Presidentja e Komisionit Evropian, Ursula von der Leyen, këtë javë do të vizitojë katër vende të Ballkanit Perëndimor: Shqipërinë, Kosovën, Malin e Zi dhe Maqedoninë e Veriut.

Udhëtimi nis të mërkurën, më 30 shtator, në Tiranë, sipas agjendës së publikuar nga Komisioni Evropian. Aty Von der Leyen pritet të takohet me drejtuesit më të lartë të vendit, përpara se më 1 tetor të vijojë drejt Prishtinës.

Në Kosovë, presidentja e Komisionit Evropian do të zhvillojë takime të veçanta me ushtruesen e detyrës së Presidentes, Albulena Haxhiu, dhe kryeministrin Albin Kurti. Po atë ditë, ajo do të ndalet edhe në Podgoricë për bisedime me drejtuesit e Malit të Zi mbi procesin e integrimit evropian.

Shkupi është ndalesa e fundit e turneut, më 2 tetor. Gjatë qëndrimit në Maqedoninë e Veriut, Von der Leyen do të takohet me udhëheqësit e vendit. Në diskutimet e vizitës do të trajtohen hapat e radhës drejt anëtarësimit të vendeve të rajonit në Bashkimin Evropian dhe përparimi i integrimit të tyre gradual, bëri të ditur Komisioni Evropian.

Në fokus do të jetë gjithashtu Plani i Rritjes për Ballkanin Perëndimor, nismë përmes së cilës BE-ja synon të mbështesë ekonomitë e rajonit dhe afrimin e tyre me tregun e strukturat e unionit. Ky është turneu i gjashtë i Ursula von der Leyen në Ballkanin Perëndimor.

Gjatë vizitave, Von der Leyen pritet të shohë edhe projekte që financohen nga Bashkimi Evropian. “BE nuk është e plotë pa Ballkanin Perëndimor”, deklaroi ajo në Samitin e Ballkanit Perëndimor të BE-së në qershor, duke vënë në pah rëndësinë që Komisioni Evropian i jep zgjerimit.

Vizita zhvillohet ndërsa Bashkimi Evropian po përpiqet të përshpejtojë afrimin e Ballkanit Perëndimor me unionin. Ndërkohë, vendet e rajonit vijojnë reformat dhe përpjekjet për të çuar përpara integrimin evropian.

The post Von der Leyen në Shkup më 2 tetor: “BE nuk është e plotë pa Ballkanin Perëndimor appeared first on Albeu.com.

Administrata e presidentit amerikan Donald Trump po ndryshon destinacionin e dhjetëra milionë dollarëve të parashikuar si ndihmë ushtarake për disa shtete të Evropës dhe Lindjes së Mesme, duke i kaluar këto fonde te vende të Amerikës Qendrore dhe Jugore.

Sipas njoftimit që Departamenti amerikan i Shtetit i ka dërguar Kongresit, 52 milionë dollarë nga fondet për financimin e ushtrive të huaja do të rialokohen. Shuma, e cila fillimisht ishte caktuar për Sllovakinë, Maqedoninë e Veriut, Tunizinë dhe Irakun, do t’i drejtohet Panamasë, Perusë, Ekuadorit dhe Kolumbisë, raportoi AP.

Ky hap pason vizitën që sekretari amerikan i Shtetit, Marco Rubio, zhvilloi javën e kaluar në Kolumbi, Ekuador dhe Peru. Gjatë qëndrimit të tij atje, Rubio premtoi vazhdimin e mbështetjes së Shteteve të Bashkuara për këto vende.

Zhvendosja e fondeve bëhet në kuadër të një rivlerësimi më të gjerë të politikave të sigurisë nga administrata Trump. Uashingtoni ka shkurtuar ose ka transferuar një pjesë të fondeve dhe trupave nga Evropa, ndërsa Trump i ka kritikuar vazhdimisht aleatët e NATO-s se nuk shpenzojnë mjaftueshëm për mbrojtjen.

Mes shteteve të prekura nga riorganizimi financiar janë Maqedonia e Veriut dhe Sllovakia, të cilat janë anëtare të NATO-s. Megjithatë, kjo masë nuk do të thotë se financimi ushtarak amerikan për Sllovakinë, Maqedoninë e Veriut, Tunizinë dhe Irakun do të ndërpritet tërësisht.

Ende nuk është bërë publike shuma e saktë që do t’u mbetet këtyre katër vendeve pas rialokimit. Sidoqoftë, ndryshimi tregon një drejtim të ri të administratës Trump, të përqendruar te forcimi i bashkëpunimit në fushën e sigurisë me shtetet e Amerikës Latine.

The post SHBA-ja zhvendos 52 milionë dollarë ndihmë ushtarake nga Evropa dhe Lindja e Mesme, preket edhe Maqedonia e Veriut appeared first on Albeu.com.