Instituti i Krimeve të Kryera Gjatë Luftës në Kosovë (IKKL) zhvilloi edhe këtë javë një vizitë zyrtare në Shkup, në kuadër të përpjekjeve për mbledhjen e dokumenteve arkivore mbi dëbimin e popullsisë së Kosovës gjatë viteve 1998–1999. Vizita synoi gjithashtu gjetjen e burimeve të reja për aktivitetet hulumtuese dhe dokumentuese të Institutit.

Një pjesë e takimeve u zhvillua në Radiotelevizionin e Maqedonisë së Veriut (RTM), ku përfaqësuesit e IKKL-së biseduan me kryeredaktoren znj. Leunora Kaliqi dhe bashkëpunëtorët e saj. Në këtë institucion u dorëzua kërkesa zyrtare për sigurimin e materialeve arkivore, ndërsa u shpreh gatishmëria për bashkëpunim institucional në identifikimin dhe sigurimin e incizimeve që dëshmojnë dëbimin e popullsisë së Kosovës.

Fondi i Institutit u zgjerua edhe me materiale arkivore digjitale me rëndësi të veçantë, të cilat u pranuan nga znj. Merita Çoçoli. Dokumentet përmbajnë dëshmi autentike mbi përvojën e personave të dëbuar gjatë luftës.

Gjatë qëndrimit në Shkup, stafi i IKKL-së u takua edhe me kryetarin e Organizatës Humanitare “Kalliri i Mirësisë”, Nexhat Lika. Ai prezantoi ndihmën e dhënë nga organizata për trajtimin, strehimin dhe ushqimin e të dëbuarve nga Kosova. Për dorëzimin e materialeve u nënshkrua procesverbali përkatës, ndërsa organizata mori përsipër përgatitjen dhe skanimin e tyre.

Informacione dhe kontakte të reja me rëndësi u ndanë edhe nga mjeku z. Eljasa Asipi. Ai deklaroi se është i gatshëm të dokumentojë, përmes një interviste, përvojën e tij në trajtimin e të dëbuarve gjatë vitit 1999.

Takimi përmbyllës u zhvillua me Besnik Rametin nga Instituti i Trashëgimisë Kulturore dhe Shpirtërore në Shkup. Rameti shprehu gatishmërinë për të vënë në dispozicion materiale dhe për të ndihmuar në gjetjen e burimeve të tjera që lidhen me luftën në Kosovë dhe dëbimin e popullsisë civile.

Vizita përbën një kontribut të rëndësishëm në pasurimin e arkivit të IKKL-së dhe në ruajtjen e dëshmive autentike mbi krimet dhe pasojat e luftës në Kosovë.

IKKL falënderoi të gjitha institucionet dhe bashkëpunëtorët për gatishmërinë e treguar në ruajtjen e kujtesës kolektive dhe dokumentimin e së vërtetës historike.

The post IKKL pasuron arkivin me dëshmi për dëbimin e kosovarëve gjatë viteve 1998–1999 appeared first on Albeu.com.

Një delegacion i Institutit të Krimeve të Kryera Gjatë Luftës në Kosovë (IKKL) qëndroi zyrtarisht në Strugë dhe Dibër të Maqedonisë së Veriut, me qëllim mbledhjen dhe regjistrimin e provave që dokumentojnë shpërnguljen me forcë të banorëve të Kosovës në periudhën 1998–1999.

Sipas të dhënave zyrtare, gjatë takimit në Strugë me anëtarë të Shoqatës “Nënë Tereza”, këta të fundit i besuan Institutit një fond prej 1,600 njësish arkivore me rëndësi të veçantë historike. Po ashtu, u morën në dorëzim edhe dosje digjitale si dhe dëshmi të tjera nga persona dhe bashkëpunëtorë që i kanë ruajtur ato që nga koha e konfliktit.

Pjesë e agjendës ishte edhe një takim me Mendi Çyra, kryetar i Komunës së Strugës, si dhe me figura të tjera të njohura të zonës, të cilët konfirmuan vullnetin për të ndihmuar në mbrojtjen dhe evidentimin e fakteve të luftës.

Misioni i IKKL-së vijoi më pas në Dibër, ku u siguruan materiale shtesë arkivore dhe u regjistruan rrëfime të dëshmitarëve okularë nga vitet e luftës. Aty, përfaqësuesit e Institutit zhvilluan bisedime me autoritetet e Komunës së Dibrës, si dhe me përfaqësues të Shoqatës “Nënë Tereza”, organizatës humanitare “Hëna”, OJQ-së “El Hilal” dhe qytetarë që luajtën rol aktiv në mikpritjen dhe përkrahjen e të dëbuarve kosovarë gjatë viteve 1998–1999.

Në fund, IKKL nënvizoi se ky udhëtim e ka zgjeruar ndjeshëm arkivin e vet, dhe u shprehu mirënjohjen të gjitha palëve – institucioneve, shoqatave dhe individëve – që kanë kontribuar me dokumente dhe mbështetje për të ndriçuar krimet dhe spastrimin etnik të popullatës së Kosovës gjatë asaj periudhe.

The post Mbi 1,600 akte arkivore sigurohen nga IKKL gjatë misionit në Strugë dhe Dibër appeared first on Albeu.com.