Sipas Raportit Vjetor të Mbikëqyrjes për 2025-ën, kontrollet u intensifikuan për shkak të natyrës së këtij aktiviteti, i cili operon me sasi të mëdha parash fizike dhe ka kontakt të drejtpërdrejtë me publikun. Si rezultat, u vendosën gjoba administrative ndaj 201 zyrave, njërës iu dha një paralajmërim, dhe 83 subjekteve iu hoq e drejta e ushtrimit të veprimtarisë.

Në të njëjtën periudhë, autoriteti mbikëqyrës licencoi edhe 33 pika të reja, duke e çuar rënien neto në 50 subjekte, ose rreth 8% më pak se në fund të vitit 2024. Ky është tkurrja e parë domethënëse pas gati një dekade rritjeje të pandërprerë, ku numri i zyrave ishte rritur nga 397 në 2015 në një kulm prej 642 subjektesh në 2024, për të rënë më pas në 592 në fund të 2025-ës.

Mangësitë kryesore të identifikuara gjatë inspektimeve lidhen me zbatimin e plotë të masave të vigjilencës së duhur dhe të zgjeruar ndaj klientëve. Në disa raste, subjektet nuk kishin sisteme të centralizuara për mbledhjen dhe analizimin e informacionit, ndërsa dokumentimi i kontrolleve kundrejt listave të sanksioneve paraqiste dobësi të theksuara.

Gjithashtu, raporti vë në dukje probleme serioze në ruajtjen e dokumentacionit dhe në procesin e analizimit të burimeve të fondeve, duke kompromentuar përpjekjet për të parandaluar pastrimin e parave dhe financimin e terrorizmit.

The post Banka e Shqipërisë revokon 83 licenca të këmbimit valutor për shkelje dhe evazion appeared first on Albeu.com.

Sipas Raportit të Mbikëqyrjes së Bankës së Shqipërisë, në mbyllje të vitit 2025 vlera e përgjithshme e depozitave u ngjit në 1.8 trilionë lekë, duke reflektuar një rritje prej 9.1% në krahasim me një vit më parë.

Burimi kryesor i financimit për bankat mbeten kursimet e qytetarëve dhe të bizneseve, pasi mbi 80% e burimeve të sistemit bankar sigurohen nga depozitat e klientëve.

Gjatë vitit të kaluar është forcuar edhe prania e depozitave në monedhën vendase, të cilat kanë arritur në 49% të totalit. Paralelisht, qytetarët janë orientuar më shumë drejt depozitave me afat, sidomos atyre afatgjata, duke treguar një prirje për t’i mbajtur kursimet në banka për periudha më të gjata.

Sa i takon shpërndarjes së depozitave, të dhënat tregojnë se dhjetë depozituesit më të mëdhenj mbajnë rreth 7.5% të totalit, një peshë më e lartë se ajo e një viti më parë.

Ndërkohë, individët vijojnë të zotërojnë pjesën më të madhe të kursimeve, me rreth 78% të totalit të depozitave. Rritja më e shpejtë është shënuar te sektori privat dhe te individët, ndërsa depozitat e sektorit publik janë zgjeruar me ritme më të përmbajtura.

Edhe marrëdhënia mes kredive dhe depozitave ka vazhduar të ngjitet. Në fund të vitit 2025, ky tregues arriti në 51.5%, nga 49.6% një vit më parë, çka tregon se bankat po vënë në punë një pjesë më të madhe të kursimeve të mbledhura për të financuar ekonominë, duke ruajtur njëkohësisht nivele të qëndrueshme likuiditeti.

Në lekë, raporti kredi-depozita mbetet më i lartë se në valutë, duke treguar se huadhënia në monedhën vendase vazhdon të mbështetet më fort te kursimet e mbledhura në të njëjtën monedhë.

The post Shqiptarët mbajnë 1.8 trilionë lekë kursime në banka, 10 depozituesit më të mëdhenj kanë 7.5% të totalit appeared first on Albeu.com.