Dinamo siguroi mbrëmjen e djeshme kualifikimin në raundin e dytë të Conference League, pasi triumfoi 1-4 ndaj Astanës në Kazakistan. Ndeshja zgjati 125 minuta, ndërsa dinamovitët përmbysën humbjen 0-1 të pësuar në “Elbasan Arena”, në takimin e parë të raundit të parë kualifikues.

Një prej figurave vendimtare të suksesit ishte Lorenco Vila. Sulmuesi realizoi në minutën e 93-të golin që i dha Dinamos sigurinë e kalimit në fazën tjetër. Në prononcimin për “Newsport.al”, ai foli për përmbysjen ndaj Astanës, rolin e trajnerit Ilir Daja, rinovimin me klubin dhe ambiciet për sezonin e ri.

Pësuat gol dhe shifrat e përgjithshme shkuan 2-0, por motivimi duket sikur u shtua më tepër, çfarë ndikoi përveç rezultatit negativ?

Në fillim të ndeshjes patëm disa vështirësi, pasi luanim në fushën e kundërshtarit. Astana ishte më e mirë në minutat e para, por pas golit të tyre ne nisëm të merrnim kontrollin e lojës. Në pjesën e dytë ritmi ynë ishte shumë më i lartë. Fituam penallti dhe Astana mbeti me 10 lojtarë. Më pas e menaxhuam ndeshjen si duhet dhe besoj se e merituam plotësisht këtë kualifikim.

Çfarë ju tha Ilir Daja në pushimin e ndeshjes, pasi duket se dora e trajnerit solli ndryshim të madh?

Profesor Daja ka padyshim meritat e tij. Edhe pse ishim me -2 gola në rezultatin e përgjithshëm, gjatë pushimit ai na kërkoi të qëndronim të qetë dhe të administronim lojën. Të gjithë e dimë se profesor Daja është ekspert për leximin e ndeshjeve. Ai na tha të mos dorëzoheshim, sepse një gol do të na kthente në lojë dhe pikërisht kështu ndodhi.

Një gol në Conference League, çfarë ndjeni, duke ditur edhe rëndësinë e golit, pasi ishte ai i kualifikimit për 1-3?

Jam shumë i lumtur për atë gol, pasi ishte goli i 3-të dhe erdhi në shtesë. Ai na siguroi kualifikimin, sepse edhe me rezultatin 1-3 ne do të kalonim më tej. Ia dedikoj të gjithë skuadrës, sepse pa ta nuk do të mund ta shënoja. Ishte vërtet një ndjesi e mrekullueshme, duke parë rëndësinë e takimit dhe kundërshtarin që kishim përballë.

Kundërshtari i radhës, Aluminij nga Sllovenia. Sa optimistë jeni që mund ta kaloni edhe fazën e dytë kualifikuese?

Nuk e kemi analizuar ende kundërshtarin e radhës, ndaj nuk mund të jap një përgjigje konkrete, pasi nuk e njohim. Gjithsesi, ne besojmë te kualifikimi, duke u mbështetur te cilësitë e këtij grupi. Do të luftojmë deri në fund për të kaluar më tej dhe për t’i bërë krenarë tifozët tanë, ashtu siç shpresoj të jenë ndjerë pas fitores ndaj Astanës.

Sapo keni rinovuar me Dinamon, ju bindi Ilir Daja apo presidenti Bardhi?

Ky është viti im i katërt te Dinamo dhe këtu ndihem si në shtëpi. Presidentin Bardhi e kam pasur edhe te Teuta, ndaj kemi një raport shumë të mirë. Edhe ardhja e profesor Dajës ishte një zgjedhje që e dëshironim të gjithë. E doja rinovimin dhe tani do të jem pjesë e Dinamos për dy vite të tjera. Besoj se përpara nesh është një e ardhme e bukur, me rezultate pozitive.

Edhe pak nis sezoni i ri i “Abissnet Superiore”. Dinamo ka 2-3 vite që investon, por përsëri larg titullit, si e shihni sezonin e ardhshëm, Dinamo mes dy pretendentëve kryesorë dhe pse?

Është e vërtetë që Dinamo prej disa vitesh investon, por ende nuk ka arritur te titulli kampion. Mendoj se duhej të kishim bërë disi më shumë për ta fituar atë. Besoj se ky mund të jetë viti i Dinamos dhe shpresoj të marrim maksimumin. Do të garojmë në çdo front, si për titullin në Superiore, ashtu edhe për të mbrojtur Kupën e Shqipërisë.

The post Lorenco Vila pas kualifikimit të Dinamos ndaj Astanës: Fitorja ishte e merituar, Ilir Daja na kërkoi qetësi appeared first on Albeu.com.

LIVE

Astana 0 – 0 Dinamo

Është vënë në lëvizje topi për përballjen mes Astanës dhe Dinamos.

Conference League: Raundi i parë

Stadiumi: “Astana Arena”

Arbitër: Oscar Johnson

FORMACIONET ZYRTARE

ASTANA: Kondric; Vorogovskiy, Kalaica, Kazukolovas, Bartolec; Abrayev, Karaman, Basic, Tomasov; Islamkhan, Karimov.

Trajner: Grigori Babayan.

DINAMO: Teqja; Ismaili, Dita, Aliji; Përndreca, Manellari, Vila, Malomo, Qefalia; Berisha, Qardaku.

Trajner: Ilir Daja.

The post LIVE/ Dinamo synon surprizën ndaj Astanës në transfertë, starton sfida e kthimit në Conference League appeared first on Albeu.com.

Dinamo do të luajë të enjten në Kazakistan përballë Astanës, në ndeshjen e kthimit të raundit të parë kualifikues të Conference League. Ekipi kryeqytetas vjen pas disfatës 0-1 të pësuar në “Elbasan Arena”, ndërsa takimi nis në orën 17:00.

Në prag të përballjes, trajneri Ilir Daja theksoi se ndeshja do të ketë vështirësi, të shtuara edhe nga fakti që Astana ka fituar duelin e parë. Sipas tij, pikërisht sfidat e komplikuara bëhen edhe më të bukura në rast se arrihet objektivi.

Daja kujtoi gjithashtu eksperiencën e tij në Kazakistan dy vite më parë, kur drejtonte Ballkanin, duke vlerësuar mikpritjen e hasur atje. Ai nënvizoi se Astana, me stafin teknik dhe trajnerin aktual, ka një mënyrë loje të konsoliduar, çka e bën përballjen ndaj saj njëkohësisht të vështirë dhe tërheqëse.

The post Ilir Daja para sfidës së kthimit me Astanën: Përmbysja është një mision i vështirë, por edhe tërheqës appeared first on Albeu.com.

Pavarësisht optimizmit për të marrë një rezultat të mirë ndaj Astanës në Conference League, Dinamo e mbylli sfidën në disavantazh, duke u mundur me shifrat 0-1.

Golin e vetëm të takimit e realizoi Karimov për miqtë në minutën e 69-të.

Menjëherë pas këtij rezultati negativ, “blutë” reaguan në rrjetet sociale me mesazhin: “Mbyllet ndeshja në Elbasan. Beteja vazhdon”.

Ndeshja e kthimit e vlefshme për raundin e parë të Conference League do të luhet më 16 korrik, në tokën kazake.

The post Dinamo mposhtet 0-1 nga Astana në “Elbasan Arena”, por kryeqytetasit besojnë ende te Conference League appeared first on Albeu.com.

Dinamo doli pa pikë nga përballja e parë e raundit të parë kualifikues në Conference League, pasi u mund 0-1 nga Astana në takimin e luajtur në stadiumin “Elbasan Arena”.

Edhe pse skuadra e drejtuar nga Ilir Daja paraqiti një lojë të mirë, ishin miqtë ata që arritën të merrnin suksesin. Goli i vetëm i ndeshjes u realizua nga Ramazan Karimov në minutën e 69-të, pas një kundërsulmi që rezultoi fatal për vendasit.

Në këtë mënyrë, Dinamo e humbet duelin e parë, por gjithçka mbetet e hapur për ndeshjen e kthimit. Takimi i radhës do të zhvillohet më 16 korrik, në orën 17:00, në stadiumin “Astana Arena”.

The post Dinamo e nis me humbje rrugëtimin në Evropë, Astana fiton 0-1 në “Elbasan Arena” appeared first on Albeu.com.

Vllaznia dhe Dinamo paraqiten me një epërsi të vogël në ndeshjet e para të tureve kualifikuese të Conference League, ku do të përballen respektivisht me Malishevën dhe Astanën.

Sipas një vëzhgimi të bërë në platformën sportive mediatike “Flashscore”, si shkodranët ashtu edhe kryeqytetasit shihen disi më të favorizuar, edhe për shkak se të dyja sfidat do t’i luajnë në fushën e tyre. Vllaznia e Edi Martinit do të zbresë në “Loro Boroçi”, ndërsa Dinamo e Ilir Dajës do të luajë në “Elbasan Arena”.

Për takimin Vllaznia – Malisheva, suksesi i kuqebluve vlerësohet me koeficientin 2.25, triumfi i skuadrës kosovare me 2.90, ndërsa barazimi me 3.25.

Ndërkohë, në sfidën Dinamo – Astana, fitorja e ekipit kryeqytetas kuotohet 2.25, ajo e kazakëve 2.70 dhe barazimi 3.40.

Dallimet mes palëve mbeten shumë të vogla, ndërsa verdikti i vërtetë do të dalë në fushë, aty ku do të shihet se cilës skuadër do t’i shkojë në favor rezultati final.

The post Koeficientët favorizojnë lehtë Vllazninë dhe Dinamon para ndeshjeve të para në Conference League appeared first on Albeu.com.

Dinamo do të luajë të enjten, më 8 korrik, përballë Astanës në ndeshjen e parë të raundit të parë kualifikues të Conference League. Takimi është programuar të zhvillohet në “Elbasan Arena”, me fillim në orën 21:00. Para kësaj përballjeje ka dalë në konferencë trajneri i kryeqytetasve, Ilir Daja.

Daja theksoi se përballë Dinamos do të jetë një skuadër me përvojë të konsiderueshme, jo vetëm në Kazakistan, por edhe në arenën europiane. Sipas tij, historia e Astanës flet vetë, pasi klubi ka marrë pjesë edhe në grupet e Champions League, ndërsa numëron 4 prezantime në Europa League dhe 2 në Conference League.

Trajneri i Dinamos nënvizoi gjithashtu se kundërshtari ndodhet në javën e 17-të të kampionatit, çka do të thotë se është në ritmin maksimal. Ai shtoi se një tjetër element i rëndësishëm është fakti që trajneri i Astanës e njeh shumë mirë ekipin, pasi prej disa vitesh punon me të dhe ka ndërtuar një manovër të konsoliduar me lojtarë me goxha eksperiencë dhe nivel goxha të mirë.

Megjithatë, Daja bëri të ditur se ekipi i tij nuk do të hyjë në fushë i kushtëzuar nga këta faktorë. Sipas tij, Dinamo do ta respektojë kundërshtarin, por mbi të gjitha do të respektojë veten.

“Çdo trajner në konferencat për shtyp përpara ndeshjes thotë që do marrim maksimumin. Ne e dimë që përballë kemi një ekip me goxha eksperiencë jo vetëm në Kazakistan, por edhe në Europë. Dihet që në historinë e saj Astana ka prezantime edhe në grupet e Champions League. Ka 4 prezantime në Europa League dhe 2 në Conference League.

Kanë eksperienca goxha të madhe, e dyta janë në javën e 17-të të kampionatit që do të thotë janë në ritmin maksimal të tyre, e treta, por jo nga rëndësia, është që trajneri e njeh shumë mirë ekipin sepse ka disa vite që punon me Astanën dhe kanë një manovër të konsoliduar me lojtarë me goxha eksperiencë dhe nivel goxha të mirë. Ne do të përballemi jo duke marrë parasysh këto elementë që preka. Do të futemi në fushë duke respektuar kundërshtarin, por më shumë do të respektojmë veten tonë.

Me ndryshimet që kemi pasur, me afrimet që janë bërë në momente të ndryshme në kohë të ndryshme, ne nuk pretendojmë se do të jemi brilantë në atë që quhet manovër. Do të mundohemi që të gjejmë strategjinë e duhur, të marrim maksimumin nga ndeshja e nesërme. I kam kërkuar lojtarëve me eksperiencë dhe atyre që kanë qenë vitin e kaluar me Dinamon, një nga ta është dhe kapiteni Bruno Dita, që të japin nga vetja më shumë, që të bëjmë më të mirën e mundshme.

Si trajner kam qejf t’i shikoj gjërat me optimizëm, ta shikoj gotën gjysëm plot, jo të kundërtën. Pozitive për ne është që jemi në vitin e dytë mbas një periudhë të gjatë të Dinamos, që marrim pjesë në Europë. Vijmë nga një eksperiencë e vjetshme, që bëmë rrugëtim deri në “Play Off”, të Konferencë Ligës. Natyrshëm që nuk do të merremi me lojtarët që nuk janë më pjesë e Dinamos. Do të kërkojmë që me grupin që kemi në dispozicion të bëjmë maksimumin.

Duke qënë me sistem eliminimi do të vendoset mbas 180 minutash. Duhet të sulmojmë fort, por duhet të kemi edhe ekuilibër. Unë e njoh mirë edhe trajnerin që ka konsoliduar një manovër goxha të mirë. Duhet të jemi në ekulibër me përqendrim maksimal, për të mos i dhënë mundësinë kundërshtarit”, u shpreh trajneri Daja.

The post Ilir Daja para sfidës me Astanën: Me lëvizjet në skuadër nuk synojmë të jemi brilantë, avantazh për ne mbetet eksperienca e sezonit të kaluar appeared first on Albeu.com.

Dinamo ka bërë publike listën e futbollistëve të gatshëm në prag të ndeshjes ndaj Astanës, takim që vlen për raundin e parë të Conference League.

Problemet kryesore për skuadrën dinamovite shfaqen në repartin mbrojtës, ku mungojnë Faton Neziri dhe Bekim Maliqi. Të dy lojtarët kanë shqetësime fizike dhe nuk do të jenë në dispozicion për të ndihmuar ekipin.

Ndërkohë, një lajm pozitiv për trajnerin Ilir Daja është prania e Hekuran Berishës. Talenti ofensiv vjen pas një gjysmë-sezoni spektakolar me Dukagjinin në Kosovë dhe tashmë konsiderohet gati të tregojë vlerat e tij edhe me Dinamon, sidomos në Conference League.

Takimi i parë mes Dinamos dhe Astanës do të luhet më 9 korrik, në orën 21:00, në stadiumin “Elbasan Arena”, ndërsa ndeshja e kthimit është programuar për më 16 korrik, në transfertë.

Lista e plotë:

Porta: Edmir Sali, Aldo Teqja, Tomas Kiri.

Mbrojtja: Usni Ismaili, Erion Hoxhallari, Fabjan Perndreca, Naser Aliji, Ardit Manjani, Lorran.

Mesfusha: Eridon Qardaku, Malomo Ayodeji, Klevi Qefalia, Bruno Dita, Isi Manellari.

Sulmi: Lorenco Vila, Ruben Silva-Richards, Dejvi Metaj, Florenc Ferruku, Hekuran Berisha, David Fadairo, Mustapha Koma, Bright James.

The post Dinamo publikon listën për Astanan, Daja mbetet pa dy mbrojtës krahu dhe përfshin Hekuran Berishën për sfidën europiane appeared first on Albeu.com.

Më 9 korrik, Dinamo do të luajë ndaj Astanës takimin e parë të raundit të parë kualifikues në Conference League. Ndeshja është programuar të zhvillohet në stadiumin “Elbasan Arena”, me fillim nga ora 21:00.

UEFA ka përcaktuar tashmë edhe trupën arbitrale që do të ndajë drejtësinë në këtë përballje. Gjyqtari kryesor i ndeshjes do të jetë sllovaku Lukas Dzivjak.

Nga i njëjti shtet do të jenë edhe dy ndihmësit e tij, Milan Strbo dhe Akos Juhos.

Po ashtu, detyra e arbitrit të katërt i është besuar një tjetër sllovaku, Filip Glova.

Vlen të theksohet se në këtë fazë të UEFA Conference League nuk përdoret sistemi VAR, njësoj si edhe në ndeshjen e Vllaznisë dhe në atë të Elbasanit.

The post UEFA cakton gjyqtarët e Dinamo – Astana, sfida e Ilir Dajës do të arbitrohet nga Lukas Dzivjak appeared first on Albeu.com.

Dinamo mund të marrë një lajm shumë pozitiv vetëm pak ditë përpara përballjes europiane. Skuadra e Superiores ka mundësi të kualifikohet nga faza e parë e UEFA Conference League pa zbritur fare në fushë, pasi kundërshtari i saj, Astana, ndodhet nën rrezikun e përjashtimit nga garat e UEFA-s në prag të nisjes së tyre.

Ky zhvillim është raportuar nga mediat në Kazakistan, të cilat kanë ngritur alarmin për situatën te Astana. Sipas tyre, përjashtimi i mundshëm lidhet me vështirësi serioze financiare, çka mund ta pengojë klubin të përballojë ndeshjet ndaj Dinamos për shkak të mungesës së fondeve.

Për këtë çështje ka reaguar edhe vetë Astana me një deklaratë zyrtare në rrjetet sociale. Klubi kazak ka sqaruar se problemi nuk ka të bëjë me udhëtimin, por me vlerësimin që UEFA po i bën gjendjes financiare të klubit, konkretisht në lidhje me borxhet ndaj palëve të treta.

“Në lidhje me përhapjen e informacionit të rremë në media në lidhje me një kërcënim të mundshëm për pjesëmarrjen e FC Astana në garat europiane, ne e konsiderojmë të nevojshme të bëjmë një sqarim.

Raportet se pjesëmarrja e klubit në garat europiane është potencialisht e kërcënuar nga mungesa e fondeve për udhëtimin e ekipit në Shqipëri janë të pavërteta. Përgatitjet për ndeshjen po vazhdojnë si zakonisht dhe të gjitha shpenzimet që lidhen me udhëtimin, akomodimin dhe pjesëmarrjen e ekipit janë mbuluar plotësisht.

Arsyeja lidhet vetëm me procesin tremujor të monitorimit financiar të UEFA-s, gjatë të cilit klubi konfirmon se nuk ka detyrime financiare të papaguara ndaj anëtarëve të ekipit të tij. Klubi aktualisht po punon për ta përfunduar me sukses këtë proces.

U kërkojmë tifozëve dhe përfaqësuesve të medias të mbështeten ekskluzivisht në informacionin zyrtar të publikuar në faqet zyrtare të internetit të FC Astana”, thuhet në reagimin e klubit kazak, që lë ende pikëpyetje mbi pjesëmarrjen në Kupat e Evropës.

The post Dinamo pret me interes zhvillimet te Astana, klubi kazak pranon monitorimin e UEFA-s para ndeshjes në Conference League appeared first on Albeu.com.