Mbrojtja e Xhelal Sveçlës ka hequr dorë nga marrja në pyetje e tij në gjykimin për rastin e gazit lotsjellës, ndërsa deklarimet e të pandehurit do t’i paraqesë gjatë fjalës përfundimtare.

Avokati Luar Prenaj, pas propozimit të mbrojtjes, ka paraqitur fjalën përfundimtare. Ai ka deklaruar se, pas konsultimit me Sveçlën, mbrojtja nuk do ta shfrytëzojë të drejtën për deklarimin dhe marrjen në pyetje të tij, duke sqaruar se qëndrimet e të pandehurit do të përfshihen në fjalën përfundimtare.

Pas mbylljes së shqyrtimit gjyqësor dhe administrimit të provave, prokurori Avni Namani ka njoftuar se Prokuroria ka bërë ndryshime në dispozitivin e aktakuzës ndaj Sveçlës.

Në versionin e ndryshuar të aktakuzës thuhet se Xhelal Sveçla, më 21 mars 2018, nga ora 12:10 deri në 15:40, në sallën e seancave plenare të Kuvendit të Republikës së Kosovës, gjatë një seance të jashtëzakonshme plenare, dyshohet se ka përdorur një bombolë gazi lotsjellës me përmbajtje të agjentit kimik CS.

Sipas pretendimit të Prokurorisë, bombola është aktivizuar nga Sveçla në disa raste dhe më pas është hedhur brenda sallës së Kuvendit, pa paralajmërim dhe pa u krijuar personave të pranishëm mundësia për t’u larguar.

Aktakuza e lidh përhapjen e gazit irritues me hapësirat e mbyllura të sallës, ku personat e pranishëm, të frikësuar për shëndetin dhe sigurinë e tyre, janë detyruar ta braktisin atë. Për pasojë, seanca është ndërprerë.

Prokurori Namani ka bërë të ditur se Sveçla akuzohet për veprën penale “Përdorimi i armës apo mjetit të rrezikshëm”, të paraparë në nenin 375, paragrafi 2 të Kodit Penal të vitit 2012.

Ndërkaq, Prokuroria ka hequr dorë nga ndjekja penale për veprën “Pengimi i personit zyrtar në kryerjen e detyrave zyrtare”, pasi për këtë vepër ka arritur parashkrimi.

Ndryshimet nuk kanë prekur pjesën tjetër të aktakuzës, e cila ka mbetur e njëjtë.

Pas këtij ndryshimi, procesi gjyqësor ka vijuar me paraqitjen e fjalëve përfundimtare të palëve.

Përveç Sveçlës, në këtë rast akuzohen edhe ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli-Dalipi, ish-deputeti i Vetëvendosjes, Salih Zyba, si dhe ish-deputetja e Lidhjes Demokratike të Kosovës (LDK), Drita Millaku.

Megjithatë, ministri në detyrë i Punëve të Brendshme, Xhelal Sveçla, nuk ishte i pranishëm në seancën e 16 janarit 2026. Ai njoftoi përmes e-mailit se ndodhej jashtë vendit, ndaj Gjykata vendosi që procedura penale ndaj tij të veçohej.

Në seancën e 10 prillit 2026, Sveçla është deklaruar i pafajshëm lidhur me veprën penale për të cilën akuzohet.

Aktakuza ndaj Sveçlës, Millakut, Zybës dhe Pacolli-Dalipit është konfirmuar nga Gjykata Themelore në Prishtinë më 6 qershor 2024. Të katër dyshoheshin për hedhjen e gazit lotsjellës në Kuvend gjatë marsit të vitit 2018. Më vonë, vendimi i Themelores është vërtetuar edhe nga Gjykata e Apelit.

Në seancën fillestare, të zhvilluar më 26 mars 2024, të gjithë të akuzuarit ishin deklaruar të pafajshëm për hedhjen e gazit lotsjellës në Kuvend.

Sveçla, Millaku, Zyba dhe Pacolli-Dalipi ishin ngarkuar edhe me veprën “Pengim i personit zyrtar në kryerjen e detyrave zyrtare”. Për këtë vepër, gjykatësi i rastit, Sabit Sadikaj, kishte njoftuar në seancën fillestare se kishte përfunduar afati i parashkrimit absolut të ndjekjes penale.

Sipas aktakuzës së siguruar nga “Betimi për Drejtësi”, e ngritur më 29 korrik 2019, të akuzuarit dyshohet se më 21 mars 2018, nga rreth ora 12:10 deri në orën 15:40, kanë ndezur disa bombola gazi lotsjellës dhe i kanë hedhur ato brenda sallës së Kuvendit të Kosovës, ku po zhvillohej seanca plenare.

Në aktakuzë thuhet se për shkak të këtij veprimi, të gjithë deputetët janë detyruar ta lëshojnë sallën e Kuvendit, duke e bërë të pamundur vazhdimin e seancës.

Për këtë veprim, secili prej tyre akuzohet veçmas për veprën penale “Përdorimi i armës apo mjetit të rrezikshëm”, sipas nenit 375, paragrafi 1 të Kodit Penal. Për këtë vepër parashihet dënim me burgim prej një deri në tetë vjet.

Ndërsa në dispozitivin e dytë të aktakuzës thuhet se të akuzuarit, secili veçmas, kanë kryer veprën “Pengimi i personit zyrtar në kryerjen e detyrave zyrtare”, nga neni 409, paragrafi 1 i Kodit Penal, pasi kanë penguar deputetët e Kuvendit të Kosovës në ushtrimin e detyrave zyrtare. Për këtë vepër parashihet burgim nga tre muaj deri në tre vjet.

The post Parashkruhet një nga veprat penale, ndryshohet aktakuza ndaj Xhelal Sveçlës appeared first on Albeu.com.

Ka qenë Shoqata për Ruajtjen dhe Mbrojtjen e Mjedisit Natyror në Shqipëri (P.P.N.E.A) që ka njoftuar policinë për një shpend të rrallë të mbrojtur me ligj, që mbahej nga aktori 37-vjeçar, i cili me shpendin postonte dhe video në rrjetet sociale.

Dritan Brahimi është proceduar në gjendje të lirë për vepren penale “Dëmtimi i specieve të mbrojtura të florës dhe faunës së egër”.

Gjatë kontrollit në banesën e këtij shtetasi u gjet shpendi, i cili aktualisht po trajtohet nga specialistët e menaxhimit veterinar të bashkisë Shkodër.

Njoftimi i policisë së Shkodrës:

Mbante në banesën e tij, në kushte të papërshtatshme, një shpend hutë (Buteo buteo), procedohet penalisht 37-vjeçari.

Komisariati i Policisë Shkodër, menjëherë pas marrjes së njoftimit nga Shoqata për Ruajtjen dhe Mbrojtjen e Mjedisit Natyror në Shqipëri (P.P.N.E.A), për një shpend të rrallë të mbrojtur me ligj, që mbahej nga një shtetas, bazuar dhe në disa video të publikuara në rrjetet sociale, kanë kryer veprimet hetimore për rastin. Në vijim të veprimeve procedurale, u referuan materialet në Prokurori ku nisi procedimi në gjendje të lirë për shtetasin D. B., 37 vjeç, banues në Shkodër, për vepren penale “Dëmtimi i specieve të mbrojtura të florës dhe faunës së egër”.

Gjatë kontrollit në banesën e këtij shtetasi u gjet shpendi, i cili aktualisht po trajtohet nga specialistët e menaxhimit veterinar të bashkisë Shkodër.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër.

The post Mbante një shpend të rrallë në kushte të papërshtatshme, procedohet ish-banori i Big Brother VIP appeared first on Albeu.com.

Bëhet fjalë për Vladimir Kola, i cili akuzohet se në bashkëpunim me perona të tjerë është i përfshirë në vrasjen e Briken Sanajt.

Ai u arrestua në qytetin Gelsenkirchen, Gjermani.

Ai ishte shpallur në kërkim ndërkombëtar nga Interpol Tirana, pasi Gjykata e Tiranës në nëntor të 2023 i ka caktuar masën e sigurisë “Arrest në burg”, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.

Më 30 tetor të 2022, në zonën “Kodra e Diellit”, 41-vjeçari, në bashkëpunim me shtetas të tjerë, dyshohet se ka vrarë me armë zjarri shtetasin Briken Senajn. Aktualisht vijon puna për ekstradimin e 41-vjeçarit në Shqipëri.

The post Akuzohet për vrasjen e Briken Sanajt te “Kodra e Diellit”, arrestohet në Gjermani autori i dyshuar appeared first on Albeu.com.

Komisioni Evropian po heton nëse Apple ka bllokuar transmetuesit e muzikës që u tregojnë përdoruesve mënyra më të lira për abonime jashtë aplikacionit AppStore.

Brukseli po planifikon të vendosë një gjobë prej 500 milionë eurosh, e cila do të përfaqësonte një vendim historik kundër Apple pas vitesh ankesa nga kompanitë, shërbimet e të cilave ofrohen përmes aplikacioneve të iPhone, shkruan the Guardian.

Kompania suedeze e transmetimit, Spotify, ka paraqitur një ankesë gjatë vitit 2019 në BE, me pretendimin se Apple kufizon zgjedhjen në AppStore duke ngarkuar një tarifë prej 30 për qind për instalimin e aplikacioneve. Gjithashtu, thuhet që Apple të ketë penguar Spotify të informojë klientët për marrëveshje më të mira dhe më të lira.

Por, sipas kompanisë, tarifa e saj justifikohet pasi shpenzon shumë para për funksionalizimin e AppStore, dhe i ofron Spotify qasje të qindra miliona klientëve.

Prandaj, Komisioni Evropian po heton për të kuptuar nëse veprimet e Apple janë të paligjshme dhe kundër rregullave të bllokut që zbatojnë konkurrencën.

Gjiganti teknologjik nuk është përballur kurrë me një gjobë nga Komisioni Evropian, megjithëse mori një gjobë prej 1.1 miliardë eurosh nga Franca në vitin 2020.

Megjithatë, ajo dhe kompanitë e tjera teknologjike janë nën vëzhgim për shqetësimet e konkurrencës në treg.

Ndryshe, Google po apelon kundër gjobave prej më shumë se 8 miliardë euro të vendosura nga BE-ja.

The post Apple thuhet se po përballet me një gjobë prej 500 milionë eurosh nga BE-ja për kufizimet e qasjeve në transmetimin e muzikës appeared first on Albeu.com.

Burime bëjnë me dije se tashmë Prokuroria e Elbasanit, ka ngritur akuzë për Indrit Shaqjan, i cili ditën e vrasjes mbeti i plagosur në këmbë.

Pritet që Prokuroria t’i drejtohet gjykatës me kërkesën e masës së sigurisë ‘arrest në burg’ për Indrit Shaqjan, pasi ka dyshime se ka bashkëpunuar për vrasjen e shokut të dhomës Arben

Lleshi, teksa po verifikohen rrethanat e implikimit të tij.

Në dosjen e ngjarjes, thuhet se Shaqja lajmëroi Lleshin se po e kërkonin tek dritarja e qelisë kur Mjacaj qëlloi ndaj tij me armë.

Ndërkohë, policët e burgut kanë dëshmuar se Shaqja e ka ndjekur  Mjacajn, deri në korridor pas vrasjes duke i thënë pse më vrave shokun.

The post Ngjarja e rëndë në burgun e Peqinit, Prokuroria ngre akuzë edhe për Indrit Shaqjan, për ҫfarë dyshohet appeared first on Albeu.com.

Ai kërkon që në nenin 120 të Kodit Penal, të shtohen edhe deputetët.

Gjithashtu, Basha propozon që nëse një ligjvënës bën një deklaratë ndaj një deputeti, ky i fundit ka të drejtë të bëjë kallëzim në prokurori dhe nëse instancat e drejtësisë vërtetojnë që deklarata është shpifje, deputeti rrezikon nga gjobë deri në 2 vite burg.

“Kur, kjo vepër, kryhet nga të zgjedhurit, gjatë kohës së ushtrimit të mandatit, në seancat parlamentare të Kuvendit, apo në çdo forme tjetër, përben kundërvajtje penale dhe dënohet me gjobë ose burgim deri në dy vjet”, thuhet në projektligjin e propozuar nga Basha.

y propozim i Lulzim Bashës vjen pas akuzave që Gazment Bardhi bëri ndaj tij, duke i thënë se ka pwrfitur dy kate në rezidencën ‘Lion’ të Tiranës.

Kjo përplasje e ashpër e dy ish-bashkëpunëtorëve të ngushtë ndodhi më 5 tetor në Kuvend, ndërsa Basha e akuzoi Bardhin se është bërë pjesë e aleancës së kullave Berisha-Rama.

The post Bardhi e akuzoi se ka përfituar dy kate te “Lion Residence”, Basha: Deputetët që shpifin të dënohen deri në 2 vite burg appeared first on Albeu.com.

27-vjeçari akuzohet se ka sulmuar tre gra në shtëpinë e tij në ‘Cheshire’ mes tetorit 2020 dhe gushtit 2021.

Louis Saha Matturie, 40 vjeç, nga Salford, gjithashtu u paraqit në Chester Crown Court i akuzuar për katër akuza për përdhunim.

Asnjërit prej burrave nuk iu kërkua të paraqiste një deklaratë dhe të dy u caktuan në paraburgim.

Ata do të dalin në gjykatë më 15 nëntor dhe një datë gjykimi është caktuar për 24 janar.

Avokati i mbrojësit, Eleanor Laws QC, duke mbrojtur Mendy, tha se do të kishte një kërkesë për të hedhur poshtë akuzat në seancën e nëntorit.

Sulmet e dyshuara, ndaj tre grave të ndryshme duke përfshirë një nën 18 vjeç, thuhet se kanë ndodhur në adresën e shtëpisë së tij në Prestbury.

Mendy foli vetëm për të konfirmuar emrin e tij gjatë seancës 45-minutëshe dhe i bëri me sy një burri në galerinë publike teksa u çua përsëri në qeli.

Ai u refuzua me kusht muajin e kaluar dhe aktualisht është në paraburgim në ‘HMP Altcourse’ në Liverpool.

Lojtari francez ka luajtur për kampionët e sezonit të kaluar në Premier Ligë, Manchester City që nga viti 2017, kur u bashkua nga Monaco për 52 milion funte. Ai u pezullua nga klubi pasi u akuzua nga policia, deri në pritje të një hetimi përfundimtar. 

The post Lajme të këqija për Mendy, ylli i City-t mbetet pas hekurave të paktën deri në fund të janarit appeared first on Albeu.com.

Menjëherë pas marrjes së këtij vendimi, avokatët e SPAK kanë kërkuar që Toro të pezullohet si anëtar i KLGJ-së deri në fund të hetimeve për të.

Toro, sipas avokatëve Anti-Korrupsion, akuzohet për ‘falsifikim dokumentesh’ dhe ‘deklarim të pavërtetë’.

Pak kohë më parë, Gjykata e Posacme urdhëroi SPAK të regjistrojë procedim penal për anëtarin e Këshillit të Lartë Gjyqësor, Alban Toro.

Vendimi u mor nga gjyqtarja Ilirjana Olldashi, pas shqyrtimit të ankimit të bërë nga shoqata e avokatëve Antikorrupsion.

Sipas shoqatës që bëri kallëzimin, Toro ka gënjyer Kuvendin për punën e tij si avokat dhe u zgjodh në KLGJ në kundërshtim me ligjin.

Sipas ligjit, anëtari i KLGJ duhet të ketë 10 vite pune avokat pa ndërprerje.

Duke iu referuar të dhënave të qendrës kombëtare të biznesit rezulton se Alban Toro nga data 02 Mars 2010 deri në datën 20 shtator 2011 e ka pezulluar ushtrimin e aktivitetit si avokat për afro 1 vit e gjysmë, por kjo nuk është pasqyruar në dokumente.

The post Akuzohet për falsifikim dokumentash dhe deklarim të rremë, kërkohet pezullim nga detyra i anëtarit të KLGJ-së appeared first on Albeu.com.

Ndriçim Harka, punonjës i shërbimit zjarrfikës të Bashkisë, është arrestuar tashmë nga policia, teksa kunati i tij Edmond Merkja është shpallur në kërkim.Lidhur me këtë operacion, ka reaguar edhe deputeti i PD, Gazment Bardhi i cili thotë se punonjësi i ndaluar, rezulton të jetë në listat e patronazhiostëve.

Sipas Bardhit, ky është kriminalizimi i politikës dhe shton se ky person ka blerë votat për PS-në gjatë zgjedhjeve të 25 Prillit. Bashkangjitur me postimin e tij, ai ka publikuar edhe një listë me emra, me patronazhistë, mes të cilëve, sipas Bardhit, çshtë edhe punonjësi i zjarrfikëses i arrestuar ditën e sotme.

Gazment Bardhi:

Ndalohen dy trafikantë droge dhe përgjimet tregojnë se kanë qenë të angazhuar në blerje votash për regjimin Rama-Doshi. Arrestohet për trafik droge një punonjës i zjarrëfikëses në Tiranë dhe rezulton të jetë patronazhist i PS-së . Ky është kriminalizimi i politikës, kjo është masakra zgjedhore e 25 prillit, kështu u pengua ndryshimi që njerëzit donin, me trafikantë droge e paratë e pista të drogës. Zhbërja e kësaj padrejtësie është dhe do të mbetet misioni ynë. Ne nuk do të ndalemi në betejën tone kundër kësaj pakice që përdor çdo mjet për të tjetërsuar vullnetin e lirë të shqiptarëve. Me shumicën e qytetarëve ne do të kthejmë legjitimitetin dhe demokracinë në vend.

The post Zjarrfikësi rezulton patronazhist, PD bën akuzën e fortë pas arrestimit të kreut të bandës së kokainës appeared first on Albeu.com.

Sipas Kreut të Shtetit, persona të shpallur në kërkim ndërkombëtar janë pajisur me pasaporta dhe dokumente identifikimi, duke përdorur të dhënat e personave që nuk kanë probleme me ligjin.

“Nga të dhënat e siguruara rezulton se në qarkun e Korçës, në disa bashki të banuara kryesisht nga minoritarë, shtetas me rekorde kriminale, të shpallur në kërkim ndërkombëtar, janë pajisur me pasaporta dhe dokumente identifikimi, duke përdorur të dhënat e personave që nuk kanë probleme me ligjin.

Pra, shtetas të huaj apo dhe shqiptarë janë pajisur me dokumente të lëshuara nga gjendja civile shqiptare, duke vjedhur identitetin e shtetasve maqedonas. Këta shtetas kanë marrë dokumente edhe në Maqedoninë e Veriut.
Nga ajo që është bërë publike, autoritetet e Maqedonisë së Veriut janë shprehur se kanë zbatuar ligjin, duke mos mbajtur përgjegjësi”, tha Meta.

The post Meta bën denoncimin e fortë: Po vidhet identiteti i qytetarëve nga persona me rekorde kriminale appeared first on Albeu.com.