Avni Arifi, sekretar i Përgjithshëm i Aleancës, ka bërë të ditur se partia e tij vazhdon të mbajë të njëjtin qëndrim lidhur me kushtet për mbështetjen e një kandidati për president të Kosovës.

Sipas tij, Aleanca nuk është e përfshirë në ndonjë projekt politik të kryeministrit në detyrë, Albin Kurti, dhe kryetarit të LDK-së, Lumir Abdixhiku, lidhur me këtë çështje.

Arifi theksoi se sqarimi i situatës për postin e presidentit u takon Kurtit dhe Abdixhikut, ndërsa pozicioni i Aleancës, siç tha ai, nuk ka pësuar asnjë ndryshim.

“Ne nuk jemi pjesë e projektit Kurti-Abdixhiku. U takon atyre të sqarojnë. Qëndrimi ynë është ai që kemi pasur para tre muajsh. Për ne asgjë nuk ka ndryshuar”, ka deklaruar Arifi.

Reagimi i tij u bë publik në të njëjtën ditë kur VV-ja dhe LDK-ja u dakorduan që Bekim Sejdiu të jetë kandidati i përbashkët për president të Kosovës.

The post Aleanca: Qëndrimi ynë për presidentin e Kosovës mbetet i pandryshuar appeared first on Albeu.com.