Sipas Kedhit, qeveria duhet t’u përgjigjet qytetarëve se kush vendosi për transformimin e Portit të Durrësit, kush do të mbajë përgjegjësi nëse lindin kosto për shtetin nga arbitrazhet dhe kush do të garantojë interesat e qytetarëve që kanë investuar në apartamente në projekt.

“Kur vetë investitori pranon se projekti u bë me nxitim, dikush duhet t’u përgjigjet shqiptarëve: kush e mori vendimin, kush mban përgjegjësinë dhe kush do ta paguajë faturën? Kush përgjigjet për vendin që mbeti pa portin e vet kryesor? Kush paguan nëse nesër arbitrazhi na kushton qindra miliona euro nga taksat tona? Dhe kush u përgjigjet familjeve që dhanë kursimet për apartamente në letër”?- shprehet Kedhi.

Ai i bëri thirrje SPAK të nisë hetime për projektin, duke kërkuar transparencë të plotë mbi kontratën me grupin Alabbar, përfshirë klauzolat e arbitrazhit, afatet dhe detyrimet e shtetit shqiptar.

“Ne i bëjmë thirrje edhe një herë SPAK që të nisë hetimet menjëherë për aferën më të madhe të ndodhur në këto vite, dhe t’u përgjigjet thirrjeve të qytetarëve shqiptarë për të vepruar kundër korrupsionit dhe shitjes së interesave kombëtare. Nuk mund të ketë heshtje, kur një aset strategjik kombëtar jepet pa garë, kur vendi mbetet pa port dhe kur qytetarët do përballen me faturën e kripur të vendimeve antikombëtare të qeverisë. Kjo çështje duhet të hetohet deri në fund dhe përgjegjësit duhet të japin llogari”, deklaroi nënkryetari i PD.

Deklarata:

‘Gabova në Shqipëri. Ndërtova shumë shpejt.’ Këto fjalë nuk i tha opozita. I tha vetë Mohamed Alabbar, investitori të cilit Edi Rama i dorëzoi Portin e Durrësit.

Kur vetë investitori pranon se projekti u bë me nxitim, dikush duhet t’u përgjigjet shqiptarëve: kush e mori vendimin, kush mban përgjegjësinë dhe kush do ta paguajë faturën? Kush përgjigjet për vendin që mbeti pa portin e vet kryesor? Kush paguan nëse nesër arbitrazhi na kushton qindra miliona euro nga taksat tona? Dhe kush u përgjigjet familjeve që dhanë kursimet për apartamente në letër?

Në vitin 2021, Porti i Durrësit, pika kryesore e tregtisë së jashtme të Shqipërisë dhe një aset strategjik për një vend anëtar të NATO-s, priste investime për modernizimin e tij. Në vend të modernizimit, Edi Rama vendosi që porti t’i hapte rrugë një projekti privat prej miliarda euro.

Pa tender. Pa garë. Pa dëgjesë publike.

Një nga asetet më strategjike të Shqipërisë u trajtua si pronë private e kryeministrit. Sot, disa vite më vonë, vetë investitori pranon se ka gabuar.

U propagandua me të madhe se dhe Monako do na kishte zili, dhjetëra mijëra vende pune do hapeshin e miliarda euro investime do vinin. Ndërkohë, situata sot është dramatike. Godinat e para janë duke u fundosur, sipas vetë institucioneve shqiptare, ndërsa modeli financiar i projektit tregon se një pjesë e rëndësishme e ndërtimit mbështetet te paratë e blerësve që kanë paguar apartamente në ajër.

I gjithë risku, dhe i gjithë dëmi është lënë në supet e qytetarëve shqiptarë.

Dhe mbi të gjitha, Shqipëria është në një situatë absurde: porti ekzistues i paralizuar, ndërsa alternativa që do duhet ta zëvendësonte nuk ekziston. Porto Romano është një tjetër aferë e rëndë që prek paratë e shqiptarëve, por dhe sigurinë e tyre kombëtare.

Kjo nuk është vetëm çështje mashtrimi financiar. Është një emergjencë ekonomike, strategjike dhe kombëtare.

Partia Demokratike ka kërkuar vazhdimisht transparencë, hetim dhe publikimin e plotë të kontratës me grupin Alabbar, përfshirë klauzolat e arbitrazhit, afatet dhe të gjithë detyrimet e shtetit shqiptar.

Ne i bëjmë thirrje edhe një herë SPAK që të nisë hetimet menjëherë për aferën më të madhe të ndodhur në këto vite, dhe t’u përgjigjet thirrjeve të qytetarëve shqiptarë për të vepruar kundër korrupsionit dhe shitjes së interesave kombëtare.

Nuk mund të ketë heshtje, kur një aset strategjik kombëtar jepet pa garë, kur vendi mbetet pa port dhe kur qytetarët do përballen me faturën e kripur të vendimeve antikombëtare të qeverisë. Kjo çështje duhet të hetohet deri në fund dhe përgjegjësit duhet të japin llogari.

Sot përballë çdo shqiptari janë dy vizione shumë të qarta për vendin tonë. Nga njëra anë betoni, klientelizmi, vjedhjet, shpopullimi, dhe trajtimi i Shqipërisë si pronë private. Dhe nga ana tjetër vizioni ynë, bindja jonë për Shqipërinë Prodhuese, të punës, inovacionit, meritokracisë. Ne kemi një alternativë diametralisht të kundërt me të Ramës për Durrësin, Vlorën dhe të gjithë ekonominë shqiptare.

Për ne, porti nuk është truall për kulla. Porti është porta hyrëse e një korridori ekonomik. Është porta e Ballkanit drejt Europës.

Vizioni ynë është Interporti: porte moderne të lidhura drejtpërdrejt me hekurudhë dhe rrugë me Tiranën, Kosovën, Maqedoninë e Veriut dhe Korridorin VIII; me terminale kontejnerësh, zona industriale dhe logjistike, dogana të digjitalizuara dhe lidhje të drejtpërdrejta me tregjet europiane.

Kjo sjell vende pune në Durrës, Vlorë, Fier, Elbasan dhe më tej. Punë në logjistikë, transport, teknologji, përpunim dhe industri. Kjo bën që fermeri shqiptar të çojë prodhimin më shpejt dhe më lirë në Europë. Kjo bën që sipërmarrësi shqiptar mos të mbytet nga kostot e transportit dhe burokracisë.

Prodhimi shqiptar nuk do të ngecë në magazina, por do dalë në tregjet europiane. Kjo është Shqipëria Prodhuese.

Aty ku kalojnë mallrat, hapen fabrikat. Aty ku hapen fabrika, krijohen vende pune. Dhe aty ku ka punë, konkurrencë, dhe perspektivë, njerëzit qëndrojnë. Ky është ndryshimi mes dy modeleve.

Ata shohin beton. Ne shohim punë, prodhim, eksport dhe sovranitet ekonomik.

Ata shohin klientë. Ne shohim qytetarë, familje, fermerë dhe sipërmarrës.

Ata e panë Portin e Durrësit si truall për kulla. Për ne porti është ekonomia e një kombi.

Porti i Durrësit nuk i përket asnjë kryeministri dhe asnjë investitori. U përket shqiptarëve. Dhe ne të gjithë së bashku do ua kthejmë atyre.

The post Alabbar pranoi se gaboi me Portin e Durrësit/ Nënkryetari i PD: Shqiptarët rrezikojnë faturën e projektit korruptiv të Ramës! SPAK të hetojë këtë aferë appeared first on Albeu.com.

“Ne do të jemi të gatshëm të publikojmë garën ndërkombëtare për të gjitha kompanitë në fund të janarit ndërkohë që procesi do të mbyllet në korrik 2023”, tha zëvendës kryeministrja Belinda Balluku, gjatë prezantimit të projektit në dhjetor të vitit të kaluar.

Pak ditë para prezantimit të projektit, drejtori i Autoritetit Portual, Pirro Vengu, u shfaq në emisionin “Pa Censurë” të gazetares Elona Meço ku sqaroi skemën e financimit se si do të përballohej ndërtimi i portit të ri tregtar në Porto Romano.

“Mund t’ju jap një vlerë paraprake që fillon nga 320-440 milionë euro për fazën e parë. Është kosto që do të përballohet nga të ardhurat që gjenerohen përmes këtij projekti dhe Autoritetit Portual, jo buxhetit të shtetit,” tha kreu i APD.

Janari iku. Tenderi i zëvendëskryeministres për ndërtimin e portit të ri që do të hapej në janar përfundoi në kosh. Tani Pirro Vengu, i cili gjashtë muaj më parë deklaronte se ndërtimin e portit do ta financojë APD, po kërkon të fusë buxhetin e shtetit në aventura të rrezikshme.

Oligarkia.al ka mësuar se Autoriteti Portual i Durrësit i ka kërkuar Ministrisë së Financave të lëshojë garanci sovrane mbi 200 milionë euro për të financuar ndërtimin e portit të ri në Porto Romano. Kjo kërkesë do të implikojë buxhetin e shtetit drejtëpërdrejtë në aferën e Portit të Durrësit.

Garancia sovrane është një instrument përmes të cilit qeveria garanton kreditë e ndërmarrjeve publike. Në rast mospagimit të kredisë nga ndërmarrja, në rastin konkret Autoritetit Portual, garancia shndërrohet automatikisht në borxh publik, pasi detyrimi për të paguar kredinë i kalon qeverisë.

S’ka para dhe s’ka port të ri

Preventivi fillestar i paraqitur nga qeveria parashikon se ndërtimi i portit të ri në Porto Romano do të kërkojë vetëm në fazën e parë 390 milionë euro pa TVSH. Plani është që ky projekt të financohet përmes një skeme të përzierë koncesionare, ku 46% e financimit do të sigurohet nga qeveria dhe 54% nga kompania që do të shpallej fituese.”

E përkthyer në shifra kjo do të thotë se buxheti do të financojë 180 milionë euro ndërsa kompania koncesionare 210 milionë eurot e tjera. Tani Autoriteti Portual po i kërkon qeverisë që të financojë 180 milionë eurot drejtëpërdrejtë nga buxheti dhe të lëshojë garanci sovrane që privati të marrë kredi 210 milionë euro në banka. Sepse asnjë kompani private nuk pranon të marrë përsipër ndërtimin e portit pa garanci nga buxheti. Me pak fjalë, i gjithë risku i financimit kalohet tek paratë e taksapaguesve. Por para nuk ka.

Buxheti i shtetit nuk ka hapësirë për të lëshuar garanci sovrane për shkak se ligji organik e detyron qeverinë që nga viti në vit borxhi publik ndaj Prodhimit Kombëtar të ulet. Ndryshe nga sa zotohej Pirro Vengu para 6 muajsh, Autoriteti Portual nuk ka fuqi financiare për ta ndërtuar portin vet. Ndaj projekti i portit të ri tregtar në Porto Romano ka hyrë në kalendat greke.

Aventura e rrezikshme që po lë Durrësin pa port

Pak ditë më parë, Këshilli Kombëtar i Territorit miratoi lejen e zhvillimit për projektin Portit Turistik që do të do ndërtojë kompania arabe Eagle Hills në vendin ku sot është Porti tregtar i Durrësit.

Por teksa Alabbar avancon me projektin e tij, së shpejti do t’i vijë radha çmontimit të portit tregtar të Durrësit. Ndërkohë që ndërtimi i portit të ri në Porto Romano tashmë duket një mision i pamundur. Të paktën në afatshkurtër.

Kjo është aventura që po e lë Durrësin, qytetin që të gjithë historinë e tij e mijëra vjeçare e ka të lidhur me portin, pa port. Dhe aktivitetit portuale do të zhvendosen pjesërisht tek porti privat i Kastratit në Porto Romano, i cili është projektuar për port nafte dhe nuk ka kapacitet të përballojë fluksin tregtar që hyn përmes Portit të Durrësit. Një aventurë me pasoja të tmerrshme për ekonominë.  /Oligarkia.al

The post “Ngec” Porti i ri i Durrësit, ndërkohë që ka filluar shitja e apartamenteve te i vjetri appeared first on Albeu.com.