Pas anulimit dhe rishpalljes së procedurës, një prej operatorëve konkurues, një kompani e quajtur AESS në pronësi të Lefter Klemos, i është drejtuar sërish Komisionit të Prokurimit Publik, duke akuzuar se kriteret e tenderit janë formuluar me qëllim përjashtimin e çdo konkurrenti tjetër përveç një bashkimi konkret kompanish: Advanced Business Solutions e Gerond Meçes, AlbaScan e Elton Jorgjis, Real Com e Marjan Brrakës dhe CSP Sh.p.k e Klevis Xhagollit.

Në dokumentin zyrtar të ankesës, kompania ngre akuza serioze për mungesë transparence dhe konkurrencë të barabartë, shkruan skyweb.al.

Kompania thekson se kërkesa për certifikata specifike të lëshuara vetëm nga prodhuesit e skanerëve (Smiths Detection) dhe të sistemeve video (VMS) është në vetvete një kriter përjashtues, pasi në Shqipëri vetëm një kompani ka akses real në këto certifikime.

Po ashtu, autoriteti kontraktor nuk ka ofruar asnjë të dhënë teknike për sistemet ekzistuese, duke pamundësuar përgatitjen e ofertave realiste.

Një tjetër element që shton dyshimet, është mospërdorimi i ndarjes në lote. Skanerët, kamerat, sistemi i telefonisë dhe pajisje të tjera, janë përfshirë në një kontratë të vetme, ç`ka sipas ankimuesit është një mënyrë për të izoluar konkurrencën dhe për të garantuar që tenderi të merret nga një bashkim operatorësh që kontrollon të gjitha segmentet e sistemit.

Ngjarjet e fundit në sistemin penitenciar, i japin kësaj procedure një kontekst edhe më alarmues. Në dhjetor të vitit 2023, në burgun e Peqinit ndodhi një ndër vrasjet më të rënda brenda sistemit penitenciar shqiptar.

I dënuari përjetë Sokol Mjacaj, arriti të fuste armë në qeli dhe qëlloi për vdekje një të burgosur e plagosi një tjetër.

Kamera jashtë funksionit, skanerët të çaktivizuar, dhe kontrolli thuajse inekzistent, këto ishin disa nga konstatimet e para pas ngjarjes.

Menaxhimi i sigurisë në atë kohë i ishte besuar kompanisë AlbaScan, një nga operatorët që pretendohet se është i përfshirë në bashkimin që parashikohet të fitojë edhe tenderin e ri.

Vetëm disa javë më pas, një tjetër incident, tentativë arratisjeje nga burgu i Fierit, vuri sërish në pikëpyetje sistemin e kontrollit dhe besueshmërinë e kontratave të sigurisë.

Mjetet e futura në qeli, kamera të paoperueshme dhe asnjë alarm funksional, janë skenat që po përsëriten, ndërkohë që kontratat miliona euro vijojnë të jepen të njëjtëve emra.

Në shkurt 2024, drejtori i përgjithshëm i Burgjeve, Admir Braja, dha dorëheqjen pas këtyre skandaleve, për t’u zëvendësuar nga Klevis Qose.

Por ndërsa drejtuesit ndryshojnë, kontratat mbeten. Dhe tani, me tenderin e ri në prag të përfundimit, të njëjtët operatorë që ishin në qendër të vëmendjes për skandale sigurie, janë sërish më afër se kurrë për të marrë miliona euro fonde publike. /skyweb.al

The post Tenderi 6.2 mln euro i sigurisë në burgje kthehet në mollë sherri në KPP, akuza për favorizim të AlbaScan dhe Advanced Business Solutions appeared first on Albeu.com.

Nga; Skyweb.al 
Komisioni i Prokurimit Publik ka urdhëruar sërish ndalimin e tenderit për instalimin e kamerave të sigurisë në dogana, duke konstatuar se Agjencia Kombëtare e Shoqërisë së Informacionitnuk ka zbatuar vendimin e mëparshëm të datës 27 maj 2025. Sipas verifikimeve të kryera nga KPP, ndryshimet në dokumentet e tenderit janë sipërfaqësore dhe nuk përmbushin kërkesën kryesore për unifikimin e specifikimeve teknike, veçanërisht për kamerat “Outdoor Bullet”.

Ky është vendimi i dytë i KPP për këtë tender, duke e detyruar AKSHI-n të ndryshojë dokumentacionin teknik dhe të ndalojë menjëherë vijimin e procedurës aktuale, me pasoja të drejtpërdrejta në kohën dhe zhvillimin e projektit.

Ankesa e parë e CSP dhe paralajmërimi për favorizime

Skandali nisi kur kompania CSP SHPK, në pronësi të Klevis Xhagollit, paraqiti një ankesë pranë KPP-së duke akuzuar AKSHI-n për hartimin e një dokumentacioni që favorizonte pajisjet e një prodhuesi specifik: kompania kineze Uniview, përmes modelit IPC6858ER-X40-VF. Sipas CSP-së, specifikimet teknike ishin “qepur si kostum” vetëm për këtë pajisje, duke përjashtuar çdo alternativë tjetër në treg dhe shkatërruar garën e lirë mes operatorëve.

Kapitali.al dhe Skyweb.al raportuan më herët se Uniview është një kompani e sanksionuar nga Shtetet e Bashkuara të Amerikës për shkelje të të drejtave të njeriut, pasi teknologjia e saj është përdorur për survejimin masiv të minoriteteve si ujgurët.

Pavarësisht kësaj, produktet e Uniview u përfshinë në tenderin e AKSHI-t, ndërkohë që kërkohej që punonjësit që do të instalonin kamerat të kishin certifikata sigurie nga Autoriteti Kombëtar për Sigurinë e Informacionit të Klasifikuar (AKSIK).

Anulimi i parë: AKSHI (bën sikur) tërhiqet përballë urdhrit të KPP

Pas shqyrtimit të ankesës së CSP-së dhe rritjes së presionit publik, KPP më 27 maj 2025 pranoi pjesërisht ankesën dhe urdhëroi AKSHI-n që të modifikonte specifikimet teknike dhe të eliminonte çdo element që kufizonte konkurrencën.

AKSHI reagoi duke anuluar tenderin dhe e rishpalli procedurën, duke pretenduar se kishte përmirësuar dokumentacionin sipas urdhrit të Komisionit.

Megjithatë, shqetësimet nuk u zgjidhën.

Ankesa e dytë: CSP akuzon për riciklim të të njëjtave kritere diskriminuese

Menjëherë pas rishpalljes së tenderit, CSP paraqiti një ankesë të dytë, me argumentin se ndryshimet ishin minimale, ndërsa specifikimet teknike mbeteshin të njëjta në thelb dhe vijonin të favorizonin të njëjtën markë.

Në këtë ankesë, CSP denoncoi se tenderi vazhdon të jetë i ndërtuar për të imponuar një zgjidhje të caktuar dhe të mbyllë garën për operatorë të tjerë, duke sjellë rritje të pajustifikuar të kostove dhe shkelje të Ligjit për Prokurimet Publike.

Përfaqësia shqiptare e Uniview dhe lidhjet me AlbaScan

Një detaj tjetër që rëndon situatën është se Uniview nuk ka përfaqësi të drejtpërdrejtë në Shqipëri. Produktet e saj ofrohen përmes ndërmjetësit AlbaScan, e listuar zyrtarisht si partner i Uniview. Në këtë mënyrë, përmes një strukture të tërthortë, teknologjia e një kompanie të sanksionuar tenton të depërtojë në sistemin e sigurisë doganore të Shqipërisë, duke krijuar rrezik të drejtpërdrejtë për sigurinë kombëtare dhe përputhshmërinë me standardet euroatlantike.

Vendimi i fundit i KPP: AKSHI të ndryshojë kushtet dhe të rishpallë tenderin

Në vendimin e datës 9 qershor 2025, KPP vlerëson se AKSHI ka shkelur vendimin e mëparshëm, duke mos bërë unifikimin e kërkuar mes certifikimeve në tabelat teknike dhe dokumentit “TORs”. Komisioni vëren se kjo mospërputhje sjell paqartësi për operatorët ekonomikë dhe dëmton transparencën e procesit duke lënë të kuptohet se tenderi është “paketuar” për AlbaScan.

Si pasojë, KPP ndalon vijimin e procedurës dhe i kërkon AKSHI-t të korrigjojë dokumentacionin për herë të dytë, duke respektuar tërësisht vendimet e mëparshme.

Kjo duhet të çojë në një rishpallje të tretë të tenderit, me kushtet e korrigjuara dhe të harmonizuara teknikisht, në mënyrë që të garantohet konkurrencë reale dhe mosfavorizim. /skyweb.al

The post SPEKTAKËL me tenderin e kamerave në dogana, AKSHI nuk pyet për KPP, urdhërohet ANULIMI i tenderit për herë të dytë: A është “paketuar” për AlbaScan? appeared first on Albeu.com.

Gazetari i “Ora News”, Elton Qyno, ka siguruar dokumente që tregojnë rritjen e shpenzimeve financiare nga ana e SPAK (649 mln lekë), të cilat do shkojnë për sigurinë e godinës, ku ushtrojnë detyrën, prokurorë, gjyqtarë dhe oficerë të BKH-së.

Këto masa për blerjen e sistemeve elektronike mbrojtëse, për shumë njerëz mund të duken të ekzagjëruara, por SPAK synon të blindojë nga jashtë dhe brenda hyrjet dhe daljet e objektit.

Drejtuesit e Prokurorisë së Posaçme, duke marë në konsideratë informacionet për sulme kriminale, kërkojnë të krijojnë një “umbrellë” mbrojtëse rreth godinës, me qëllim parandalimin e çdo agresori sulmues, që mund të kryhet qoftë nga toka apo nga ajri.

Dhe për të vënë në zbatim këtë plan, SPAK ka zgjedhur në dy procedura tenderuese, t’ia besojë punën e sigurimit të godinës, kompanisë private “AlbaScan”, që aktualisht menaxhohet dhe kontrollohet nga Elton dhe Elision Jorgjis.

Ky është tenderi i parë që kjo kompani fiton në SPAK, duke dhënë ofertën fituese prej 649.8 milion lekë të vjetra.

Ndërkohë që vetë fondi limit i SPAK ishte planifikuar për t`u shpenzuar, diku tek 708 mijë euro.

E themeluar vetëm pak vite me parë, “AlbaScan” është shndërruar rrufeshëm në një “përbindësh” të fondeve publike.

“AlbaScan”, u krijua në shkurt të vitit 2017 nga dy ortakë, Sokol Cane dhe Etmira Dashi.

Të dy këta aksionerë zotëronin nga 50 për qind të aksioneve.

Gjatë kohës që ishte në pronësinë e tyre, kompania mbeti një biznes i vogël me xhiro të papërfillshme.

Ngjitja e saj erdhi në vitin 2019.

Por në janar të vitit 2019, kompania u ble nga Elton dhe Elision Jorgjis, për vetëm 150 mijë lekë.

Menjëherë sapo u ble nga dy pronarët e rinj, xhiro e kompanisë kërceu në 110 milionë lekë nga 19 milionë që kishte qenë në vitin 2018.

Kompania “AlbaScan”, në dy lotet tenderuese të hapura nga SPAK, konkuroi përballë kompanive të tjera private “Alcomm Solutions” dhe “AESS” & “S2 Secure Albania”, të cilat u skualifikuan nga Komisioni i Ofertave pranë SPAK, me argumentin se ofertat e ulëta të paraqitura prej tyre, nuk përmbushnin kapacitetin ekonomik të kërkuar nga institucioni.

Tashmë “AlbaScan”, do japi asistencën e saj dhe në SPAK, ku pritet të implementojë teknologjinë elektronike për sigurimin e godinës.

Vetëm për Lotin e Parë, kjo kompani ka dhënë ofertën ekonomike prej 200 milion lekë të vjetra, për instalimin në SPAK të një paisje skanimi për bagazhe, një pajisje skaner për zarfet e postës si dhe 1 urë kontrolli.

Kurse për Lotin e Dytë, “AlbaScan”, është shpallur fituese për ofertën ekonomike prej 449 milion lekë të vjetra, në këmbim për vendosjen e një paisje skaner për skanimin e poshtëm të automjeteve që hyjnë dhe parkohen në ambjentet e brendshme të SPAK, si dhe instalimin e një paisje automatike të quajtur “Bollard”.

Njësia e skanimit duhet të jetë e dizenjuar, për të dhënë rezultate maksimale në skanimin e poshtëm të automjeteve.

Sipas vetë dokumentave të SPAK, qëllimi i blerjes së sistemit automatik me siguri të lartë “Bollard”, është të ndalojë automjetet nga hyrja e paautorizuar në zona të sigurisë dhe të ruajë nivelin më të lartë të mbrojtjes ndaj antiterrorizmit.

SPAK, tashmë do blejë nga “AlbaScan” dy copë sisteme të tilla me tre pistona çeliku, të cilat do vendosen në hyrjen dhe daljen e tunelit të godinës së SPAK dhe hyrjen dhe daljen në oborin e SPAK.

Ndërsa dy sisteme, do blihen për skanimin e poshtëm të automjeteve që hyjnë dhe dalin në SPAK.

Kurse pak ditë më parë mësohet se SPAK, ka mbyllur dhe procedurën tenderuese prej 4 miliard lekë, që do shkojë për mobilimin dhe ndërtimin e godinës së re të SPAK, ndërtimin e një tuneli ajror dhe ndërtimi i disa shkallëve të brendshme brenda objektit ekzistues të dhuruar nga Bashkia e Tiranës.

The post Kërcënime se do sulmohen/ SPAK i jep 649 milion lekë kompanisë “AlbaScan” për mbrojtje appeared first on Albeu.com.