Vendet anëtare të Bashkimit Evropian nuk kanë mundur të arrijnë një qëndrim të përbashkët për t’i hapur rrugë vazhdimit të negociatave të anëtarësimit me Serbinë.

Diskutimi u zhvillua pasi Komisioni Evropian u kishte dërguar me shkrim shteteve anëtare një rekomandim që Grupkapitulli 3 të hapej me Serbinë gjatë muajit korrik.

“Komisioni Evropian vlerëson se Grupkapitulli 3 mund të hapet në korrik, duke konsideruar se Serbia ka bërë disa përpjekje në çështje kyçe specifike dhe se është përmbushur balanca e përgjithshme e nevojshme për hapjen e Grupkapitullit 3”, ka deklaruar Guillaume Mercier, zëdhënës i Komisionit Evropian.

Megjithatë, në mbledhjen e ambasadorëve të BE-së, një numër i madh shtetesh anëtare dolën kundër hapjes së Grupkapitullit 3. Sipas tyre, Serbia ende nuk ka shënuar progres të mjaftueshëm në sundimin e ligjit, nuk i është bashkuar sanksioneve të Bashkimit Evropian kundër Rusisë dhe vijon të ngjallë dyshime lidhur me orientimin e saj strategjik.

Hapja e këtij grupkapitulli do të sillte zhbllokimin e negociatave të anëtarësimit mes Bashkimit Evropian dhe Serbisë, të cilat kanë mbetur të ngrira që prej dhjetorit të vitit 2021.

Në fillim, shkaku kryesor i këtij bllokimi ishte refuzimi i Serbisë për t’u përafruar me sanksionet e BE-së ndaj Rusisë. Më vonë, si pengesë u shtuan edhe shqetësimet në rritje për gjendjen e sundimit të ligjit dhe standardet demokratike në vend.

The post BE-ja nuk gjen dakordësi për të ecur përpara me negociatat e anëtarësimit të Serbisë appeared first on Albeu.com.