Ministri i Drejtësisë, Jeton Shasivari, priti sot në një takim Nicole Varns, e cila ushtron detyrën e shefes së Misionit në Ambasadën Amerikane. Gjatë bisedës, të dy palët theksuan vijimin e partneritetit të qëndrueshëm mes Ministrisë dhe Shteteve të Bashkuara, si një aleat kyç në procesin e reformimit të sektorit të drejtësisë, bëri të ditur Ministria e Drejtësisë.

Diskutimet u përqendruan në çështjet kryesore të agjendës së Ministrisë, duke nxjerrë në pah veçanërisht transformimin e sistemit gjyqësor përmes digjitalizimit, përparimin e sundimit të ligjit, axhendën legjislative dhe përballjen me fenomenin e korrupsionit. Në këtë kontekst, ministri Shasivari shprehu kërkesën për të lehtësuar shkëmbimin e njohurive dhe angazhimin e ekspertizës amerikane në të ardhmen, me fokus të veçantë në përmirësimin e ligjeve penale.

Shefi i Drejtësisë vlerësoi lart kontributin e pandërprerë të SHBA-së ndaj dikasterit që ai drejton dhe proceseve reformatore në vend. Ai nënvizoi se kjo ndihmë luan një funksion thelbësor në fuqizimin e institucioneve shtetërore, sidomos në luftën kundër rrjeteve të krimit të organizuar ndërkombëtar dhe në thellimin e marrëdhënieve mes organeve vendase dhe bashkëpunëtorëve globalë.

Një tjetër pikë qendrore e takimit ishte ripërtëritja e kodit penal, e cila vijon të jetë një objektiv strategjik i Ministrisë. U nënvizua se tashmë ka nisur vënia në jetë e projektit “Përkrahje për zbatimin e Strategjisë Kombëtare për Drogat në Republikën e Maqedonisë së Veriut”, i cili mbështetet financiarisht nga Byroja për Çështje Ndërkombëtare të Narkotikëve dhe Zbatimit të Ligjit (INL) e Departamentit të Shtetit të SHBA-së.

The post Shasivari rikonfirmon aleancën me SHBA-në për drejtësinë dhe antikorrupsionin appeared first on Albeu.com.

Kryetari i Kuvendit, Afrim Gashi, sot ka mbajtur një takim pune me ushtruesen e detyrës së ambasadores së Shteteve të Bashkuara të Amerikës, Nicole Varnes, bëjnë të ditur nga shërbimi për shtyp i Kuvendit.

Gjatë bisedës, palët kanë rikonfirmuar raportet e shkëlqyera mes dy shteteve dhe partneritetin e qëndrueshëm, të ndërtuar mbi vlera të përbashkëta demokratike dhe bashkëpunim të ngushtë institucional.

Temë e takimit ishin edhe prioritetet e agjendës parlamentare, si dhe zhvillimet e tanishme në institucione.

Në këtë drejtim, u nënvizua nevoja për funksionim efikas të institucioneve demokratike, fuqizimin e rolit të Kuvendit dhe përparimin e reformave në dobi të qytetarëve.

Në përfundim të takimit, Gashi dhe Varnes konfirmuan vullnetin e përbashkët për ta thelluar më tej partneritetin dhe dialogun strategjik, thuhet në njoftim./Telegrafi/

The post Gashi dhe Varnes konfirmojnë partneritetin e ngushtë dhe prioritetet parlamentare appeared first on Albeu.com.

Ambasada e SHBA-së në Shkup ka bërë të ditur se nga 15 korriku 2026 do të vendoset një sistem i ri pagese për Shërbimet e Shtetasve Amerikanë, që përfshijnë pasaportat dhe shërbimet noteriale.

Sipas njoftimit, në sportelin konsullor nuk do të pranohen më para në dorë, kartela krediti apo asnjë formë tjetër pagese. Të gjitha detyrimet do të duhet të paguhen paraprakisht në internet, përmes portalit zyrtar Pay.gov.

Qytetarët amerikanë që kanë takim në Ambasadën e SHBA-së në Shkup duhet të hyjnë në portal, të kryejnë pagesën online dhe më pas të printojnë konfirmimin elektronik, të cilin duhet ta paraqesin gjatë takimit të tyre personal.

“Duke filluar nga data 15 korrik 2026, Ambasada e SHBA-së në Shkup do të kalojë në një sistem pa para të gatshme dhe pa kartela krediti për Shërbimet e Shtetasve Amerikanë (shërbimet e pasaportave dhe noterisë).

Çfarë po ndryshon?

Paratë në dorë (kesh), kartat e kreditit ose çdo formë tjetër pagese NUK do të pranohen më në sportelin konsullor.

Çfarë duhet të bëni?

Të gjitha pagesat duhet të kryhen online përpara takimit tuaj përmes portalit zyrtar qeveritar të SHBA-së në Pay.gov.

Mos harroni:

Duhet të hyni në portal, të printoni konfirmimin elektronik të pagesës nga Pay.gov dhe ta merrni atë me vete në takimin tuaj personal në Ambasada e SHBA-së në Shkup.

Për detaje të plota, vizitoni faqen zyrtare të Ambasada e SHBA në Maqedoninë e Veriut https://mk.usembassy.gov/services/”, thuhet në njoftimin e ambasadës./Telegrafi/

Për më shumë informacion, ambasada u ka bërë thirrje qytetarëve që të konsultojnë faqen e saj zyrtare.

The post Ambasada e SHBA-së në RMV njofton se nga 15 korriku pagesat do të bëhen ekskluzivisht online appeared first on Albeu.com.