Aktivistët e platformës “Liria ka Emër” do të organizojnë sot, në orën 11:00, një veprimtari simbolike dhe demokratike përpara ndërtesës së EULEX-it në Prishtinë, ku është e vendosur edhe Zyra e Dhomave të Specializuara të Kosovës.

Organizatorët bëjnë të ditur se në hyrje të objektit do të shpaloset një mesazh.

Pas këtij veprimi, parashihet të mbahet edhe një fjalim.

Sipas njoftimit, aktiviteti do të zgjasë afërsisht 30 minuta.

The post Platforma “Liria ka Emër” zhvillon sot një aksion 30-minutësh para EULEX-it appeared first on Albeu.com.

Gjatë kontrolleve, janë verifikuar dhjetëra automjete luksoze përmes një aparature të posaçme, e cila mundëson kontrollin e të dhënave identifikuese të mjeteve.

Pas verifikimit në sistem, Policia thotë se ka kryer kontrolle të mëtejshme për pronësinë, origjinën dhe historikun e automjeteve, përfshirë mënyrën e blerjes, shitjes dhe posedimit të tyre.

Njoftimi:

Tiranë/ Kontrolle të përqendruara ndaj automjeteve luksoze, në fokus verifikimi i origjinës dhe burimit të pasurisë.

Strukturat e Policisë së Tiranës kanë intensifikuar kontrollet ndaj automjeteve luksoze, me qëllim evidentimin dhe verifikimin e mjeteve që dyshohet se mund të jenë përfituar nga veprimtaria kriminale, si dhe parandalimin e trafikimit të tyre.

Në kuadër të këtyre kontrolleve, strukturat për Hetimin e Krimeve Ekonomike dhe Financiare, në bashkëpunim me Forcën e Posaçme “Operacionale”, Forcën e Posaçme “Shqiponja” dhe Policinë Rrugore, kanë kontrolluar dhjetëra automjete luksoze në kryeqytet.

Kontrollet janë kryer nëpërmjet një aparature të posaçme, e cila mundëson kontrollin dhe verifikimin e të dhënave identifikuese të automjetit. Pas verifikimit në sistem, për automjetet e evidentuara janë kryer kontrolle të mëtejshme lidhur me pronësinë, origjinën dhe historikun e blerjes, shitjes dhe posedimit të tyre.

Gjithashtu, janë kryer verifikime mbi burimin e të ardhurave me të cilat janë blerë automjetet, me qëllim evidentimin e rasteve kur pasuria mund të jetë përfituar nga veprimtaria kriminale, si dhe identifikimin e mjeteve që mund të jenë objekt i trafikimit të paligjshëm.

Në përfundim të verifikimeve, materialet procedurale janë referuar pranë Prokurorisë, për vijimin e hetimeve dhe kryerjen e veprimeve të mëtejshme procedurale.

Policia e Tiranës do të vijojë kontrollet e përbashkëta dhe verifikimet ndaj automjeteve luksoze, në funksion të evidentimit dhe goditjes së pasurive me origjinë kriminale, parandalimit të trafikimit të tyre dhe luftës kundër pastrimit të produkteve që rrjedhin nga veprimtaria kriminale.

The post Aksion ndaj makinave luksoze në Tiranë, policia verifikon origjinën dhe burimin e pasurisë appeared first on Albeu.com.

Partia Demokratike e Kosovës dhe Aleanca kanë zhvilluar edhe sot aksionin e tyre para objektit të Qeverisë së Kosovës, duke penguar hyrjen në ndërtesë, raporton KosovaPress.

Aksioni, që po vijon prej katër javësh, u shoqërua me pjesëmarrjen e asamblistit të PDK-së në Prishtinë, Yll Muriqi, dhe aktivistëve të kësaj partie. Muriqi deklaroi se Kosova ndodhet në paralizë institucionale dhe kërkoi nga kryeministri në detyrë, Albin Kurti, të mundësojë konstituimin e Kuvendit dhe krijimin e institucioneve.

Sipas tij, vështirësitë e qytetarëve po shtohen ndërsa institucionet vazhdojnë të mbeten të bllokuara. Ai akuzoi Kurtin se nuk po arrin të qeverisë dhe se vendi po mbahet peng nga veprimet e tij.

Deputeti i PDK-së, Artan Behrami, tha se qëllimi i aksionit është t’u bëhet e qartë qytetarëve se Qeveria po e mban Kosovën në krizë. Ai e përshkroi situatën si një krizë të thellë kushtetuese, politike, ekonomike dhe në raport me aleatët.

Behrami ngriti pikëpyetje edhe për përdorimin e buxhetit prej 4 miliardë eurosh, duke theksuar se jemi në shtator dhe se, sipas tij, nuk është realizuar asnjë projekt në shëndetësi, infrastrukturë apo arsim. Ai kërkoi rikthimin në Kuvend, konstituimin e institucioneve të Republikës së Kosovës dhe adresimin e sfidave të brendshme e të jashtme.

Edhe deputetja e Aleancës, Time Kadrijaj, e cilësoi gjendjen si bllokadë totale. Ajo përmendi vështirësitë me sigurimin e librave shkollorë, problemet që, sipas saj, janë shkaktuar nga Ministria e Arsimit dhe faktin se procesi mësimor ka nisur me mungesa në shkolla.

Kadrijaj foli gjithashtu për mungesën e barnave në onkologji dhe sektorë të tjerë, çka i detyron pacientët t’i blejnë vetë medikamentet me kosto të lartë. Ajo shtoi se prej vitesh Ministria e Shëndetësisë nuk ka hapur konkurs për pranimin e specializantëve, të cilët synojnë avancimin në fushat përkatëse.

Sipas deputetes së Aleancës, përgjegjësia për këtë situatë i takon kryeministrit në detyrë, Albin Kurti. Ajo tha se aksioni synon zhbllokimin e gjendjes, të cilën e cilësoi si të shkaktuar qëllimisht nga Kurti.

Deputetët e PDK-së dhe Aleancës po e zhvillojnë këtë aksion prej katër javësh, me kërkesën për konstituimin e Kuvendit dhe formimin e institucioneve të Kosovës.

The post PDK dhe AAK bllokojnë sërish hyrjen e Qeverisë: Institucionet e Kosovës mbeten të paralizuara appeared first on Albeu.com.

Drejtori i Përgjithshëm i Policisë së Kosovës, Gazmend Hoxha, njoftoi se në komunën e Zubin-Potokut janë zhvilluar disa operacione për identifikimin dhe sekuestrimin e armëve ilegale. Aksioni është ndërmarrë në bashkëpunim me Prokurorinë Themelore në Mitrovicë, Agjencinë Kosovare për Inteligjencë dhe Drejtorinë për Hetimin e Krimeve të Luftës.

Sipas Hoxhës, kontrollet u kryen nga 6 deri më 17 gusht, pas informatave të siguruara përmes burimeve të ndryshme operative dhe në bashkëpunim me qytetarët.

Gjatë kësaj periudhe, autoritetet kontrolluan gjithsej 48 lokacione, ku zbuluan sasi të konsiderueshme armësh, municionesh dhe mjetesh të tjera të kundërligjshme. Hoxha tha se armët e zjarrit dhe eksplozivët mbeten një kërcënim i madh për sigurinë e qytetarëve, ndërsa operacionet u realizuan me synim parandalimin e posedimit të tyre të paligjshëm.

Si rezultat i kontrolleve, u gjetën 72 armë: dy mitralozë, 11 armë të gjata AK-47, 22 armë të gjata të llojeve të ndryshme, 27 pushkë gjuetie, nëntë armë të shkurtra dhe një pushkë ajrore.

Po ashtu, ekipet zbuluan shtatë mjete shpërthyese, shtatë granata dore, pjesë plastike të paketimit të granatave, pjesë metalike të mjeteve shpërthyese dhe 4 mijë e 831 copë municion të kalibrave të ndryshëm.

Hoxha bëri të ditur se në operacione u sekuestruan edhe pjesë të shumta armësh, karikatorë, optikë për armë, kaseta armatimi dhe magazina. Në mesin e pajisjeve të konfiskuara kishte gjithashtu thika, maska gazi, dylbi, radiolidhje, mbushër për radio, sëpata dhe mjete të tjera luftarake.

Ndër materialet e gjetura u përfshinë edhe një numër i madh uniformash, çantash ushtarake të ushtrisë serbe dhe të policisë serbe, si dhe pajisje të tjera të lidhura me qëllime ushtarake.

Gjatë bastisjeve, autoritetet sekuestruan dokumentacione, kartela të veteranëve të luftës, leje për armë të shkurtra, leje për armë të UNMIK-ut dhe leje të tjera të skaduara.

Përveç tyre, u sekuestruan edhe 6 mijë e 100 euro dhe 5 mijë franga zvicerane, deklaroi drejtori i Përgjithshëm i Policisë së Kosovës.

The post Hoxha jep detaje për operacionet kundër armëve ilegale në Zubin-Potok appeared first on Albeu.com.

Policia e Kosovës do të bëjë publike sot të dhëna lidhur me një operacion të gjerë të kryer në disa lokacione në veri të Mitrovicës. Gjatë këtij aksioni janë zbuluar dhe konfiskuar një sasi e konsiderueshme armatimi, municioni, uniformash, si dhe dëshmi të tjera relevante.

Për informimin e opinionit lidhur me rastin, është njoftuar një konferencë e jashtëzakonshme për media. Ajo do të zhvillohet më 20 gusht, duke filluar nga ora 16:00, në Qendrën e Njësive Speciale “Enver Zymeri” në Mitrovicë.

Sipas njoftimit të Policisë së Kosovës, më 20.08.2026, në ora 16:00, do të paraqiten detajet e operacioneve të zhvilluara në disa pjesë të Mitrovicës së Veriut, ku janë gjetur dhe konfiskuar armatim, municion, uniforma dhe dëshmi të tjera relevante. Materialet e sekuestruara do të ekspozohen para mediave.

Gjatë konferencës pritet të jepen gjithashtu informacione për veprimet policore që lidhen me rastin e Krimeve të Luftës ndaj Popullatës Civile në Kosovë. Hetimet për këtë rast janë duke u zhvilluar në disa lokacione të dyshuara në Zubin Potok.

Në konferencë do të marrin pjesë ministri i MPB-së, z. Sveçla, dhe drejtori i Përgjithshëm i PK-së, kolonel Hoxha, thuhet në njoftim.

The post Operacion policor në veri të Mitrovicës, sot mbahet konferencë për armët dhe hetimet në Zubin Potok appeared first on Albeu.com.

Përfaqësuesit e Partisë Demokratike të Kosovës janë rreshtuar sërish sot përpara selisë së Qeverisë, duke vijuar me aksionin e tyre të nisur në ditët paraprake. Kësaj nisme i janë bashkuar edhe ligjvënës nga Aleanca, si dhe anëtarë të Kuvendit Komunal të PDK-së bashkë me drejtues nga Komuna e Vushtrrisë.

Protesta po mbahet pikërisht te hyrja e godinës qeveritare, ku deputetët po e thërrasin kryeministrin në detyrë, Albin Kurti, që të paraqitet në Kuvend dhe të mundësojë vijimin e procesit të konstituimit.

Prej disa ditësh, PDK-ja ka mbajtur qëndrim para objektit të Qeverisë duke shprehur kundërshtimin ndaj vazhdimësisë së mandatit të Kurtit dhe duke insistuar për kthimin e funksionalitetit të institucioneve.

Angazhimi i sotëm zhvillohet në një moment kur PDK-ja i është drejtuar kryesuesit Avni Dehari me kërkesën për të thirrur sërish seancën konstituive të Kuvendit, duke propozuar që ajo të organizohet pikërisht sot, në orën 11:00.

The post PDK-ja rikthehet para ndërtesës së Qeverisë, në protestë i bashkohen edhe përfaqësues të Aleancës appeared first on Albeu.com.

Rinia Demokratike e Kosovës organizoi sot një aksion simbolik pranë hyrjes së Kuvendit të Kosovës, përmes të cilit kërkoi konstituimin e legjislativit dhe vënien në funksion të institucioneve, raporton KosovaPress.

Në kuadër të këtij aktiviteti, përfaqësuesja e RDK-së, Arbnora Salihu, bëri të ditur se te dyert e Kuvendit ishin vendosur simbolikisht tri shkallë. Ajo shpjegoi se ato përfaqësonin Kushtetutën, vendimin e Gjykatës Kushtetuese dhe Rregulloren e Kuvendit.

“Përmes vendosjes së tri shkallëve kryesore kemi synuar të paraqesim tri çështje: çfarë përcakton Kushtetuta, çfarë ka thënë Gjykata Kushtetuese në vitin 2025 dhe çfarë parashikon Rregullorja e Kuvendit”, deklaroi Salihu.

Ajo tha se nuk është i nevojshëm hartimi i rregullave të reja, pasi afatet për përfundimin e procesit të konstituimit të Kuvendit, sipas saj, janë të përcaktuara në mënyrë të qartë.

“Numrat i keni, thirreni seancën dhe konstituojeni Kuvendin”, u shpreh përfaqësuesja e RDK-së.

Salihu drejtoi kritika edhe ndaj Lëvizjes Vetëvendosje dhe Albin Kurtit, të cilët i akuzoi se po e shkelin Kushtetutën dhe po pengojnë funksionimin e institucioneve.

“Mbi Kushtetutën nuk mund të qëndrojë asnjë parti, deputet apo shumicë. Të rinjtë në Kosovë nuk mund të pajtohen me shkelje të tilla, të cilat fillimisht shndërrohen në praktikë dhe më pas paraqiten si diçka normale”, deklaroi ajo.

RDK-ja thekson se Kushtetuta cakton një afat prej 30 ditësh për konstituimin e Kuvendit, duke nisur nga dita kur rezultatet e zgjedhjeve shpallen zyrtarisht. Ndërkaq, sipas Rregullores së Kuvendit, ndërprerja e seancës konstitutive nuk lejohet të zgjasë më shumë se 48 orë.

The post Rinia Demokratike me aksion simbolik para Kuvendit: Kushtetuta qëndron mbi çdo parti appeared first on Albeu.com.

Donika Kadaj-Bujupi, ish-deputete dhe ish-këshilltare e ish-presidentes Vjosa Osmani, ka vlerësuar se organizimi i sotëm në Kuvend nuk mund të konsiderohet aksion politik. Sipas saj, kundërshtimi parlamentar duhet të mbështetet në kauza të mëdha dhe jo të shndërrohet në përplasje fizike.

Ajo ka shpjeguar se në parlamentet e shteteve demokratike ndërmerren aksione kur opozita kundërshton vendime që prekin territorin, kufijtë, rendin kushtetues ose jetën dhe mirëqenien e qytetarëve. Për çështje të tjera, sipas Kadaj-Bujupit, deputetët kanë në dispozicion forma të tjera veprimi dhe komunikimi.

Duke iu referuar protestave të opozitës në Kuvend në vitet 2015 dhe 2016, ish-deputetja ka thënë se veprimet e asaj kohe erdhën si reagim ndaj një sërë vendimesh që cenonin integritetin e shtetit dhe rendin kushtetues.

Kadaj-Bujupi ka kujtuar se për ato aksione pjesëmarrësit ishin arrestuar dhe kishin vuajtur disa herë dënime me burg. Më pas, ndaj tyre kishin nisur procese gjyqësore që vazhdojnë ende, ndërsa, si pasojë, disa prej tyre nuk kanë mundur të kandidojnë në listat zgjedhore.

Ajo ka nënvizuar se, megjithëse ajo periudhë u karakterizua nga tensione, asnjë prej protestuesve parlamentarë nuk kishte prekur, shtyrë apo sulmuar fizikisht ndonjë deputet të pushtetit të atëhershëm.

Sipas saj, gazi ishte përdorur për të penguar zhvillimin e votimit në sallë, pasi objektiv i aksionit kishte qenë vota dhe jo individi. Kadaj-Bujupi ka shtuar se kauza e tyre ishte ndjekur edhe përmes rrugës institucionale, duke u dërguar në Gjykatën Kushtetuese, e cila, sipas saj, e kishte cilësuar marrëveshjen antikushtetuese.

Ish-deputetja ka theksuar se kriteret përcaktohen nga ideja, synimi, ndjekja e procedurave institucionale dhe pranimi i përgjegjësisë përpara ligjit. Ajo ka përfunduar se aksioni politik është krejtësisht i kundërt me konfrontimin fizik dhe se ajo që u organizua sot në Kuvend nuk mund të vlerësohet sipas të njëjtit standard.

Gjatë ditës, deputetët e PDK-së dhe Aleancës i kërkuan Lëvizjes Vetëvendosje thirrjen e vazhdimit të seancës konstituive. Në këtë periudhë u regjistruan disa raste shtyrjesh fizike mes deputetëve të partive ish-opozitare dhe atyre të Lëvizjes Vetëvendosje.

The post Kadaj-Bujupi: Ngjarja e sotme në Kuvend nuk përmbush kriteret e një aksioni politik appeared first on Albeu.com.

Ministria e Mjedisit, Planifikimit Hapësinor dhe Infrastrukturës (MMPHI) rikonfirmoi se ruajtja e burimeve ujore përbën një shtyllë strategjike të veprimtarisë së saj, duke sinjalizuar se operacionet për çlirimin e hapësirave ujore të përvetësuara dhe ndërtimeve pa leje do të intensifikohen.

Përmes një komunikate të shpërndarë në rrjetet sociale, ministria bëri me dije se ka filluar shqyrtimin me përparësi të kërkesave që vijnë nga institucionet dhe kompanitë publike për rikthimin e pronave ujore të zaptuara apo të tjetërsuara në mënyrë të kundërligjshme.

Duke e cilësuar mbrojtjen e resurseve ujore si një prioritet kombëtar, MMPHI-ja theksoi se për këtë arsye, pronat ujore janë bërë fokusi kryesor i angazhimit institucional. Ministria njoftoi se po trajton me urgjencë kërkesat për lirimin e të gjitha hapësirave të uzurpuara apo të shpronësuara jashtë kuadrit ligjor.

Ky angazhim, sipas ministrisë, shtrihet në të gjithë territorin e vendit, ku si shembull konkret u përmend ndërhyrja më e freskët në zonën e Liqenit të Ujmanit. Gjatë këtij aksioni, nën asistencën e Inspektoratit të MMPH-së dhe Policisë së Kosovës, u shkatërruan 16 struktura të ngritura ilegalisht në pronat ujore që administrohen nga N.P. “Ibër-Lepenci”. Ministria shtoi se ky veprim është vetëm një prej hapave të një plani më të gjerë, për të cilin të gjithë të përfshirët ishin njoftuar paraprakisht duke respektuar plotësisht procedurat ligjore.

Në vijim të këtij plani strategjik, MMPHI-ja bëri të ditur se vëmendja është përqendruar tani me intensitet të shtuar edhe tek shkeljet e evidentuara pranë dy burimeve thelbësore të ujit të pijshëm për qytetarët: Liqeni i Batllavës dhe ai i Badovcit. Inspektorati i ministrisë ndodhet në një proces të plotë identifikimi të shkeljeve në këto zona dhe, posa ky proces të përfundojë, autoritetet paralajmëruan se do të merren masa të menjëhershme ligjore për t’i kthyer këto ambiente në shërbim të interesit publik.

Ministria ritheksoi se monitorimi nga Inspektorati vijon edhe në zonat e mbrojtura dhe parqet kombëtare, duke përforcuar zotimin për sundimin e ligjit. Në përfundim të komunikimit, MMPHI-ja u shpreh e vendosur për të garantuar mbrojtjen e çdo resursi ujor e natyror të Kosovës përballë çdo forme të uzurpimit apo ndërtimit pa leje, duke u mbështetur në zbatimin e ligjit dhe bashkëpunimin midis institucioneve.

The post Pas shembjes së 16 vilave në Ujman, MMPHI paralajmëron ofensivë të re ndaj uzurpimeve në Batllavë dhe Badovc appeared first on Albeu.com.

Në Gjilan dhe Viti është realizuar sot një operacion i përbashkët inspektues, i koordinuar nga Drejtoria për Hetimin e Krimeve Ekonomike dhe Korrupsionit – Njësia Rajonale në Gjilan, në bashkëpunim me Administratën Tatimore të Kosovës (ATK), Inspektoratin Qendror të Punës (IQP) dhe Inspektoratin Qendror të Ministrisë së Tregtisë (IQMT).

Aksioni, i zhvilluar në koordinim me Prokurorinë Themelore në Gjilan, ka filluar në orën 09:30. Gjatë kontrolleve janë përfshirë gjithsej 35 auto parkingje.

Autoritetet kanë njoftuar se gjatë inspektimeve janë konstatuar shkelje të ndryshme. Për këto raste, institucionet përgjegjëse kanë ndërmarrë veprimet e nevojshme, në pajtim me kompetencat e tyre ligjore.

Në këtë fazë nuk janë bërë publike as lloji i shkeljeve të gjetura dhe as masat konkrete që mund të jenë shqiptuar. Institucionet kanë bërë të ditur se koordinimi ndërinstitucional do të vijojë edhe në aksione të tjera, me synim zbatimin e ligjit, luftimin e ekonomisë joformale dhe sigurimin e konkurrencës së ndershme në treg.

The post Në Gjilan dhe Viti inspektohen 35 auto parkingje në kuadër të një aksioni të përbashkët appeared first on Albeu.com.