Avokati i Popullit, Faton Selami, qëndroi sot në Institucionin Ndëshkues-Përmirësues – Burgu i Shkupit në Shutkë, ku zhvilloi takime me drejtuesit e institucionit dhe me disa prej të burgosurve që kanë ngritur pretendime për ushtrim dhune gjatë kontrollit të djeshëm.

Siç njoftoi Zyra e Avokatit të Popullit, Selami bashkë me ekipin e Mekanizmit për Kontroll Civil u takua me drejtorin e burgut, Boban Utkovski, si edhe me zëvendësdrejtorin Baki Mustafi, për të siguruar informacion më të hollësishëm mbi kontrollin e realizuar nga pjesëtarët e Njësisë së Intervenimit të Policisë së Burgjeve, që është nën kompetencën e drejtpërdrejtë të Drejtorisë për Ekzekutimin e Sanksioneve.

Gjatë kësaj vizite, Avokati i Popullit zhvilloi biseda të drejtpërdrejta edhe me disa të burgosur që kanë qenë subjekt i kontrollit.

Në qendër të këtyre bisedimeve ishte mënyra se si kanë vepruar pjesëtarët e njësisë gjatë kontrollit, konkretisht nëse janë zbatuar procedurat dhe standardet e parashikuara në aktet përkatëse, si dhe nëse ka pasur tejkalim të autorizimeve zyrtare apo përdorim të forcës së tepërt.

Zyra e Avokatit të Popullit bëri të ditur se gjatë ditës së sotme ekipi i Mekanizmit për Kontroll Civil do të vijojë hetimin për këtë rast, ndërsa pas përmbylljes së verifikimeve, Avokati i Popullit do ta njoftojë opinionin për gjetjet dhe hapat që do të ndërmerren.

The post Avokati i Popullit në Burgun e Shutkës, në verifikim ankesat për dhunë ndaj të burgosurve appeared first on Albeu.com.

Avokati i Popullit ka dalë me reagim pas njoftimeve se disa të burgosur janë lënduar gjatë një kontrolli të zhvilluar në INK Burgu “Shkup” (Shutkë), si rrjedhojë e ndërhyrjes së Njësisë për Intervenime të Policisë së Burgjeve.

Institucioni njoftoi se, menjëherë pasi mori informacionet për incidentin, sot ka nisur një ekip nga Mekanizmi për Kontroll Civil, i cili do të kryejë inspektim në burg për të sqaruar rrethanat e ngjarjes.

“Avokati i Popullit, pas informacioneve të marra se gjatë një kontrolli të kryer nga Njësia për Intervenime e Policisë së Burgjeve, e cila është nën kompetencën e drejtpërdrejtë të Drejtorisë për Ekzekutimin e Sanksioneve, në INK Burgu ‘Shkup’ janë lënduar disa persona, sot dërgoi një ekip nga Mekanizmi për Kontroll Civil me qëllim që të kryejë inspektim”, thuhet në reagim.

Nga ky institucion theksojnë se, pasi të mblidhen të gjitha faktet dhe të konstatohet gjendja faktike, publiku do të njoftohet për përfundimet e inspektimit dhe gjetjet që lidhen me këtë rast.

The post Pas aksionit në Burgun e Shutkës, Avokati i Popullit dërgon ekip për inspektim në terren appeared first on Albeu.com.

Afeti nga Shkupi prej 25 vitesh rezulton zyrtarisht si i vdekur, ndonëse është gjallë dhe për vite me radhë ka zhvilluar pa sukses një përballje me institucionet për të dëshmuar se jeton, megjithëse shteti e ka fshirë prej kohësh.

Pasi nuk arriti të gjente zgjidhje në këtë ngërç institucional, ai iu drejtua për ndihmë Avokatit të Popullit.

Në raportin e Avokatit të Popullit, të përcjellë nga “Fokus”, thuhet: “Duke vepruar në kuadër të kompetencave të tij kushtetuese dhe ligjore për mbrojtjen e të drejtave të qytetarëve, Avokati i Popullit veproi sipas një ankese të paraqitur më 24.01.2023 nga një qytetar nga Shkupi, i cili ka zhvilluar procedura para disa autoriteteve për më shumë se shtatë vjet për t’u fshirë nga regjistri i vdekjeve, ku ishte regjistruar gabimisht pas vdekjes së vëllait të tij binjak, jashtë vendit, për shkak të zëvendësimit të dokumenteve personale”.

Ngatërresa nisi në vitin 2001, kur vëllai binjak i Afetit shkoi në Republikën Çeke dhe, pa dijeninë e tij, mori pasaportën e Afetit. Pak më pas ai ndërroi jetë jashtë vendit dhe, bazuar në pasaportë, institucionet regjistruan se kishte vdekur Afeti.

Megjithëse ai ka provuar me gjurmën e gishtit se është Afeti, institucionet vazhdojnë t’ia kalojnë njëra-tjetrës përgjegjësinë për korrigjimin e këtij gabimi. Gjykata Civile dhe Zyra e Regjistrimit Civil ia hedhin njëra-tjetrës kompetencën për zgjidhjen e çështjes.

Qytetari dorëzoi kërkesë në Gjykatën Themelore Civile të Shkupit që të shpallej i gjallë, por gjykata mori vendim duke e shpallur veten jokompetente, me arsyetimin se një procedurë e tillë nuk parashikohet nga rregulloret ligjore në fuqi. Pasi ky vendim u bë i formës së prerë, qytetari u udhëzua që çështjen ta trajtonte pranë Zyrës së Regjistrimit Civil.

Nga ana tjetër, Administrata e ktheu sërish qytetarin te procedurat gjyqësore, duke theksuar se vetëm gjykata ka kompetencë të nxjerrë vendim me të cilin personi shpallet i gjallë, e më pas Administrata mund të fshijë regjistrimin nga regjistri i të vdekurve. Për shkak të këtij kalimi të ndërsjellë të juridiksionit, pa asnjë veprim thelbësor mbi kërkesën, Avokati i Popullit vlerësoi se po cenohet e drejta themelore e jetës, pasi qytetari që figuron zyrtarisht i vdekur pengohet të ushtrojë edhe të drejtat më bazike./Telegrafi/

The post Shkupjani figuron i vdekur prej 25 vitesh megjithëse është gjallë, institucionet ia hedhin fajin njëra-tjetrës appeared first on Albeu.com.

Studentët shqiptarë në Maqedoninë e Veriut paralajmërojnë se mund të rikthehen në protestë në rast se nuk pranohet kërkesa e tyre që provimi i jurisprudencës të organizohet edhe në gjuhën shqipe.

Në përpjekjet për ta bërë të mundur këtë, është përfshirë edhe Avokati i Popullit në këtë shtet fqinj të Kosovës.

Faton Selami ka bërë të ditur se i është drejtuar Qeverisë në Shkup me një nismë për harmonizimin e ligjeve që rregullojnë dhënien e provimit të jurisprudencës, në mënyrë që studentët shqiptarë të kenë mundësi ta japin këtë provim në gjuhën e tyre amtare, shqip.

Në një prononcim për KosovaPress, ai tha se nga qeveria ka marrë përgjigje se tashmë është ngritur një grup pune i ekspertëve, i cili po shqyrton mundësitë juridike për hartimin e një propozimi që do të zgjidhte këtë çështje.

Selami theksoi se bëhet fjalë për një problematikë me rëndësi të veçantë dhe se institucioni që ai udhëheq ka hapur lëndë me vetiniciativë për trajtimin e saj.

“Kjo çështje është aktuale shumë, është aktivizuar në ditët e para pas marrjes së funksionit të avokatit të popullit nga ana ime. Për këtë arsyeje, e pashë të arsyeshme, që me vet iniciativë, të hapi një lëndë për zgjedhjen e kësaj problematike, që tu mundësohet studentëve të cilët studimet e tyre, deri në diplomë dhe më pas i kanë kryer në gjuhën shqipe, tu mundësohet që edhe provimin e jurisprudencës e jo vetëm, por edhe atë për noterë e përmbarues të mund ta japin dhe në gjuhën e tyre amtare”, thotë Selami.

Ai shtoi se pret që gjatë ditëve të ardhshme grupi punues i ekspertëve, i angazhuar nga qeveria maqedonase, të dalë me propozime konkrete.

“Ne jemi drejtuar dhe me iniciativë deri te qeveria, për harmonizimin e këtyre ligjeve që në mënyrë taksative i rregullon mbarëvajtjen e këtyre provimeve konkrete dhe kemi kërkuar që të mundësohet në gjuhën amtare provimi. Përgjigja e fundit nga ana e qeverisë është se është formuar një grup pune nga ana e ekspertëve, të cilët i shqyrtojnë të gjitha mundësitë juridike dhe punojnë në përgatitjen e një propozimi lidhur me zgjidhjen e kësaj problematike. Ka paralajmërime se në ditët në vijim do të ketë edhe ndonjë propozim konkret nga ana e këtij grup joformal të ekspertëve dhe ne si institucion jemi në pritje të propozimit zyrtarë nga ana e qeverisë”, tha Selami.

Për këtë çështje, studentët shqiptarë kanë protestuar dy herë. Ata kërkojnë të mos diskriminohen gjatë procesit të provimeve profesionale, duke argumentuar se studimet i kanë zhvilluar në gjuhën shqipe dhe se kanë të drejtë që edhe provimi i jurisprudencës të mbahet në shqip për ta.

Sipas Selamit, përdorimi i gjuhës shqipe në Maqedoninë e Veriut ka qenë vazhdimisht një temë problematike, ndërsa vlerëson se debate të tilla janë të shpeshta në një shtet multilingual si ky.

Ai njoftoi gjithashtu se po merret edhe me një çështje tjetër që lidhet me emërtimet e reja të rrugëve në Tetovë, ku janë larguar emrat e mëparshëm në gjuhën shqipe. Sipas tij, lënda është dërguar edhe në Gjykatën Kushtetuese, megjithëse kjo çështje hyn në kompetencat e pushtetit lokal.

“Çështja e gjuhës shqipe ka qenë në vazhdimësi problematike në Maqedoni. Jemi një shtet multilingual dhe kjo është çështje që gjithmonë ka qenë aktuale. Sa i përket çështjes së ndryshimit të emrave të rrugëve, kjo është sipas ligjit, nën kompetencat e komunave të cilët duhet që të përgatisin propozime dhe sipas ligjit dhe të marrin pëlqim nga qeveria dhe të votohen nga këshilli komunal dhe të implementohen në praktikë. Ka pasur edhe iniciativa deri te gjykata kushtetuese, por kjo si kompetencë është e pushtetit lokal”, shtoi ai.

Ndryshimi i emrave të rrugëve në Tetovë ka shkaktuar tensione jo vetëm në këtë komunë, por edhe në të tjera me shumicë shqiptare në Maqedoninë e Veriut.

The post Avokati i Popullit në Maqedoninë e Veriut kërkon që provimi i jurisprudencës të zhvillohet edhe në shqip appeared first on Albeu.com.