Jurgen Klopp po hap një kapitull të ri në krye të Kombëtares së Gjermanisë, ku synon të ndërmarrë ndryshime të shumta në përbërjen e ekipit. Sipas mediave gjermane, përzgjedhësi i ri ka në planet e tij 57 futbollistë, mes të cilëve gjenden si emra të rinj, ashtu edhe disa prej yjeve aktualë të “Mannschaft”.

Mes kandidatëve është edhe Brajan Gruda, talenti 22-vjeçar me prejardhje shqiptare. Sulmuesi anësor i RB Leipzigut vlerësohet prej kohësh si një nga lojtarët më premtues të futbollit gjerman, ndërsa tashmë është vendosur edhe në radarët e ekipit të parë, sipas Welt.de.

Në listën me 57 emra nuk figurojnë portieri Diant Ramaj dhe sulmuesi Arijon Ibrahimovic. Të dy futbollistët kanë origjinë shqiptare, luajnë në nivele të larta në Gjermani dhe prej një kohe janë në kontakte me Kosovën.

Ramaj është formuar në akademitë e futbollit gjerman dhe ka përfaqësuar Gjermaninë në ekipet e grupmoshave. Portieri, i cili konsiderohet se ka potencial të madh, aktualisht është nën kontratë me Borussia Dortmundin, ndërsa më herët ka tërhequr vëmendje me paraqitjet e tij në Bundesligë.

Vëmendje në Gjermani ka marrë edhe Arijon Ibrahimovic, talenti ofensiv i Bayern Munichut. Futbollisti 20-vjeçar i përket klubit bavarez dhe ka luajtur për ekipet e të rinjve të Gjermanisë. Pas huazimeve te Lazio dhe Heidenheim, ai do të jetë pjesë e klubit gjerman gjatë këtij sezoni.

Përveç Grudës, në përzgjedhjen e Kloppit janë përfshirë edhe disa prej figurave kryesore të futbollit gjerman, si Joshua Kimmich, Florian Wirtz, Jamal Musiala, Kai Havertz, David Raum, Nico Schlotterbeck dhe Jonathan Tah. Këta lojtarë pritet të ruajnë një rol të rëndësishëm edhe në projektin e ri.

Klopp njihet për hapësirën që u jep futbollistëve të rinj dhe për aftësinë e tij në zhvillimin e talenteve. Ai ka bërë të ditur se Kombëtarja e Gjermanisë do të mbetet e hapur për çdo lojtar që dëshmon cilësi dhe potencial. Përbërja e publikuar sinjalizon se trajneri gjerman synon të ndërthurë përvojën e yjeve të tanishëm me energjinë e brezit të ri.

The post Klopp përzgjedh 57 kandidatë për Gjermaninë, Brajan Gruda në listë, jashtë dy futbollistët e Kosovës appeared first on Albeu.com.

Bayern Munich e ka vazhduar traditën e fitoreve të thella përballë Rottach-Egern, duke triumfuar me rezultatin 0-15.

Në këtë sukses të skuadrës bavareze lanë gjurmë edhe dy futbollistët shqiptarë, Arijon Ibrahimovic dhe talenti 16-vjeçar Skendër Nuraj.

Ibrahimovic shënoi dy herë dhe dha tre asistime, ndërsa Nuraj arriti ta dërgonte një herë topin në rrjetë.

Arijon Ibrahimovic, i cili mund të bëhet prurja më e re e Kosovës, vazhdon të jetë pjesë e ekipit të parë të Bayern Munichut.

Ai duhet të fitojë besimin e trajnerit Vincente Kompany, pasi aktualisht konsiderohet vetëm si alternativë e Luis Diaz.

Futbollisti me prejardhje nga Prizreni mund të jetë gjithashtu emri më i ri i Kosovës duke filluar nga shtatori, në kuadër të Ligës së Kombeve.

The post Arijon Ibrahimovic dhe Skendër Nuraj spikasin në triumfin 15-0 të Bayern Munichut appeared first on Albeu.com.

Futbollisti me origjinë kosovare, Arijon Ibrahimoviç, ka lënë të hapur mundësinë që në të ardhmen t’i bashkohet Kombëtares së parë të Gjermanisë, teksa tashmë ka kaluar nëpër të gjitha ekipet e moshave të përfaqësueses gjermane.

Aktualisht, 20-vjeçari po përqendrohet plotësisht tek klubi i tij, Bayern Munich, ku synon të bindë stafin teknik dhe të fitojë hapësira më të mëdha në formacionin bazë, përpara se të mendojë për ftesat ndërkombëtare.

“Dua të konsolidohem këtu, të jap çdo gjë nga vetja dhe të luftoj për minuta në fushë. Çfarë do të sjellë e ardhmja, do ta shohim të gjithë së bashku. Tani për tani, gjithë vëmendja ime është te Bayerni”, u shpreh mesfushori ofensiv.

Me paraqitje bindëse në “Allianz Arena”, talenti shpreson të kthehet në një alternativë konkrete për trajnerin e ri të Gjermanisë, Jurgen Klopp, i cili pritet të ndërtojë një cikël të ri me kombëtaren.

Sezonin e kaluar, Ibrahimoviç ishte i huazuar te Heidenheim, ku regjistroi 32 ndeshje në Bundesligë, duke shënuar dy herë dhe duke kontribuar me katër asiste.

The post Ibrahimoviç zbulon ambicien për Kombëtaren Gjermane, por prioritet ka Bayernin appeared first on Albeu.com.

Sulmuesi i ri me origjinë kosovare, Arijon Ibrahimovic, ndodhet në një pikë kthese të karrierës së tij te Bayern Munich. Skuadra bavareze vlerëson se 20-vjeçari tashmë posedon pjekurinë e nevojshme për t’u përfshirë në betejën për minuta nën drejtimin e Vincent Kompany.

Në javën e parë të korrikut, lojtari firmosi një marrëveshje të re që e lidh me gjigantët gjermanë deri në vitin 2028. Tani, objektivi i tij kryesor është të kthejë këtë besim në paraqitje konkrete me ekipin e parë.

Ibrahimovic iu nënshtrua një formimi të vlefshëm përmes huazimeve radhazi te Frosinone, Lazio dhe së fundmi Heidenheim. Gjatë edicionit 2025/26, pavarësisht se klubi i tij ra nga kategoria, ai zhvilloi 32 takime në Bundesligë, ku shënoi dy herë dhe kontribuoi me shtatë pasime vendimtare për gol.

Rifreskimi me ngjyrat e Bayernit erdhi në miqësoren ku u mposhtën 2-1 nga Wehen Wiesbaden, në një ndeshje ku talenti u hodh në fushë në fraksionin e dytë. Prej tij pritet që të shfrytëzojë çdo moment si zëvendësues dhe të tregojë vlerat e tij kur t’i jepet rasti.

Brenda hierarkisë së klubit ekziston bindja se lojtari është i shtyrë nga një dëshirë e madhe për t’i provuar trajnerit Kompany se ia vlen t’i besohet.

Në planet teknike, ai shihet si zgjidhja e parë rezervë për Luis Diazin në krahun e majtë. Fillimisht, drejtuesit bavarezë kërkuan të përforconin atë pozicion me një element tjetër, por Anthony Gordon doli jashtë parametrave financiarë dhe u transferua përfundimisht te Barcelona.

Më vonë, u mbyll marrëveshja për afrimin e Ismail Saibarit, mirëpo lojtari maroken shpreh preferencë për të vepruar në zonën qendrore të sulmit, qoftë si organizator prapa sulmuesit apo si “nëntëshe false”. Ky detaj i hapi automatikisht më shumë shtigje Ibrahimovicit, i cili ndihet rehat si në krahun e majtë, ashtu edhe në hapësira më të mbyllura në fazën e fundit të aksioneve.

Sfida për një fanellë titullari mbetet tejet e lartë. Përveç rikthimit të pritshëm në formë të Serge Gnabryt, Kompany ka në dispozicion emra si Harry Kane, Jamal Musiala, Michael Olise, Lennart Karl dhe vetë Saibarin për repartin e avancuar.

Trajneri planifikon të përdorë rotacione gjatë kalendarit të ngjeshur, çka e mban Ibrahimovicin në konsideratë për planet afatshkurtra. Ecuria e tij do të analizohet në detaje gjatë pushimit dimëror, në mënyrë që klubi të përcaktojë nëse 20-vjeçari ka ditur ta kapë këtë mundësi vendimtare për të ardhmen e tij në Mynih.

The post Arijon Ibrahimovic përballet me provën vendimtare për të ardhmen te Bayern Munich appeared first on Albeu.com.

Agim Ademi, presidenti i Federatës së Futbollit të Kosovës, ka zhvilluar sot një takim me sulmuesin e talentuar të Bayern Munichut, Arijon Ibrahimoviq, në qytetin e Prizrenit. Talenti 19-vjeçar konsiderohet si një prej emrave më premtues në arenën evropiane të futbollit.

Prej kohësh, FFK po punon për ta bindur Ibrahimoviqin që të përfaqësojë Kosovën në nivel ndërkombëtar, ndërsa ai vetëm pak ditë më parë zgjati bashkëpunimin me kampionët e Gjermanisë deri në vitin 2028. Megjithatë, një hollësi që tërhoqi vëmendjen e tifozëve gjatë fotografimit të dyshes ishte mbishkrimi “Coming soon” në një dyqan pas tyre, një rastësi që shumëkush e interpretoi si një sinjal se ylli i Bayernit mund të vishet me fanellën e Kosovës që nga shtatori.

Në një njoftim të shpërndarë në platformat sociale, Ademi shprehu vlerësimin maksimal për lojtarin, duke vënë theksin jo vetëm mbi aftësitë e tij sportive, por edhe mbi edukatën dhe lidhjen që ai ruan me vendlindjen. “Në Prizrenin e bukur, sot pata kënaqësinë të drekoj së bashku me një nga talentet më të mëdhenj kosovarë të futbollit evropian, yllin e Bayern Munichut, Arijon Ibrahimoviq. Përveçse një super futbollist me të ardhme të ndritur, Arijoni është edhe një djalë i edukuar, modest dhe krenar për rrënjët e tij, vlera këto që e bëjnë edhe më të veçantë”, shkroi kreu i FFK-së.

Ai gjithashtu i uroi të riut suksese të vazhdueshme në rrugëtimin e tij profesional, duke parashikuar me bindje se Ibrahimoviq do të shënojë arritje të larta në elitën e futbollit europian. “I uroj nga zemra shumë suksese në karrierë dhe jam i bindur se e ardhmja i rezervon atij arritje të mëdha”, shtoi ai.

Në përmbyllje të mesazhit, Ademi nuk harroi të shprehte mirënjohje për familjen e futbollistit, e cila ka luajtur një rol thelbësor në edukimin e tij dhe në ruajtjen e ndjenjës së përkatësisë ndaj Kosovës. “Një falënderim i veçantë edhe për familjen e tij, e cila i ka kultivuar dashurinë për atdheun dhe vlerat e Kosovës”, përfundoi presidenti i Federatës.

The post Takimi i Ademit me Ibrahimoviqin në Prizren ngre pritshmëritë për fanellën dardane, detaji që s’kaloi pa u vënë re appeared first on Albeu.com.

Arijon Ibrahimovic do të jetë pjesë e ekipit të parë të Bayern Munich në sezonin e ri, pasi klubi bavarez ka marrë vendimin për ta integruar sulmuesin e ri në planet e tij. Futbollisti 20-vjeçar hyn kështu në projektin e trajnerit Vincent Kompany, pas periudhës së huazimit te 1. FC Heidenheim.

Klubi gjerman ka bërë të ditur se lojtari me prejardhje shqiptare, i cili është pjesë e Bayern Munich që nga viti 2018, ka kontratë deri më 30 qershor 2028. Në edicionin e ardhshëm, ai do të luajë me fanellën me numrin 22.

Ibrahimovic, i formuar në akademinë e Bayernit, ka ndjekur një proces të vazhdueshëm drejt skuadrës së parë. Ai iu bashkua klubit kur ishte 12 vjeç, pasi kishte ardhur nga akademia e 1. FC Nürnberg, dhe më tej u zhvillua nëpërmjet ekipeve zinxhir dhe huazimeve të planifikuara.

Për ecurinë e tij foli edhe drejtori sportiv i Bayern, Christoph Freund, i cili vuri në pah hapat përpara të futbollistit pas disa periudhave në huazim.

“Arijoni iu bashkua Bayernit kur ishte 12 vjeç. Ai ka përparuar hap pas hapi përmes akademisë sonë dhe huazimeve të menduara mirë. Sidomos gjatë vitit të fundit te Heidenheim, ai ka mësuar shumë si lojtar dhe si person për të qenë gati për Bayernin. Zhvillimi i tij është një shembull i mundësive që u japim talenteve tona. Tani nuk bëhet më vetëm fjalë për të mësuar, por për të lënë gjurmë te Bayern”, deklaroi Freund.

Debutimin me ekipin e parë të Bayern ai e regjistroi në shkurt të vitit 2023, kur ishte vetëm 17 vjeç, në përballjen kundër VfL Bochum.

Në sezonin e fundit me Heidenheim, Ibrahimovic u aktivizua në 34 ndeshje zyrtare, ku realizoi 2 gola dhe kontribuoi me 5 asistime. Para kësaj eksperience, ai kishte marrë minuta dhe përvojë edhe në futbollin italian te Frosinone dhe Lazio.

Në arenën ndërkombëtare, ai debutoi me Gjermaninë U-21 në nëntor dhe numëron dy paraqitje.

Ndërkohë, Ibrahimovic vlerësohet pozitivisht edhe nga FFK, me të cilën ka zhvilluar bisedime lidhur me afrimin e tij te Kombëtarja e Kosovës.

The post Bayern Munich e përfshin Arijon Ibrahimovicin në ekipin e parë, Kompany vendos për sezonin e ri appeared first on Albeu.com.

Arijon Ibrahimovic duket se do të mbetet pjesë e Bayern Munichut, pasi talenti gjerman pritet të firmosë javën e ardhshme një kontratë të re me kampionët e Gjermanisë.

Raportimet e Transfermarkt bëjnë të ditur se mesfushori ofensiv 20-vjeçar ka zgjedhur të vijojë te Allianz Arena, edhe pse për të kishte interes të konsiderueshëm nga klube të ndryshme brenda dhe jashtë Gjermanisë.

Marrëveshja që ai ka aktualisht, e vlefshme deri në vitin 2027 dhe me mundësi zgjatjeje edhe për një tjetër sezon, pritet të zëvendësohet me një kontratë të re të garantuar deri në verën e vitit 2028.

Një rol kyç në këtë vendim kanë luajtur bisedat inkurajuese dhe marrëdhënia që lojtari ka krijuar me trajnerin Vincent Kompany, i cili e ka bindur se do të ketë peshë të rëndësishme brenda skuadrës.

Pas periudhës në formë huazimi te Heidenheim, Ibrahimovic tërhoqi vëmendjen e disa klubeve, mes tyre Werder Bremen, Hamburg SV, Freiburg, Augsburg, Villarreal, Brighton dhe Hull City.

20-vjeçari pati një edicion mjaft të mirë me Heidenheimin, ku regjistroi gjashtë kontribute në gola në 34 ndeshje të Bundesligës. Gjatë këtij sezoni, edhe vlera e tij në treg u rrit ndjeshëm, duke e renditur mes futbollistëve më të vlefshëm nën moshën 20-vjeçare në Gjermani.

Paraqitjet e tij u ndoqën me vëmendje edhe nga drejtuesit e Bayernit, veçanërisht ajo kundër vetë skuadrës bavareze në barazimin 3-3 në Allianz Arena në fillim të muajit maj, sfidë në të cilën ai realizoi një gol.

Vetëm një javë më pas, Ibrahimovic shtoi edhe dy kontribute të tjera në gola në përballjen për mbijetesë ndaj Kolnit, ndërsa në gjysmën e dytë të sezonit dëshmoi se mund të jetë vendimtar edhe kundër rivalëve më të fortë të kampionatit.

Sipas raportimeve, Kompany i ka paraqitur futbollistit një projekt të qartë për vazhdimësinë, duke i garantuar një rol fleksibël në repartin ofensiv dhe minuta të qëndrueshme gjatë sezonit të ardhshëm.

Trajneri belg planifikon ta aktivizojë Ibrahimovicin si në qendër të sulmit, ashtu edhe në krahë, ndërsa mundësitë për më shumë hapësira pritet të shtohen sidomos në startin e sezonit, kur disa nga lojtarët e Bayernit që morën pjesë në Kampionatin Botëror do të kthehen gradualisht në stërvitje.

Për Bayernin, mbajtja e Ibrahimovicit përbën gjithashtu një mesazh të qartë pas huazimeve të njëpasnjëshme te Frosinone, Lazio dhe së fundmi Heidenheimi.

Tani klubi bavarez është gati t’i japë besim të plotë njërit prej talenteve më premtues të akademisë, i cili prej kohësh vlerësohet si një nga sulmuesit më interesantë të brezit të tij në Bayern Campus.

Ibrahimovic e bëri debutimin me ekipin e parë të Bayernit në Bundesligë në shkurt të vitit 2023, kur ishte vetëm 17 vjeç, ndërsa cilësitë që e dallojnë mbeten aftësia për të luajtur në disa role, teknika dhe nuhatja për golin.

The post Arijon Ibrahimovic pranë zgjatjes së kontratës me Bayernin pas besimit të Vincent Kompanyt appeared first on Albeu.com.