Ushtruesja e detyrës së Presidentes së Kosovës, Albulena Haxhiu, i ka përcjellë ngushëllimet familjes së zyrtarit policor Altin Kryeziu. Ai ndërroi jetë pasi nuk u mbijetoi lëndimeve të pësuara kur u godit nga një automjet gjatë kryerjes së detyrës.

Sipas Haxhiut, vdekja e Kryeziut përbën një humbje të rëndë jo vetëm për të afërmit e tij, por edhe për Policinë e Kosovës, e cila ka humbur një pjesëtar që profesionin e tij e kishte vënë në shërbim të të tjerëve.

“Familja e tij ka humbur një njeri të dashur, ndërsa Policia e Kosovës një koleg e pjesëtar që e kishte zgjedhur detyrën si shërbim për të tjerët”, ka shkruar Haxhiu.

Në reagimin e saj të plotë, ajo ka thënë se e ka pikëlluar thellësisht lajmi për ndarjen nga jeta të zyrtarit policor Altin Kryeziu, i cili nuk arriti t’u mbijetojë plagëve të marra pas goditjes nga një automjet gjatë detyrës.

Haxhiu ka theksuar se sot familja Kryeziu ka humbur njeriun e saj të dashur, ndërsa Policia e Kosovës një koleg dhe pjesëtar që e kishte zgjedhur punën e tij për t’u shërbyer të tjerëve.

Ajo ka vlerësuar se humbja e Altinit shërben si një paralajmërim i dhimbshëm për rrezikun në trafik, ku edhe një çast pakujdesie mund t’i marrë jetën dikujt dhe të ndryshojë përgjithmonë jetën e shumë personave të tjerë. Sipas saj, kujdesi gjatë qarkullimit dhe përgjegjësia ndaj njëri-tjetrit janë, mbi të gjitha, përgjegjësi ndaj jetës së njeriut.

Ushtruesja e detyrës së Presidentes u ka shprehur ngushëllimet më të sinqerta familjarëve të Kryeziut, duke thënë se ndan dhimbjen edhe me kolegët e Altinit në Policinë e Kosovës, si dhe me të gjithë ata që e kanë njohur, kanë punuar me të dhe e kujtojnë sot me dhimbje.

“Qoftë i përjetshëm kujtimi për të”, ka përfunduar Haxhiu.

The post Haxhiu për vdekjen e Altin Kryeziut: Pakujdesia në trafik mund të ketë pasoja fatale appeared first on Albeu.com.