Alain Taho është përfshirë në listën e lojtarëve të gatshëm për trajnerin Rolando Maran, për sfidën që Shqipëria do të zhvillojë sonte ndaj San Marinos në stadiumin “Air Albania”, në orën 20:45. Portieri u thirr pas mungesës së konfirmuar për arsye fizike të Alen Sherrit, ndërsa Etrit Berisha nuk mund të luajë për shkak të pezullimit të marrë pas kartonit të kuq ndaj Finlandës.

Vendimi i trajnerit italian për t’i besuar Tahos përbën një zgjedhje të guximshme, por njëkohësisht edhe një moment të veçantë për portierin e talentuar të Interit. Ai ka përjetuar një nga ditët më të rëndësishme të jetës së tij, duke marrë ftesën për t’iu bashkuar ekipit të parë të Kombëtares.

Lajmi ka tërhequr vëmendjen edhe në Itali. Media “FC Inter1908.it” ka shkruar për portierin shqiptar, i cili aktivizohet me ekipin U-23 të Interit.

Ftesë e papritur – Taho ishte pjesë e Shqipërisë U-21 në miqësoren ndaj Ukrainës, të luajtur në Hungari dhe të mbyllur me rezultatin 2-2. Për shkak të alternativave të kufizuara në portë, ku ishin në dispozicion Dajsinani dhe Simoni, Rolando Maran vendosi të thërriste edhe portierin e Interit.

Një mundësi për të bërë hapin e radhës – Përfshirja në skuadrën kuqezi për ndeshjen e Ligës së Kombeve kundër San Marinos i jep Tahos besim dhe një shtysë të rëndësishme për të avancuar në karrierën e tij. Kjo ftesë tregon gjithashtu se, në ciklin e drejtuar nga Maran, çdo lojtar është i mirëpritur dhe mund të gjejë vend në Kombëtare.

The post Mungesat e Sherrit dhe Berishës i hapin derën talentit të Interit në Kombëtare, mediat italiane vlerësojnë Tahon appeared first on Albeu.com.