Ndonëse ende nuk ka një njoftim zyrtar, mundësia që Mirlind Daku të transferohet te Spartak Moska ka nxitur reagime të shumta në Rusi.

“Crazy North”, grupimi i tifozëve të Spartakut, ka dalë kundër transferimit të sulmuesit shqiptar nga Rubin Kazani. Më herët, ky grup publikoi edhe një deklaratë që përmbante fyerje ndaj shqiptarëve dhe kosovarëve.

Qëndrimin e tifozëve e ka kundërshtuar ish-futbollisti i Spartakut, Andrei Tikhonov. Ai ka kërkuar që politika të mos përzihet me futbollin dhe që klubi t’u kushtojë vëmendje nevojave sportive të skuadrës.

Sipas Tikhonovit, Spartakut i duhet aktualisht një sulmues, ndaj transferimi i Dakut do të përbënte një përforcim të rëndësishëm.

Në një kanal në YouTube, Tikhonov deklaroi se Spartaku ka nevojë për një sulmues dhe se Daku do të paguhet nga klubi. Ai e cilësoi bashkimin me një skuadër që luan mirë si një bekim për futbollistin, duke nënvizuar se bëhet fjalë për futboll.

Daku është afër kalimit te një nga klubet më të mëdha ruse. Sipas raportimeve të mediave në Rusi, Spartak Moska dhe sulmuesi kanë gjetur gjuhën e përbashkët për kushtet personale, ndërsa zyrtarizimi pritet të ndodhë së shpejti.

Futbollisti 28-vjeçar pritet të largohet nga Rubin Kazani pas një etape të suksesshme. Ai ka realizuar 38 gola në 93 paraqitje, shifra që e kanë renditur mes sulmuesve më produktivë të kampionatit rus.

Edhe pse një pjesë e tifozëve e kundërshton afrimin e tij, Daku konsiderohet tashmë një objektiv konkret i Spartakut. Klubi pritet të vendosë nëse do ta çojë përpara transferimin.

The post Andrei Tikhonov mbron Mirlind Dakun pas kundërshtimeve të tifozëve të Spartak Moskës appeared first on Albeu.com.