Lumbardh Dellova, mbrojtësi i Kombëtares së Kosovës, ka bërë hapin e radhës në karrierë duke u zyrtarizuar te skuadra turke Amedspor.

27-vjeçari i është bashkuar klubit nga Turqia pas transferimit nga CSKA Sofia, me të dyja palët që kanë arritur marrëveshje për një kontratë trevjeçare.

Pas dy sezonesh në futbollin bullgar, Dellova i jep fund qëndrimit te CSKA Sofia, skuadër me të cilën luajti rregullisht dhe u kthye në një prej mbrojtësve më të sigurt të ekipit.

Te Amedspor, futbollisti kosovar do të jetë nën urdhrat e trajnerit Besnik Hasi dhe pritet të ketë një rol të rëndësishëm në vijën defensive të skuadrës.

Ekipi turk do të marrë pjesë në Superligën turke në sezonin 2026/27, pasi arriti të sigurojë ngjitjen në elitën e futbollit në Turqi.

Në radhët e Amedsporit, Dellova nuk do të jetë i vetmi lojtar nga Kosova.

Pjesë e kësaj skuadre janë edhe Ermal Krasniqi dhe Florent Hasani, çka e bën klubin një nga ekipet me numrin më të madh të futbollistëve kosovarë në kampionatin turk.

Përpara kalimit në Bullgari, Dellova ka luajtur për Ballkanin, Prishtinën, Hajdukun të Splitit dhe Lirinë, ndërsa me Kombëtaren e Kosovës numëron 23 paraqitje dhe tre gola të shënuar.

The post Lumbardh Dellova firmos me Amedsporin dhe nis kapitullin e ri në Turqi appeared first on Albeu.com.

Lumbardh Dellova ka bërë një tjetër lëvizje të rëndësishme në rrugëtimin e tij profesional, pasi tashmë është prezantuar zyrtarisht si lojtari më i ri i Amedsporit.

Për të siguruar shërbimet e mbrojtësit të Kombëtares së Kosovës, klubi turk ka paguar 950 mijë euro te CSKA Sofia, duke aktivizuar klauzolën e lirimit për kartonin e 27-vjeçarit. Në këtë mënyrë, Dellova mbyll aventurën e tij në futbollin bullgar, pas paraqitjeve të mira me ekipin nga kryeqyteti.

Futbollisti kosovar ka firmosur marrëveshje trevjeçare me Amedsporin dhe do të jetë pjesë e projektit të klubit për sezonin 2026/27, ku pritet të ketë peshë të rëndësishme në fazën mbrojtëse.

Te Amedspori, Dellova do të drejtohet nga legjenda shqiptare Besnik Hasi, ndërsa në skuadër do të ketë si bashkëlojtarë edhe Ermal Krasniqin dhe Florent Hasanin.

Njoftimi i plotë i Amedsporit:

“Si pjesë e planifikimit të skuadrës sonë për sezonin 2026-2027, klubi ynë ka nënshkruar kontratë 3-vjeçare me lojtarin e Kombëtares së Kosovës, Lumbardh Dellova, i cili së fundmi ishte pjesë e CSKA Sofia.

Lumbardh Dellova, 27 vjeç, i aftë të luajë si mbrojtës qendror, mbrojtës i djathtë dhe mbrojtës i majtë, do t’i japë ekipit tonë kontribute të rëndësishme falë stilit të tij të gjithanshëm të lojës”.

“E mirëpresim Lumbardh Dellovën në klubin tonë dhe i dëshirojmë një karrierë të suksesshme me fanellën tonë jeshile dhe të kuqe”.

The post Lumbardh Dellova bëhet zyrtarisht pjesë e Amedsporit, nënshkruan kontratë për tre vjet appeared first on Albeu.com.

Lumbardh Dellova është në prag të ndarjes me CSKA Sofia, teksa destinacioni i radhës për mbrojtësin e Kosovës pritet të jetë Amedspor në Turqi.

Raportimet bëjnë të ditur se skuadra nga Diyarbakiri ka vendosur ta paguajë klauzolën e lirimit të lojtarit, e cila është 950 mijë euro.

Klubi turk, që së fundmi siguroi ngjitjen në elitën e futbollit turk, mësohet se ka gjetur dakordim me Dellovën edhe për kushtet personale.

Futbollisti 27-vjeçar ndodhet aktualisht në Turqi dhe pritet t’u nënshtrohet vizitave mjekësore përpara se të hedhë firmën mbi kontratë. Nuk përjashtohet që transferimi të zyrtarizohet gjatë të premtes.

Dellova ishte në proces rikuperimi pas një lëndimi dhe vetëm rreth një javë më parë iu bashkua përgatitjeve të CSKA-së, megjithatë nuk pritet të ketë probleme sa u përket testeve mjekësore.

Që nga kalimi te klubi bullgar në korrik të vitit 2024, reprezentuesi i Kosovës ka regjistruar 69 paraqitje me CSKA Sofia, duke shënuar katër gola dhe duke kontribuar me dy asistime.

Nëse gjithçka mbyllet me sukses, Amedspor do ta ketë Dellovën si shqiptarin e tretë nga Kosova në ekip, pas Florent Hasanit dhe Ermal Krasniqit. Po ashtu, përflitet se edhe portieri Amir Saipi pritet t’i bashkohet klubit kurd.

Në stolin e ekipit është vendosur edhe legjenda shqiptare e futbollit, Besnik Hasi, i cili do ta udhëheqë skuadrën turke në sezonin e saj të parë në Superligë.

The post Amedspor pranë transferimit të Lumbardh Dellovës, aktivizohet klauzola prej 950 mijë eurosh appeared first on Albeu.com.

Lajmi është bërë i ditur sot (e premte) nga klubi kurd, i cili e ka zyrtarizuar afrimin e Krasniqit nga Legia Varshava.

Futbollisti 27-vjeçar i Përfaqësueses së Kosovës i është bashkuar Amedsporit në formë huazimi, pasi i ka kaluar me sukses kontrollet mjekësore.

Zyrtarizimi u publikua nga faqja zyrtare e Amedsporit në rrjetet sociale, përmes një videoje ku shkruhej: “Ju mirëpresim Ermal Krasniqi”.

Duhet theksuar se te klubi turk janë pjesë edhe një tjetër futbollist nga Kosova, Florent Hasani, si dhe trajneri Besnik Hasi, i cili u zyrtarizua pak ditë më parë.

The post Ermal Krasniqi zyrtarizohet te Amedspor në Superligën e Turqisë appeared first on Albeu.com.