Ndërmjetësuesit ndërkombëtarë patën shpresuar se do të siguronin një armëpushim gjashtëjavor përpara se të fillonte Ramazani, por Hamasi refuzoi çdo formë marrëveshjeje që nuk do të sillte një armëpushim të përhershëm në Gazë, një kërkesë që u refuzua nga Izraeli.

“Mund t’ju them se po punojmë intensivisht me Izraelin, Katarin, Egjiptin, për të përafruar qëndrimet dhe për të arritur një marrëveshje. Kemi bisedime që po zhvillohen edhe në këto momente që unë po flas këtu dhe jam i bindur se këto përpjekje do të vazhdojnë gjatë ditëve në vijim”, tha nga Vjena Sekretari amerikan i Shtetit, Antony Blinken.

Ndërkaq anijet e Shteteve të Bashkuara po lundrojnë drejt Gazës në një mision humanitar, të urdhëruar nga Presidenti Joe Biden. Objektivi është ndërtimi i një porti të përkohshëm në brigjet e Gazës ku do të shkarkohen ndihmat e ardhura me anije.

“Sapo të ndërtohet dhe të jetë gati për të kryer misionin, ne do të jemi në gjendje të dërgojmë 2 milionë vakte ushqimore në ditë”, thotë gjenerali amerikan Brad Hinson. Por, ekspertët thonë se procesi kërkon kohë dhe është i kushtueshëm.

“Logjistika e përbashkët në bregdet është e improvizuar. Mënyra më e mirë për të dërguar ndihmat do të ishte me kamionë”, thotë ish-koloneli në ushtri Myles Caggins, tashmë në Institutin New Lines.

Por kamionët dhe qendrat e shpërndarjes së ndihmave janë sulmuar dhe palestinezët po përballen me uri. Moli lundrues do të duhet disa javë që të mbërrijë dhe rreth dhjetë ditë të tjera për t’u montuar. Ndërkohë, ushtria amerikane dhe vende të tjera si Jordania dhe Egjipti po i dërgojnë ndihmat në rrugë ajrore.

Por, ndihmat nga ajri janë të pamjaftueshme. Një avion transportues C-130 mund të mbartë po aq pako ndihmash sa një kamion. Sean McFate, autori i librit “Rregullat e Reja të Luftës”, thotë se planet amerikane për shpërndarjen e ndihmave janë të pamenduara mirë.

“Nuk dihet nëse ndihmat shkojnë tek njerëzit e duhur, pasi nuk ekziston kontrolli i drejtpërdrejtë dhe Hamasi ia vjedh ndihmat popullsisë. Pra duket më tepër si një manovër politike në një vit zgjedhor nga kjo administratë, vetëm për të treguar se po bën diçka”, thotë zoti McFate.

Ndërkohë çdo ditë e luftës sjell vuajtje të mëtejshme për palestinezët. Sipas ministrisë së Shëndetësisë së Gazës, të kontrolluar nga Hamasi, rreth 63 palestinezë u vranë dhe 112 u plagosën gjatë 24 orëve të fundit. Të paktën 31,553 palestinezë janë vrarë dhe 73,546 janë plagosur që kur Izraeli filloi fushatën ushtarake pas sulmit terrorist të Hamasit më 7 tetor, ku sipas autoriteteve izraelite u vranë 1200 persona dhe u morën peng më shumë se 250 të tjerë.

Marrë nga VOA

The post Zyrtarët egjiptianë: Pritet që bisedimet për armëpushim në Gaza të rifillojnë të dielën në Katar appeared first on Albeu.com.

Shtetet e Bashkuara kanë hedhur poshtë thirrjet ndërkombëtare për një armëpushim të plotë, por janë përpjekur të bindin Izraelin të pranojë pauza të përkohshme humanitare, një ide që kryeministri izraelit Benjamin Netanyahu e refuzoi, pasi u takua me zotin Blinken të premten në Izrael.

Sekretari Blinken po viziton rajonin për herë të dytë që pas sulmit të Hamasit ndaj Izraelit më 7 tetor që shkakoi vdekjen e mbi 1,400 personave. 240 të tjerë u morën peng. Izraeli u kundërpërrgjigj mes sulme në Rripin e Gazës për të goditur grupin militant që Shtetet e Bashkuara e konsiderojnë organizatë terroriste.

Zyrtarët shëndetësorë në Gazën e drejtuar nga Hamasi thonë se më shumë se 9,250 palestinezë janë vrarë në sulmet izraelite që atëherë. Ushtria izraelite e ka vendosur Gazën nën rrethim, e ka goditur nga ajri dhe ka nisur një sulm tokësor, duke shkaktuar alarm global për kushtet humanitare në enklavë. Ushqimi është i pakët dhe shërbimet mjekësore po paralizohen.

Ministrat e Jashtëm të Arabisë Saudite, Katarit, Emirateve të Bashkuara Arabe, Egjiptit dhe Jordanisë, si dhe përfaqësuesit palestinezë, do të vënë theksin tek “qëndrimi arab që bën thirrje për një armëpushim të menjëhershëm, ndihma humanitare dhe mënyrat për t’i dhënë fund përkeqësimit të rrezikshëm që kërcënon sigurinë e rajonit”, tha ministria e jashtme jordaneze në një deklaratë të premten.

Pas takimit me zotin Blinken të premten, Kryeministri Netanyahu tha se Izraeli refuzoi një armëpushim të përkohshëm që nuk përfshinte lirimin e pengjeve.

Një zyrtar i lartë i Departamentit të Shtetit tha se bisedimet e Sekretarit Blinken me Kryeministrin Netanyahu dhe kabinetin e tij të luftës për pauzat humanitare të premten janë në vazhdën e trysnisë që filloi muajin e kaluar për të dërguar mallra humanitare në Gazë.

Izraeli fillimisht refuzoi, por më pas lejoi hyrjen e ndihmës. Më shumë se 100 kamionë me ndihma në ditë hyjnë tani në Gazë, tha zyrtari. Zyrtarët amerikanë thonë se nevojiten 500-600 kamionë në ditë për të plotësuar nevojat në enklavën që kontrollohet nga Hamasi.

SHBA po i kërkon Izraelit që të bjerë dakord për pauza të përkohshme humanitare për të lejuar shpërndarjen e ndihmave, por Izraeli është i shqetësuar se Hamasi do t’i përdorte këto pauza për t’u riorganizuar dhe furnizuar.

I dërguari i posaçëm i SHBA-së për çështjet humanitare në Lindjen e Mesme, David Satterfield, u tha gazetarëve që udhëtonin me zotin Blinken se shqetësimet e Izraelit ishin të kuptueshme, por se garancitë se Izraeli nuk do të vërë në shënjestër vende apo rrugë të veçanta janë një “domosdoshmëri strategjike” për të dërguar ndihmat tek ata që kanë nevojë.

“Ne duam të shohim krijimin e mundësisë për lëvizje të sigurt dhe të qëndrueshme të ndihmës humanitare, jo vetëm nëpër pikëkalimin kufitar Rafah, por aty ku ka nevojë në tërë pjesën jugore”, tha ai, duke shtuar se mes 800,000 dhe 1 milion njerëz janë zhvendosur tashmë nga veriu në jug.

Mbreti Abdullah i Jordanisë, një aleat i SHBA-së, i tha kancelarit gjerman Olaf Scholz gjatë një bisede telefonike të premten se komuniteti ndërkombëtar duhet të nxisë urgjentisht një armëpushim të menjëhershëm në Gaza.

Shtetet arabe janë të shqetësuara nga rreziku i përhapjes së konfliktit në rajon. Hezbollahu i Libanit dhe milicitë shiite irakiane të mbështetura nga Irani kanë nisur sulme ndaj Izraelit që nga 7 tetori, ndërsa milicitë shiite irakiane të mbështetura nga Teherani kanë qëlluar edhe mbi forcat amerikane në Irak dhe Siri.

Kryeministri i përkohshëm i Libanit Najib Mikati theksoi nevojën urgjente për një armëpushim në Gaza gjatë një takimi me zotin Blinken në Jordani të shtunën, tha zyra e zotit Mikati.

Ai tha gjithashtu se “agresioni izraelit” në Libanin jugor duhet të ndalet.

Zëdhënësi i Departamentit amerikan të Shtetit, Matthew Miller tha se Sekretari Blinken kishte “ndarë shqetësimin e tij të thellë për shkëmbimet e zjarrit përgjatë kufirit jugor të Libanit me Izraelin dhe theksoi se është e rëndësishme që konflikti Izrael-Hamas të mos përhapet më tej”.

The post Në takimin me Sekretarin Blinken, udhëheqësit e vendeve arabe pritet të bëjnë thirrje për armëpushim në Gazë appeared first on Albeu.com.