Bersant Celina ka një skuadër të re. Mesfushori ofensiv i Kosovës është transferuar zyrtarisht te Al-Ettifaq, klub që garon në Arabinë Saudite.

Al-Ettifaq njoftoi afrimin e 29-vjeçarit përmes kanaleve të veta zyrtare, vetëm pak javë pas përfundimit të bashkëpunimit të tij me AIK.

Celina u bashkua me ekipin suedez në verën e vitit 2023, fillimisht si lojtar i huazuar. Gjatë periudhës së tij te AIK, ai luajti 77 ndeshje në kampionat, shënoi 11 gola dhe regjistroi 14 asistime. Në fillim të muajit korrik, dy palët i dhanë fund marrëveshjes.

Kalimi në futbollin saudit përfaqëson një etapë të re për mesfushorin kosovar, i cili ka pasur një karrierë të pasur në arenën evropiane.

Futbollisti është formuar në akademinë e Manchester Cityt dhe më pas ka veshur fanellat e Twente, Ipswich Town, Swansea City, Dijon, Kasımpaşa dhe AIK.

Në nivel përfaqësues, Celina numëron 38 ndeshje me Kombëtaren e Kosovës dhe ka shënuar dy gola. Për vite me radhë, ai ka qenë një prej futbollistëve kryesorë të “Dardanëve”.

Al-Ettifaq e mbylli sezonin e kaluar në vendin e shtatë të elitës së futbollit saudit, ndërsa me transferimin e Celinës synon ta fuqizojë repartin ofensiv me përvojën dhe cilësitë e tij.

The post Zyrtare: Bersant Celina bëhet pjesë e Al-Ettifaq në Arabinë Saudite appeared first on Albeu.com.