Prokuroria Speciale e Republikës së Kosovës ka ngritur aktakuzë ndaj një personi, i dyshuar për kryerjen e veprës penale “Kontrabandim me migrantë”.

Aktakuza është paraqitur në Gjykatën Themelore në Prishtinë kundër të pandehurit me inicialet N.L., bëri të ditur Prokuroria Speciale, transmeton “Bota sot”.

Sipas dyshimeve të ngritura, ai ka vepruar së bashku me persona të tjerë duke siguruar individë brenda dhe jashtë territorit të Kosovës, të cilët synonin të migronin drejt shteteve të ndryshme evropiane.

Çështja pritet të shqyrtohet nga organet e drejtësisë. Deri në dhënien e një vendimi të formës së prerë, i pandehuri prezumohet i pafajshëm.

The post N.L akuzohet për kontrabandim të migrantëve appeared first on Albeu.com.

Dy persona janë vënë nën akuzë nga Prokuroria Themelore në Prishtinë, me dyshimin se kanë kryer veprën penale “Përvetësimi në detyrë”.

Departamenti i Krimeve të Rënda, përkatësisht Njësiti për Hetimin e Krimeve Ekonomike dhe Korrupsion, e ka ngritur aktakuzën ndaj të pandehurve R.N. dhe H.D., bën të ditur Prokuroria, transmeton “Bota sot”.

Aktakuza përshkruan se R.N. ka punuar si rojtar në Agjencinë e Pyjeve të Kosovës, në Njësinë Pyjore Blinaj në Lipjan, gjatë periudhës 2022–2026.

Sipas dyshimeve të prokurorisë, pas pensionimit, ai nuk e ktheu armën zyrtare të gjahut të modelit “Over/Under”, e cila ishte pronë e Agjencisë së Pyjeve të Kosovës.

Ndërsa i pandehuri H.D., i cili përmendet në aktakuzë si rojtar në po të njëjtën njësi gjatë viteve 2019–2026, dyshohet se pas shkarkimit nga puna nuk e dorëzoi armën zyrtare të gjahut të modelit “Pump Action Shotgun”.

Prokuroria vlerëson se përmes këtyre veprimeve Agjencisë së Pyjeve të Kosovës i është shkaktuar një dëm material i konsiderueshëm.

Prokurori i çështjes i ka kërkuar gjykatës që, pas zhvillimit të shqyrtimit gjyqësor dhe administrimit e vlerësimit të provave, të dy të pandehurit të shpallen fajtorë dhe të dënohen në përputhje me ligjin.

Deri në një vendim të formës së prerë, personat e dyshuar gëzojnë prezumimin e pafajësisë.

The post Dy ish-rojtarë të Agjencisë së Pyjeve akuzohen se nuk i kthyen armët e shërbimit appeared first on Albeu.com.

Prokuroria Speciale e Republikës së Kosovës ka depozituar në Gjykatën Themelore në Prishtinë aktakuzë ndaj gjashtë të pandehurve.

B.D., A.D., L.D., G.D. dhe E.D. akuzohen për “Pjesëmarrja ose organizimi i grupit kriminal të organizuar”, në lidhje me veprat penale “Mashtrimi” dhe “Hyrja e paautorizuar në sistemet kompjuterike”.

Ndërkohë, B.C. akuzohet veçmas për veprën penale “Mashtrimi”.

Aktakuza pretendon se gjatë periudhës 2022–2024, B.D., A.D., L.D., G.D. dhe E.D. kanë qenë pjesë e një grupi të organizuar kriminal me veprimtari ndërkombëtare. Sipas Prokurorisë, veprimet kriminale janë kryer nga territori i Republikës së Kosovës ndaj shtetasve të Republikës Federale të Gjermanisë.

The post Prokuroria Speciale akuzon gjashtë persona për mashtrim dhe krime kibernetike appeared first on Albeu.com.

Departamenti për Krime të Rënda i Prokurorisë Themelore në Pejë ka ngritur aktakuzë kundër R.K. dhe një personi juridik. Ata dyshohen për veprat penale “Keqpërdorimi dhe mashtrimi në prokurim publik” dhe “Falsifikimi i dokumentit”.

Në aktakuzë thuhet se R.K., si pronar dhe përfaqësues i autorizuar i një operatori ekonomik, kishte marrë pjesë në procedurën e prokurimit publik të zhvilluar nga Spitali i Përgjithshëm në Pejë për furnizim me libra të protokollit.

Gjatë kësaj procedure, ai dyshohet se ka dorëzuar dhe shfrytëzuar dokumente të falsifikuara dhe të paautorizuara. Sipas pretendimeve të Prokurorisë, në dosjen e paraqitur ndodheshin një CV, një kontratë pune dhe një certifikatë universitare që i përkisnin një personi tjetër dhe ishin përdorur pa dijeninë e pa lejen e tij.

Organi i akuzës pretendon se dokumentacioni në fjalë është përdorur për të ndikuar në vendimmarrjen e autoritetit kontraktues dhe për ta fituar kontratën.

R.K. dyshohet gjithashtu se ka hartuar një kontratë pune të falsifikuar, me synimin që ajo të paraqitej si dokument origjinal në procedurën e prokurimit publik.

Në aktakuzë është përfshirë edhe personi juridik, për të cilin dyshohet se, gjatë pjesëmarrjes në procedurën e prokurimit, ka paraqitur dhe përdorur dokumentacion të rremë e të paautorizuar. Sipas Prokurorisë, synimi ishte ndikimi në vendimin e autoritetit kontraktues dhe sigurimi i kontratës.

Prokuroria vlerëson se ekziston dyshim i bazuar mirë që R.K. ka kryer veprat penale “Keqpërdorimi dhe mashtrimi në prokurim publik” dhe “Falsifikimi i dokumentit”. Ndërkaq, personi juridik dyshohet për veprën penale “Keqpërdorimi dhe mashtrimi në prokurim publik”.

Prokurorja e rastit i ka kërkuar gjykatës që të pandehurit t’i shpallë fajtorë dhe t’i dënojë në përputhje me ligjin për veprat penale që u ngarkohen.

Deri në vërtetimin e fajësisë me një vendim gjyqësor të formës së prerë, të pandehurit konsiderohen të pafajshëm.

The post Pejë, ngrihet aktakuzë për mashtrim në prokurim publik dhe falsifikim dokumentesh appeared first on Albeu.com.

Departamenti për Krime të Rënda i Prokurorisë Themelore në Pejë ka bërë të ditur se ka ngritur aktakuzë ndaj të pandehurit R.K. dhe një personi juridik. Ata dyshohen për veprën penale “Keqpërdorimi dhe mashtrimi në prokurim publik”, ndërsa R.K. ngarkohet edhe me veprën “Falsifikimi i dokumentit”.

Sipas aktakuzës, R.K., si pronar dhe përfaqësues i autorizuar i një operatori ekonomik, dyshohet se ka dorëzuar dhe përdorur dokumente të rreme dhe të paautorizuara gjatë një procedure të prokurimit publik. Procedura ishte zhvilluar nga Spitali i Përgjithshëm në Pejë dhe kishte të bënte me furnizimin me libra të protokollit.

Prokuroria njoftoi se dokumentacioni i dorëzuar dyshohet se përmbante një CV, një kontratë pune dhe një certifikatë universitare të lëshuara në emër të një personi tjetër. Këto dokumente pretendohet se janë përdorur pa dijeninë dhe miratimin e personit përkatës, me synimin për të ndikuar te vendimi i autoritetit kontraktues dhe për të siguruar kontratën.

R.K. dyshohet gjithashtu se ka hartuar një dokument të falsifikuar, konkretisht një kontratë pune, në mënyrë që ajo të përdorej si dokument origjinal brenda procedurës së prokurimit publik.

Edhe personi juridik dyshohet se, gjatë pjesëmarrjes në këtë procedurë prokurimi, ka paraqitur dhe shfrytëzuar dokumentacion të rremë e të paautorizuar, me qëllim ndikimin në vendimmarrjen e autoritetit kontraktues dhe fitimin e kontratës.

Në bazë të këtyre veprimeve, aktakuza pretendon se ekziston dyshim i bazuar mirë që R.K. ka kryer veprat penale “Keqpërdorimi dhe mashtrimi në prokurim publik” dhe “Falsifikimi i dokumentit”. Ndërkohë, personi juridik akuzohet për veprën penale “Keqpërdorimi dhe mashtrimi në prokurim publik”.

Me paraqitjen e aktakuzës, prokurorja e çështjes i ka kërkuar gjykatës që të pandehurit të shpallen fajtorë dhe të marrin dënimin e parashikuar me ligj për veprat penale që u ngarkohen.

The post Aktakuzë ndaj R.K. dhe një personi juridik për keqpërdorim në prokurim, mashtrim dhe falsifikim dokumenti appeared first on Albeu.com.

Në Hagë është mbyllur faza e deklaratave përfundimtare në çështjen ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të cilët akuzohen për vepra penale kundër administrimit të drejtësisë në Dhomat e Specializuara të Kosovës.

Të gjitha ekipet mbrojtëse kërkuan pafajësi, duke argumentuar se Prokuroria nuk ka paraqitur prova që i lidhin klientët e tyre me veprat për të cilat akuzohen.

David Young, avokati i Fadil Fazliut, deklaroi se gjithë aktakuza ndaj klientit të tij është ndërtuar mbi dy takime me Remzi Mustafën, të zhvilluara në lokalin “Route 66” në fund të qershorit dhe në fillim të korrikut.

Young tha se Prokuroria nuk ka dëshmuar se çfarë është diskutuar gjatë këtyre takimeve. Sipas tij, në gjykatë nuk është thirrur Remzi Mustafa, i cili ishte njëra nga palët e takimit, ndërsa nuk janë marrë në pyetje as pjesëtarë të stafit apo klientë të lokalit “Route 66”.

“Në lidhje me këtë, prokuroria nuk ka asnjë provë se çfarë ka ndodhur konkretisht. Prokuroria nuk e ka thirrur as zotin Remzi Mustafa që ka qenë një prej palëve në këtë takim. Nuk ka thirrur asnjë nga personeli i Route 66, asnjë klient nga lokali Route 66. Pra ne nuk e dimë cila ka qenë përmbajtja e takimeve.

E vetmja provë që kemi në duar në gjykatë është lidhur me atë që mund të jetë diskutuar, ka të bëjë me zotin Fazliu vetë, kur i është shpjeguar zotit Thaçi se kishte bërë një takim apo që do të shkonte në një takim në Route 66. Kjo është arsyeja që s’kishin bërë ndonjë me këtë çështje”, tha Young.

Mbrojtja e Hajredin Kuçit argumentoi se akuza ndaj tij mbështetet vetëm në “tetë fjalë të thjeshta”, të drejtuara një miku të vjetër prej 30 vjetësh.

“Tetë fjalë të barabarta, tetë fjalë të thjeshta drejtuar një shoku që kish… të një miku prej 30 vjetësh, nuk përmbajnë asnjë referencë lidhur me këtë çështje, një bisedë pas së cilës nuk ndodhi asgjë. Asnjë dëshmitar nuk u kontaktua, asnjë dëshmitar nuk u ndikua, asnjë provë nuk u tjetërsua, asnjë procedurë nuk u vonua, asnjë dëm nuk u shkaktua. Një burrë i moshës 55 vjeç pa të kaluar penale, i padënuar më parë, i cili e ka kaluar gjithë jetën e tij profesionalisht duke ndërtuar një lartësi ligjore”, deklaroi avokati Alexander Admiral.

Ndërkaq, Joe Holmes, avokati i Isni Kilajt, përsëriti se Prokuroria nuk ka arritur të provojë ndonjë veprim të klientit të tij. Ai e cilësoi si thelbësore çështjen nëse vepra e pretenduar ka mbetur në fazën e tentativës.

Holmes: Kilaj nuk ndërmori veprim dhe nuk pati as tentativë për veprim

“Por në këtë rast nuk ka pasur asnjë lloj tentative, asgjë. Ka pasur një muaj, një muaj pa aktivitet fare, që me sa ne zbuluam më vonë prokuroria ka filluar të shpikë terminologji të re sa i takon fazës së zbatimit të veprës penale. Sa i takon rrezikut të veprës penale, sipas tyre, problemi është se zoti Kilaj ka qenë pjesë e një grupi, por ky është një kriter që nuk mund të përmbushet sepse asnjë nga dëshmitarët që pretendojnë ata nuk është kontaktuar, as nuk është tentuar të kontaktohen këta dëshmitarë që pretendon prokuroria.

Me mbylljen e procesit dhe përfundimit të deklaratave përfundimtare, vendimi tashmë i takon gjykatësit Christopher Gosnell.

The post Mbrojtjet në Hagë: Aktakuza ndaj Fazliut lidhet me dy takime, ndërsa ajo ndaj Kuçit me tetë fjalë appeared first on Albeu.com.

Prokuroria Themelore e Pejës ka ngritur aktakuzë ndaj Valmir Hajrullahut dhe Avdyl Kryeziut, të dyshuar për mashtrim të një zyrtari policor, të cilit dyshohet se për dy vjet i kanë marrë më shumë se 134 mijë euro me pretekstin se do t’i mundësonin transplantimin e një veshke në një spital në Turqi. Në këtë skemë dyshohet të ketë qenë i përfshirë edhe shtetasi turk Yilmaz Tassoker, për të cilin procedura është veçuar. RTK kishte raportuar edhe më parë për rastin.

Hajrullahu, nga Banulla e Lipjanit, dhe Kryeziu, nga Malisheva, do të përballen me akuzat për veprën penale të mashtrimit. Ndërkohë, rasti ndaj shtetasit turk Yilmaz Tassoker po trajtohet veçmas.

Aktakuza, të cilën e ka siguruar RTK, përcakton se Hajrullahu dhe Kryeziu, gjatë periudhës 2021-2023, dyshohet se kanë vepruar kundër zyrtarit policor A.B., duke e bindur atë për një mundësi të rreme trajtimi.

“Me paraqitje të rreme të fakteve dhe me synim përfitimin e kundërligjshëm pasuror, në mënyrë të vazhdueshme e mashtron dhe e mban në lajthim të dëmtuarin A.B., duke i shkaktuar dëm material pasurisë së tij në shumën prej 134.761,00 euro”, thuhet në aktakuzën e siguruar nga RTK.

Sipas organit të akuzës, Hajrullahu është prezantuar para viktimës si mjek në specializim në spitalin “Acibadem” të Turqisë. Ai dyshohet se i ka premtuar zyrtarit policor se do të kontaktonte një doktor për realizimin e transplantimit, ndërsa Yilmaz Tassoker është paraqitur si personi që do të dhuronte veshkën.

Zëdhënësi i Prokurorisë së Pejës, Shkodran Nikçi, ka bërë të ditur përmes emailit se prokurori i rastit, në momentin e ngritjes së aktakuzës, i ka propozuar gjykatës që të pandehurit të shpallen fajtorë dhe të dënohen në përputhje me ligjin për veprat penale me të cilat ngarkohen.

Valmir Hajrullahu është person i njohur për organet e rendit dhe drejtësisë. Gjykata Themelore në Ferizaj së fundmi e ka dënuar me dy vjet burgim dhe me 2 mijë euro gjobë për një rast tjetër mashtrimi.

Për të njëjtin person po shqyrtohet edhe një aktakuzë në Departamentin për Krime të Rënda. Në atë rast, ai akuzohet se, përmes organizatës joqeveritare Qendra për Avokim dhe Diplomaci (QAD), ka mashtruar bujq, ndërsa dëmi i pretenduar ndaj fermerëve llogaritet në miliona euro.

The post Dy persona akuzohen për mashtrimin e një zyrtari policor me premtimin për transplant veshke appeared first on Albeu.com.

Prokuroria Speciale e Republikës së Kosovës ka bërë të ditur se gjatë ditës së sotme do të organizojë një konferencë për media.

Konferenca lidhet me dorëzimin e një aktakuze për krimet e luftës të kryera në lagjen e Jasharëve, në Prekaz të Skenderajt.

Në këtë paraqitje para mediave pritet të publikohen hollësi rreth aktakuzës së dorëzuar për krimet e luftës në Prekaz, sipas njoftimit të Prokurorisë Speciale.

Në njoftimin paraprak, institucioni nuk ka bërë publike informacione të tjera për personat që përfshihen në aktakuzë.

The post Sot dorëzohet aktakuza për krimet e luftës në lagjen e Jasharëve në Prekaz appeared first on Albeu.com.

Gjatë 24 orëve të fundit, prokuroritë themelore kanë ngritur 35 aktakuza kundër 37 personave, ka bërë të ditur Prokurori i Shtetit.

Personat ndaj të cilëve janë ngritur aktakuzat dyshohen për kryerjen e veprave të ndryshme penale.

Në raportin 24-orësh bëhet e ditur gjithashtu se, me urdhër të Prokurorit të Shtetit, janë ndaluar 19 persona nën dyshimin se kanë kryer vepra penale.

Po ashtu, sipas raportit, janë paraqitur tri kërkesa për caktimin e masës së paraburgimit ndaj tre personave të dyshuar për vepra të ndryshme penale.

The post Brenda 24 orëve, ndalohen 19 persona dhe ngrihen 35 aktakuza appeared first on Albeu.com.

Prokuroria Themelore në Mitrovicë, përmes Departamentit të Krimeve të Rënda, ka ngritur aktakuzë ndaj dy mjekëve të Spitalit të Vushtrrisë, të cilët dyshohen për “Marrje të ryshfetit”. Për të njëjtin rast, nëntë persona të tjerë janë përfshirë në aktakuzë nën dyshimet për “Dhënie të ryshfetit”.

Sipas pretendimeve të Prokurorisë, mjekët Ekrem Sefiu dhe Valdet Rexhepi, në cilësinë e personave zyrtarë, kanë kërkuar dhe marrë drejtpërdrejt para për ofrimin e shërbimeve shëndetësore.

Aktakuza bën të ditur se Valdet Rexhepi dyshohet se ka kërkuar dhe pranuar para në gjashtë raste, ndërsa Ekrem Sefiu në tri raste. Pagesat, sipas organit të akuzës, lidhen me trajtimin dhe operimin e pacientëve, në përputhje me detyrat e tyre zyrtare.

Ndaj nëntë të pandehurve, F.V., B.Q., F.Xh., B.G., B.A., K.H., S.N., V.Y. dhe L.K., rëndon dyshimi se u kanë premtuar, ofruar ose dhënë mjekëve shuma të ndryshme parash, drejtpërdrejt ose përmes personave të tjerë dhe në interes të tyre apo të të afërmve.

Shumat e përmendura në aktakuzë variojnë nga 50 deri në 300 euro. Prokuroria dyshon se këto pagesa janë bërë si shpërblim për kryerjen e operacioneve ndaj familjarëve të personave të akuzuar.

Pas ngritjes së aktakuzës, Prokuroria Themelore në Mitrovicë i ka kërkuar gjykatës që t’i shpallë fajtorë të pandehurit për veprat penale që u atribuohen dhe t’i dënojë në përputhje me ligjin.

The post Dy mjekë të Spitalit të Vushtrrisë akuzohen për marrje ryshfeti appeared first on Albeu.com.