Lista paraprake e kandidatëve për pranimin e kadetëve të rinj në Akademinë Ushtarake në Shkup përfshin 46 persona, por vetëm një prej tyre është shqiptar. Aleanca për Shqiptarët e sheh këtë shifër si tregues të përfaqësimit të pamjaftueshëm të shqiptarëve në institucionin që formon kuadrot e ardhshme të Forcave të Armatosura.

Partia ka drejtuar kritika edhe ndaj VLEN-it, i cili është pjesë e Qeverisë dhe përfaqësohet në Ministrinë e Mbrojtjes. Sipas ASH-së, kjo strukturë ka qëndruar e heshtur dhe nuk ka treguar angazhim për shtimin e pjesëmarrjes së të rinjve shqiptarë në sektorin e mbrojtjes. “Të jesh në pushtet, të thirresh në përfaqësim të shqiptarëve dhe të mos jesh në gjendje të sigurosh përfaqësim elementar për bashkëqytetarët e tu shqiptarë nuk është pushtet, por është vetëm dekor”, thuhet në reagimin e Aleancës për Shqiptarët.

ASH-ja vlerëson se VLEN-i, duke qenë pjesë e pushtetit dhe duke pasur edhe postin e zëvendësministrit në Ministrinë e Mbrojtjes, duhej të kishte ndërmarrë veprime konkrete për t’i nxitur, ndihmuar dhe mbështetur të rinjtë shqiptarë që të aplikonin në Akademinë Ushtarake. “Me qëllim të rritjes së numrit të shqiptarëve në mbrojtje, kjo listë preliminare është dëshmi e qartë se nuk është ndërmarrë asgjë në këtë drejtim dhe kjo padyshim se është dështimi i radhës i VLEN-it”, thekson ASH.

Aleanca për Shqiptarët kërkon nga Ministria e Mbrojtjes dhe Akademia Ushtarake që të japin menjëherë sqarime, ndërsa përfaqësuesve shqiptarë në Qeveri u kërkon të mbajnë përgjegjësi politike. “Shqiptarët nuk kërkojnë privilegje, por përfaqësim të drejtë, të barabartë dhe dinjitoz në institucionet e shtetit”, përfundon reagimi.

The post ASH: Nga 46 kandidatë në listën paraprake të Akademisë Ushtarake në Shkup, vetëm një është shqiptar appeared first on Albeu.com.

Aleanca për Shqiptarët ka hedhur akuza ndaj VLEN-it, duke thënë se ky koalicion po i përdor institucionet shtetërore për punësimin e familjarëve dhe njerëzve të afërt me funksionarët e tij. Sipas ASH-së, emërimet e fundit ngrenë dyshime për nepotizëm dhe ndërhyrje politike.

Në reagimin e saj për media, partia vlerëson se VLEN-i po i jep përparësi punësimeve familjare, në vend që të fokusohet te çështjet që, sipas saj, janë thelbësore për shqiptarët.

“VLEN-i institucionet shtetërore i ka shndërruar në zyra punësimi për familjarët dhe të afërmit e funksionarëve të vet. Në këmbim të posteve dhe privilegjeve, përfaqësuesit e tij heshtin për degradimin e pozitës së shqiptarëve, për gjuhën shqipe, për përfaqësimin e drejtë, për ligjin e lojërave të fatit, për provimin e jurisprudencës në shqip dhe për bllokimin e procesit eurointegrues”, thuhet në reagimin e partisë.

ASH si shembull të fundit përmend Mimoza Musën, deputete dhe nënkryetare e VLEN-it. Sipas pretendimeve të saj, babai i Musës, Arif Musa, ndonëse pensionist, është zgjedhur anëtar i Këshillit Mbikëqyrës të Bankës Zhvillimore të Maqedonisë së Veriut.

Partia thekson se Arif Musa, gjatë kohës kur ishte anëtar i Komisionit Shtetëror për Parandalimin e Korrupsionit, kishte kërkuar zbatimin e standardeve të tjera për emërimet në institucionet publike. “Ironia është se Arif Musa, si ish-anëtar i Komisionit për Parandalimin e Korrupsionit, dikur kërkonte rishqyrtimin e emërimeve dhe rihapjen e konkurseve aty ku konstatohej nepotizëm. Sot, të njëjtat parime duhet të vlejnë edhe për të”, thekson ASH.

Në kumtesë përmendet edhe Nusret Haliti, të cilin ASH e identifikon si nip të Arif Musës dhe si ushtrues aktual të detyrës së drejtorit të Agjencisë për Komunikime Elektronike.

“Familjarizmi vazhdon edhe me nipin e tij, Nusret Haliti, i cili mban pozitën e drejtorit të Agjencisë për Komunikime Elektronike”, thuhet në kumtesë.

Aleanca për Shqiptarët u kërkon institucioneve dhe opinionit publik të sqarojnë procedurat që janë ndjekur për këto emërime. “Prandaj pyesim publikisht nëse ka pasur ndikim politik në këto emërime dhe nëse procedurat kanë qenë transparente dhe konkurruese”, deklaron ASH.

Në përmbyllje, ASH pretendon se VLEN-i nuk e ka realizuar zotimin e tij për të luftuar nepotizmin. “VLEN-i nuk e luftoi nepotizmin. Vetëm priti radhën për të përfituar prej tij”, përfundon kumtesa e Aleancës për Shqiptarët.

The post ASH akuzon VLEN-in për nepotizëm: Nuk e luftoi, por përfitoi nga ai appeared first on Albeu.com.

Në reagimin e saj, ASH thekson se për shumë vite janë dëgjuar zotime se procesi i emërtimit të rrugëve do të vazhdonte në përputhje me vullnetin e qytetarëve. Sipas saj, vendimi i Këshillit Komunal të Tetovës i vitit 2007 është rrëzuar nga Gjykata Kushtetuese, ndërsa ata që dikur e kishin këtë temë pjesë qendrore të premtimeve të tyre, sot nuk japin asnjë qëndrim të qartë para qytetarëve.

ASH i rikujton VLEN-it se në kohën kur ishte në opozitë, çështjen e emërtimit të rrugëve e paraqiste si kauzë, por tani që është në pushtet, sipas saj, ky vendim po kalon pa ndonjë reagim serioz.

“Kur ishin në opozitë, emërtimi i rrugëve ishte kauzë. Sot, kur janë në pushtet, anulimi i vendimit kalon pa asnjë reagim serioz. Kjo tregon sa të sinqerta kanë qenë premtimet e tyre. Nuk mjafton të flasësh për dinjitet, identitet dhe të drejta kur je në opozitë. Përgjegjësia matet kur ke mundësinë të veprosh. Heshtja e sotme është dëshmia më e qartë e dallimit mes premtimeve të dikurshme dhe realitetit të sotëm”, thuhet në reagimin e ASH-së.

The post ASH akuzon VLEN-in për heshtje pas vendimit për anulimin e emrave shqip të rrugëve në Tetovë appeared first on Albeu.com.