Policia e Kosovës ka bërë të ditur se gjatë dy operacioneve të zhvilluara në veri të vendit ka sekuestruar armë, municion, veshje ushtarake dhe materiale të tjera.

Sipas Drejtorisë Rajonale të Policisë në Mitrovicë Veri, bastisjet u kryen më 27 shtator, pas marrjes së informacionit se në fshatin Dren të Leposaviqit dhe në Shipovë të Zubin Potokut mund të ruheshin armë apo mjete të paligjshme.

Në Dren, kontrollet u përqendruan në një objekt që shërbente si stallë. Aty u zbuluan dhe u morën si prova një armë përsëritëse M-56, një pistoletë CZ-99 e kalibrit 9 mm dhe një pistoletë CZ Mod-70 e kalibrit 7.65 mm.

Gjatë të njëjtit operacion u gjetën gjithashtu 99 fishekë të kalibrit 7.62 mm, 30 fishekë të kalibrit 9 mm dhe 10 fishekë të kalibrit 7.65 mm.

Për këtë rast është ndaluar S.V., i lindur më 1971. Ai është marrë në pyetje në Stacionin Policor në Leposaviq, në praninë e avokatit mbrojtës, ndërsa prokurori i shtetit ka urdhëruar ndalimin e tij për 48 orë.

Operacioni i dytë u zhvillua në një banesë të pabanuar në fshatin Shipovë të Zubin Potokut. Në këtë lokacion, zyrtarët policorë gjetën një pushkë automatike AK-47, gjashtë karikatorë dhe 157 fishekë të kalibrit përkatës.

Policia sekuestroi edhe një pushkë gjuetie M-48, së bashku me 186 fishekë për armë të gjatë, një bajonetë, uniforma ushtarake me emblemë serbe, dy çanta ushtarake dhe një pajisje ushtarake për ushqim.

Deri në këtë fazë, për ngjarjen në Shipovë nuk është arrestuar asnjë person.

Për të dyja rastet, me vendim të prokurorit të shtetit, është hapur hetim nën dyshimin për veprën penale “Mbajtja në pronësi, kontroll ose posedim të paautorizuar të armëve”.

The post Kontrolle në veri të Kosovës, sekuestrohen armë, municion dhe pajisje ushtarake me simbole serbe appeared first on Albeu.com.

Gjatë kontrolleve të zakonshme në Aeroportin Ndërkombëtar “Adem Jashari”, zyrtarët e Doganës së Kosovës kanë penguar importimin e një arme ajrore të ndaluar, e cila nuk ishte deklaruar.

Udhëtari kishte kaluar përmes kanalit të gjelbër, duke nënkuptuar se nuk kishte mallra për t’i paraqitur pranë autoriteteve doganore. Megjithatë, ai u përzgjodh për kontroll dhe bagazhi i tij iu nënshtrua skanimit.

Pasi pamjet e skanerit ngritën dyshime për përmbajtjen e valixhes, zyrtari doganor kreu kontroll fizik. Brenda bagazhit u zbulua një revole ajrore “FB Record” e kalibrit .177, një (1) copë, e çmontuar dhe e mbështjellë me foli alumini e rroba për t’u mbajtur e fshehur.

Arma u sekuestrua dhe iu dorëzua Policisë Kufitare në Aeroportin e Prishtinës për trajtim të mëtejshëm. Ndërkohë, ndaj udhëtarit do të ndërmerren procedurat përkatëse administrative dhe ligjore.

Dogana e Kosovës ka deklaruar se do të vazhdojë angazhimin për mbrojtjen e kufijve të Republikës së Kosovës dhe ndalimin e hyrjes së mallrave të ndaluara apo të kontrabanduara. Për garantimin e sigurisë së qytetarëve dhe zbatimin e legjislacionit në fuqi, ajo thekson se bashkëpunon ngushtë me institucionet kompetente.

The post Dogana ndalon futjen e një arme ajrore në Aeroportin e Prishtinës appeared first on Albeu.com.

Policia e Kosovës ka zbuluar dhe konfiskuar një arsenal të konsiderueshëm armësh, municioni dhe pajisjesh ushtarake në fshatrat përreth Kalludrës, në Zubin Potok, bëri të ditur ministri në detyrë i Punëve të Brendshme, Xhelal Sveçla.

Sipas tij, operacioni është zhvilluar pas një hetimi intensiv të institucioneve të Kosovës, ndërsa detajet u prezantuan në konferencën e jashtëzakonshme të Policisë së Kosovës në Mitrovicë.

Sveçla tha se arsenali është gjetur në të njëjtën zonë ku, gjatë javëve të fundit, janë zbuluar tri varreza masive me mbetje mortore të 23 personave.

Ministri në detyrë e lidhi zbulimin e armatimit dhe të varrezave me shtrirjen e sovranitetit shtetëror në veri, vendosjen e rendit dhe ligjit, si dhe bashkëpunimin ndërinstitucional.

Ai theksoi se zbulimi i varrezave masive ka rikthyer në vëmendje përmasat e krimeve të kryera gjatë luftës së fundit në Kosovë.

Sipas deklarimit të tij, veriu i Kosovës, përveçse ishte vendi ku u kryen krime të rënda ndaj civilëve shqiptarë, maltretime dhe dëbime, u përdor edhe për fshehjen e trupave të viktimave.

Sveçla deklaroi se Serbia ka investuar vazhdimisht për ta mbajtur veriun e Kosovës të destabilizuar dhe rezistent ndaj institucioneve të sigurisë së Kosovës.

Ai shtoi se, gati tri dekada pas përfundimit të luftës, familjarët e personave të zhdukur vazhdojnë të presin gjetjen e mbetjeve mortore të më të dashurve të tyre. Kosova, ndërkaq, kërkon përgjegjësi për të gjithë ata që kanë marrë pjesë në krime, në fshehjen e trupave apo në mbajtjen e fshehtë të informacioneve për vendndodhjen e viktimave.

Në tri lokacione të kësaj zone janë gjetur mbetje mortore të 23 personave. Në lokacionin e parë janë zbuluar mbetjet e 13 personave, në të dytin të katër personave, ndërsa në të tretin mbetjet e gjashtë personave.

Gjatë konferencës, Policia e Kosovës prezantoi armët, municionin dhe pajisjet ushtarake të gjetura e të konfiskuara gjatë operacioneve në këtë zonë.

The post Sveçla: Armët u zbuluan pranë tri lokacioneve ku u gjetën varreza masive appeared first on Albeu.com.

Operacioni policor “Hallkat”, i zhvilluar në Maminas të Durrësit, çoi në sekuestrimin e tri pistoletave dhe 34 fishekëve. Sipas Policisë së Shtetit, armët dyshohet se ishin trafikuar nga Kosova për t’iu shitur grupeve kriminale në Shqipëri.

Në flagrancë u arrestua M. B., 34 vjeç dhe banues në Kukës, i cili dyshohet se po transportonte armët me automjet, përcjell KosovaPress.

Bashkë me të u vu në pranga edhe pasagjerja D. N., 39 vjeçe, banuese në Prizren. Ajo dyshohet për veprën penale “Moskallëzimi i krimit”.

Policia bëri të ditur se gjatë kontrollit të automjetit me të cilin të dy po udhëtonin në Maminas, u zbuluan tri armë zjarri të llojit pistoletë dhe 34 fishekë, për të cilat dyshohet se janë sjellë ilegalisht nga Kosova.

Kontrolli në banesën e të dyshuarit zbuloi gjithashtu një armë të ftohtë, konkretisht një dorezë hekuri. Autoritetet sekuestruan edhe automjetin që dyshohet se ishte përdorur për transportin e armëve.

M. B. po hetohet për veprat penale “Trafikim të armëve dhe municionit” dhe “Prodhim, mbajtje, blerje apo shitje pa leje të armëve të ftohta”.

Hetuesit po punojnë për të identifikuar persona të tjerë që mund të kenë lidhje me rastin. Materialet procedurale ndërkohë i janë referuar Prokurorisë për veprimet e mëtejshme.

The post Sekuestrohen armë të trafikuara nga Kosova në Shqipëri, dy persona në pranga në Durrës appeared first on Albeu.com.

Arben Fetoshi, drejtor i Institutit për Studime të Luftës Hibride “Octopus”, ka reaguar ndaj deklaratave të presidentit serb Aleksandar Vuçiq për lumin Ibër. Sipas tij, përdorimi i ujit si mjet presioni dëshmon se resurset natyrore vazhdojnë të jenë pjesë e strategjisë hibride të Serbisë kundër Kosovës.

“Një deklaratë me elemente fashiste që përbën një tjetër kërcënim të drejtpërdrejt ndaj Kosovës. Vuçiq e zbuloi planin për ‘mbrojtjen e serbëve’, duke përdorur ujin si instrument presioni: Do ta ndryshojmë rrjedhën e Ibrit, pastaj të shohim se çfarë do të bëjnë shqiptarët” (RT Balkan, 09.08.2026). Fetoshi ka shkruar në Facebook se lidhja e këtij “plani” me pretendimet për “keqtrajtim” të serbëve nuk duhet parë vetëm si retorikë për audiencën e brendshme. Sipas tij, kjo përbën përshkallëzim të strategjisë hibride ndaj Kosovës dhe konfirmon në mënyrë të tërthortë përgjegjësinë për sabotazhin në kanalin e Ibër-Lepencit në vitin 2024.

Fetoshi ka vlerësuar se, pas dështimit të sulmit që synonte destabilizimin e vendit për shkak të pasojave të mundshme në furnizimin me ujë të komunave në veri, Mitrovicës, Vushtrrisë, Prishtinës, Drenasit, Fushë Kosovës dhe Obiliqit, si dhe në furnizimin me energji të termocentraleve në Obiliq, Vuçiq po tregon se Beogradi nuk ka hequr dorë nga përdorimi i burimeve natyrore kundër Kosovës.

Ai ka theksuar se një veprim i tillë ndalohet nga kufizimet ndërkombëtare, përfshirë Konventën e UNECE-së për Mbrojtjen dhe Përdorimin e Rrjedhave Ujore Ndërkufitare dhe Liqeneve Ndërkombëtare të vitit 1992. Gjithashtu, sipas tij, kërcënimi do të kishte pasoja edhe për qytetarët serbë në veri, ndërsa Shtetet e Bashkuara e trajtojnë Ujmanin si çështje të sigurisë rajonale, bazuar në vlerësimin e Pacific Northwest National Laboratory, Water Resource Opportunities at Lake Gazivode/Ujmani, 14.04.2021. Në këtë kuadër, ndërthurja e kërcënimit presidencial me pretendimet për “keqtrajtim” tregon, sipas Fetoshit, avancimin e narrativës së “viktimizimit” në funksion të presionit për “Botën Serbe”.

Ndryshimi i qëndrimit të Vuçiqit, nga deklarata “ekziston ideja por unë jam kundër” (Danas, 01.12.2024) në pohimin “jemi duke mbledhur inxhinierë për të parë si mund ta bëjmë” (RT Balkan, 09.08.2026), sipas Fetoshit, tregon transformimin e komunikimit strategjik të Serbisë. Ai e lidh këtë zhvillim me deklaratat e ministres Paunoviq, “heroizimin” e kriminelëve të luftës dhe arrestimin e një serbi, për të cilin dyshohet se ka dhënë informacione lidhur me varrezat masive.

Ideja e devijimit të Ibrit, që “do ta linte Ujmanin pa ujë”, kishte qarkulluar më herët në Serbi. Eksperti Lubisha Mijaçiq ka deklaruar se “Serbia ka mundësi teknike të devijimit” dhe se bëhet fjalë për një “kërcënim real” (Kosovo Online, 22.11.2025). Në të kundërt, profesori spanjoll i gjeografisë Miguel Borja Bernabe-Crespo e ka mohuar rrezikun, duke iu referuar detyrimeve që burojnë nga regjimi ndërkombëtar i ujërave ndërkufitare (REL, 05.12.2024).

Megjithatë, Fetoshi konsideron se ndikimi i llogaritur i kërcënimit, në kushtet e “varësisë” së Kosovës nga ky sistem, shpjegon formulimin hakmarrës drejtuar shqiptarëve dhe përpjekjen për ta paraqitur konfliktin mbi baza etnike. Në këtë rast, “mbrojtja e serbëve” shërben si premisë për legjitimimin e kërcënimit.

Sipas tij, strategjia e “viktimizimit” synon ta portretizojë Kosovën si “represive” dhe ta paraqesë Perëndimin si “bashkë-përgjegjës”, duke përgatitur terrenin për fazën e avancuar të “të drejtës së Serbisë për reagim”.

Fetoshi ka deklaruar se radikalizimi i diskursit shovinist pas qëndrimeve të ministres Paunoviq, mbështetjes së saj nga Daçiq dhe “heroizimit” të kriminelëve të luftës e të arrestuarve lidhur me Masakrën e Reçakut, e bën kërcënimin për Ibrin zgjatim të mesazhit të Vuçiqit në ceremoninë përkujtimore të operacionit “Stuhia”. Në atë ceremoni, Vuçiq deklaroi se “Serbia është mjaftueshëm e fuqishme për mbrojtjen e serbëve” (Insajder, 04.08.2026).

Ai ka paralajmëruar se normalizimi i gjuhës së dhunës, spastrimit etnik dhe “ndëshkimit” të shqiptarëve synon jo vetëm të kalkulojë “tolerimin” e mëtejshëm të Serbisë në pozicionin e “dy karrigeve” dhe përfitimin e Vuçiqit në planin e brendshëm, por edhe të legjitimojë “Botën Serbe” si kamuflim të projektit të Millosheviqit. “Kjo është strategjia hibride e Serbisë në formën e saj të avancuar. Nuk është e domosdoshme ndërhyrja ushtarake, derisa qëllimet minuese mund të arrihen përmes ujit, energjisë, sabotimit, spiunazhit dhe dezinformimit. Në këtë perspektivë, kërcënimi i Ibrit është leva strategjike, ndërsa Ujmani kërcënim ndaj sigurisë kombëtare”, ka thënë Fetoshi.

The post Fetoshi: Kërcënimi për Ibrin, pjesë e luftës hibride të Serbisë ndaj Kosovës appeared first on Albeu.com.

Bëhet me dije se mes personave të shoqëruar janë Astrit Gjonpalaj, ish-punonjës policie dhe pronar i kompanisë “Globus Travel”, si edhe Astrit Meta, shtetas shqiptaro-amerikan.

Këta të fundit, dyshohet se kanë qenë në jaht në momentin kur janë dëgjuar të shtënat.

Gjatë ndjekjes, dy nga personat që ndodheshin në bordin e jahtit, kanë tentuar të afroheshin në breg me gomone për t’i ikur policisë, por pasi kanë parë praninë e efektivëve në tokë, janë kthyer sërish drejt jahtit.

Ndërsa, njëri nga personat e tjerë, është hedhur në det, por është kapur më pas nga Policia Kufitare.

Jahti fillimisht kishte marrë drejtimin për në Greqi, por më pas ndryshoi kurs. Në përpjekje për t’i ikur autoriteteve, jahti ka fikur dritat dhe ka vijuar lëvizjen në det, por pas dy orësh ndjekjeje, mjeti u ndalua dhe u dërgua në Portopalermo për kontroll të imtësishëm.

Ngjarja ka ndodhur rreth orës 21:00, kur pushues që ndodheshin në zonë njoftuan policinë se nga një jaht ishin dëgjuar të shtëna me armë zjarri.

Menjëherë pas marrjes së sinjalizimit, shërbimet e Policisë Kufitare dhe të Njësisë Policore Detare janë ngritur me urgjencë në këmbë dhe i janë vënë në ndjekje mjetit lundrues në hapësirën detare.

Mjeti lundrues iu nënshtrua një kontrolli të imtësishëm nga forca të shumta policie, por ende nuk është bërë e ditur se çfarë është gjetur në bord.

Megjithatë ende nuk dihen motivet e të shtënave dhe as kush ka qëlluar me armë, ndërsa hetimet vijojnë për të dokumentuar rrethanat e plota të ngjarjes.

The post Të shtënat me armë nga jahti në Palasë, mes personave të shoqëruar edhe biznesmeni i njohur appeared first on Albeu.com.

Forcat e rendit në Kosovë kanë konfiskuar gjatë ditës së martë gjithsej 12 armë zjarri nëpër zona të ndryshme të vendit, ku bëjnë pjesë edhe tre pushkë automatike të tipit kallashnikov.

Gjatë këtyre ndërhyrjeve dhe bastisjeve, autoritetet kanë vënë në dorë gjithashtu sasi municioni dhe komponentë të tjerë të armatimit, raporton KosovaPress.

Në një rast të veçantë në komunën e Podujevës, pas kontrollit të banesës së një personi të dyshimtë, u zbulua dhe u sekuestrua një armë zjarri, ndërsa çështja ka kaluar në procedurë standarde.

Në të njëjtën komunë, në vijim të hetimeve për një tentativë vrasjeje të ndodhur më parë, policia ka bastisur shtëpitë e dy personave të shpallur në kërkim. Gjatë këtij aksioni, u konfiskuan gjashtë armë zjarri – tre pistoleta dhe tre armë të gjata – si dhe 67 fishekë dhe pjesë të ndryshme të armatimit.

Ndërkohë, në fshatin Gjonaj të rajonit të Prizrenit, pas njoftimeve për të shtëna armësh në një festë familjare, efektivët e policisë bllokuan një pistoletë gazi, një automatik AK-47, 20 fishekë dhe disa gëzhoja. Sipas informacioneve, dy persona u arrestuan dhe u vendosën në paraburgim.

Në Deçan, gjatë trajtimit të një rasti të dhunës brenda familjes, uniformat blu i morën një të dyshuari një pushkë automatike AK-47 bashkë me një karikator.

Po ashtu, në fshatin Temeqin të Malishevës, kontrollet e ushtruara në dy banesa sollën gjetjen dhe konfiskimin e një pushke automatike AK-47, një pistolete TT, një karikatori, 10 fishekëve dhe një pjese të një arme automatike të gjatë.

The post Operacionet policore në Kosovë çojnë në sekuestrimin e 12 armëve të zjarrit, mes tyre tre kallashnikovë appeared first on Albeu.com.

Gjatë gjashtë muajve të parë të këtij viti, Policia e Kosovës ka evidentuar 51 raste të armëmbajtjes pa leje në komunat veriore. Zbulimi i armëve, kryesisht në objekte të braktisura, vazhdon të jetë pjesë e operacioneve policore në këtë pjesë të vendit.

Sipas zëvendëskomandantit të Policisë për rajonin e veriut, Veton Elshani, në këto 51 raste janë identifikuar 18 persona të dyshuar, ndërsa për personat e tjerë hetimet janë ende në proces. Ai vlerësoi se shifrat nuk dëshmojnë rritje të rrezikshmërisë, por pasqyrojnë bashkëpunimin e përmirësuar të qytetarëve të veriut me Policinë.

Elshani tha se largimi i çdo arme nga veriu nënkupton më shumë siguri për këtë zonë. Sipas tij, armatimi i zbuluar në shtëpi të braktisura nuk duket se lidhet me ndonjë grup të organizuar, ndërsa rëndësi të veçantë ka që këto armë të mos përdoren në raste të dhunës në familje, grabitjeve apo lëndimeve të lehta dhe të rënda trupore.

Policia nuk e përjashton që në veriun e Kosovës të gjenden edhe sasi të tjera armësh. Elshani theksoi se institucionet e sigurisë reagojnë sa herë që pranojnë informacione për armatim dhe se nuk ekziston asnjë zonë në veri ku Policia nuk mund të ndërhyjë ose ku nuk ka qasje.

Ai shtoi se bashkëpunimi me qytetarët është rritur krahasuar me vitin 2023, çka, sipas tij, e ndihmon Policinë të veprojë dhe të gjejë armë në çdo vend për të cilin ka informacione.

Për disa prej rasteve, pronarët e armëve ose të dyshuarit janë identifikuar, ndërsa në rastet e tjera hetimet vijojnë. Elshani sqaroi se personat e kërkuar mund të vendosen në listat e Policisë së Kosovës për intervistim dhe se procedurat hetimore nuk ndërpriten derisa të gjenden personat përgjegjës. Shumica e 51 rasteve, sipas tij, kanë të bëjnë me shtëpi të braktisura ku nuk ka pasur persona të pranishëm.

Në aksionet e zhvilluara në veri janë zbuluar armë të llojeve të ndryshme, nga armët e shkurtra dhe të gjata te pushkët e gjuetisë, pushkët M48 dhe kallashnikovët. Elshani tha se në këtë pjesë të vendit ka pasur shumë armatim, ndërsa origjina e tij nuk është gjithmonë e qartë, pasi një pjesë mund të ketë mbetur nga lufta ose të ketë hyrë më vonë në Kosovë.

Ai përmendi se Policia ka gjetur edhe armë të prodhuara në vitet 2020/2021. Për Policinë, sipas Elshanit, prioritet mbetet ruajtja e rendit dhe qetësisë publike, si dhe ofrimi i shërbimeve për të gjithë qytetarët e veriut.

Trajtimi i personave që gjenden me armë varet edhe nga vendimi i prokurorit. Në rastet kur një qytetar e lajmëron vetë armën dhe bashkëpunon me Policinë, prokurori njoftohet dhe personi mund të lirohet në procedurë të rregullt. Po ashtu, janë evidentuar raste me armë gjuetie me leje të skaduara ose jo valide, të cilat nuk janë vlerësuar si rrezik për sigurinë e përgjithshme nëse personi mbetet i lirë.

Në rastet e dhunës në familje, personat arrestohen pavarësisht nëse arma gjendet tek ata. Arrestimi mund të ndodhë edhe në raste të lëndimeve të lehta apo të rënda trupore, kur vlerësohet se ekziston mundësia e përsëritjes së veprës. Elshani theksoi se ligji përcakton rastet kur një person duhet të mbahet, ndërsa vendimin përfundimtar e merr prokurori.

Gazetari serb Branislav Krstiq vlerësoi se problemi i armatimit në veri duhet trajtuar në një kuadër më të gjerë. Ai ngriti çështjen se kush i armatosi serbët, nëse ky proces ka pasur miratim nga KFOR-i apo forcat ndërkombëtare të sigurisë, si dhe si ka kaluar një sasi e madhe armatimi përmes pikave kufitare, përkatësisht administrative.

Sipas Krstiqit, do të kishte qenë vendimtare që në një moment të merrej një vendim i përbashkët, përmes të cilit pala që i armatosi serbët do të obligohej t’i çarmatoste ata brenda një ose dy muajsh. Ai tha se, në vend të kësaj, rastet e veçuara kanë mbetur për t’u trajtuar nga shteti i Kosovës dhe aparati i tij policor.

Krstiq konsideroi se sasi të vogla të armëve individuale ose municionit mund të jenë mbetje të ish-veteranëve të luftës dhe të zhvillimeve të dekadave të fundit në Ballkan. Megjithatë, sipas tij, shqetësim mund të paraqesë ekzistenca e bunkerëve ose depove me sasi më të mëdha armësh.

Ai tha se Kosova është e armatosur dhe se një aksion për dorëzimin vullnetar të armëve mund të sillte rezultate. Krstiq kujtoi se KFOR-i, që nga ardhja e misionit ndërkombëtar paqeruajtës, ka organizuar në disa raste nisma për dorëzim armësh, të cilave u janë përgjigjur qytetarët e Kosovës. Sipas tij, nuk dihet nëse një nismë e tillë do të kishte efekt në veri, pasi serbët nuk e kanë pasur këtë mundësi.

Ai përmendi gjithashtu nivelin e armatosjes së qytetarëve shqiptarë në rajonin e Metohisë, përkatësisht në Rrafshin e Dukagjinit, në Drenicë dhe në Podujevë. Krstiq tha se shteti i Kosovës duket se fillimisht ka orientuar kërkimin dhe konfiskimin e armëve drejt personave që potencialisht mund ta cenojnë stabilitetin e vendit në një periudhë të afërt. Sidoqoftë, ai vlerësoi se edhe armatimi në jug të lumit Ibër mund të shndërrohet në një problem serioz afatgjatë për sigurinë e të gjithë qytetarëve të Kosovës.

Sipas Krstiqit, qytetarët në veri nuk kanë arsye të ndihen më pak të sigurt për shkak të armëve të zbuluara ose armëve që mund të ekzistojnë ende. Ai iu referua raporteve të Policisë së Kosovës, duke thënë se në veri nuk ka pasur asnjë vrasje mes qytetarëve dhe asnjë incident të armatosur.

Në të njëjtën kohë, ai theksoi se në Prishtinë, Gjilan dhe Ferizaj ndodhin pothuajse çdo muaj incidente të armatosura. Krstiq tha se fokusi i forcave policore në veri është i arsyeshëm, duke marrë parasysh incidentin në kanal (Ibër-Lepenc) dhe ngjarjet në Banjskë. Sipas tij, sasitë e armëve në veri nuk mund të rrezikojnë stabilitetin as të shtetit dhe as të qytetarëve në këtë pjesë të Kosovës.

Krstiq vlerësoi se armatimi i gjetur mund të ketë prejardhje të ndryshme. Një pjesë, sipas tij, mund të jenë pajisje të mbetura nga policia ose ushtria e Jugosllavisë, përkatësisht e Serbisë, dhe trashëgimi e civilëve të mobilizuar gjatë bombardimeve të Jugosllavisë.

Ai theksoi se ekzistenca e armëve dhe pajisjeve më të reja është veçanërisht shqetësuese. Në këtë rast, tha Krstiq, Policia duhet të hetojë nëse armatimi mund të jetë pjesë e ndonjë plani për aksione destabilizuese brenda Kosovës, apo nëse bëhet fjalë për pajisje të një projekti të vjetruar që, me konsolidimin e sovranitetit të Kosovës në veri, ka mbetur pa pronarë dhe pa përdorim real.

Zbulimi i armëve në veriun e Kosovës vijon të trajtohet nga institucionet e sigurisë. Policia e Kosovës deklaron se ndërhyn për çdo informacion që merr për armatim të fshehur, ndërsa autoritetet vlerësojnë se situata e sigurisë nuk është përkeqësuar. Njohësit e zhvillimeve në veri, ndërkaq, theksojnë nevojën për të zbardhur prejardhjen e armëve dhe për të verifikuar nëse ekzistojnë sasi më të mëdha armatimi.

The post Policia evidenton 51 raste të armëmbajtjes pa leje në veri, mbetet e mundur prania e armëve të tjera appeared first on Albeu.com.

Një aksion i suksesshëm policor është zhvilluar sot në veri të vendit, si rezultat i bashkëpunimit të vazhdueshëm dhe besimit të ndërsjellë mes Policisë së Kosovës dhe qytetarëve, të cilët edhe më herët kanë dhënë informacione me rëndësi që kanë ndihmuar në zbulimin dhe konfiskimin e armëve ilegale.

Sipas të dhënave të siguruara gjatë komunikimit të rregullt me qytetarët, zyrtarët policorë kanë marrë informacion se në një shtëpi të pabanuar në fshatin Lucka Reka, në komunën e Zubin Potokut, mund të ndodheshin armë dhe mjete të tjera të paligjshme.

Pas pranimit të këtij informacioni, njësitë policore kanë reaguar menjëherë, duke ndërmarrë veprime të shpejta dhe profesionale dhe duke ushtruar kontroll në vendin e dyshuar.

Nga kontrolli janë gjetur dhe sekuestruar:

– Një armë të gjatë gjysmë automatike;

– 392 fishekë të kalibrit 7.62 mm;

– 123 fishekë kalibër 7.9 mm;

– 15 fishekë të pushkës së gjuetisë;

– 11 fishekë të pushkës së gjatë;

– 3 fishekë manovrues;

– 18 fishekë të armës së shkurtë;

– 2 fishekë të armës së gjatë;

– 6 gëzhoja të llojeve të ndryshme;

– 1 bajonetë

Për të gjitha veprimet e kryera është njoftuar Prokurori i Shtetit, i cili ka udhëzuar që të iniciohet rasti për veprën penale “Mbajtje në pronësi, kontroll ose posedim të paautorizuar të armëve”.

Deri në këto momente nuk është arrestuar asnjë person lidhur me këtë rast, ndërsa hetimet po vazhdojnë nga njësitë përkatëse.

Policia e Kosovës ka falënderuar qytetarët për besimin dhe bashkëpunimin e vazhdueshëm, duke i nxitur që edhe më tej të raportojnë çdo informacion me rëndësi përmes numrit emergjent 192. Sipas policisë, vetëm nëpërmjet një partneriteti të ngushtë mes qytetarëve dhe institucioneve të rendit mund të sigurohet një mjedis i qetë, i sigurt dhe paqësor për të gjithë, pa dallim.

The post Policia sekuestron armë dhe municion në një shtëpi të pabanuar në Zubin Potok appeared first on Albeu.com.

Ky i fundit është shumë i njohur për policinë, pasi ka precedentë penalë.

I plagosuri u transportua në spitalin e Pogradecit ku po merr ndihmën mjekësore, kurse autorët mbeten ende të panjohur.

Brian Syzo, është i njohur nga policia për prodhim shitje narkotikësh, ndërsa është përfshirë disa herë në konflikte në Pogradec.

The post Plagosje me armë në Pogradec, i riu me precedentë penalë përfundon në spital (EMRI) appeared first on Albeu.com.