Drejtori i Agjencisë së Ushqimit dhe Veterinarisë (AUV), Oliver Millanov, deklaroi sot se ndalesa për përdorimin e ujit nga ujësjellësi i Gostivarit për pije dhe përgatitje ushqimi do të vazhdojë të zbatohet derisa analizat laboratorike të dëshmojnë se ai është i sigurt. Ai theksoi se gjendja po ndiqet me kujdes dhe se po ndërmerren masat e domosdoshme ligjore për sqarimin e plotë të rastit, zbulimin dhe eliminimin e shkaqeve që sollën këtë situatë dhe rrezikuan shëndetin e qytetarëve. Sipas tij, çdo pjesë e procedurës do të hetohet.

Në një konferencë për media të mbajtur në Qeveri, Milanov bëri të ditur se shërbimet inspektuese edhe sot po vijojnë kontrollet te operatorët ushqimorë në rajonin e Gostivarit. Ai sqaroi se masat e jashtëzakonshme dhe mbikëqyrja e intensifikuar synojnë të përcaktojnë me saktësi burimin, shkallën dhe përmasat e kontaminimit, si dhe të sigurojnë rezultate të reja dhe relevante laboratorike. Mbi bazën e këtyre rezultateve do të vendosen të gjitha veprimet e mëtejshme për rastin.

Millanov tha se AUV-ja po e monitoron me vëmendje të posaçme cilësinë e ujit të pijshëm në Komunën e Gostivarit. Pas marrjes së informacioneve të para për një rrezik të mundshëm ndaj shëndetit publik, shërbimet inspektuese të Agjencisë zhvilluan kontroll të jashtëzakonshëm në sistemin e furnizimit me ujë në fshatin Vrutok, Komuna e Gostivarit. Veprimi pasoi njoftimin e prokurorit publik nga Prokuroria Themelore Publike e Gostivarit dhe kallëzimin e MPB Gostivar për cenim të mundshëm të sigurisë së ujit të pijshëm në sistemin e ujësjellësit të Gostivarit.

Në përputhje me kompetencat ligjore dhe protokollet e përcaktuara, kontrolli u realizua më 16 korrik, në orët e vona të mbrëmjes. Në të morën pjesë edhe përfaqësues të Ministrisë së Mjedisit, PTHP Gostivar dhe teknikës kriminalistike të MPB-së.

Gjatë mbikëqyrjes, sipas drejtorit, u zbulua se në tubacionin kryesor të rrjetit të ujësjellësit ishin montuar ilegalisht dhe pa leje pompa, përmes të cilave injektohej drejtpërdrejt në sistem ujë nga lumi Vardar.

Për të përcaktuar nëse uji ishte i sigurt, ekspertët e Institutit të Shëndetit Publik morën katër mostra për analiza laboratorike. Mostrat u siguruan nga rezervuari, burimi i ujit, uji sipërfaqësor dhe një çezmë publike në një xhami.

Millanov njoftoi se AUV-ja vendosi menjëherë ndalesë të përkohshme për përdorimin e ujit të pijshëm, me qëllim parandalimin e një rreziku më të madh për banorët e rajonit. Gjatë ditës së djeshme, veprimtaritë u zgjeruan ndjeshëm dhe inspektorët e Agjencisë së Ushqimit dhe Veterinarisë morën mostra të tjera në të gjithë sistemin e furnizimit me ujë. Kontrollet përfshinë institucionet publike, kopshtet, objektet hotelierike dhe subjekte të tjera që e përdorin këtë ujë për pije ose përgatitje ushqimi.

Ai paralajmëroi se Agjencia, brenda kompetencave të saj ligjore, do të marrë të gjitha masat e nevojshme ndaj çdo subjekti ku evidentohen mangësi apo mosrespektim i detyrimeve të parashikuara me ligj.

Drejtori u bëri thirrje qytetarëve që, deri në pranimin e rezultateve përfundimtare laboratorike dhe normalizimin e plotë të situatës, të zbatojnë vazhdimisht rekomandimet e institucioneve kompetente shëndetësore dhe të pushtetit lokal për përdorimin e ujit të pijshëm.

Millanov shtoi se AUV-ja është përgjegjëse për marrjen e mostrave zyrtare të ujit, ndërsa analizimi i tyre kryhet nga Instituti i Shëndetit Publik. Ky institucion duhet t’ia dorëzojë zyrtarisht rezultatet Agjencisë së Ushqimit dhe Veterinarisë.

The post Millanov: Uji i ujësjellësit të Gostivarit mbetet i ndaluar për pije dhe përgatitje ushqimi appeared first on Albeu.com.

Agjencia e Ushqimit dhe Veterinarisë (AUV) ka urdhëruar ndalimin e përkohshëm të përdorimit për pije të ujit nga rrjeti i ujësjellësit në Gostivar. Masa është marrë për shkak të dyshimeve të bazuara se uji mund të jetë i kontaminuar dhe i rrezikshëm për konsum.

Ndërkohë, në Spitalin e Përgjithshëm në Gostivar kanë kërkuar trajtim mjekësor mbi 1.200 qytetarë, të cilët janë paraqitur me ankesa për dhimbje barku dhe të vjella.

Kontrolli i jashtëzakonshëm ka zbuluar se në gypin kryesor të ujësjellësit ishte vendosur pa leje dhe në mënyrë të paligjshme një pompë, e cila dërgonte drejtpërdrejt ujë nga lumi Vardar në sistemin e furnizimit të qytetit.

“Pas njoftimit të marrë nga Prokurori Publik i Prokurorisë Themelore Publike në Gostivar për kryerjen e një inspektimi të jashtëzakonshëm në stacionin e pastrimit të ujit në fshatin Vrutok, Komuna e Gostivarit, me qëllim verifikimin e sigurisë dhe cilësisë së ujit të pijshëm në këtë sistem furnizimi, si dhe pas ankesave të qytetarëve drejtuar Prokurorisë dhe kallëzimit nga MPB Gostivar lidhur me sigurinë dhe cilësinë e ujit, shërbimet inspektuese të AUV-së, së bashku me përfaqësues të Ministrisë së Mjedisit, Prokurorisë Publike dhe teknikës kriminalistike të MPB-së, mbrëmë zhvilluan një inspektim të jashtëzakonshëm. Specialistët e Institutit të Shëndetit Publik, të pranishëm gjatë kontrollit, morën mostra të ujit për analiza laboratorike me qëllim përcaktimin e sigurisë së tij. Për të parandaluar një rrezik më të madh për popullatën e këtij rajoni, AUV vendosi ndalim të përkohshëm të përdorimit të ujit për pije deri në marrjen e rezultateve laboratorike që do të konfirmojnë sigurinë e tij”, thuhet në njoftimin e AUV-së.

Sipas Spitalit të Përgjithshëm “Dr. Ferid Murad” në Gostivar, rastet me simptoma të ngjashme janë shfaqur gjatë 3–4 ditëve të fundit. Institucioni shëndetësor njofton se ka shtuar numrin e stafit në repartet që po përballen me fluksin më të madh të pacientëve.

“Në lidhje me epideminë që është përhapur në Gostivar gjatë këtyre 3–4 ditëve, kemi një numër të madh pacientësh të cilëve u është ofruar ndihmë mjekësore në institucionin tonë. Për këtë arsye kemi përforcuar personelin mjekësor në repartet ku ka më shumë pacientë. Shumica e pacientëve paraqiten me të njëjtat simptoma: të vjella, diarre, dhimbje stomaku, temperaturë, dobësi etj. Numri më i madh i pacientëve me këto simptoma është në repartin e Infektologjisë, Pediatrisë dhe Njësinë e Urgjencës”.

“Gjatë këtyre ditëve, në Spitalin e Përgjithshëm ‘Dr. Ferid Murad’ në Gostivar janë paraqitur rreth 1.000–1.200 pacientë me këto simptoma. Të gjithë pacientëve u është ofruar ndihmë mjekësore dhe terapi përkatëse”, thuhet në njoftimin e spitalit.

SPB Tetovë deklaron se ekzistojnë dyshime se Ndërmarrja Publike “Ujësjellësi”, në bashkëpunim me Komunën e Gostivarit, kishte instaluar tre pompa në shtratin e ujërave të ndotura. Përmes tyre, sipas dyshimeve, ujë injektohej në gypin kryesor që furnizon qytetin.

Dyshohet se ky veprim është kryer për shtimin e presionit në rrjet, për shkak të mungesës së ujit të pijshëm, duke e vënë në rrezik të drejtpërdrejtë shëndetin e banorëve të Gostivarit.

Rasti është denoncuar edhe në SPB Tetovë. Pas veprimeve të kryera, është vlerësuar se shkaku i mundshëm mund të ketë qenë futja e ujit të ndotur në ujësjellësin e qytetit nga pika e pompimit në fshatin Vrutok, me synimin për rritjen e presionit në rrjet.

“Më 16.07.2026, rreth orës 18:20, inspektorët e Zyrës së Jashtme për Punë Kriminalistike në Gostivar, duke vepruar sipas udhëzimeve të Prokurorit Publik të Prokurorisë Themelore Publike Gostivar, ndërmorën masa urgjente dhe aktivitete në terren në fshatin Vrutok, për shkak të dyshimeve për ndotjen e ujit me të cilin furnizohet qyteti i Gostivarit”, thuhet në njoftimin e SPB Tetovë.

SPB Tetovë bën të ditur se hetimet vazhdojnë për sqarimin e plotë të rastit, për shkak të dyshimeve për veprën penale “Ndotja e ujit të pijshëm”, e paraparë dhe e dënueshme sipas nenit 219 të Kodit Penal.

Nga Qendra e Shëndetit Publik në Gostivar njoftojnë se analizat për përcaktimin e cilësisë së ujit vazhdojnë ende.

The post Gostivari ndalon ujin e pijshëm pas helmimit të mbi 1.200 banorëve appeared first on Albeu.com.