Ndihmëstrajneri i Kosovës, Atdhe Nuhiu, bëri të ditur se lënia e Edon Zhegrovës në stol në ndeshjen kundër Austrisë erdhi si pasojë e një vendimi taktik të përzgjedhësit Franco Foda.

Zhegrova pati një paraqitje të mirë ndaj Irlandës, por këtë herë nuk do ta nisë ndeshjen si titullar.

Gjatë një prononcimi për “KlanKosova”, Nuhiu foli edhe për mungesën e Albian Hajdarit. Ai tha se ekipi ka besim te të gjithë lojtarët dhe se Roni tani ka mundësinë të tregojë vlerat e tij.

“Albian Hajdari është një mungesë e rëndësishme, por kemi besim te secili lojtar. Tani është radha e Ronit të tregojë çfarë mund të bëjë dhe jam i bindur se do të japë më të mirën”.

Për Zhegrovën, ndihmëstrajneri shpjegoi se lodhja pas një kohe të gjatë si titullar ndikoi në vendim. Sipas tij, lojtari do të ketë mundësinë të bëjë diferencën pas pushimit.

“Edon Zhegrova ka ndier lodhje, pasi nuk kishte luajtur titullar prej një periudhe të gjatë. Kundër Irlandës ishte fantastik. Kemi biseduar me të dhe jemi dakordësuar që të përpiqet të bëjë diferencën kur të aktivizohet si zëvendësues në pjesën e dytë”.

Nuhiu theksoi se Kosova hyn në çdo ndeshje me synimin për të fituar, ndonëse edhe një barazim do të ishte rezultat i pranueshëm, në varësi të ecurisë së takimit.

“Ne luajmë çdo ndeshje për fitore, ky është mentaliteti ynë. Gjithçka varet nga mënyra si zhvillohet loja, por edhe një pikë do të ishte mirë. Natyrisht, objektivi është fitorja”.

Ndeshja mes Kosovës dhe Austrisë nis në orën 18:00.

The post Atdhe Nuhiu sqaron pse Edon Zhegrova e nis nga stoli ndaj Austrisë appeared first on Albeu.com.

Historia sportive mes Kosovës dhe Austrisë ka edhe një protagonist të veçantë: Atdhe Nuhiun. I lindur në Prishtinë, ai e kaloi pjesën më të madhe të formimit dhe karrierës së tij si futbollist në Austri, ndërsa sot shërben në stafin e Kombëtares së Kosovës, së bashku me përzgjedhësin Franco Foda.

Karriera e Nuhiut në futbollin austriak përfshiu fanellat e Austria Kärnten, Wacker Innsbruck dhe Altach. Pas eksperiencave në këto klube, ai vijoi rrugëtimin profesional edhe jashtë territorit austriak.

Megjithatë, ishte pikërisht Austria ajo që i dha bazën kryesore të zhvillimit të tij, duke shërbyer për vite me radhë si mjedisi ku ai u formua dhe u konsolidua si futbollist profesionist.

Nuhiu pati gjithashtu mundësinë të luante për ekipet përfaqësuese të moshave të Austrisë. Ai ishte pjesë e Austrisë U21, në një grup lojtarësh ku bënin pjesë edhe futbollistë që më vonë patën rol të rëndësishëm në futbollin e atij vendi.

Një nga momentet e spikatura të asaj periudhe ishte hat-tricku i shënuar ndaj Azerbajxhanit, rezultat që e vendosi Nuhiun ndër protagonistët e asaj skuadre të Austrisë U21.

Më pas, ai mori vendimin që karrierën ndërkombëtare ta vazhdonte me Kosovën. Me fanellën e “Dardanëve”, Nuhiu zhvilloi 19 ndeshje dhe shënoi tri gola.

Kjo zgjedhje e bëri atë një nga shembujt e lidhjes së drejtpërdrejtë që ekziston mes dy realiteteve futbollistike, atij kosovar dhe austriak.

Marrëdhënia e tij me Austrinë vijoi edhe pasi i dha fund karrierës si lojtar. Nuhiu iu përkushtua trajningut dhe vazhdoi aktivitetin profesional në futbollin austriak.

Që nga viti 2024, ai ishte pjesë e stafit të SC Rheindorf Altach, ku nisi të ndërtonte një përvojë të re në rolin e trajnerit.

Tani, Nuhiu ka kaluar në një tjetër etapë të karrierës, duke iu bashkuar stafit të Franco Fodës te Kombëtarja e Kosovës. Edhe Foda ka një lidhje të fortë me Austrinë, pasi ka qenë për shumë vite pjesë e strukturave të futbollit të këtij vendi dhe ka drejtuar Kombëtaren austriake.

Për këtë arsye, ndeshja Austri–Kosovë në Vjenë mbart një element të veçantë edhe jashtë fushës. Në kampin kosovar ndodhet një pjesëtar që pjesën më të madhe të rrugëtimit të tij sportiv e ka zhvilluar në Austri.

Nga përfaqësues i Austrisë U21, te futbollist i Kosovës dhe më pas pjesë e stafit teknik të “Dardanëve”, Atdhe Nuhiu mbetet një prej urave më të veçanta sportive dhe njerëzore që lidhin dy vendet.

The post Atdhe Nuhiu, figura që bashkon futbollin e Kosovës me atë të Austrisë appeared first on Albeu.com.

Të enjten, me fillim nga ora 19:00, kampionia e Kosovës do të përballet në Andorrë me Inter D’Escaldes në ndeshjen e kthimit të play-offit, e cila do të vendosë për vazhdimin e rrugëtimit evropian të skuadrës nga Gjilani.

Gjithçka mbetet e hapur pas barazimit 2-2 në takimin e parë, të luajtur në stadiumin “Fadil Vokrri”. Golat e Dritës në atë përballje u realizuan nga Hajdin Salihu dhe Blerim Krasniqi.

Nën drejtimin e Ardian Nuhiut, gjilanasit kërkojnë të përsërisin arritjen e edicionit të kaluar, kur u kualifikuan në fazën e ligës së Ligës së Konferencës dhe më pas kaluan edhe në play-offin e fazës nokaut.

Nuhiu ka treguar se kundërshtari është studiuar hollësisht, ndërsa nga futbollistët e tij pret një nivel më të lartë loje krahasuar me duelin e parë.

Sipas trajnerit, përballje të këtij lloji kërkojnë përqendrim të madh, guxim dhe autoritet. Ai ka theksuar se Drita duhet të shfaqë më shumë agresivitet në ndeshjen e kthimit për ta siguruar kualifikimin.

Tekniku shprehet plotësisht besimplotë në cilësitë dhe potencialin e grupit, por kërkon që skuadra të paraqitet më mirë se në Prishtinë.

Të njëjtin optimizëm e ka shfaqur edhe Arb Manaj, një nga futbollistët kryesorë të Dritës. Sulmuesi vlerëson se ekipi duhet të përmirësojë lojën në mbrojtje dhe të mos përsërisë gabimet nga të cilat erdhën dy golat e pësuar në takimin e parë.

Manaj ka deklaruar se skuadra është 100 për qind e gatshme dhe se shpreson që nesër të largohet nga fusha me fitore.

Drita e konsideron veten favorite në këtë duel, megjithëse sulmuesi ka paralajmëruar se ky status, i vetëm, nuk garanton kalimin në fazën tjetër.

Sipas Manajt, skuadra gjilanase është disi më e favorizuar se kundërshtari, por duhet të japë maksimumin për ta fituar ndeshjen.

Përvoja e edicionit të kaluar ka bërë që Drita ta njohë tashmë atmosferën e sfidave të këtij niveli. Në paraqitjen historike në fazën e ligës, gjilanasit mblodhën tetë pikë dhe u renditën në pozitën e 20-të, rezultat që u mundësoi kualifikimin në play-offin e fazës nokaut.

Skuadra tani ka përpara një mundësi të re për të lënë gjurmë në Evropë. Nëse triumfon në Andorrë, Drita do ta sigurojë për të dytin edicion radhazi pjesëmarrjen në fazën e ligës të Ligës së Konferencës.

The post Drita kërkon në Andorrë një tjetër kualifikim në Ligën e Konferencës, Nuhiu dhe Manaj synojnë fitoren appeared first on Albeu.com.

 

View this post on Instagram

 

A post shared by Atdhe NUHIU |Official Account| (@__atdhenuhiu__)

The post ZYRTARE/ Atdhe Nuhiu jep dorëheqje nga kombëtarja e Kosovës appeared first on Albeu.com.