Anëtari i Lidhjes Demokratike të Kosovës (LDK), Berat Rukiqi, ka kërkuar nga institucionet kosovare të sqarojnë kontrollet e kryera ndaj produkteve me origjinë shtazore të importuara nga Brazili.

Përmes një postimi, Rukiqi ka rikujtuar se Bashkimi Evropian, nga 3 shtatori 2026, ka ndaluar përkohësisht importin e disa produkteve braziliane me origjinë shtazore, mes tyre mishin e gjedhit dhe të pulës. Sipas tij, ky vendim lidhet me standardet evropiane për përdorimin dhe mbikëqyrjen e antimikrobikëve në prodhimin e produkteve shtazore.

“Nga 3 shtatori 2026, Bashkimi Evropian ka pezulluar importin e disa produkteve me origjinë shtazore nga Brazili, përfshirë mishin e gjedhit dhe të pulës, për shkak të kërkesave evropiane lidhur me përdorimin dhe kontrollin e antimikrobikëve në prodhimin shtazor”, ka shkruar Rukiqi.

Duke iu referuar këtij vendimi, ai ka pyetur pse Kosova nuk aplikon masa të ngjashme kur një produkt i importuar nuk i plotëson kriteret e sigurisë ushqimore.

“Nëse BE-ja vendos kufizime për produktet braziliane për shkak të standardeve të sigurisë ushqimore, pse ne nuk veprojmë njëjtë? Interesat e kujt po mbrohen? Pse krejt ajo zhurmë për qumësht, e tash heshtje dhe mosveprim?”, ka deklaruar Rukiqi.

Rukiqi ka sjellë në vëmendje edhe një rast të raportuar nga autoritetet e Malit të Zi. Sipas këtij raportimi, tre kontejnerë me mish viçi nga Brazili, të cilët ishin destinuar për Kosovë, kishin kaluar afatin e përdorimit.

Ai ka thënë se autoritetet malazeze kanë bërë të ditur se në Portin e Tivarit deklaratat origjinale ishin larguar dhe ishin zëvendësuar me etiketa të reja, ku shënohej një afat tjetër skadimi.

“Mali i Zi na tregoi se tre kontejnerë me mish viçi nga Brazili, të destinuar për Kosovë, kishin afatin e përdorimit të skaduar. Madje, sipas autoriteteve malazeze, në Portin e Tivarit ishin hequr deklaratat origjinale dhe ishin vendosur etiketa të reja me afat të ri skadimi”, ka shkruar ai.

Ndërkaq, anëtari i LDK-së ka kërkuar të dihet se sa ngarkesa të tilla mund të kenë hyrë në Kosovë dhe sa prej tyre u janë nënshtruar kontrolleve përkatëse.

“Kush duhet të na japë përgjigje? Sa ngarkesa të tilla kanë hyrë në Kosovë? Sa prej tyre janë kontrolluar? Sa kontrolle veterinare dhe ushqimore janë bërë? A është kontrolluar origjina, afati i përdorimit dhe deklaracioni i mallit?”, ka pyetur Rukiqi.

The post Rukiqi kërkon sqarime për importin e produkteve braziliane: Pse Kosova nuk vepron si BE-ja? appeared first on Albeu.com.