Gjatë viteve, Kupa e Botës ka sjellë episode të rëndësishme edhe për futbollistët me prejardhje shqiptare. Ndonëse kanë luajtur për përfaqësuese të ndryshme, disa prej tyre kanë qenë pjesë e skuadrave që kanë mbërritur në mesin e katër më të mirave në botë, madje edhe kanë zënë vend në podiumin e kompeticionit më të madh të futbollit.

Edhe pse Kosova dhe Shqipëria mungojnë në Kupën e Botës 2026, ndonëse të dyja ishin pranë kualifikimit në eventin e fundit, futbollistët me origjinë shqiptare nuk mungojnë në këtë turne.

Tashmë, Granit Xhaka dhe Ardon Jashari kanë mundësinë që me Zvicrën të vazhdojnë këtë traditë. Ata ndodhen në çerekfinale kundër Argjentinës dhe janë vetëm pak hapa larg një kapitulli tjetër të rëndësishëm për futbollistët shqiptarë në skenën më të madhe të futbollit botëror.

Xhaka, në rolin e kapitenit dhe liderit të padiskutueshëm të Zvicrës, mban barrën e përvojës dhe të përgjegjësisë në një skuadër që synon të tejkalojë arritjet e saj të deritanishme. Nga ana tjetër, Jashari mishëron gjeneratën e re, si një lojtar që kërkon të ndërtojë historinë e vet me fanellën helvetike.

Nëse Zvicra kalon çerekfinalen dhe siguron një vend në podium, atëherë Xhaka dhe Jashari do t’i shtohen listës së futbollistëve me prejardhje shqiptare që kanë lënë gjurmë në Kupën e Botës.

Ky rrugëtim e ka zanafillën te Ardian Kozniku në Francë, në vitin 1998. Ish-sulmuesi kosovar bënte pjesë te Kroacia në një Botëror historik për atë shtet, që po luante për herë të parë në Kupën e Botës si vend i pavarur.

Kroacia, e drejtuar nga emra të tillë si Davor Suker, Zvonimir Boban, Robert Prosinecki dhe Robert Jarni, e kaloi fazën e grupeve falë fitoreve ndaj Xhamajkës dhe Japonisë. Më pas eliminoi Rumaninë në 1/8 e finales, ndërsa në çerekfinale surprizoi Gjermaninë me shifrat e thella 3-0.

Në gjysmëfinale, kroatët u ndeshën me Francën nikoqire. Skuadra kaloi e para në avantazh me Sukerin, por vendasit e kthyen rezultatin falë dy golave të Lilian Thuram dhe prenë biletën për në finale. Kroacia u kundërpërgjigj në takimin për vendin e tretë, ku mposhti Holandën 2-1 dhe fitoi medaljen e bronztë.

Edhe pse Kozniku nuk mori minuta në atë Botëror, ai ishte pjesë e skuadrës që arriti një prej sukseseve më të mëdha në historinë e futbollit kroat.

Pas gjashtëmbëdhjetë vjetësh, Shkodran Mustafi preku kulmin e mundshëm në futboll. Mbrojtësi me prejardhje shqiptare ishte pjesë e Gjermanisë që në vitin 2014, në Brazil, u kurorëzua kampione e botës.

Skuadra e Joachim Löwit e hapi turneun me një fitore të thellë 4-0 ndaj Portugalisë, më pas barazoi me Ganën dhe fitoi ndaj SHBA-së për ta mbyllur grupin në vendin e parë. Në fazën me eliminim direkt, gjermanët kaluan me vështirësi Algjerinë vetëm pas vazhdimeve, më tej nxorën jashtë Francën në çerekfinale dhe më pas shkruan histori në gjysmëfinale.

Përballë Brazilit vendas, Gjermania regjistroi një nga fitoret më tronditëse në historinë e Kupës së Botës, duke triumfuar 7-1. Në finalen ndaj Argjentinës, ishte goli i Mario Götzes në vazhdime që i dha Gjermanisë titullin e katërt botëror.

Mustafi pati një rol aktiv në fazën e grupeve dhe luajti edhe në 1/8 e finales kundër Algjerisë, përpara se një lëndim ta nxirrte jashtë për pjesën e mbetur të turneut. Sidoqoftë, ai mbetet futbollisti i vetëm me prejardhje shqiptare që e ka fituar Kupën e Botës.

Në Botërorin e Rusisë më 2018, në podium arriti edhe Adnan Januzaj me Belgjikën. “Djajtë e Kuq” e nisën garën me fitore ndaj Panamasë dhe Tunizisë, ndërsa Januzaj u kthye në protagonist në ndeshjen e fundit të grupit përballë Anglisë.

Lojtari me origjinë shqiptare realizoi golin e vetëm të sfidës, duke i dhënë Belgjikës suksesin 1-0 dhe vendin e parë në grup. Ai realizim e veçoi Januzajn si një nga figurat karakteristike të rrugëtimit belg në atë Botëror.

Më pas, Belgjika eliminoi Japoninë në një ndeshje dramatike të 1/8 së finales, ku përmbysi humbjen 2-0 për të fituar 3-2. Në çerekfinale erdhi edhe fitorja e madhe 2-1 kundër Brazilit, rezultat që e çoi Belgjikën në gjysmëfinale për herë të parë që nga viti 1986.

Në gjysmëfinale, Belgjika u ndal nga Franca pas golit të Samuel Umtitit, por ekipi i Roberto Martinez reagoi në ndeshjen për vendin e tretë. Fitorja 2-0 ndaj Anglisë i solli Belgjikës medaljen e bronztë dhe arritjen më të mirë në historinë e saj në Kupën e Botës. Januzaj nuk luajti as në gjysmëfinale dhe as në ndeshjen për vendin e tretë, por mbeti pjesë e skuadrës që u ngjit në podium.

Historia që nisi me bronzin e Koznikut në vitin 1998, vijoi me titullin botëror të Mustafit në vitin 2014 dhe me medaljen e Januzajt në vitin 2018, tani mund të marrë një vazhdim të ri me Granit Xhakën dhe Ardon Jasharin.

The post Xhaka e Jashari synojnë të hyjnë në gjurmët e Mustafit, Koznikut dhe Januzajt appeared first on Albeu.com.

Ish-futbollisti nga Gjakova e ka shkruar emrin e tij në histori pasi ishte bërë shqiptari i parë që e kishte fituar medaljen e bronztë në Kampionat Botëror.

Ndonëse e kishte përfaqësuar Kroacinë në atë eveniment prestigjioz dhe faktit që jeton në Zagreb qe një kohë të gjatë, Kozniku nuk i ka harruar asnjëherë rrënjët e tij.

Madje, ai është munduar ta promovonte gjithandej futbollin kosovar edhe në kohërat e vështira para pranimit në UEFA e në FIFA, edhe tash, shkruan “Gazeta Express”.

Ai e ka dhënë një intervistë për mediumin kroat “Index.hr”, ku ndër të tjera ka folur për eksperiencat që i kishte tek Hajduk Spliti dhe te Dinamo Zagrebi.

Po ashtu, Kozniku foli edhe për talentet kosovare, duke insistuar se ka me bollëk, sa që çdo ditë do ta mbushte nga një autobus me lojtarë të talentuar të vendit tonë.

Ndër të tjera, ai u ndal të fliste edhe për transferimin e fundit të Arbër Hoxhës nga Slaven Belupo në Dinamo Zagreb, i cili u zyrtarizua mbrëmë.

Kozniku është i bindur se, nëse Hoxha e tregon veten tek Dinamo, mund të marrë ftesë edhe nga Kombëtarja e Kosovës.

“Sa i përket kompensimit, unë vërtet nuk do të hyja në këtë, sepse vetë klubet e dinë më së miri se sa buxhet kanë në dispozicion. Sa i përket cilësisë së vetë Hoxhës, e njoh që më parë kur luante për Ballkanin. Atje ai tregoi potencial të madh dhe premtoi se do të shndërrohej në një lojtar të madh”, deklaroi fillimisht Kozniku.

“Mua nuk e kam të qartë pse ai nuk pati një shans te Lokomotiva, sepse dominoi në ligën e Kosovës dhe me bashkëlojtarë më të mirë mund të jetë vetëm më i mirë. Cilësia e tij nuk vihet aspak në dyshim dhe sigurisht që Dinamo nuk e ka njohur rastësisht dhe e ka sjellë. Slaven duhet përgëzuar që e sollën dhe i dhanë një shans, tani ua ka shpërblyer. Hoxhës i uroj vetëm më të mirat dhe të tregojë të gjithë potencialin e tij në Dinamo.”

“Jam i sigurt se ai mund të japë ndeshje shumë të mira për Dinamon, është vetëm çështje që ai të përshtatet dhe të jetë në formë. Është ndryshe të luash në Slaven sesa në Dinamo apo Hajduk, që janë klubet tona më të mëdha dhe ku je çdo ditë nën llupë. Duhet të jesh vazhdimisht i mirë dhe besoj se ai mund ta bëjë këtë dhe do të duhet të mësohet me faktin se do të jetë një nga lojtarët e Dinamos, ndërsa te Slaven gjithçka kaloi përmes tij.”

“Por, e përsëris, cilësia është aty dhe nuk kam frikë për të. Është mirë edhe për kombëtaren e Kosovës apo Shqipërisë, varësisht se kush do ta thërrasë, sepse besoj se përmes Dinamos mund të meritojë thirrje dhe ndihmë me cilësinë e tij. Ai tregon cilësi shumë të mira të një lojtari modern pasi ka një këmbë të fortë të majtë dhe të djathtë dhe driblime dhe rishikim të shkëlqyer të lojës.”

“Nga atje erdhën vërtet shumë lojtarë të mirë, veçanërisht nëse kemi parasysh që territori është kaq i vogël. Edhe në ligën e ish-Jugosllavisë kishte shumë lojtarë të mirë, edhe pse kushtet për zhvillim ishin prapa në krahasim me vendet tjera. Por nuk është si më parë, sepse tani Kosova po punon shumë seriozisht, dhe klubet po bëjnë rrugën drejt Evropës.”

“Kushtet e punës janë përmirësuar shumë vitet e fundit dhe puna është e mirë edhe në kombëtare, sepse lojtarët më të rinj monitorohen më mirë. Shembulli më i mirë është Ballkani, i cili mundi Dinamon këtë sezon. Për mua është normale që klubet kroate të shikojnë gjithnjë e më shumë poshtë, sepse lojtarët janë të talentuar dhe cilësorë, dhe ende nuk janë aq të shtrenjtë sa të mos jenë të disponueshëm për klubet tona.”

“Para disa vitesh, organizova një kamp me Lokomotivën në qytetin tim të lindjes në Gjakovë, dhe atje kishte aq shumë talente sa që po të isha menaxher, do të mbushja çdo ditë një autobus me lojtarë që mendoj se janë të mirë dhe mund të bëjnë një karrierë. Është marrëzi të thuash se këta janë djem të uritur, por mbi të gjitha janë të uritur për sukses. Të gjithë ata që kam takuar dallohen për të qenë shumë të ndershëm, punëtor dhe kanë qëndrimin e duhur ndaj futbollit dhe jetës”, përfundoi Kozniku. /Gazeta Express/

The post Kozniku: “Do ta mbushja çdo ditë nga një autobus me talentë kosovarë” appeared first on Albeu.com.