Një shtetas nga Irani ka paraqitur kërkesë për azil në Kosovë, pas ndalimit të tij në Aeroportin Ndërkombëtar të Prishtinës “Adem Jashari”.

Policia e Kosovës bëri të ditur se gjatë kontrollit, më 18 gusht, ai kishte përdorur një pasaportë të lëshuar nga Belgjika.

Gjatë marrjes në pyetje, shtetasi iranian pranoi se dokumenti i përkiste një personi tjetër. Ai deklaroi gjithashtu se ishte nga Irani dhe se nuk kishte me vete dokumente personale.

Para autoriteteve, ai tha se në Iran ndihej i rrezikuar.

Fitim Zariqi, drejtor i Qendrës për Azil, konfirmoi për Radion Evropa e Lirë se kërkesa për azil ishte dorëzuar nga shtetasi iranian.

“Ka parashtruar kërkesë për azil edhe shqyrtohet kërkesa prej Ministrisë së Punëve të Brendshme”, deklaroi Zariqi.

Ai sqaroi se procedura e shqyrtimit mund të zgjasë deri në gjashtë muaj, ndërsa afati mund të zgjatet edhe me tre muaj.

“Po zakonisht nuk zgjat më shumë se mesatarisht dy muaj e gjysmë, apo tre”, tha Zariqi.

Ende nuk është bërë e ditur se nga cili shtet kishte udhëtuar iraniani për në Kosovë.

Radio Evropa e Lirë pret përgjigje nga Policia e Kosovës lidhur me mënyrën e udhëtimit të tij, gjendjen e rastit dhe nëse ndaj tij është ngritur ose jo ndonjë procedurë penale. / REL

The post Shtetasi iranian ndalohet në Prishtinë dhe kërkon azil në Kosovë appeared first on Albeu.com.