Në ambientet e “Shtëpisë së Futbollit” u mbajt sot një takim me mediat nga trajneri i ekipit kombëtar U-21, Alban Bushi. Gjatë fjalës së tij, ai komentoi emrat e grumbulluar për sfidën testuese që Shqipëria do të zhvillojë ndaj Ukrainës më 5 tetor, në stadiumin “Szentmarjay Tibor”.

Duke iu referuar fytyrave të reja në grupin kuqezi, Bushi shprehu mirënjohje të veçantë. “I jam falënderues Ajetit që hoqi dorë nga Maqedonia për të veshur fanellën tonë. Lojtarë si ai, së bashku me Kullën dhe Huqin, kanë një potencial të jashtëzakonshëm për U-21 dhe më pas për ekipin A. Edhe pse janë më të rinj, kjo është një mundësi ideale për të hedhur hapa përpara”, u shpreh ai.

Sa i përket përballjes me Ukrainën, tekniku e cilësoi si një provë mjaft serioze. “Kemi përballë një ekip shumë të fortë, por për ne ky është një test thelbësor. Në fushë jemi treguar gjithmonë të barabartë me rivalët, pavarësisht se në letër na kanë parë më dobët. Kjo ndodh sepse grupi ynë ka disiplinë dhe intensitet të lartë. Mendoj fuqishëm se jemi një ekip që nuk dorëzohet lehtë”, theksoi Bushi.

Kur u pyet për ndonjë lojtar konkret që mund të bëjë diferencën, trajneri i vlerësoi të gjithë të përzgjedhurit. Ai veçoi Bajraktarin dhe Ajetin, për të cilët beson se do të ndërtojnë një karrierë të shkëlqyer dhe kanë hapa të shpejtë rritjeje. “Të gjithë lojtarët janë në gjendje t’i bëjnë ballë Ukrainës. Natyrisht që kemi mungesa, por duke qenë një ekip kombëtar, zgjidhjet nuk na mungojnë”, pohoi ai.

I pyetur nëse brezi aktual i U-21 ka potencial për Kombëtaren A, Bushi u tregua optimist. “Pa dyshim që po. Mjafton të shohësh katër emra si Sina, Fetai dhe Simon Simoni, të cilët tashmë shfaqin potencial për të luajtur si me U-21 ashtu edhe me ekipin e parë”, shtoi trajneri.

Në lidhje me objektivat dhe rrugëtimin drejt kampionatit europian, Bushi nënvizoi rëndësinë e ecjes paralele mes rezultateve dhe lojës. “Te moshat nuk kemi presionin e vendit të parë. Megjithatë, fokusi total është tek Europiani. Çdokush duhet ta kuptojë se koha po shkurtohet dhe duhet të japim maksimumin, duke i marrë sfidat njëra pas tjetrës. Që të hënën do të japim sinjale të qarta përballë Ukrainës”, përfundoi Bushi.

The post Alban Bushi: “Nuk dorëzohemi kollaj”, fokusi është te Europiani, falënderime për lojtarët e rinj kuqezi appeared first on Albeu.com.

Ekipi kombëtar shqiptar i moshës nën 21 vjeç po vazhdon ciklin përgatitor për Kampionatin Europian të vitit 2027 me një tjetër takim miqësor. Skuadra e drejtuar nga trajneri Alban Bushi do të ndeshet me përfaqësuesen e Ukrainës U-21 më 5 tetor, duke filluar nga ora 15:30, në impiantin sportiv “Szentmarjay Tibor Városi Stadion” që ndodhet në Eger, Hungari.

Faza përgatitore e lojtarëve do të fillojë në kryeqytetin shqiptar më 28 shtator, ndërsa tekniku Bushi ka bërë publike listën me 21 futbollistët e thirrur për këtë sfidë.

Në këtë përzgjedhje vihen re katër fytyra të reja, dy prej të cilëve vijnë direkt nga Kombëtarja U-19. Bëhet fjalë për Mattia Huqin dhe Gabriel Kullën, që marrin ftesën e parë në këtë grupmoshë. Gjithashtu, për herë të parë i bashkohen kuqezinjve edhe dy mbrojtësit Numan Ajetovikj, që aktivizohet me Egnatian, dhe Omer Bajraktari, pjesë e klubit të Malishevës, të cilët kanë vendosur të mbrojnë ngjyrat e Shqipërisë.

Përballja me Ukrainën hyn në kuadër të një serie ndeshjesh përgatitore që Kombëtarja U-21 po zhvillon në funksion të pjesëmarrjes në finalet e Europianit 2027, turne ku Shqipëria do të marrë pjesë automatikisht si një prej shteteve pritëse.

The post Katër emra të rinj në ekipin e Alban Bushit për testin me Ukrainën, bie në sy mbrojtësi i Egnatias dhe talenti që po shkëlqen te Sassuolo appeared first on Albeu.com.

Ervin Bashi është zyrtarisht futbollisti më i ri i Crotone. Qendërmbrojtësi 21-vjeçar mbylli periudhën te Catanzaro për të vijuar karrierën në Serie B të Italisë.

Kalimi te skuadra e re është realizuar në formën e huazimit, marrëveshje që do të jetë në fuqi deri në përfundim të sezonit 2026/2027. Pavarësisht transferimit të përkohshëm, Bashi do të mbetet nën kontratë me Catanzaro deri në vitin 2028.

Mbrojtësi është një prej lojtarëve të grumbulluar rregullisht nga Alban Bushi te Kombëtarja U21, ku konsiderohet “benjamini” i trajnerit. Në të kaluarën, Bashi ka qenë pjesë edhe e ekipit U18 të Milanit, të njohur si “Djalli”.

The post Ervin Bashi transferohet te Crotone, mbrojtësi i Kombëtares U21 me të kaluar te Milani appeared first on Albeu.com.

Shqipëria U-21 do të jetë pjesë e Lojërave Mesdhetare “Taranto 2026”, ndërsa trajneri Alban Bushi ka bërë publike listën e futbollistëve që do të përfaqësojnë kuqezinjtë në këtë aktivitet të rëndësishëm ndërkombëtar.

Pas përzgjedhjes së lojtarëve, tekniku i ekipit shpresa ka dhënë një intervistë për fshf.org, ku ka folur për objektivat, pritshmëritë dhe vlerën që ky turne ka për një brez të ri futbollistësh shqiptarë.

“Pjesëmarrja e Shqipërisë në Lojërat Mesdhetare na motivon shumë. Ky nuk është vetëm një turne, por një mundësi për të shfaqur karakterin, personalitetin dhe mentalitetin e futbollit shqiptar. Në grup kemi kundërshtarë shumë të fortë, si Italia, Kosova dhe Algjeria. I respektojmë të gjitha këto skuadra, por nuk do të shkojmë vetëm për të marrë pjesë; synimi ynë është të konkurrojmë denjësisht ndaj tyre”, u shpreh Bushi.

Trajneri theksoi se Shqipëria do të kërkojë kualifikimin, edhe pse pranon vështirësinë e detyrës. Ai sqaroi gjithashtu se lista përbëhet pothuajse tërësisht nga lojtarë të rinj, të datëlindjeve 2006, 2007 dhe 2008, të cilët sezonin e ardhshëm pritet të jenë pjesë e ekipit shpresa. Sipas Bushit, ky kompeticion do t’u japë atyre mundësinë të tregojnë vlerat dhe të përballen me futbollin europian. Megjithëse nuk janë në formën optimale, pasi kampionati i Kategorisë së Parë ende nuk ka nisur, ai beson se skuadra do të zhvillojë një paraqitje shumë të mirë.

“Objektivi ynë është kualifikimi. E dimë se do të jetë e vështirë, por futbolli nuk vendoset vetëm nga emrat apo historia. Organizimi, besimi dhe lufta për çdo top janë thelbësore. Për këta lojtarë ky është një rast shumë i mirë për të treguar nivelin e tyre dhe për t’u matur me futbollin europian”, deklaroi trajneri i Shqipërisë U-21.

Bushi u ndal edhe te ndeshja hapëse kundër Italisë dhe te koha e kufizuar që stafi teknik ka në dispozicion për përgatitjen e ekipit. Përballja do të luhet të shtunën në orën 21:00, ndërsa trajneri tha se çdo takim do të trajtohet si një finale.

“Koha për t’u përgatitur është shumë e shkurtër. Sot është e mërkurë dhe të shtunën, në orën 21:00, luajmë me Italinë. Si staf do të përpiqemi t’u përcjellim lojtarëve idetë dhe strategjitë tona për këtë përballje. Çdo ndeshje do të jetë si një finale. Duhet të paraqitemi me shumë dinjitet dhe kemi dëshirë të madhe ta fitojmë këtë turne”, tha Alban Bushi.

The post Taranto 2026”, Bushi: Respektojmë Italinë, Kosovën dhe Algjerinë, por objektivi ynë është kualifikimi appeared first on Albeu.com.

Shqipëria U-21 po përmbyll përgatitjet për një tjetër paraqitje të rëndësishme në arenën ndërkombëtare. Trajneri Alban Bushi ka prezantuar futbollistët e përzgjedhur për Lojërat Mesdhetare “Taranto 2026”, të cilat do të mbahen në Itali.

Grupi kuqezi përbëhet kryesisht nga lojtarë të klubeve të Abissnet Superiores dhe Kategorisë së Parë. Pjesë e listës janë gjithashtu talente që aktivizohen në akademi dhe skuadra të kampionateve europiane, mes të cilave në Holandë, Greqi dhe Itali.

Duke ndërthurur futbollistët që luajnë në Shqipëri me ata që po fitojnë përvojë jashtë vendit, stafi teknik synon të krijojë një grup me eksperiencë si nga futbolli vendas, ashtu edhe nga ai ndërkombëtar.

Për portën janë përzgjedhur Skander Tahri dhe Amarildo Dervishaj. Në repartin e mbrojtjes janë thirrur Arlind Leshi, Antonis Dama, Aurel Marku, Rajmond Marinaj, Kevi Mejdani, Renato Halili dhe Valentin Daja.

Mesfusha përbëhet nga Ersi Bode, Bjorni Duka, Oresti Kasmollari, Orgito Ruçi dhe Jordi Jaku. Në krahët e sulmit, Alban Bushi do të ketë si alternativa Hetem Lushaj, Kristi Bespallov, Emiljano Mihana dhe Nebi Qokthi.

Në Grupin B, Kombëtarja shqiptare do të masë forcat me Italinë, Kosovën dhe Algjerinë. Rrugëtimi i kuqezinjve nis më 22 gusht në Leçe, ku kundërshtari i parë do të jetë Italia, ndërsa më pas do të zhvillohen përballjet me Kosovën dhe Algjerinë.

Turneu përbën një mundësi të re që lojtarët e rinj shqiptarë të marrin përvojë në një kompeticion ndërkombëtar të nivelit të lartë. Njëkohësisht, pjesëmarrja në “Taranto 2026” shërben si një platformë e rëndësishme për zhvillimin e talenteve të Kombëtares U-21 dhe për përfaqësimin e Shqipërisë në një event të rëndësishëm multisportiv të rajonit të Mesdheut.

The post Alban Bushi shpall lojtarët e Shqipërisë U-21 për Lojërat Mesdhetare “Taranto 2026” në Itali appeared first on Albeu.com.

Bushi ka vazhduar më tej se Gruda i ka thënë, nëse nuk do luajë me përfaqësuesen kryesore të Gjermanisë, do të zgjedh kalimin te Shqipëria.

Aktualisht Brajan Gruda po luan Kampionatin Europain me Gjermaninë U-21.

“Brajan Gruda mund të luajë te Shqipëria me 100% në qoftë se nuk është pjesë e kombëtares së Gjermanisë A.

Në momentin që nuk është pjesë e saj, ai do të përfaqësojë Shqipërinë. Ky ka qenë bashkëbisedim, kontakt ose le të themi, ne kemi bërë takimet me familjen e tij. Ne do të donim shumë që të ishte pjesë e Shqipërisë.

Faktikisht është një lojtar me potencial shumë të madh dhe një lojtar që i mungon Shqipërisë, pra që futet gjithmonë nga brenda dhe futet me të majtën që nuk e kemi, dhe këta lojtarë si Gruda bëjnë diferencën në një ndeshje futbolli, fitojnë ndeshjen”, tha Bushi për “Klan News”.

The post E BUJSHME/ Alban Bushi zbulon prapaskenën me Grudën: Do të luajë me Shqipërinë, nëse… appeared first on Albeu.com.

Ramaj është 19 vjeç dhe luan me Atalantën U-20. Mbrojtësi është aktivizuar më parë te Shpresat. Pikërisht në ndeshjet e marsit mori minuta nga trajneri Bushi.

Talenti shqiptar numëron minuta me Italinë U-16, U-17, U-18 dhe U-19. Në anën tjetër ka luajtur edhe me Shqipërinë U-17.

Shqipëria U-21 do të përballet me Hungarinë fillimisht në transfertë, më 5 qershor ora 19:30. Më pas përballja tjetër do të jetë ndaj turqve në Turqi, më 8 qershor ora 19:00.

The post FIFA jep dritën jeshile për Shqipërinë, talenti i Atalantës largohet zyrtarisht nga përfaqësuesja e Italisë appeared first on Albeu.com.

Shpresat mbajnë aktualisht vendin e katërt në grupin E, me pikë të barabarta sa Finlanda. Në përfundim të ndeshjes foli për mikrofonin e SuperSport Alban Bushi.

Trajneri i grupmoshës 21-vjeçare nuk e fshehu zhgënjimin, ndërsa përmendi se do vazhdojnë të luftojnë për 3 ndeshjet e mbetura. Po ashtu ra në sy veçimi i mesfushorit Fetai, që e konsideroi numrin 6 shqiptar më të mirë të të gjitha kohërave.

Sa i zhgënjyer? – “Ne e dinim forcën e Zvicrës. Më i fortë se ne në letër dhe fushë. Ndëshkohemi për gabimet tona. E kam te golat, i japim vetë. Nuk duhet të bëjmë gabimet individuale, pastaj le të na rrahin si na rrahën”.

Objektivi për të qenë në vendet e para? – “Na vjen keq që rrihemi. E dim që kundërshtari më i mirë, kur i sheh në letër nivelet të mëdha. Ata ishin pushim, ne luajtëm para 3 ditëve. Ne objektiv kishim për të kap vend të dytë. Kemi dhe 9 pikë në lojë, mund të ndodhë gjithçka”.

“Ne sot kishim 4 lojtarë dhe për edicionin tjetër. Duhet ta falenderoj Fetain, më i miri i gjithë kohërave në numrin 6. Mund ta krahasoj me Altin Lalën. Zvicra shumë e fortë, jemi të zhgënjyer nga kjo humbje gjithsesi”.

Tifozët? – “Na kanë mbështetur, e di ça suporti të japin. Nuk mund të them që i zhgënjyem se çunat luftuan. Duhet harruar dhe parë ndeshje tjetër”.

The post “Kemi dhe 3 ndeshje për kualifikimin”, Alban Bushi vë në piedestal Fetain: Më i miri i të gjitha kohërave appeared first on Albeu.com.

Trajneri shqiptar e pranon se e ka kontaktuar 17 vjeçarin, por që nuk ka marrë ende përgjigje prej lojtarit në pronësi të Bayern Mynihut.

“Çdo lojtar shqiptar kudo që është, në çdo kampionat të Evropës ne e kontaktojmë. Nuk diskutohet fare që ka pasur kontakte Shqipëria. Për arsye të njëanshme të lojtarit, mund ta presë Gjermaninë ose diçka tjetër, për këtë arsye nuk është thërritur. Por, çdo lojtar shqiptar që është në kampionatet e Evropës që luan dhe ka nivel për ekipin kombëtar, është i kontaktuar 100 % nga ne”, u shpreh Bushi në konferencë për shtyp ditën e sotme. /albeu.com

The post Alban Bushi për Ibrahimoviçin nga Kosova: E kemi kontaktuar, ndoshta pret Gjermaninë appeared first on Albeu.com.

Por edhe Shpresat e Alban Bushit nuk kanë mundur dot të sigurojnë rezultat pozitiv në miqësoren që zhvilluan ndaj Kroacisë.

Kroatët fituan 3-1 ndaj djemve të Bushit dhe kjo është humbja e dytë në pak ditë me të njëjtin rezultat, pasi kuqezinjtë u mposhtën edhe nga Maqedonia e Veriut.

Ky turne i Shpresave ishte ideuar me kombëtaret e edicionit të ardhshëm pikërisht për të parë në veprim kandidatë potencialë për të veshur fanellën e kësaj përfaqësueseje dhe për momentin, bilanci i Shqipërisë me 2 gola të shënuar e 6 të pësuar, nuk jep shumë optimizëm.

The post Shpresat “ndjekin” Kombëtaren e madhe, djemtë e Bushit mposhten edhe nga Kroacia appeared first on Albeu.com.