Të gjithë personat e akuzuar për tragjedinë e Llaskarcës, ku humbën jetën 16 persona dhe u plagosën 38 të tjerë, tashmë janë jashtë burgut. Qirko Mihajlloski, gjyqtar i procedurës paraprake në Gjykatën e Gostivarit, konfirmoi për Alsat se lirimi erdhi pas vendimit të Gjykatës Supreme, e cila shfuqizoi vendimin e Apelit për rritjen e dënimeve.

Sipas Mihajllovskit, zbatimi i vendimit të shkallës së parë, që parashikon dënime më të ulëta për të akuzuarit, nuk mund të konsiderohet përfundimtar. Për këtë arsye, duhet pritur vendimi i radhës nga Gjykata e Apelit.

Gjithashtu, ndaj të akuzuarve janë hequr të gjitha masat e kujdesit që garantonin praninë e tyre në procedurë. Këto masa kishin përfshirë edhe detyrimin për paraqitje në gjykatë, ndërsa disa prej tyre kishin ofruar garanci se nuk do të largoheshin.

Ndërkohë, Remzi Miftari vazhdon të jetë në arrati. Pas vendimit të Supremes, Gjykata e Gostivarit pritet t’i kërkojë Ministrisë së Punëve të Brendshme anulimin e fletarrestit të brendshëm dhe atij ndërkombëtar. Miftari e kishte shtyrë vuajtjen e dënimit me pretendimin se do t’i nënshtrohej një ndërhyrjeje kirurgjikale për “Hernia”, ose “kilë”, por pas përfundimit të trajtimit nuk u paraqit në burg dhe u arratis.

Për të njëjtën diagnozë, fillimin e vuajtjes së dënimit për gjashtë muaj e kishte shtyrë edhe Durmish Beluli. Ai kishte kryer dy operacione për “Hernia”.

Familjarët e viktimave të Llaskarcës organizuan protestë dhe deklaruan se e kishin parë Belulin duke lëvizur nëpër qytet. “Unë tani duke ardhur këtu. Ja për këtë konferencë për shtyp në ora 11, Durmish Beluli me veturë vozit këtu te Bulevardi “Braqa Xhinovski”. Para ca kohësh, i akuzuari i parë është në dasmë në një kafene”, deklaroi familjari Bllagojçe Trpeski më 15 shtator të vitit 2025.

Ndryshe nga Miftari, Beluli u paraqit në janar për të nisur vuajtjen e dënimit. Megjithatë, pas vendimit të Gjykatës Supreme dhe pas nëntë muajsh qëndrimi në burg, ai është liruar sërish.

Pas lirimit, Beluli publikoi në rrjetet sociale një mesazh ku shprehet se “heshtja nuk është më virtyt”. Ai thekson se vendimet e gjykatave duhet të zbatohen, por drejtësia duhet të jetë e paanshme dhe të mbështetet vetëm te provat, pa ndikim nga presionet politike apo mediatike. “Jam shumë i bindur se asnjë presion nuk mund të mbajë të burgosur pafajësinë dhe lirinë”.

Vendimi i Supremes ka nxitur reagime të shumta, pasi rrëzoi dënimet më të larta të vendosura nga Apeli dhe riktheu në fuqi dënimet e shkallës së parë. Tashmë çështja do të shqyrtohet sërish nga Gjykata e Apelit.

Si pasojë e këtij vendimi, pronarit të kompanisë “Durmo Turs”, Durmish Belulit, i hiqet dënimi prej 10 vjetësh dhe rikthehet masa prej 4 vjetësh burgim. Përgjegjësit të transportit, Remzi Miftarit, i shfuqizohet dënimi 10-vjeçar dhe i rikthehet ai prej 6 vjetësh. Shefi i kontrollit teknik Igor Gjorgjievski dhe kontrollori teknik Goran Dukovski do të kenë dënim 5 vjet burgim, në vend të 7 viteve. Për kontrollorin teknik Jane Babarovski mbetet në fuqi dënimi prej 5 vjetësh, ndërsa shoferi Manoil Trifunovski vazhdon të ketë dënimin më të lartë, prej 14 vjetësh burgim.

Procesi gjyqësor është shoqëruar ndër vite me akuza për zvarritje, në një situatë që lidhet me shprehjen “drejtësi e vonuar, drejtësi e mohuar”. Kanë kaluar plot 7 vite nga ngjarja, ndërsa ende nuk është arritur një përfundim përfundimtar. /Alsat/

The post Lirohen të gjithë të dënuarit për tragjedinë e Llaskarcës, pritet heqja e fletarrestit për Remzi Miftarin appeared first on Albeu.com.

Gjykata Supreme ka shfuqizuar vendimin e Gjykatës së Apelit të Shkupit për aksidentin tragjik të autobusit pranë Llaskarcës dhe e ka kthyer çështjen në rigjykim e vendimmarrje. Vendimi i Apelit kishte sjellë rritjen e dënimeve për disa prej të akuzuarve.

Sipas njoftimit zyrtar, Këshilli Penal i Gjykatës Supreme e shqyrtoi rastin me numër KVP2-86/25 në seancën e zhvilluar më 9 shtator. Lënda, e njohur publikisht si rasti i aksidentit të autobusit pranë fshatit Llaskarcë, do të rigjykohet.

Gjykata Supreme bëri të ditur se ka pranuar kërkesat për rishikim të jashtëzakonshëm të vendimit përfundimtar, të parashtruara nga të dënuarit përmes avokatëve të tyre mbrojtës. Për rrjedhojë, është revokuar vendimi i Gjykatës së Apelit të Shkupit me numër KZ-979/24, i datës 17.04.2025, ndërsa çështja është kthyer për rigjykim dhe vendimmarrje.

Me vendimin e Apelit, të marrë në maj 2025, dënimi për pronarin e kompanisë Durmo Tours, Durmish Beluli, dhe menaxherin e transportit, Remzi Miftari, u rrit nga gjashtë në 10 vite burg. Po ashtu, dënimet e punonjësve të stacionit të kontrollit teknik, Igor Gjorgievski dhe Goran Dukovski, u ndryshuan nga pesë në shtatë vite burg.

Për Jane Bovarovskin dhe shoferin e autobusit, Manoil Trifunovskin, dënimet mbetën përkatësisht pesë dhe 14 vite burg.

Në janar 2024, Gjykata e shkallës së parë i shpalli fajtorë të gjashtë të pandehurit për vepra të rënda penale kundër sigurisë së njerëzve dhe pronës në komunikacion.

Aksidenti ndodhi më 13 shkurt 2019, kur autobusi i kompanisë Durmo Tours doli nga autostrada Shkup-Tetovë, pranë Llaskarcës. Si pasojë e tragjedisë, 16 persona humbën jetën dhe më shumë se 30 të tjerë u plagosën./Telegrafi/

The post Gjykata Supreme anulon vendimin e Apelit për aksidentin në Llaskarcë appeared first on Albeu.com.