Në Botërorin 2026, ai hyri sërish në historinë e futbollit irakian, pasi u bë vetëm lojtari i dytë nga Iraku që arrin të shënojë në një Kupë Bote. Goli i realizuar prej tij ndaj Norvegjisë në minutën e 39-të riktheu përkohësisht baraspeshën, përpara se Erling Haaland të shënonte dy herë për skandinavët.

Por, përpara se të dilte në skenën më të madhe të futbollit botëror, Hussein hasi në një përvojë të vështirë në Shtetet e Bashkuara.

Raportimet bëjnë të ditur se ai u mbajt për shtatë orë në aeroportin ndërkombëtar O’Hare të Çikagos, ku iu nënshtrua një verifikimi të hollësishëm nga autoritetet kufitare amerikane.

Si pjesë e procedurës, zyrtarët kontrolluan edhe fotografitë që ai kishte në telefon, përpara se t’i lejonin hyrjen në vend. Autoritetet amerikane thanë se rasti kishte të bënte me një “vlerësim individual në përputhje me ligjet e emigracionit dhe sigurisë, si dhe me çështjet e identifikuara gjatë inspektimit”.

Ky rast nxiti reagime të shumta në media dhe në rrjetet sociale. Romain Molina, gazetari i njohur i The Guardian, e kritikoi trajtimin që iu bë futbollistit irakian, duke e krahasuar me mënyrën se si merret në pyetje një person i dyshuar për terrorizëm.

“Ai iu nënshtrua një interviste shtatëorëshe sapo mbërriti në SHBA dhe u trajtua si një ‘terrorist i mundshëm’. Aymen Hussein është irakian dhe dukej sikur kjo mjaftonte për t’i mohuar të drejtat e tij”, shkroi Molina.

Kjo histori bëhet edhe më e dhimbshme kur merret parasysh e kaluara personale e lojtarit.

Babai i tij, një ish-oficer ushtarak, u vra në vitin 2008 në një sulm terrorist të Al-Qaedas, ndërsa vëllai i tij u rrëmbye nga pjesëtarë të ISIS-it. Trupi i këtij të fundit nuk është gjetur kurrë.

Pikërisht për këtë, mënyra se si Hussein u trajtua në hyrje të SHBA-së u pa nga shumë njerëz si veçanërisht e padrejtë, duke qenë se familja e tij ka qenë vetë viktimë e terrorizmit.

The post Nga protagonisti i Irakut në Botëror te ndalimi si i dyshuar për “terrorizëm” – Aymen Hussein u mbajt shtatë orë nga autoritetet amerikane appeared first on Albeu.com.

Futbollisti 30-vjeçar shënoi golin e vetëm të irakianëve në këtë ndeshje dhe hyri në historinë e përfaqësueses si autori i golit të dytë të Irakut në Kupat e Botës. Deri më tani, i vetmi lojtar që kishte realizuar për Irakun në këtë kompeticion kishte qenë Ahmed Radhi në Botërorin e vitit 1986.

Me rrjetën e tundur ndaj Norvegjisë, Hussein shkoi në 33 gola me fanellën e kombëtares, duke u renditur mes realizuesve më të spikatur në historinë e futbollit irakian.

Por rruga e tij nuk lidhet vetëm me arritjet në fushë.

Aymen Hussein u rrit në Al Safra, një fshat pranë Kirkukut, në një kohë të shënuar nga lufta dhe dhuna. Kur ishte 12 vjeç, humbi të atin, i cili shërbente në ushtrinë irakiane dhe u vra nga militantët e Al-Kaedës ndërsa po blinte materiale ndërtimi për shtëpinë e familjes.

Më pas, familja e tij u godit sërish nga një tjetër tragjedi e rëndë. Sipas raportimeve, vëllai i madh i Hussein u rrëmbye nga anëtarë të ISIS-it dhe nuk u kthye më kurrë.

Shtëpia që i ati kishte nisur të ndërtonte mbeti për vite të tëra e papërfunduar. Në një intervistë për FIFA-n, Hussein kishte treguar se dëshira e tij më e madhe nuk ishte futbolli, por të siguronte para të mjaftueshme për ta përfunduar shtëpinë që babai kishte lënë përgjysmë.

Vite më pas, ai u shndërrua në njeriun që udhëhoqi Irakun drejt një kualifikimi historik në Kupën e Botës, duke i siguruar vendit paraqitjen e parë në turneun më të madh të futbollit pas katër dekadash të plota.

Ndonëse Iraku u mposht nga Norvegjia në takimin e parë, goli i Aymen Hussein mbetet një moment i rëndësishëm për futbollin irakian dhe një kapitull tjetër frymëzues në jetën e një lojtari që ka përballuar sprova të jashtëzakonshme jashtë fushës.

The post Nga tragjeditë familjare te goli historik i Irakut në Kupën e Botës, rrëfimi i Aymen Hussein appeared first on Albeu.com.