Deputeti i Lidhjes Shqiptare, Elmi Aziri, ka ngritur akuza të forta ndaj qeverisë, duke pretenduar se po tentohet të miratohet Ligji për Arsimin e Lartë në mënyrë të fshehtë dhe pa respektuar procedurat.

“Kërkova fjalën për procedurë për të shprehur shqetësimin dhe kundërshtimin tonë ndaj kësaj praktike që po synohet të vendoset në punimet e Kuvendit. Ky funksionim bie ndesh me disa nene të rregullores, konkretisht me nenin 74, nenin 126 dhe nenin 115”, deklaroi Aziri. Sipas tij, rregullorja përcakton qartësisht rrethanat dhe mënyrën se si thirret një seancë plenare, kushte të cilat nuk janë plotësuar në këtë rast.

Ai kërkoi ndërprerjen e menjëhershme të seancës, duke theksuar se asnjë prej parakushteve të kërkuara nga rregullorja nuk është përmbushur. Aziri tërhoqi vëmendjen konkretisht te neni 74, i cili përcakton se njoftimi për mbledhjen, së bashku me propozimin e rendit të ditës dhe materialet përkatëse, duhet t’u dërgohet deputetëve të paktën dhjetë ditë pune përpara datës së caktuar për seancë. Megjithatë, sipas tij, thirrja për këtë seancë u bë të premten, në orët e vona të pasdites.

Deputeti e cilësoi këtë mënyrë veprimi si një tendencë klandestine dhe një përpjekje për të kontrabanduar ligje, e cila nuk i shërben as shumicës parlamentare dhe as institucionit të Kuvendit. Ai paralajmëroi se shkeljet procedurale minojnë funksionimin demokratik të Kuvendit dhe nuk duhet të lejohen të ndodhin.

Duke iu referuar dinamikës së ditës së premte, Aziri e përshkroi atë si një ditë të mbushur me skandale që i hapën rrugë seancës së sotme. Ai renditi një seri veprimesh kaotike: fillimisht u thirr komisioni, më pas puna e tij u pezullua, pastaj u thirr sërish seanca, ligji u tërhoq dhe më pas u rifut përsëri. Sipas tij, e gjithë kjo krijon një kaos që synon t’i humbasë deputetët në labirintet e Rregullores.

Në fund, Aziri iu drejtua me një lutje për të ndërprerë seancën dhe për të respektuar rregulloren. Ai kërkoi që deputetëve t’u jepet kohë e mjaftueshme për të diskutuar dhe analizuar çështjen dhe që një seancë e re të thirret në përputhje të plotë me rregullat.

The post Aziri akuzon: Ligji për Arsimin e Lartë po kalohet fshehurazi, Kuvendi po shkel rregulloren appeared first on Albeu.com.

Prokuroria Themelore Publike në Tetovë ka pranuar një kallëzim penal nga Policia Financiare, në të cilin akuzohet një punonjës i Universitetit të Tetovës për shpërdorim të detyrës dhe falsifikim dokumentesh.

Sipas autoriteteve, i pandehuri A.Z., i punësuar si bashkëpunëtor i lartë për logjistikë dhe punë në terren, dyshohet se në periudhën nga marsi 2020 deri në shkurt 2023 ka përvetësuar paratë e studentëve që i ishin besuar për participim, bashkëfinancim dhe shpenzime të tjera studimore.

Në vend që t’i depozitonte këto mjete në llogarinë bankare të universitetit përmes platformës E-pay, ai akuzohet se i ka futur në xhepin e tij, duke përfituar në mënyrë të paligjshme rreth 3.362.272 denarë. Sipas kallëzimit, po kjo shumë i është shkaktuar si dëm financiar Universitetit të Tetovës.

Për të fshehur gjurmët e veprës, dyshohet se ai përgatiste dëshmi të falsifikuara pagese, të cilat ua dorëzonte studentëve si vërtetime se pagesa ishte kryer.

Hetimet kanë zbuluar se për të falsifikuar dokumentet, ai ka marrë të dhënat dhe kodin QR nga një dëshmi e vërtetë pagese përmes E-pay dhe pastaj ka ndryshuar emrin e paguesit, shumën dhe datën. Studentët, duke besuar në origjinalitetin e dokumenteve, i kanë ngarkuar ato në sistemin elektronik të universitetit dhe i kanë paraqitur në shërbimin studentor.

The post Kallëzim penal ndaj një punonjësi të Universitetit të Tetovës, i dyshuar për përvetësimin e mbi 3.3 milionë denarëve nga pagesat studentore appeared first on Albeu.com.

Ministrja e Arsimit dhe Shkencës, Vesna Janevska, deklaroi sot në Kuvend se gjatë shtatë viteve të qeverisjes së LSDM-së dhe BDI-së, numri i nxënësve ka pësuar rënie me 17 mijë. Kjo situatë e bën të domosdoshëm optimizimin e rrjetit shkollor, sipas saj.

Ajo vuri në dukje se ka shumë shkolla rajonale me vetëm dy ose tre nxënës, të cilët nuk kanë mundësi të bashkëveprojnë apo të përdorin teknologji moderne. Bashkimi i tyre me shkolla më të mëdha do të siguronte një proces arsimor më cilësor, duke vendosur interesat e fëmijëve në plan të parë. Ministrja siguroi gjithashtu se asnjë mësues nuk do të mbetet pa vend pune.

Duke iu përgjigjur pyetjeve të deputetëve lidhur me spekulimet për shkarkimin e mësuesve, Janevska sqaroi se gjatë dy viteve të fundit të mandatit qeveritar nuk është pushuar asnjë mësimdhënës. Edhe në periudhën në vazhdim, theksoi ajo, nuk do të ketë largime. Për të plotësuar normën e orëve, mësuesve do t’u ofrohen mundësi për angazhim shtesë me nxënësit e talentuar ose ata që kanë mbetur prapa, si dhe udhëheqje të seksioneve dhe aktiviteteve jashtëshkollore.

Kjo masë, shpjegoi ministrja, synon gjithashtu të zgjasë qëndrimin e fëmijëve në shkollë, duke marrë parasysh se numri i orëve të tyre është dukshëm nën mesataren evropiane. Sipas të dhënave, nxënësit në Maqedoni deri në moshën 14 vjeç kalojnë 6,816 orë në shkollë, ndërsa mesatarja në vendet e OECD-së arrin 7,775 orë.

“Përpiqemi që këtë hendek ta tejkalojmë dhe që nxënësit tanë të mos renditen të fundit në testet PISA,” shtoi ajo.

Lidhur me ndërtimin e shkollës fillore në fshatin Sellcë të Tetovës, Janevska informoi se objekti ishte nisur gjatë qeverisjes së mëparshme, por ka mbetur i papërfunduar. Mungojnë fondet për fasadën, rregullimin e katit përdhes dhe ngritjen e një muri mbajtës në një anë ku ka rrezik rrëshqitjeje dheu.

Megjithë shqetësimin për këtë gjendje, ministrja premtoi se qeveria aktuale do ta çojë deri në fund projektin, për të mos lejuar humbjen e investimeve, siç ndodhi me rastet e FINKI-t dhe FFK-së, të cilat qeveria e kaluar nuk i përfundoi.

The post Janevska: Nën LSDM-BDI, numri i nxënësve ra me 17 mijë appeared first on Albeu.com.

Në Manastir po zbatohet një cikël i gjerë investimesh në arsim me mbështetjen e Qeverisë dhe Ministrisë së Arsimit dhe Shkencës, theksoi ministrja Vesna Janevska gjatë inspektimit të punimeve në lagjen Bukovski Livadi.

Sipas saj, Qeveria po vazhdon të investojë fuqishëm në përmirësimin e infrastrukturës arsimore, me synimin që çdo nxënës, pavarësisht vendbanimit, të ketë mundësi të barabarta për arsim cilësor.

Në këtë lagje po kryhen punime për përshtatjen e një objekti që deri në fund të vitit do të vihet në funksion si shkollë e re vartëse e SHFK “Kole Kaninski”. Investimi kap vlerën e 31 milionë denarëve dhe po realizohet nga vetëqeverisja lokale me përkrahje të Qeverisë. Punimet i panë nga afër sot kryeministri Hristijan Mickoski, ministrja e Arsimit dhe Shkencës, Vesna Janevska, si dhe kryetari i Manastirit, Toni Konjanovski.

“Urime për këtë investim të rëndësishëm të komunës së Manastirit, i realizuar me mbështetjen e Qeverisë. Është e rëndësishme të ndërtohet aty ku ka nevojë reale, të përmirësohet infrastruktura arsimore dhe kudo të krijohen kushte për arsim cilësor. Me adaptimin e këtij objekti, i cili do të ketë pesë klasë, bibliotekë dhe hapësira sanitare, përfshirë edhe për nxënës me nevoja të veçanta arsimore, fëmijët e lagjes Bukovski Livadi do të mund ta përfundojnë arsimin fillor në vendbanimin e tyre, në vend që çdo ditë të udhëtojnë në zona të tjera. Kështu u kursejmë kohë dhe u mundësojmë të përkushtohen më shumë në mësim dhe të arrijnë rezultate edhe më të mira”, deklaroi Janevska.

Ajo nënvizoi se ky projekt përbën vetëm një segment të investimeve të rëndësishme që po zhvillohen në Manastir me mbështetjen e institucioneve qendrore.

“Komuna nuk është e vetme në përpjekjet për arsim më të mirë. Janë siguruar mjete për rreth 15 investime infrastrukturore. Ministria tashmë ka përfunduar rikonstruksionin e sallës sportive në SHFK ‘Elpida Karamandi’, është në ndërtim një nga tre sallat e reja sportive shkollore, po finalizohet ndërtimi i shtatë fushave sportive shkollore, do të rikonstruktohen katër shkolla, ndërsa nga viti i ardhshëm fillon rikonstruksioni i konviktit studentor ‘Koço Racin’. Bëhet fjalë për një cikël investimesh me vlerë mbi 450 milionë denarë, pra më shumë se 7 milionë euro, me të cilin do të përmirësohen ndjeshëm kushtet për arsim dhe sport në Manastir”, theksoi Janevska.

The post Janevska: Në Manastir po avancon infrastruktura arsimore me investime qeveritare mbi 7 milionë euro appeared first on Albeu.com.

Ministria e Punëve të Brendshme e Maqedonisë bëri të ditur se dje, më 29.06.2026, në orën 11:45, zyrtarë policorë nga SPB Shtip kanë ndaluar T.A. (39) nga Shtipi, nën dyshimin për veprën penale “marrje ryshfet”.

Sipas njoftimit, më herët, më 22.06.2026, K.B. (26) nga Turqia, i cili qëndron përkohësisht në Shtip dhe është student në Universitetin “Goce Dellçev”, kishte raportuar se T.A. i kishte kërkuar 300 euro për ta kaluar në një provim që ishte caktuar të mbahej më 29.06.2026.

Nga MPB theksojnë se, në bashkërendim me Prokurorinë Themelore Publike të Shtipit, janë ndërmarrë veprimet përkatëse dhe K.M. i janë dhënë tri kartëmonedha nga 100 euro, të përpunuara me metoda krimo-teknike. T.A. është arrestuar nga policia menjëherë pasi i ka marrë paratë. Më pas ajo është shoqëruar në stacion policor, ndërsa mjetet monetare janë sekuestruar. Pas zbardhjes së plotë të rastit, ndaj saj do të ngrihet kallëzimi përkatës, thuhet në njoftimin e MPB-së.

The post Arrestohet një profesoreshë e Universitetit të Shtipit, dyshohet se i kërkoi studentit 300 euro për kalimin e provimit appeared first on Albeu.com.

Në dy paraqitjet e qershorit për regjistrim në shkollat e mesme për vitin shkollor 2026/2027, janë regjistruar gjithsej 15 705 nxënës, bëri të ditur Ministria e Arsimit dhe Shkencës.

Sipas të dhënave të MASH-it, 11 171 nxënës janë regjistruar për ndjekjen e mësimit në gjuhën maqedonase, 4241 në gjuhën shqipe, 279 në gjuhën turke dhe 14 në gjuhën serbe.

Ndarë sipas llojit të arsimit, në të dy afatet janë regjistruar 4653 nxënës në arsimin gjimnazial dhe 10 823 në arsimin profesional. Në Akademinë sportive janë regjistruar 229 nxënës, ndërsa për arsimin artistik, sipas njoftimit të MASH-it, procesi i përzgjedhjes ende nuk ka përfunduar.

Afati i dytë i paraqitjes u realizua më 23 qershor, ndërsa dokumentacioni i nevojshëm u dorëzua nëpër shkolla më 24 qershor. MASH njoftoi se në këtë afat të dytë të qershorit janë paraqitur 2927 nxënës, prej të cilëve 1457 për mësim në gjuhën maqedonase, 1369 për mësim në gjuhën shqipe dhe 101 për mësim në gjuhën turke.

Më herët, MASH kishte informuar se në paraqitjen e parë për regjistrim në arsimin e mesëm, e zhvilluar me aplikim elektronik nga 12 deri më 15 qershor, ishin paraqitur 15 075 nxënës, ndërsa pas selektimit të bërë në arsimin artistik u regjistruan 13 423.

Nga ky numër, 9839 nxënës ishin regjistruar për mësim në gjuhën maqedonase, 3357 në gjuhën shqipe, 213 në gjuhën turke dhe 14 nxënës në gjuhën serbe.

The post MASH: Në dy afatet e qershorit, 15 705 nxënës u regjistruan në arsimin e mesëm appeared first on Albeu.com.

Interesimi më i vogël gjatë dy afateve të para të regjistrimit është evidentuar në Shkollën ekonomike dhe në atë të tekstilit.

“Në shkollën ekonomike për fat të keq kemi numër të vogël të nxënësve të pranuar, e që numri është rreth dyzet, dhe tek shkolla e mesme tekstile, deri më tani nxënësit që kanë plotësuar kriterin me 45 pikë janë pranuar vetëm 44 nxënës dhe aty, do kërkojmë nga Ministria ulje të numrit të pikëve që të mund nxënësit që nuk kanë plotësuar kriteriumin e pikëve të regjistrohen”, u shpreh Nazmi Dauti nga Sektori për Arsim në komunën e Tetovës.

Nga ana tjetër, drejtimi më i preferuar mbetet ai i mjekësisë. Që në afatin e parë janë mbushur të gjitha vendet për profilin motër medicinale, ndërsa për drejtimin e kozmetikës kanë aplikuar mbi 200 nxënës për vetëm 30 vende të lira.

“Në afatin e parë të regjistrimit ne kishim diku mbi 600 aplikime në gjuhën shqipe, maqedonase dhe turke. Ndërsa në afatin e dytë afër 200 aplikime, por prej tyre shumë pak plotësonin kushtet për drejtimet 70 pikë. Prej tyre janë pranuar diku vetëm 20” , tha Malësore Ramadani, Drejtoreshë e SH M M “Nikolla Shtejn”.

Sipas Ramadanit, ende ka vende të lira në drejtimet teknik i farmacisë, asistent dentar dhe gjinekologji, por kriteri i pikëve do të mbetet i njëjtë dhe nuk do të ketë ulje.

Pas mjekësisë, interesimi më i lartë në Tetovë është për gjimnazin “Kiril Pejçinoviq”, megjithatë në disa drejtime vazhdojnë të ketë vende të lira për regjistrim në afatet e mbetura./Alsat/

The post Interes i ulët për regjistrim në shkollat profesionale të Tetovës appeared first on Albeu.com.

Në një konferencë për shtyp të mbajtur në Qeveri, ku prezantoi raportin për punën dyvjeçare të Ministrisë së Arsimit dhe Shkencës, Janevska tha se është në dijeni të reagimeve që lidhen me optimizimin, por nënvizoi se askush nuk do të humbasë vendin e punës.

Ajo kujtoi se, kur mori detyrën dy vjet më parë, u përball me probleme të rënda në sistemin arsimor, ndërsa tani, siç u shpreh, vëmendja është përqendruar te ngritja e cilësisë në arsim dhe shkencë.

“Dy vjet më parë u përballëm me një kataklizmë. Ne ndaluam rënien e mëtejshme dhe me punë të përgjegjshme dhe të përkushtuar tani po e rrisim cilësinë e arsimit dhe po e promovojmë shkencën”, shtoi Janevska./Telegrafi/

The post Janevska: Optimizimi i rrjetit shkollor nuk do të sjellë largim të mësuesve, synim mbetet cilësia në arsim appeared first on Albeu.com.

Sipas njoftimit të Ministrisë së Arsimit dhe Shkencës, raundi i dytë i regjistrimit në afatin e qershorit do të zhvillohet elektronikisht të martën, më 23 qershor.

Pasi të përfundojë aplikimi online, kandidatët më 24 qershor do të duhet të dorëzojnë dokumentet e nevojshme në shkollat përkatëse.

Rezultatet e regjistrimit, përmes listave të renditjes, do të shpallen më 25 qershor deri në orën 12:00, si në shkolla ashtu edhe në faqet e tyre zyrtare në internet.

Nëse në shkolla të caktuara paraqiten kandidatë me numër të njëjtë pikësh, atëherë më 29 qershor do të organizohet testimi kualifikues, ditë kur do të bëhen publike edhe listat përfundimtare të renditjes.

Në total, për aplikimin e dytë janë të lira 11,882 vende. Prej tyre, 7,404 janë për mësim në gjuhën maqedonase, 4,002 për mësim në gjuhën shqipe, 456 për gjuhën turke dhe 20 për gjuhën serbe.

Ministria e Arsimit bëri të ditur se në regjistrimin e parë aplikuan elektronikisht 15,075 nxënës, ndërsa 13,397 prej tyre u regjistruan.

The post Të martën hapet afati i dytë për regjistrimin në shkollat e mesme, në dispozicion 11,882 vende appeared first on Albeu.com.

Sipas tyre, ky hap i ri i fuqizon kapacitetet institucionale të universitetit, pasuron ofertën akademike dhe hap mundësi të reja për studentët shqiptarë, por edhe për të gjithë të rinjtë që vendosin ta ndërtojnë të ardhmen përmes dijes dhe një arsimi cilësor.

Me këto ndryshime, Universiteti “Nënë Tereza” e çon më tej organizimin e vet akademik duke përfshirë Fakultetin Juridik, Fakultetin Ekonomik dhe Fakultetin e Shkencave Humane, çka e konsolidon edhe më shumë rolin e tij si qendër e arsimit të lartë, e kërkimit shkencor dhe e zhvillimit profesional.

Në të njëjtën kohë, theksohet se universiteti e forcon edhe dimensionin ndërkombëtar përmes harmonizimit të standardeve akademike dhe dhënies së diplomave në gjuhën shqipe, maqedonase dhe angleze, duke zgjeruar mundësitë për mobilitet dhe konkurrueshmëri në tregun evropian të punës.

VLEN nënvizon se mbetet e angazhuar që arsimi të jetë një prej shtyllave themelore të zhvillimit kombëtar. Sipas këtij subjekti, investimi në Universitetin “Nënë Tereza” përfaqëson investim te rinia, te dija, te profesionalizmi dhe te e ardhmja e shqiptarëve në Maqedoninë e Veriut.

“24 vite u fol për avancimin e arsimit të lartë në gjuhën shqipe. Sot, për 24 muaj me vendime konkrete, po ndërtojmë institucione më të forta, më funksionale dhe më të përgatitura për sfidat e së ardhmes”, thonë nga VLEN./Telegrafi/

The post VLEN: Me ndryshimet në Statutin e Universitetit “Nënë Tereza” nis një fazë e re për arsimin e lartë publik në shqip appeared first on Albeu.com.