Në mbledhjen e grupit parlamentar të PD, kryedemokrati u shpreh se ndaj atyre personave duhet të ishte hapur çështje penale dhe për këtë SPAK nuk e pengonte asgjë.

“Prokurori i Përgjithshëm që duhet të jetë kryesori në zbatimin e ligjshmërisë së vendit është kukull, ia kanë hequr të gjitha kompetencat. Ky tjetri thotë e arrestuan, keq ishte ajo që u bë. Po kush të pengoi ty të hapësh çështje penal ndaj atyre që i bënë Ilir Metës. Kush i pengoi?! Është ish president ai. Është nga ata studentë që në 1990 kërkoi pluralizimin. Ka qenë kryeministër, kryetar parlamenti. Ça pengese kishe ti të vesh para ligjit ata që bënë atë. Ça pengese kanë për prokurorin që arrestoi në sallën e gjyqit avokatin e të pandehurit”, tha Berisha.

The post Arrestimi i Metës/ Sali Berisha: Pse nuk u hap çështje penale ndaj atyre që u sollën në atë mënyrë me Presidentin? appeared first on Albeu.com.

Nikoloski ka shtuar se pamjet janë jo të denja për një vend demokratik në Europë. Gjithashtu ai tha se nëse dikush është i dyshuar, mund të ftohet.

Pjesë nga intervista:

Gazetari: Zoti Nikoloski, më datë 18 gusht publikuat një fotografi së bashku me kryeministrin në Ohër me Ilir Metën, për të cilin thoni se është mik i madh i Maqedonisë së Veriut, mik personal dhe mik i VMRO DPMNE. Më intereson një mendim për arrestimin e tij. Ai dyshohet për pastrim parash dhe korrupsion.

Nikoloski: Po kishim një takim, bëhet fjalë për kryetar të një subjekti politik, që bashkëpunonte dhe bashkëpunon me VMRO DPMNE-në. Bëhet fjalë për një person që ka qenë kryeministër, president, ministër i Jashtëm dhe kryetar i parlamentit të Shqipërisë.

Unë nuk mund të hyj në punët e brendshme të Shqipërisë dhe të komentoj nëse ka ndodhur diçka apo jo, ajo është punë e institucioneve të Shqipërisë dhe nuk mendoj se është e drejtë nga ana ime që të jap koment posaçërisht për punë që nuk i di, por njerëzisht mund të them diçka.

Qëndroj pas kësaj që do të them, atë që pamë në opinion, në televizione, më falni por nuk i ngjan asgjëje. Një shtet demokratik nuk vepron ashtu. Nëse dikush është i dyshuar, ka mënyra që të ftohet, të bisedohet. Ata janë pamje që nuk shihen në shtetet demokratike të Europës.

The post Arrestimi i Metës/ Zv.kryeministri i Maqedonisë së Veriut: Pamjet jo të denja për një vend europian appeared first on Albeu.com.

Këngëtari i njohur siç duket ende nuk është mësuar me rregullat e këtij formati televiziv dhe ka dhënë informacion nga jashtë për Rezart Veleshnjën. Aktori shqiptar mëson se SPAK-u ka arrestuar Ilir Metën dhe pikërisht ky lajm bombastik e elektrizon atë.

“U çfarë më the”, shprehet ai ndërsa nuk e mban vendi prej lumturisë. Në atë moment ndërhyn edhe produksioni duke i kërkuar Xuxit që të mos japë info nga jashtë.

PJESË NGA BISEDA:

Xuxi: E di që futën në burg Ilir Metën?

Veleshnja: Çar re? Çfarë më the? Kur mo? Kur e futën në burg?

Xuxi: 2-3 ditë…

Veleshnja: U çfarë lajmi më ke dhënë… Ilir Metën e paskan futur në burg. SPAK-u…

Produksioni i bën thirrje Xuxit që të mos japë informacion nga jashtë, ai i kërkon falje.

The post Mori vesh në BBV Kosova se është arrestuar Meta, aktori i njohur “fluturon” nga gëzimi: U çfarë lajmi më dhe! appeared first on Albeu.com.

Opozita pretendon se agjentë të BKH-së, të maskuar dhe pa numer identifikues kanë shkelur ligjin, duke dhunuar kreun e Partisë së Lirsë.

Arrestimin e Ilir Metës, eksponentë të PL e kanë etiketuar si “pengmarrje” dhe hakmarrje politike të Edi Ramës, me qëllim që Prokuroria e Posaçme dhe Policia e Shtetit të dhurojnë “show” mediatik.

Lufta kundër korrupsionit, krimit të organizuar, trafiqeve të paligjshme dhe te*orizmit, ishin në fokus të bisedës së drejtorit të Përgjithshëm të Policisë së Shtetit, Ilir Proda me shefin e Zyrës Rajonale të Sigurimit në Detyrë në ambasadën amerikane në Tiranë, Jonathan Ellis.

“Proda dhe Ellis vlerësuan bashkëpunimin e deritanishëm dhe konfirmuan gatishmërinë për ta thelluar këtë bashkëpunim. Ellis uroi Drejtor Prodën për detyrën e vështirë që ka marrë përsipër dhe e siguroi për mbështetjen e SHBA-së për Policinë e Shtetit dhe se bashkëpunimi i shkëlqyer dhe i veçantë i Policisë së Shtetit me Zyrën e Sigurimit Rajonal do të thellohet akoma më tej”, thuhet në njoftimin e Policisë së Shtetit.

Zyra e shtypit e drejtorit të Policisë njofton se; Proda e siguroi Shefin e Zyrës Rajonale të Sigurimit në Ambasadën Amerikane, se është i vendosur për të bashkëpunuar dhe punuar bashkërisht me agjencitë ligjzbatuese amerikane dhe ato në Ambasadën amerikane në Tiranë, duke treguar profesionalizëm e besueshmëri gjatë hetimeve dhe operacioneve të përbashkëta në luftë kundër korrupsionit, krimit të organizuar, trafiqeve të paligjshme dhe terrorizmit.

The post Pas arrestimit të Ilir Metës, ambasada e SHBA mbështet Policinë e Shtetit appeared first on Albeu.com.

Ndër të tjera ai u shpreh në studion e emisionit ‘Open’ se Shqipëria mund të ketë 100 probleme, por nuk është në pikën ku mund të themi se policia rrëmben njerëz rrugëve.

“Skenat të ekzagjeruara, nuk ishte e mirë sidomos për dikë që ka shërbyer në krye të shtetit. Edhe debati është ekzagjeruar pasi ofiqarët e lartë të shtetit duhet të jenë të parët që nuk duhet të kundërshtojnë një vendim të organeve policore, gjyqësore. Edhe po ka ndaj teje një vendim që mund të jetë problematik, duhet të zbatohet.

Gjithë thelbi, ideali ka të bëjë me barazinë para ligjit. Nuk ka të pasur të varfër, të fortë më pak të fortë, politikanë apo jo politikanë. Edhe Meta nuk duhej të kundërshtonte, edhe pse nuk e di nëse ka kundërshtuar.

Shqipëria mund të ketë 100 probleme nuk jemi në atë pikë që të themi policia po rrëmben njerëz rrugëve”, tha Zekthi.

The post Arrestimi i Metës, analisti: Skenat e ekzagjeruara, por Shqipëria nuk është në pikën ku policia rrëmben njerëz rrugëve appeared first on Albeu.com.

“Mirëmbrëma dhe përshëndetjet e mia më të përzemërta, më miqësore. Mirënjohjen më të pakufishme për ju qëndrestare e qëndrestarë, misionarë të vërtetë të kauzës së drejtë, kauzës së lirisë, dinjitetit, begatisë dhe integrimit të shqiptarëve.
Një përshëndetje për oratorët e tribunës së fjalës së lirë, që shpërndajnë me guxim në të katër anët të vërtetat që fsheh regjimi ndaj shqiptarëve. Të dashur miq, zhvillimet e djeshme kanë plotësuar para çdo shqiptari imazhin e vërtetë të narkoregjimit të Edi Ramës.

Akti makabër publik i rrëmbimit tek futej në Tiranë, tek kthehej në zyrën e tij, me banditë të armatosur dhe të maskuar, i zvarritjes dhe goditjes të ish-presidentit të Republikës, ish-kryetarit të parlamentit dhe kryetarit të qeverisë, aktualisht kryetar i partisë së dytë më të madhe opozitare, është një akt i paregjistruar në dekadat e fundit në asnjë vend të planetit tonë, demokraci apo diktaturë qoftë ai. Një akt të tillë çnjerëzor, antidemokratik, banditesk mund ta ndërmerrte vetëm një njeri, i cili ka si trashëgimi atërore xhelatin Kristaq Rama që firmosi varjen në litar të kundërshtarit politik në vitin 1988 për vargjet e tij.

Një akt të tillë publik, në të cilin ju garantoj se terroristët e armatosur që i zunë pritën, kishin urdhër dhe të gatshëm të shkrehnin të gjithë karikatorët mbi armikun e Edi Ramës, Ilir Metën, riprovon pra aktin publik të të atit të tij, por natyrisht ligjet e asaj kohe parashikonin varjen për armiqtë, kurse Edi Rama zuri pusi për ta rrëmbyer ose për ta ekzekutuar në vend një njeri që kishte kryer të gjitha funksionet në këtë shtet, nuk po largohej, por po shkonte drejt zyrave të tij. Një njeri, i cili ishte paraqitur sa herë ishte thirrur. Një njeri, për të cilin organizata kriminale Skapi i partisë, që urdhëroi aktin, nuk ka paraqitur dot asnjë akuzë të vërtetë, por i ndërmorën të gjitha këto si person nën hetim. Si person pa asnjë akuzë penale,” tha Berisha.

The post Berisha: Terroristët që i zunë pritë Metës, kishin urdhër të shkrehnin karikatorët mbi armikun e Edi Ramës appeared first on Albeu.com.

Strazimiri ka deklaruar se Ervin Hoxha, nuk e drejton Ministrinë e Brendshme, ndërsa pohon se prangosja e Metës ishte një hakmarrje politike nga Edi Rama.

“Ajo që është skandal në këtë vend, nuk është shumë për të cilën akuzohet, është fakti në thelb, akuzat që i ngrihen dhe arsyet se përse i ngrihen. Sot në këtë vend, në qoftë se shikon bilancin e SPAK-ut, që po mbytet nga korrupsioni, rezulton sipas SPAK-ut që korrupsionin e bëjnë zyrtarë të tretë të nivelit të qeverisë dhe masivisht opozita. Kjo është lufta që po bën sot SPAK ndaj korrupsionit.

Sigurisht që nuk është një logjikë juridike, sigurisht që nuk është një logjikë drejtësie. Dhe në qoftë se kjo nuk përjashtohet nga faktet që ju përmenda e motivon këtë vetëm një logjikë politike e cila të çon tek ai plan i kryeministrit i cili pikërisht për këtë arsye duke pasur këto hapa, siç thotë edhe veta jam tre hapa përpara të tjerëve në politike.

Duke patur parasysh këto hapa që po ndërmerr SPAK-u sigurisht që mbi këtë do ketë vendosur që do të ketë jo me pak se 94 mandate, dhe është për tu marrë seriozisht për shkak se sa hërë , 24 orë përpara zgjedhjeve ai përcakton rezultatin që do të dalë ditën e hënë ose ditën e martë, mbasi ka mbaruar numërimi. A është kjo një drejtësi amerikane. Do të thoja që është një drejtësi që flet anglisht por që shkruan me germa cirilike. Kështu që nga kjo pikëpamje, ne qoftë se ka një hibrid më të palogjikshëm, më jashtë kohe më të pa bazë për atë ku duam të arrijmë, unë nuk besoj se ka.

Justifikimi që është përpjekur të bëjë ministri i brendshëm për atë skandal që pame dje nga Policia e Shtetit. Ishtë një shkrim i gjatë të cilin unë nuk besoj se e ka shkruar ai, aq sa ngre pyetjen, tek lexoja shkrimin kush e drejton sot ministrinë e brendshme. Jam i bindur që ky ministër nuk e drejton. E them këtë, nisur nga fakti se ministri i sotme i brendshëm është formuar në një nga shkollat më të mira ta policimit në Evropë. Është diplomuar me rezultate shumë të mira në Gjermani. Prej ti ne prisnim një drejtim të policisë sipas modelit të Gerhardit…jo sipas modelit të Xhelaladinit.

Ajo që pamë dje është një skenar turk. Të tilla gjëra ndodhin në Turqi.

Ilir Meta nuk është qytetari Ilir Meta. Ilir Meta është qytetar i Republikës së Shqipërisë por i mbrojtur me ligj të posaçëm për shkak të cilësive të veçanta që ai ka. Ka qene numri një, numri dy, numri tre i shtetit. Dhe për këtë arsye ai mbrohet nga Garda e Republikës që është po në varësi të këtij ministri të brendshëm aty ku varet edhe Policia e Shtetit. Ilir Meta në kuptimin e ruajtjes fizike të tij, është një person i cilësuar që do të thotë që salla operative e Gardës së Republikës, ashtu sikur e thamë, njoftohet. Të futësh ne konflikt dy institucione që t`i i drejton dhe të thuash se mund të kishte vajtur edhe me keq kjo është pak të thuash se është e papërgjegjshme”, u shpreh Gent Strazimiri

The post Arrestimi i dhunshëm i Metës/ Gent Strazimri: Hakmarrje politike nga Edi Rama appeared first on Albeu.com.

Hoxha deklaron se Policia e Shtetit, kreu detyrën dhe u detyrua ta kryente duke përdorur forcë

Gjithashtu, Hoxha shprehet se fjalori ka qenë ekstrem për mënyrën sesi u ekzekutua urdhri i Prokurorisë së Posaçme Antikorrupsion, ndaj shtetasit në fjalë.

Sipas tij, për zbatimin e vendimit të Gjykatës u angazhuan efektivë të Forcës Lëvizëse Operacionale, forcë e posaçme e trajnuar dhe specializuar për të ndjekur protokollet standarde sipas rastit, dhe jo punonjës të Rendit, që është një forcë shërbimi ditor.

“Ata fatkeqësisht u përballën me një subjekt, që kundërshtoi forcërisht t’i nënshtrohej vendimit të Gjykatës, sapo mori dijeni për të.

Kjo është zanafilla e ngjarjes dhe nga këtu fillon arsyetimi sipas protokollit, që Policia e Shtetit ndjek në ekzekutimin e një vendimi ndalimi”, deklaron ndër të tjera ministri Hoxha.

REAGIMI I PLOTË:
Kam ndjekur me vëmendje dhe respekt opinionet e një sërë analistësh të angazhuar mbrëmë, lidhur me ndalimin e shtetasit Ilir Meta, nga Policia e Shtetit.

Fjalori ka qenë ekstrem për mënyrën sesi u ekzekutua urdhri i Prokurorisë së Posaçme Antikorrupsion, ndaj shtetasit në fjalë.

Janë përdorur etiketime të rënda ndaj Policisë dhe janë akuzuar efektivët e saj për faje, që nuk i kanë bërë, dhe reagimi ndaj rezistencës me forcë të personit, që kishin detyrë të ndalonin është nxjerrë jashtë kontekstit të ngjarjes.

Janë hedhur edhe variante alternative për mënyrën se si duhej kryer, ku duhej kryer, e kur duhej kryer ndalimi i shtetasit Ilir Meta, për shkak të asaj çka ai ka përfaqësuar në dekadat e jetës politike shqiptare.

Nuk dua të bëj asnjë polemikë me zotërinjtë dhe zonjat e angazhuara, në ekranet e këtij diskutimi.

Ata kishin mbrëmë, përtej pozicionimeve të njohura, edhe avantazhin e spektatorit në dhënien e gjykimeve, jashtë dinamikës dhe tensionit të ngjarjes.

Por e ndjej për detyrë të shprehem në emër të atyre efektivëve, të cilët nuk e meritojnë trajtimin tejet tendencioz, që iu bë operacionit të tyre.

Për zbatimin e vendimit të Gjykatës u angazhuan efektivë të Forcës Lëvizëse Operacionale, forcë e posaçme e trajnuar dhe specializuar për të ndjekur protokollet standarde sipas rastit, dhe jo punonjës të Rendit, që është një forcë shërbimi ditor.

Ata fatkeqësisht u përballën me një subjekt, që kundërshtoi forcërisht t’i nënshtrohej vendimit të Gjykatës, sapo mori dijeni për të.

Kjo është zanafilla e ngjarjes dhe nga këtu fillon arsyetimi sipas protokollit, që Policia e Shtetit ndjek në ekzekutimin e një vendimi ndalimi.

Me këtë fakt lidhet edhe e gjithë shija, sigurisht jo e mirë e skenës që u krijua.

Nëse shtetasi Ilir Meta nuk do ta kishte kundërshtuar ekzekutimin e vendimit, dinamika e ngjarjes nuk do të kishte prodhuar asgjë tjetër, përveçse kalimin e qetë të tij, nga automjeti privat në automjetin e shoqërimit në Polici.

Nga ana tjetër, askush nuk e thotë dot, që ajo shfaqje e dhunshme kundërshtie, nuk do të kishte qenë e njëjta kudo tjetër, ku do të mund të bëhej ndalimi i tij.

Madje sipas analizës përgatitore të operacionit, në të tjera rrethana, rezultati mund të kishte qenë edhe më problematik për shijen e atyre, që mbrëmë e trajtuan Policinë si autore të një operacioni të dhunshëm.

Por fatkeqësisht dhe çuditërisht, të gjithë ata “harruan”, që vetëm kundërshtimi i saj me dhunë dhe asgjë tjetër, e bëri të pashmangshëm shoqërimin me forcë të shtetasit Ilir Meta. Për pasojë edhe skenën shqetësuese!

Prandaj me keqardhje të sinqertë për pamundësinë e shmangies së shoqërimit të tij me forcë, jam po ashtu i keqardhur, që nuk bie dot dakord me optikën e akuzatorëve të mbrëmshëm të Policisë së Shtetit.

Me fjalorin e tyre ekstrem ndaj efektivëve të saj, jo dhe jo. Kurrën e kurrës.

Dhe në fund, e shoh të nevojshme të nënvizoj një të vërtetë absolute dhe fare banale. Kur Policia e Shtetit, jo në Shqipëri, por kudo në botë, merr një urdhër arresti, nuk ka në dispozicion shumë opsione, por vetëm një: Të ndalojë personin e kërkuar dhe pikë. As mund ta lajmërojë, as mund ta ftojë dhe as mund të koordinojë me të, vendin dhe orën e ndalimit. Të gjitha këto nuk janë thjeshtë të pamundura, por janë vepër penale, që ndëshkohen me burg.

Pra, Policia e Shtetit dje kreu detyrën dhe u detyrua ta kryente duke përdorur forcën, për gjithë sa sqarova më lart, duke iu referuar dinamikës së ngjarjes, jo dëshirës, sesi do të kishte qenë më mirë të ndodhte apo të mos ndodhte.

The post Arrestimi i Ilir Metës/ Reagon ministri Ervin Hoxha: Policia e Shtetit kreu detyrën dhe u detyrua ta kryente duke përdorur forcë appeared first on Albeu.com.

Ai tha se udhëheqësit e PD në qarqe do të marrin përsipër të organizojnë protestën në kryeqytet. Ai tha se protesta do jetë më 29 tetor, ndërsa e radhës do të jetë akoma edhe më afër.

“Më datën 29, udhëheqësit e PD në qarqe marrin përsipër të organizojnë në rang qarku paralizimin këtij regjimi”, tha ai.

Shpallja e datës së kësaj protestë vjen pas arrestimit të Ilir Metës, i cili akuzohet për dosjen “Cez-Dia”, si dhe për pastrim parash.

Në lidhje me arrestimin e Ilir Metës, Berisha e cilësoi si politik, duke thënë se Rama nxori banditë nme uniformë për të tërhequr zvarrë kreun e PL.

“Kjo mbledhje kryesie e thirrur ditë më parë mblidhet sot në një moment, në një ditë, në të cilën regjimi, narko-regjimi i Edi Ramës kreu një akt terrorist të vërtet. Rrëmbeu në mes të rrugës, tërhoqi zvarrë dhe goditi me urdhër të Edi Ramës, ish-presidentin, ish-kryeministrin, ish-kryetarin e Parlamentit, kryetarin e partisë së dytë më të madhe opozitare, z.Ilir Meta, e gjitha kjo si përson nën hetim.

Edi Rama, me këtë akt prej burracaku, prej frikacaku dëshmoi se në shpirtin e tij nuk ka asnjë dallim nga i ati xhelat që i tmerruar nga vargjet e Havzi Nelës firmoste varjen e tij në litar si kundërshtar politik.

Të nxjerrësh një bandë me uniformë, të rrëmbejnë, të zvarrisin, të godasin njërin nga personalitetet me karrierë më të gjatë politike, i cili në rininë e tij bëri aq sa kishte mundësi për një orientim europian të partisë së krimit.

Në periudha tjera, veçanërisht gjatë luftës në Kosovë dha kontribut thelbësor në përballimin e krizës, qendroi në detyrën e presidentit në mbrojtje të Kushtetutës dhe pluralizmit”, tha Berisha

The post Pas arrestimit të Metës, Sali Berisha njofton protestën e radhës së opozitës appeared first on Albeu.com.

Ndërkohë që po vijonin hetimet për këtë procedim, mbi bazën e kallëzimeve të shtetasve H. V. dhe I. B., Prokuroria e Posaçme ka regjistruar procedimin penal nr.122 të vitit 2022 për veprat penale “Korrupsion pasiv i zyrtarëve të lartë shtetëror dhe të zgjedhurve vendorë”, “Pastrim i produkteve të veprës penale dhe veprimtarisë kriminale”, “Refuzim për deklarim, mosdeklarim, fshehje ose deklarim i rremë i pasurive, interesave private të personave të zgjedhur dhe nëpunësve publikë, ose i çdo personi që ka detyrimin ligjor për deklarim”, parashikuar nga nenet 260 dhe 25, 287/2 dhe 257/a/2 i K.Penal.

Në vijim të hetimeve, procedimet e sipërcituara janë bashkuar në një procedim të vetëm në vitin 2024.

Nga sa më sipër, janë dokumentuar disa episode ku subjektet e këtij procedimi penal I.M. dhe M. K. në bashkëpunim mes tyre por edhe me funksionarë të tjerë publikë janë përfshirë në kryerjen e disa veprave penale.

1- Është provuar se ish-Ministri i Ekonomisë, Tregtisë dhe Energjitikës, I. M., ka përdorur autoritetin dhe influencën e tij për të ndërhyrë në procesin e lidhjes së kontratës ndërmjet shoqërisë “Debt International Advisory” dhe kompanisë CEZ Shpërndarje. Kjo kontratë kishte për objekt asistimin në identifikimin dhe arkëtimin e borxheve të prapambetura.

Këto marrëdhënie ngushtësisht të ndërlidhura kanë ndikuar drejtpërdrejtë në procesin e përzgjedhjes së DIA-s për të kryer shërbimet e mbledhjes së borxheve të CEZ-it, pavarësisht se shoqëria nuk përmbushte të gjitha kriteret ligjore dhe profesionale për të menaxhuar detyrime të kësaj natyre.

Shoqëria “Debt International Advisory”, përmes kësaj marrëveshjeje ka përfituar në mënyrë të parregullt shumën prej 649,803,520 lekësh, e cila është konfirmuar nga një vendim gjyqësor i formës së prerë.

Hetimet e deritanishme kanë zbuluar se I.M. ka kërkuar dhe pranuar shuma të konsiderueshme parash nga z. K. I., gjatë periudhës kur ai mbante funksionin e Ministrit, detyrë e cila përfshinte mbikëqyrjen e procesit të privatizimit të CEZ-it dhe lidhjen e kontratave për mbledhjen e borxheve, duke konsumuar kështu elementët e veprës penale të “Korrupsionit pasiv të funksionarëve të lartë shtetërorë ose të zgjedhurve vendorë”, parashikuar nga neni 260 i Kodit Penal.

2- Nga hetimet ka rezultuar se shtetasi I. M. në sajë të funksionit të tij si Kryetar i Kuvendit dhe bashkëshortja e tij, M. K. si deputete e Kuvendit, në vitin 2014 kanë përdorur influencën e tyre duke ndikuar tek drejtuesit e institucioneve të ndryshme shtetërore si dhe tek drejtuesit e kompanive të telefonive celulare, me qëllim futjen në tregun e fibrave optike si dhe lidhjen e marrëveshjes së interkonjeksionit midis kompanisë “U… C… INC” dhe një kompanie private telefonike celulare.

Si rezultat i kësaj influence të paligjshme subjektet në hetim I.M dhe M.K. kanë përfituar pjesën e tyre në përqindje nga fitimi i kompanisë, dhe janë pajisur me karta krediti nga administratori i shoqërisë. Shpenzimet e kryera nëpërmjet këtyre kartave, nuk janë deklaruar në deklaratat periodike të pasurive nga të hetuarit.

Personi nën hetim P. Xh., duke shfrytëzuar autoritetin e tij si Kryetari i AKEP, i zgjedhur nga Kuvendi i Shqipërisë me propozimin e subjektit politik “Lëvizja Socialiste Për Integrim” (LSI), në zbatimi të porosive të marra nga subjektet I. M. dhe M. K., jo vetëm ka ndikuar tek drejtuesit e kompanisë telefonike celulare për finalizmin e marrëveshjes por nga ana tjetër, ka lejuar kompaninë private të ushtrojë aktivitetin e saj në shkelje të ligjit të AKEP. Për këto arsye, personat nën hetim I.M. dhe M.K. ka dyshime se kanë konsumuar veprën penale të “Korrupsionit pasiv të zyrtarëve të lartë shtetërore ose të zgjedhurve”, në bashkëpunim, të ndihmuar edhe nga personi tjetër nën hetim P. Xh., i cili akuzohet për të njëjtën vepër penale.

3- Gjatë hetimit ka rezultuar gjithashtu se çifti I.M. dhe M.K., kanë hyrë në marrëdhënie korruptive me biznesmenin S.M., duke përfituar përkohësisht një vilë si shpërblim për influencën e paligjshme që ata ushtronin ndaj funksionarëve publikë të emëruar nga LSI, në interes të aktiviteteve ekonomike të bizmesmenit në fjalë. Personi nën hetim M.K., me porosi të biznesmenit në fjalë, ka marrë përsipër edhe ndryshimin e një ligji në Kuvendin e Shqipërisë (ligj i cili u ndryshua sipas kërkesës së biznesmenit S.M.).

4- Përgjatë periudhës 2016-2017, I. M. me cilësinë e Kryetarit të Partisë Lëvizja Socialiste për Integrim, ka lidhur dhe ekzekutuar kontrata për shërbimi konsulence dhe lobimi me kompanitë Global Security and Inovative Solution LLC dhe Grupi McKeon Inc në Shtetet e Bashkuara të Amerikës. Nga hetimi rezulton se një pjesë e financimit të kontratave është bërë me transferta bankare nga llogaritë e subjektit politik, Lëvizja Socialiste për Integrim, ndërkohë që shuma prej 463.546,26 USD nuk është transferuar nga llogaritë bankare të këtij subjekti politik. Po kështu rezulton se kjo shumë monetare, e cila nuk është transferuar nga llogaritë bankare të forcës politike nuk është pasqyruar në bilancet e subjektit politik Lëvizja Socialiste për Integrim, të depozituara pranë Komisionit Qëndror të Zgjedhjeve.

5- Për periudhën 2009-2010, nga ana e personave nën hetim, I. M., M. K. dhe F. K., është blerë, një apartament dublex me vendndodhje në zonën e njohur si “ish bllok”, i deklaruar si i financuar me kredi bankare. Nga hetimi ka rezultuar se shuma prej 310,000 Euro që kanë shërbyer për blerjen e katit të parë të dublex, janë derdhur Cash në sistemin bankar nga F. K., dhe shuma 335,000 Euro e marrë kredi nga F. K., është shlyer gjithashtu me para të depozituara në bankë të nivelit të dytë në Republikën e Shqipërisë, në Mars-Nëntor 2010. Këto para dyshohet se kanë origjinën nga aktiviteti i paligjshëm i shtetasve I.M. dhe M.K. si dhe kredia bankare është përdorur si mbulesë dhe mënyrë për të futur në sistemin bankar shuma të konsiderueshme monetare.

6- Nga hetimi ka rezultuar se shtetasit I.M. dhe M.K. nuk kanë deklaruar shpenzimet mjekësore të kryera gjatë periudhës 2013-2019, në vlerën totale prej 106.125 Euro. Nga këto shpenzime, 86.891 Euro janë paguar në cash. Hetimet kanë zbuluar se në deklaratën e Interesave Private Vjetore për vitin 2019, të dorëzuar në ILDKPKI më 29 Maj 2020, këta subjekte nuk kanë deklaruar shpenzimet shëndetësore në vlerën prej 9.000 Euro të kryera në një klinikë private jashtë vendit si dhe dhe shumën 100.000 Euro në llogarinë bankare dy emërore, të cilat i përkasin E.M. dhe F. K. Subjektet I.M. dhe M. K. dyshohet se kanë konsumuar veprën penale “Refuzimit për deklarim, mosdeklarimi, fshehja dhe deklarimi i rrëmë i pasurive, interesave private të personave të zgjedhur dhe nëpunësve publikë” parashikuar nga neni 275/a të Kodit Penal.

Prokuroria e Posaçme ka kryer hetime në kuadër të procedimeve penale nr. 55 të vitit 2019 (dërguar për kompetencë nga Prokuroria për Krime të Rënda), 122 të vitit 2022 (regjistruar mbi bazën e kallëzimit të shtetasit I.B.), 125 të vitit 2022 (regjistruar mbi bazën e kallëzimit të shtetasit H.V.), 165 të vitit 2022 (regjistruar mbi bazën e kallëzimit të shtetasit I.B.), të cilët janë bashkuar në një procedim të vetëm duke u numërtuar procedimi penal nr.55/2019.

Pas kryerjes së veprimeve të shumta hetimore dhe analizës së provave, në datën 09.10.2024 Prokuroria e Posaçme iu drejtua Gjykatës së Posaçme të Shkallës së Parë Për Korrupsionin dhe Krimin e Organizuar me kërkesën për caktim mase sigurimi ndaj katër shtetasve.

Me vendimin nr.125 datë 20.10.2024, Gjykata e Posaçme e Shkallës së Parë ka vendosur:

1. Caktimin e masës së sigurimit personal “Arrest në burg” parashikuar nga neni 238 i Kodit të Procedurës Penale, ndaj personit nën hetim I. M., i dyshuar për kryejen e veprave penale; “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim” parashikuar nga nenet 260 dhe 25, 287/2 dhe 257/a/2 i K.Penal.

2. Caktimin e masës së sigurimit personal “Detyrim për tu paraqitur në policinë gjyqësore” parashikuar nga neni 234 i Kodit të Procedurës Penale, ndaj personit nën hetim, M. K., e dyshuar për kryerjen e veprave penale; “Korrupsioni pasiv i funksionarëve të lartë shtetërorë ose të zgjedhurve vendorë” në 2(dy) raste dhe në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim” parashikuar nga nenet 260 dhe 25, 287/2 dhe 257/a/2 i K.Penal.

3. Caktimin e masës së së sigurimit personal “Arrest në shtëpi” parashikuar nga neni 237 i Kodit të Procedurës Penale, ndaj personit nën hetim P. Xh. i dyshuar për kryerjen e veprës penale “Korrupsioni pasiv i funksionarëve të lartë shtetërorë ose të zgjedhurve vendorë”, e kryer në bashkëpunim, parashikuar nga nenet 260 dhe 25 të Kodit Penal.

4. Caktimin e masës së sigurimit personal “Detyrim për tu paraqitur në policinë gjyqësore” parashikuar nga neni 234 i Kodit të Procedurës Penale, ndaj personit nën hetim E. Ç., e dyshuar për kryerjen e veprës penale të “Pastrimi i produkteve të veprës penale ose veprimtarisë kriminale” e kryer në bashkëpunim parashikuar nga neni 287/2 i Kodit Penal.

Po në datën 20.10.2024 Prokuroria e Posaçme ka urdhëruar Drejtorinë e Përgjithshme të Policisë së Shtetit që të ekzekutojë masat e sigurimit të caktuara me vendimin nr.125 datë 20.10.2024. Policia e Shtetit ka ekzekutuar sot në datën 21.10.2024 masat e sigurimit të mësipërme ndaj katër personave nën hetim.

Hetimet vazhdojnë me administrimin e provave sa i përket implikimit të personave të tjerë që dyshohet se janë të përfshirë në këtë veprimtari të paligjshme kriminale.

Gjejmë rastin që të falenderojmë Drejtorinë e Përgjithshme të Policisë së Shtetit si dhe autoritetet e zbatimit të ligjit të Shteteve të Bashkuara të Amerikës, Austrisë, Italisë, San Marinos, Qipros për ndihmën dhe bashkëpunimin e treguar.

The post Arrestimi i Ilir Metës, SPAK del me njoftim zyrtar, zbardhen akuzat ndaj tij dhe Monika Kryemadhit appeared first on Albeu.com.