Bekim Blakaj, drejtor ekzekutiv i Fondit për të Drejtën Humanitare në Kosovë, ka komentuar gërmimet në Kalludër të Zubin Potokut dhe përpjekjet për të zbardhur fatin e personave të zhdukur gjatë luftës në Kosovë.

Duke folur në emisionin Info Magazine të Klan Kosovës, Blakaj e cilësoi si shqetësues arrestimin e një dëshmitari që kishte dhënë të dhëna të rëndësishme për vendndodhjen e mbetjeve mortore.

Sipas tij, dëshmitari kishte ndihmuar në sigurimin e informacionit për zbardhjen e fatit të së paku 23 personave të zhdukur gjatë luftës në Kosovë. Blakaj tha se dyshimi ndaj tij për spiunazh tregon mungesë të vullnetit politik dhe se çështja nuk po trajtohet me karakter humanitar.

Ai theksoi se, edhe 27 vjet pas përfundimit të luftës, një qasje e tillë krijon përshtypjen se synohet fshehja e fakteve dhe e të dhënave për krimet e rënda të kryera gjatë asaj periudhe.

Një pjesë të diskutimit Blakaj ia kushtoi edhe dosjeve ushtarake serbe. Ai tha se autoritetet e Kosovës nuk duhet të kufizohen vetëm te kërkesa për dosjen e Brigadës së 37-të të Motorizuar.

Blakaj rikujtoi se kjo dosje është bërë e njohur pasi Fondi për të Drejtën Humanitare kishte kërkuar qasje në të, ndërsa ajo ishte shpallur sekret shtetëror.

Ai vlerësoi se duhet të ekzistojnë qindra dosje të tjera që lidhen me brigada të ndryshme, njësi ushtarake dhe struktura të përbashkëta policore. Për këtë arsye, sipas tij, autoritetet kosovare duhet fillimisht të identifikojnë këto dokumente dhe më pas të kërkojnë hapjen e të gjithave, jo vetëm të një dosjeje.

Blakaj foli gjithashtu për përgjegjësinë e Bashkimit Evropian në zbatimin e marrëveshjeve Kosovë-Serbi për personat e zhdukur. Ai sqaroi se deklarata e përbashkët dhe marrëveshja e përgjithshme i japin BE-së rol monitorues, ndërsa në rast të moszbatimit parashikohet edhe mundësia e masave ndëshkuese.

Megjithatë, ai tha se deri tani nuk është parë që Bashkimi Evropian ta ketë ushtruar këtë rol. Blakaj shtoi se, të paktën publikisht, nuk janë vërejtur sanksione ndaj Serbisë për moszbatimin e marrëveshjes dhe se nuk ka dijeni që një veprim të tillë ta kenë ndërmarrë as Shtetet e Bashkuara të Amerikës.

The post Blakaj: Hapja e arkivave serbe kërkon presion të BE-së ndaj Beogradit appeared first on Albeu.com.

Duke folur pas homazheve te Memoriali për të Pagjeturit më 27 prill në Prishtinë, Osmani tha se “edhe sot Serbia vazhdon që të bëjë krim të dyfishtë, sepse njëherë e kreu krimin, e pastaj bëri çmos që ta fshehë atë, duke i fshehur gjurmët e krimit edhe 25 vjet më vonë”.

Në Kosovë më 27 prill shënohet Dita Kombëtare e të Zhdukurve me Forcë gjatë luftës. Rreth 6,000 njerëz u zhdukën gjatë luftës së fundit, prej të cilëve mbi 1.600 janë ende të pagjetur.

“Përkundër faktit se kryetari i komisionit qeveritar, Andin Hoti, i ka dërguar letra Serbisë disa herë, duke i kërkuar që…të hapen arkivat për të dhënat e brigadave policore dhe ushtarake, për të cilat ka dëshmi që kanë marrë pjesë në masakra por edhe në operacione pas luftës për fshehjen e trupave – Serbia akoma nuk bëhet e gjallë në përgjigjen e këtyre kërkesave dhe vazhdon ta shkelë këtë marrëveshje të arritur në Bruksel”, tha Osmani.

Kosova dhe Serbia, një vit më parë, u pajtuan për Deklaratën e përbashkët për personat e zhdukur në kuadër të dialogut për normalizimin e marrëdhënieve të ndërmjetësuar nga Bashkimi Evropian.

Zotimet që u bënë me këtë deklaratë, përfshijnë: qasje të plotë në informacione të besueshme, mes tyre edhe ato me status të klasifikuar; vënie në dispozicion të të gjitha dokumenteve me rendësi për përcaktimin e fatit të personave të zhdukur, si dhe punë të përbashkët përmes një komisioni të kryesuar nga Bashkimi Evropian.

Një vit pas, asgjë prej këtyre në praktikë, të gjitha vetëm në letër.

Zëdhënësi i BE-së, Peter Stano, konfirmoi për Radion Evropa e Lirë ditë më parë se Deklarata e përbashkët, e miratuar nga kryeministri i Kosovës, Albin Kurti, dhe presidenti i Serbisë, Aleksandar Vuçiq, në maj të vitit 2023, “nuk po zbatohet ende”.

Stano theksoi se Deklarata nuk është ligjërisht e detyrueshme, por shtoi se BE-ja kërkon nga palët që të angazhohen “në mënyrë konstruktive” në kuadër të dialogut, për të arritur pajtueshmëri për termat e referencës.

Gjatë luftës në Kosovë janë vrarë rreth 13,000 njerëz, janë zhvendosur mbi 800,000, ndërsa janë zhdukur rreth 6,000, prej të cilëve rreth 1.600 janë ende të pagjetur.

Qindra trupa të shqiptarëve të vrarë të Kosovës janë gjetur në varrezat masive në Serbi.

The post Osmani: Serbia po e shkel marrëveshjen për të zhdukurit duke mos i hapur arkivat appeared first on Albeu.com.