KF Dukagjini njoftoi të dielën se ka përfunduar bashkëpunimin me trajnerin Arsim Thaqi.

Largimi është bërë me marrëveshje të dyanshme, ndërsa së bashku me trajnerin janë ndarë nga klubi edhe ndihmëstrajnerët Valmir Bytyqi, Ahmet Haliti dhe Lekë Termkolli.

Në njoftimin e tij, Dukagjini shprehu mirënjohje të sinqertë për punën, përkushtimin dhe kontributin e stafit teknik gjatë gjithë periudhës së bashkëpunimit.

Klubi theksoi se profesionalizmi dhe angazhimi i tyre i bënë pjesë të rëndësishme të rrugëtimit të KF Dukagjinit. Në emër të drejtuesve, futbollistëve dhe tifozëve, ata u falënderuan për kohën e kaluar së bashku dhe për gjithçka që dhanë për ngjyrat e klubit.

Dukagjini i uroi trajnerit Arsim Thaçi dhe ndihmëstrajnerëve Valmir Bytyqi, Ahmet Haliti e Lekë Termkolli suksese në vazhdimin e karrierës dhe në sfidat e ardhshme, si në planin profesional, ashtu edhe në atë personal.

Gjatë periudhës me Thaqin në krye të skuadrës, Dukagjini e fitoi Kupën e Kosovës pasi në finale mposhti Ferizajn.

Ky trofe i siguroi ekipit nga Klina pjesëmarrjen në raundin e dytë kualifikues të Ligës së Konferencës. Megjithatë, shorti nuk ishte në anën e Dukagjinit, që u eliminua nga skuadra zvicerane Lugano.

Armend Dallku pritet ta marrë postin e lënë nga Thaqi. Ai e ka drejtuar Dukagjinin edhe më herët.

The post Dukagjini dhe Arsim Thaqi përfundojnë bashkëpunimin appeared first on Albeu.com.

Arsim Thaqi e pranoi se Lugano ishte skuadra superiore, pasi Dukagjini pësoi humbje të thellë 5:1 dhe e mbylli rrugëtimin në raundin e dytë kualifikues të Ligës së Konferencës.

Pas takimit të luajtur në Kampin Nacional të FFK-së në Hajvali, trajneri i ekipit kosovar e cilësoi Luganon si një nga kundërshtarët më të vështirë me të cilët mund të përballej skuadra e tij.

“Lugano është një prej skuadrave më të forta që mund të na binte përballë. Në përbërje ka tre reprezentues, dy prej të cilëve luajnë për Zvicrën. Golat e pësuar në minutat e para ndikuan në vazhdimin e ndeshjes”, deklaroi Thaqi.

Sipas tij, dy golat e shpejtë e bënë shumë të vështirë rikthimin e Dukagjinit, ndërsa situata u ndikua edhe nga ndryshimet e shumta që pësoi ekipi gjatë verës.

“Pas golave të fillimit nuk e kishim të lehtë të rimëkëmbeshim. Nga skuadra janë larguar pesë lojtarë cilësorë. Futbollistët e rinj që janë afruar kanë potencial, por u nevojitet kohë”, shtoi ai.

Në përfundim, Thaqi nënvizoi se mes dy ekipeve kishte një hendek të dukshëm sa i përket cilësisë dhe ritmit të lojës.

“Përballë kishim një skuadër që vlen 40 milionë dhe sfida nuk ishte e lehtë. Ritmin e ndeshjes e diktoi Lugano. Ata tashmë po luajnë në kampionat, kurse ne e kemi nisur me ndeshjet evropiane. Dëshira nuk mungoi, por ndonjëherë këto janë mundësitë”, përfundoi Thaqi.

The post Thaqi pas eliminimit të Dukagjinit: Lugano, ekip me vlerë 40 milionë, kontrolloi ritmin appeared first on Albeu.com.