Kosova do të luajë sonte, e enjte, ndaj Izraelit në “Nagyerdei Stadion” të Debrecenit, në Hungari, në takimin e tretë të Grupit B3 të Ligës së Kombeve.

Përballja nis në orën 20:45 dhe përfaqësuesja dardane synon të marrë një rezultat pozitiv në këtë duel të rëndësishëm.

Franco Foda pritet të bëjë disa lëvizje në formacionin titullar, ndërsa skema e planifikuar besohet të jetë 3-4-3. Ndryshimet më të mëdha parashikohen në repartin ofensiv.

Amir Saipi pritet të jetë titullar mes shtyllave, pasi Arijanet Murici, i cili u dëmtua ndaj Austrisë, ende nuk është rikuperuar plotësisht. Për këtë arsye, portieri i Sassuolos pritet të mungojë.

Lumbardh Dellova, Ilir Krasniqi dhe Ron Raci pritet ta përbëjnë sërish vijën e mbrojtjes, njësoj si në ndeshjen me Austrinë. Foda duket se kërkon të ruajë vazhdimësinë dhe stabilitetin në prapavijë.

Mesfusha pritet të formohet nga Dion Gallapeni, Veldin Hoxha, Leon Avdullahu dhe Mërgim Vojvoda. Hoxha e Avdullahu do të veprojnë në qendër, ndërsa Gallapeni dhe Vojvoda pritet të mbulojnë krahët dhe të ndihmojnë si në fazën sulmuese, ashtu edhe në atë mbrojtëse.

Në sulm, trajneri pritet të bëjë një ndryshim të plotë krahasuar me sfidën e fundit ndaj Austrisë. Vedat Muriqi, Ermal Krasniqi dhe Baton Zabërgja mund të mbeten jashtë formacionit titullar.

Treshja ofensive pritet të përbëhet nga Milot Rashica, Fisnik Asllani dhe Edon Zhegrova. Asllani do të luante në qendër, ndërsa Rashica dhe Zhegrova do të aktivizoheshin në krahë.

Megjithatë, një dilemë mbetet mes Milot Rashicës dhe Vedat Muriqit. Nëse sulmuesi prizrenas përfshihet në formacion, Fisnik Asllani do të zhvendosej në krahun e majtë të sulmit.

The post Kosova me ndryshime të shumta ndaj Izraelit, Foda zbulon formacionin e mundshëm appeared first on Albeu.com.

Në prag të përballjes me Irlandën në Ligën e Kombeve, Kombëtarja e Kosovës duket se po kalon momente të mbushura me humor pozitiv dhe një frymë të çlirët brenda grupit.

Federata e Futbollit të Kosovës ka ndarë me publikun një video nga momentet e paqena të sesionit fotografik të skuadrës, ku lojtarët shfaqen të buzëqeshur dhe duke shijuar shoqërinë e njëri-tjetrit.

Në këto pamje spikatin disa nga figurat qendrore të përfaqësueses, si Edon Zhegrova, Vedat Muriqi, Milot Rashica, Meriton Korenica, Lumbardh Dellova, Amir Saipi dhe Leard Sadriu.

Po ashtu, në fokus të kamerave kanë qenë edhe fytyrat më të freskëta të këtij grumbullimi, përfshirë Erblin Osmanin, Dion Kaçurin dhe Milot Avdylin, të cilët duket se janë integruar pa vështirësi në dinamikën e ekipit.

Ajo që bie më shumë në sy nga materiali i publikuar është harmonia e brendshme e skuadrës: lojtarët shkëmbejnë batuta, komunikojnë lirshëm dhe duket se po e shijojnë çdo çast përpara se të zhyten në betejën e radhës me fanellën dardane.

Këto imazhe ofrojnë një dritare të qartë mbi lidhjet e forta brenda ekipit, teksa gjithë fokusi tani është përqendruar drejt asaj që i pret në fushën e blertë.

Sonte, “Dardanët” nisin rrugëtimin e tyre në këtë edicion të Ligës së Kombeve, duke pritur Irlandën në stadiumin “Fadil Vokrri” në një takim që starton në orën 20:45.

The post Prapaskenat e foto-sesionit të Kombëtares, FFK zbulon atmosferën e çlirët para ndeshjes me Irlandën appeared first on Albeu.com.

Portieri i përfaqësueses së Kosovës, Amir Saipi, ka mbyllur ciklin e tij te Lugano dhe karrierën do ta vijojë në Spanjë. Largimi i 26-vjeçarit u konfirmua nga vetë klubi zviceran, i cili njoftoi se destinacioni i ri i lojtarit është CD Castellón, formacion që militon në Segunda División.

Gardiani shqiptar iu bashkua Luganos më 10 shtator 2021, pas një eksperience te Schaffhausen. Gjatë periudhës pesëvjeçare me ngjyrat bardh e zi, Saipi grumbulloi 180 paraqitje dhe u shndërrua në një element kyç të skuadrës.

Castellón, ekipi ku do të vazhdojë të luajë, ishte përballur në sezonin e fundit me eliminimin në fazën “play-off” për ngjitje në La Liga, nga Almeria. Në atë edicion, rolin e portierit kryesor e kishte belgu Roman Matthys, i cili numëroi 40 ndeshje në kampionat.

Megjithëse shifrat zyrtare të operacionit nuk janë bërë të ditura, burime nga shtypi zviceran sugjerojnë se akordi arrin në afro 1 milion euro, duke llogaritur këtu edhe bonuset, si dhe një përqindje nga një transferim i mundshëm i ardhshëm i portierit kosovar.

Në anën tjetër, Lugano kishte siguruar tashmë pasardhësin e Saipit. Gjatë kësaj periudhe merkatoje, klubi afroi portierin gjerman 24-vjeçar Felix Gebhardt nga Regensburgu, i cili parashikohet të jetë alternativa e David von Ballmoos.

Kalimi në futbollin spanjoll shënon një etapë të re në rrugëtimin e Amir Saipit, i cili kërkon të rritet më tej në një ligë me nivel të lartë garues dhe të ruajë pozitën e titullarit në Kombëtaren e Kosovës.

The post Amir Saipi përfundon aventurën zvicerane, i bashkohet Castellónit në Spanjë appeared first on Albeu.com.