar Nuredini edhe në aplikacionin “Whatsapp” dhe në telefon dhe më ka thënë “…ik largohu, se sa më morën në telefon dhe më informuan…”, pasi ai kishte marrë informacion nga dikush nga policia, se e kishin shoqëruar babën tim në Policinë e Durrësit dhe ai ishte i trembur…”-tregon Alla.

Sipas Allës ai nuk e ka zbatuar porosinë e Dumanit për t’u fshehur, por ka shkuar tek shtëpia e një shokut të tij në Plazh, dhe pasi ka qëndruar aty 1 natë, të nesërmen është larguar drejt banesës së tij në zonën e Nishtullës. E po ashtu tregon sesi me të atin kishte shkuar në Policinë e Durrësit.

“…kur shkova në Nishtulla, takova babin tim, nuk e kujtoj se ku e kam takuar, por ai më tregoi se e kishin shoqëruar dhe kërkonin të dinin vendodhjen time ditën e ngjarjes. I kam thënë babait, se si ishte puna duke i treguar se isha i përzier edhe unë në vrasjen e vëllezërve Haxhia, pasi ato çunat kishin pasur tek puna ime një makinë të tyren. U ndava me babin dhe i thash se do flasim për çdo gjë, si do vepronim dhe çfarë do bënim. Kam telefonuar policin e lagjes dhe i kam thënë ku je? Kujtoj se jemi takuar me policin e zonës afër gjykatës së apelit në Shkozët. Së bashku me babin, kemi hipur në makinën e policit dhe kemi shkuar në Komisariatin e Policisë Durrës. Kur kam shkuar në polici, ju kam thënë drejtuesve së dua të flas në prani të Drejtorit të Krimeve, Z.Tonin Voci, të cilit ja kam shpjeguar të gjithë ngjarjet siç është në deklarim, por edhe në deklarimet e mëparshme…”-tregon bashkëpunëtori Klevis Alla.

Klevis Alla, në dëshminë e tij e kujton kështu momentin kur ditën e 27 Prillit 2020, grupi ndezi dritën jeshile për tu hedhur në aksion dhe vrarë, Besmir Haxhinë. Sipas tij “Toyota” ndodhej e mbyllur prej disa ditësh në servisin e tij, ndërsa këtë mjet ai e kishte pastruar me alkool për të humbur çdo gjurmë të mundshme gishti.

“…unë kam ikur në këmbë nga shtëpia ime deri tek servisi im. Kam marrë makinën tip “Toyota” dhe jam nisur për tek mbikalimi në autostradë, që ka një urë hekuri që ikën për tek kisha e “Shën Vlashit”. Kur isha tek ura e hekurit, kam telefonuar Nuredinin dhe ai më tha, “…erdha erdha…”. Nuredini ро vinte nga shtëpia e tij me Benzin tim sepse ai nuk kishte makinë. Ka ardhë Nuredini, i cili ishte në timon të makinës time, i shoqëruar edhe me shtetasit Talo Çela dhe Altin Ndoci, ku ishin të maskuar me maska të zeza. Talo Çela, kishte një maskë si ajo që kishte perdorur Admir Murati, në grabitjen e bërë në Rinas…”. Alla thotë se ata kanë zbritur nga makina tip Benz, që e lanë afër autostradës dhe më pas hipën të tre në makinën “Toyota” dhe u nisën direkt, në zonën ku kishin planifikuar të bënin vrasjen, duke kryer ekzekutimin e dy vëllezërve Besmir dhe Viktor Haxhia.

Megjithatë Alla nuk është më i besueshëm sepse dëshmitë e tij nuk përputhen më me ato të bashkëpunëtorëve, Nuredin Dumani dhe Henrik Hoxhaj. Këta të fundit marrin përsipër, se kanë organizuar dhe kryer vrasjen e Besmir Haxhia, Viktor Haxhia, Dorian Shkozës dhe Anxhelo Avdisë, duke përjashtuar pjesëmarrjen në këto 4 vrasje Talo Çelën dhe Altin Ndocin. E Alla nga ana tjetër, në kulmin e hasmërisë mes tyre, pretendon se Çela dhe Dumani kanë qenë bashkë në një makinë për të vrarë së bashku. Por fakti që Alla përmend Ndocin dhe Çelën si protagonistë në këtë vrasje, ka ngritur dyshime nga prokurorët e SPAK se ai mund të jetë mësuar dhe kërcënuar nga Nuredin Dumani, para se Alla të paraqitej me këmbët e veta në policinë e Durrësit. Tani hetuesit po hetojnë edhe për dëshmitë e tyre, ndaj njëri prej të dyve, ose Dumani-ose Alla, mund të humbë statusin dhe privilegjet e të penduarit të drejtësisë.

The post “Jam veshur, kam marrë rreth 200 Euro me vete, ML e kam vjedhur unë”, rrëfehet Klevis Alla: Ja çfarë po bënte Dumanin appeared first on Albeu.com.